TITUS
Svan Prose Texts IV (Lashkh)
Part No. 126
Previous part

Text: 126 
Page of edition: 157 
Line of edition: 24 
CXXVI. ლიბურჯჲელ


Line of edition: 25       ლუნთისა ლიცი ლათვნათე ერ კუნაშს აჲესხ ბობშარ, ეჩქა ხოჩა
Line of edition: 26    ნანენ კუმაშ ლიცე პილჟი, ჟი ლუთვნა̄ლან, ხოჩა გუჟი არიხ ი
Line of edition: 27    ლიკვჩხჲელს იბნეხ აშთქა ფურალჷნქა მოცეტ კუმაშ მაგ ი ჲესი-ჲეს
Line of edition: 28    მინევშ იბნეხ ლიბურჯჲელს ხოჩა ნანენ ჴანარ ი მავრანდალ მე̄რმა
Line of edition: 29    მეზგე̄მი ჴანარცახან. ჴანარე ლიბურჯჲელ მე̄ვარ ხისჲამხ მინე პატრონუს,
Line of edition: 30    ბობშარსგარ მა̄დე̄ჲ, ხოშე̄ლსი̄ ი ხოსგდიხ ხედი̄ ღენ ეხწინახ

Page of edition: 158 
Line of edition: 1       მებურჯჲელ ჴანარ უშხვა̄რ ი ხაჟახხი̄ ა̄დვ, ხოჩა მებურჯჲელ ჴან
Line of edition: 2    ხედი̄შიში̄ ი̄რი, ეჩა პატრონს. მანკვი ლიბღვი̄რჲელს იბნეხ, ჭიშხარშვ
Line of edition: 3    ი მუჭვარშვ ვორს აშთხრიხ მებურჯჲელ ჴანარ, ჲედ მავრანდალ
Line of edition: 4    ი ეჩანღო სგა ხეძგრიხ უშხვა̄რ ი ლიბურჯჲელს იბნეხ. ხედი̄ ახწინა,
Line of edition: 5    ეჯი ქა ხოჩი̄ნქვე მე̄რმა ჴანს, ჟი ლჷმწირას, ი ქა̄კვა̄ნე ლესთექა.
Line of edition: 6    მომწირ ჴან, ჲედ მავრანდ, მახანუდ იბნე ლიბღვი̄რჲელს ი მე̄რმას
Line of edition: 7    ხეთხე̄ლი ქა ლებურჯად. ჲერხი ჴანარ აშ ჴედნიხ კელდღა ხოჩა
Line of edition: 8    ბურჯაჲ, მარა ჲერხი, ამგვარ მაჲ ხოჩა მუჭვარ ხა̄გჷდეხ ი ძღჷდ ტანაშ
Line of edition: 9    ლე̄სეხ, ეში̄ მა ლიხ ხოჩა ბურჯაჲ. ლიბურჯჲელ ხაზნახ ხოშა
Line of edition: 10    ნაღალდ მავრანდალს ი ბურჯაჲდი̄ ხოჩა ლიხ მავრანდალ. ეჩქადა
Line of edition: 11    დროჲჟი უსხვაჲ ჴანარ ხეყე̄დახ ხვა̄ჲ ი ეჯჲარ ჟი იტყვფახ გიმს
Line of edition: 12    ნაკვჩხჲელ ი ნაბურჯჲელ, მარა ათხე̄ დროჲჟი მე̄ვარ ეხქი̄ფა̄ნ უსხვე̄ლე
Line of edition: 13    ლირდვნეს, იქჲა̄ქგარ ე̄მე ხაყახ. ლაბურჯჲელჟი ხვა̄ჲდინ მუჭვს იკვშეხ
Line of edition: 14    მებურჯჲელ ჴანარ ი ეჯი მე̄ვარ ხასდიკხ მინე პატრონუს, მუჭვმეკვშე
Line of edition: 15    ჴანს ლჷგონ ხა̄რ ლჷქი̄ფ ი ამღა ხასდიკხ ჴანარე მუჭვი ლიკვეშ.
Line of edition: 16    ლახვს ერ ხაყახ ლალხუნად ლუფხვისა ჴანარე ჯოჷ, ეჩქა
Line of edition: 17    ლა̄ჲდი̄ მე̄ვარ იბურჯჲელხ ი თე ხო̄ზხ, ერე მუჭვ მო̄დ ედკუშიხ
Line of edition: 18    ჴანარდ. ხოჩა მებურჯჲელს ი ხოჩა კოჩაჲ ლუმუჭვ ჴანარს ნადირ დეშსა
Line of edition: 19    ხობდავი ქა ლიშგებს. ლაქა̄ლუშ ლახ ე̄სა ლეხქა̄ლი ნადირ, ოდო
Line of edition: 20    აშ ყადავათდ დეშ ხოშგბენი ი დეშ ხობდავი ხოჩა ბურჯაჲ ჴანს.
Line of edition: 21    ფურალს მა̄მ ხაზნახ ლიბურჯჲელ. ჲესი-ჲეს ხოხრა ბობშარი̄ ჴანარშა̄ლ
Line of edition: 22    ხებურჯჲელხ უშხვა̄რ, ბარჯა̄ლშვ ხება̄ჯგიხ უშხვა̄რ ჲერუ
Line of edition: 23    ბობშ ი ხედი̄ ღოშდ აქხე მე̄რმას, ეჯი ი̄რი მომწირ ი ლუმურჯე
Line of edition: 24    ლაჲდი̄შ. ლაბურჯჲელჟი ბობშარ ლაბუ̄ლუშ ლჷ̄გხ ი ეჯჟი ხებურჯჲელხ
Line of edition: 25    უშხვა̄რ ბარჯა̄ლშვ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.