TITUS
Svan Prose Texts IV (Lashkh)
Part No. 116
Previous part

Text: 116 
Page of edition: 153 
Line of edition: 17 
CVI. ლიბრა̄ლ


Line of edition: 18       ლუფხვისა, ათვიე̄რუჟი ჩინ მაშე̄ნე ხასჲამხ ბობშარს ი ხოშვლარსი,
Line of edition: 19    ნო̄მ ჯალა, მე̄ზი ლიცისა ტანი ლიბრა̄ლ. ლიცი პილჟი იხვრჲელიხ
Line of edition: 20    ფიშირ ეშხუდ, ქა ი̄ღეხ ლერექვს ი სგა ღჷრიხ ლიცთე, ხემქარა̄ლხ
Line of edition: 21    უშხვა̄რ ლიცქა ლი̄ზის მე̄რმა პილთე, მარა ცურავ და̄ს ხოხალ
Line of edition: 22    მუშვანს, ეჯღა ერე მე̄ზი ლიც ღარშა̄ლ ესღრი. ცურავ ჩუ̄ჲ ერ
Line of edition: 23    ხოხა̄ლდეხ, ეში̄ ჭიშხვშ ლი̄ზის იმქარა̄ლხ ლიცქა. ლალა̄რტყელდ ერ
Line of edition: 24    ხეჲა̄ლხ მე̄ზი ლიც, ეჩექა ქა ღჷრიხ, მარა მუჭოდნუნ მეჲა̄ლ ლიცქა
Line of edition: 25    დეშ ღჷრიხ ჲერხი, ჩუ ლიშგვდიდ ხაყლუ̄ნიხ. ლაბრა̄ლდ ითშიხ მე̄ზი
Line of edition: 26    ლიცისა̄ ღურღუცს ი დგნო̄რ აგის, ერე ქა დოშ ადჲას ლიცემ
Line of edition: 27    ჲერვა̄ლე ი დო̄სა ადშგუდას. დგნო̄რ ლიცისა მობრა̄ლ ბობშარ არშვლარს
Line of edition: 28    აბე̄ლეხ, ჟი ხეყვნიხ ჴადშვ ი ხეთვრჲელხ ცურავი ლიმთქვეს,
Line of edition: 29    მარა ცურავს ამნოვშ ეში̄ დეშ ხემთქვიხ, მე̄ვარ ქვე̄რ ლიხ შვანე ლიცარ
Line of edition: 30    ი ამღა ხვაჲ ხანს ლიცისა ლიგნეს მა̄ ხაყა, ლიკჷლპჷნეს ხაბნა̄სვნე
Line of edition: 31    ქვე̄რ ლიც მა̄რას ი ამღა ლი, ერე ჩუ დეშ იჩრავიხ ლიცისა
Page of edition: 154  Line of edition: 1    მორა̄გდ ი ამღა მჷრე̄ს ლი, ერე ცურავ მუშვან მა̄რას და̄ს ახგად ი ჩუ̄ჲ
Line of edition: 2    და̄ს ღალ ხოხალ. სგა̄ვიშარს ჩი̄სშა̄ლ ხოხალხ ცურავ, ლამგემთე ერ
Line of edition: 3    ჴედნიხ შვანთე ი მეგმი ჯორგ ერ ისყი ლიცისა, ეჩქა სგა̄ვი მა̄რე,
Line of edition: 4    ცურავი მუჩომ, სგა ღჷრი ლჷჩრავა ჯორგთე ი ჟი ფუშვდე ჯორგს
Line of edition: 5    ი აჲეს ლიც ლექვა̄ვ ლჷჩრავა მეგმარს. ლამგემთე მჷშაჲდ ჴედნიხ
Line of edition: 6    მეგმარე მჷჲესდ სგა̄ვიშარ ი ხოჩულდ იმარგხ ლიცისა ეჯჲარ, მა̄
Line of edition: 7    ხაყლუ̄ნიხ ლიშგვდიდ, ცურავ ე̄რ ხოხალხ, ეჯღა.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.