TITUS
Svan Prose Texts IV (Lashkh)
Part No. 127
Previous part

Text: 127 
Page of edition: 158 
Line of edition: 26 
CXXVII. ცხულა̄-ჴემეტ


Line of edition: 27       ლუცხუ̄ტე ტყელ კვედელს თხუმვარმჷყ ხა̄ბ ბჷგი თეკუ̄ლი̄ლ,
Line of edition: 28    ეჯკალიბ ერე ლაცხუ̄ტაჟი ჩუ დო̄სა აქვეცეს. ალ კვედელს შიდ
Line of edition: 29    იყდა̄ნიხ ეშხუ ში̄სა ი მე̄რმა შივშ ცხუს ხადე̄სხ ი ლჷშახს ხეფშვდანხ.
Line of edition: 30    ჲერხი მე̄ვარ მეწვინდ ხაფშვდე ცხუს ჩუ ლჷგა ლჷშანს, მარა ჲერხი
Line of edition: 31    ქა ხაქდენიხ. ჲერხი ეჲჟი ლჷმთქვე ხა̄რ მეწვინდ ლიფშვდანს ცხუვშ,
Line of edition: 32    ერე ჲესი-ჲეს ნეპრალს ადგარიხ ამნოვშ. ჯვინელ დროჲჟი თოფრე
Line of edition: 33    მჷქაფ ჴემეტ ხაღვე̄ნახ, თოფარ დე̄სა ლჷმარდ ეჩქად ი ლითხვიარსი̄
Line of edition: 34    ამნოვშ ლჷმჩომინხ. ათხე̄ჲ ჩვარიხ კა̄ლს ლაგურკაჟი ი უშგულს
Page of edition: 159  Line of edition: 1    ლამრია̄ საყდარჟი ამკალიბ ჴემტარ, მარა ჲერხი ხოჩა თვეთვნა ჯიჯვიშ
Line of edition: 2    ლიხ ი ჲერხი თეთრშვ ჩუ ლჷშკა̄დ ლიხ. ცხუვარი̄ ხვაჲ არიხ ალ
Line of edition: 3    საყდარჟი ჯვინელ დროჲჟი̄ნაშ ი ცხუვარს ჯო̄დი მუჯვრაშა̄ლ ბერჟალ
Line of edition: 4    ხაგფახ -- თხუმთე სკჷრი შუბშა̄ლ. ეჩქადა დროჲჟი ლათხვიარდ
Line of edition: 5    ი ლაშჲა̄ლდი̄ ალ ჴემტარ ი ბერჟი ცხუვარ ხაღვე̄ნახ ჩი̄ს, მარა ათხე
Line of edition: 6    ბობშარსგარ ხუღვახ თხუმე ლაშდბჷნად, ლჷშანთე ლაფე̄შვდანა̄ლდ.
Line of edition: 7    ჲესი-ჲეს ნეპრალთე იმჷრჯი̄ნეხ ჲერხი̄ლუ. ჲერხი ჴემტარს
Line of edition: 8    ლაცხუ̄ტა̄რს ხატუ̄ლიხ, ბობშარ ასყა̄ლიხ აგის კვედლიშს; ამშა ლისყი
Line of edition: 9    ჩი̄ს ჩუ ხა̄ჲმედა. მე̄რმეკალიბს ასყიხ აჯაღ ი ეჯი ხოშა მეწვინდ
Line of edition: 10    აზზი ცხუს, ალეს ხატუ̄ლიხ ცხულა̄-ჴემეტს, მარა ალეს ხოშე̄ლ
Line of edition: 11    ხოფშირა̄მინ იჴმარიხ ლამპო̄ლთე. ალესი̄ ცხუს ხადე̄სხ ლუცხუ̄ტა
Line of edition: 12    ჴემეტჟი, მარა ჟი ლაფშვდად ჴემეტიშ მურგვალ ჩახმახ ხა̄რ ი ში̄მი
Line of edition: 13    ლარკინა მუჭუ̄ლ ჲერსკნიშ ი მე̄ვარ მეწვინდ აზზი ცხუს. ამჟი ერ
Line of edition: 14    ჯვინელ დროჲჟი ცხულა̄-ჴემეტ ხაღვე̄ნახ ლათხვიარდ ი ლაშჲა̄ლდ
Line of edition: 15    ლა̄ჲდი̄. ჲერხის ჩუ ხოშხვნახ ჯვინელ ცხულა̄-ჴემტარ ჩუ ლუჭყურტუნე
Line of edition: 16    კვამხენქა მე̄ვარ. ლაშდრა̄ლდ ვო̄ბაშინ ასყიხ ათხე ბობშარ
Line of edition: 17    ამკალიბ ცხულა̄-ჴემტარს, მარა ეჩთანს დეშ, ეჩქად ერ ხაღვე̄ნახ.
Line of edition: 18    თოფარშა̄ლ ხარკე̄ნახ ალჲარ ბარჯლექვა ცხეკართე ლაზელა̄ლჟი
Line of edition: 19    ი ლათხვიარჟი ი ცხუვარ ლა̄ჲდი̄ ფიშირ ხაღვე̄ნახ. ცხუვარე ლარდა
Line of edition: 20    ლა̄რტყლექვა ხაღვე̄ნახ ჩუ ლჷრკინე ი ეშხვ ცხუს ერ ახფიშვდა
Line of edition: 21    ნადირს, მე̄რმას ენკედნა ი ჟესდე̄სნა გაფაჟი ი ეშ ახფიშვდა.



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.