TITUS
Svan Prose Texts IV (Lashkh)
Part No. 109
Previous part

Text: 109 
Page of edition: 148 
Line of edition: 24 
CVIX. ლჷშანთე ლითოფ


Line of edition: 25       მუშვან მა̄რას თოფ ჲადურდ სურუ ხალატ ჩი̄ს, სერთხი̄ ათხე̄
Line of edition: 26    დროჲა თოფარ. ვოდ ათხე̄ დროჲა მახე თოფარ დო ანჴადხ, ეჩქად
Line of edition: 27    კაჟიან თოფი̄ლარ ხაღვე̄ნახ ჩი̄ს, მარა აშ ხალტე̄ნახ ალ კაჟიან
Line of edition: 28    ლჷჩჷხმახ თოფი̄ლარ, ერე ალ თოფრე სალტარ ჲერხის ვოქრეშ
Line of edition: 29    ი ჲერხის წყჷლჲან თეთრიშ ხაღვე̄ნახ მჷსყე ი ეჯჲარე ლა̄ზნას,
Line of edition: 30    ლიფერვანის ი ლიცმენის, ქი ხაყე̄ნო̄ლნახ თელდ, ხოჩა ბიდარ
Line of edition: 31    ხადე̄ნახ, ჲერხის -- დეშდვე ბელიშ, ჲერხის -- მანჩვიშ ი ჲერხის --
Line of edition: 32    ნაბდიშ, დო̄სა ლოქ ეთძღირე̄ნდეხ ცხვკარისა ავდრიანობჟი ი დო̄სა
Line of edition: 33    ლოქ ეთგჷნჯენდეხ. თოფარ ხვაჲ რიგიშ ხაღვე̄ნახ, ჲერხის -- სტამბვლა
Page of edition: 149  Line of edition: 1    კუთხვარ, ჲერხის -- ნამცა̄შ ი ამჟი იშგენ. აშ ლჷგონ ხადე̄ნახ ალ
Line of edition: 2    კაჟიან თოფარს, ჲერხის ეში̄, ერე თელდ ლა̄ჲრაკ. ეზარ ლჷგონ
Line of edition: 3    ხადე̄ნა სტამბვლა კუთხს, ხედისი̄ ერე ჯაბ მო̄ ხეგნო̄ლ, მარა ჯაბ
Line of edition: 4    ხედისი̄ ხეგნო̄ლ, ეჯის ლჷგონ მა̄ ხადე̄ნა ეჲზუმ, იმზუმი̄ ჯაბურ თოფს.
Line of edition: 5    ხოჩა მეთხვიარს ერ ხეღვე̄ნო̄ლ ლჷჩჷხმახ თოფ ი ხვაჲ ნადირს ადგარნო̄ლ,
Line of edition: 6    ალე თოფი ტარ ხებჟა̄ნხ ი ეჯ თოფს აქე̄ბი̄ნახ. სასა̄ში სოფელისა
Line of edition: 7    ლჷმარდ ხოჩა მეთხვიარ მა̄რე, ჲეჯა ხა̄ჲშხე̄ნა, ი ეჩა თოფ
Line of edition: 8    ედვოდა̄ნ, ჲეჯა̄ ლჷდგარან, ეჩხე̄ შვანთე, ჰადი̄შთე, ი ეჯ თოფი
Line of edition: 9    ნაფას კუმაშდ, ჴანდ ი ფურდ, ეშხუ კალ ახგოშლეხ, ეჯი მაგ ჴან ი ფურ
Line of edition: 10    ედჴიდხ ჰადი̄შარდ ჲეჯა̄ თოფისა. ალ ამბავ ათხე̄ხი ლას, მარა ათხე̄
Line of edition: 11    დროჲა მახა თოფარე ლიჴდა̄ლდ ლას. ამზუმ ნაფასი ნაჴიდ თოფ
Line of edition: 12    ათხე̄ჲ ჩვარი სოფელ ადი̄შისა გე̄გა̄ნშე̄რმჷყ. ხოჩა თოფი ლიღვე̄ნე
Line of edition: 13    მეზგას მე̄ვარ ხაჟახ ჩი̄ს ი ამღა იდგახ თეს თოფი გუ̄ნღა შვანარ,
Line of edition: 14    ნადირ ლა̄ჲდი̄ სურუ ხვაჲ არი ი ლათხვიარდ მო̄ ხამკახჷ̄ნდეხ, თხუმე
Line of edition: 15    ლალჩად ი დაბარე ლალჩად ხამკახხ თოფარ. ლუფხვისა დეშდვარხენ
Line of edition: 16    ლიხ ლელჩე დაბარ ჩი ლე̄თ, ოდო ულჩად მა̄ ხაყახ დაბარს ჩუ
Line of edition: 17    ლეცვრად ი ამშა დამწა̄რ მაგ ითჲა̄ლხ, ერე თოფარ ითხახ ი
Line of edition: 18    ხუღვე̄ნდეხ ლა̄ჲმედდ მჷწჷხჟი̄ნაშდ. სერთხი̄ ჯვინელ დროჲალჟი, ლი̄ჲმახვ
Line of edition: 19    ერ ხა̄დახ უშხვა̄რისა გვარს ი გვარს, ჲედ სოფელს ი სოფელს,
Line of edition: 20    ეჩქა თოფარულაჲ მაჲ ხე̄ჲმედო̄ლხ?! თხუმე ლაწორჟი ლა̄ჲდი̄შ
Line of edition: 21    თოფურ დეშ იწვრუდახ თხუმს. ჩუ ხადრაჯნახ ამახვს ეჩქად, ლეწვრი
Line of edition: 22    გვეშ ერ ხეჭკჷ̄რო̄ლხ, ი ეჲჟი ლჷმდაგრინხ, ერე მუწვრის, მჷდრაჯის,
Line of edition: 23    დო̄სამა ხაყრე̄ნ, ოდო მუწვრის ლახ ე̄სამა ოხრეკნო̄ლ, ეჩქა ლჷწორ
Line of edition: 24    მა̄მ ი̄რო̄ლ ი ამნარ ჩი̄ნარ თოფ ლას მუშვან მა̄რე̄მი ლერსგვენ მეჴერ
Line of edition: 25    ი ამღა ხადე̄ნა ლჷგონ თოფს ი ხა̄ზ ათხე ლა̄ჲდი̄შ მახა დროჲა
Line of edition: 26    თოფს. ხვაჲ ნავარ ხელკიხ თოფი ბედშვ, ხვაჲ დაგრობ იჩმი̄ნო̄ლ,
Line of edition: 27    მარა თოფი ლჷგონს ეში̄ მა̄დ ეხქი̄ფა̄ნ შვანისა ჩიქე ი ამანღო̄შ მო̄
Line of edition: 28    მიხალ, მაჲ დო ი̄რი. მარა ამანღო ერ ჟეხქი̄ფი თოფი ლჷგონს ი
Line of edition: 29    თოფი მალატს, ალე ქა თერა ეჯღა, ერე ათხად მაგ უთვრად ლასხ
Line of edition: 30    ჩუ მესდე, კლასარ დე̄მე ა̄რდახ ი უთვრა ხალხ ხექდო̄ლხ, ოდო ათხე̄
Line of edition: 31    დროჲჟი ჩჲა̄გ სოფლი-სოფელნ კლასარ ლჷ̄გხ, მაგ ჩვედთორა̄ნხ
Line of edition: 32    ი ჯვინელ დროჲშა̄ლ დე̄მ ილდე̄ვა̄ლხ ლუთრუ ი, მაჲ საკვრელ ლი,
Line of edition: 33    თოფრე ლჷგონსი̄ ჟეხქი̄ფი სერ, მა̄დე̄ჲ ათხე̄ჲ ფარცაგდ ლჷქი̄ფ ხა̄რ.
Line of edition: 34    და̄ს ხოჟიბხ ლათო̄ფა̄ლდ ი ლი̄ჲმახვა̄ლი̄ მა̄მა ლი უშხვა̄რეშ. მაჲ
Line of edition: 35    ღალ ხე̄რიხ ჯვინელ ჩუჩხუტ თოფი̄ლარ, მა̄დე̄ჲ ათხე̄ დროჲა მახე
Line of edition: 36    ვინტოვკე̄ლი̄. ჯვინელ კაჟიან თოფარს ათხე̄ მახე ალმე̄ზიარ ქა̄ჲ დე̄მ
Line of edition: 37    ხასი̄ნჯავიხ, ცუდდ ერ ხაშჩუქვრა, აშამსი̄ დე̄მ ჯე̄ქვნეხ. ეჩქადა დროჲჟი
Page of edition: 150  Line of edition: 1    ლჷმჟებ ლადღარჟი ი ღჷნჲემურჟი ლჷშანს ლჷმჷემინხ ი
Line of edition: 2    თოფრე პატრონუ ხათოფნახ ლჷშანს ი ჲერვა̄ჲ მოშ ხაჴდა, ძღჷდ
Line of edition: 3    ხაჟხჷ̄ნდა ი თოფს ლა̄ჲდი̄ მე̄ვარ აქე̄ბი̄ნახ. ხვაჲდინ ლჷჯმარას
Line of edition: 4    ლჷმგემინხ ლჷშანდ ი ჲერვა̄ჲ ერ ქა ხაჴდა, ლჷჯმარე̄ჲ ეჩა ი̄რო̄ლ. ხვაჲდინ
Line of edition: 5    ნეღეშტს ი ჲედ დაჴჷლს ლჷმგემინხ ლჷშანდ ი ეჯი ქა მჷყერიშ
Line of edition: 6    ი̄რო̄ლ, მაჲ საკვრელ ლი. აშ ლათხვიარისა ი მეწვინდ ლჷშანი ლაყერისა
Line of edition: 7    მუშვან მა̄რას ქა და̄რ მოშ ი დე̄მსგი̄ მა̄რე მოშ ხასრინა ი ათხე
Line of edition: 8    ლა̄ჲდი̄შ მეწვინდ ლათოფისა მუშვან მა̄რას ქა და̄რმოშ ხასრე, იმთეჲ
Line of edition: 9    დო ადინე. ხოჩდახ ფიშირს ლასჷლდათს, ხოჩდახ ფიშირს ლაშჲა̄ლისა
Line of edition: 10    ი მაგ ჟახი̄რიან მეჴედხ ი ჩი̄მიშდ ხოსრახ შვანარს ლათოფისა ი
Line of edition: 11    ლამარგობისა̄ჲ ლა̄ჲდი̄შ, იმე̄ჲ დო ლჷმარდხ ლაკვჲა̄ლვნა
Line of edition: 12    აგის.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.