TITUS
Svan Prose Texts IV (Lashkh)
Part No. 130
Previous part

Text: 130 
Page of edition: 160 
Line of edition: 17 
CXXXX. ჩაჟჟი კაჩუშ ლიგნე


Line of edition: 18       ჲერხი უბელ ჩა̄ჟჟი ჟი ლისგვრე̄ მჷქაფ ჭიშხარშვ ხეგნიხ ი კაჩუშ
Line of edition: 19    იჩრავიხ ჩა̄ჟი შიყჟი, აღვირს შიარისა იყდა̄ნიხ ი ჲერხი ქა̄ჲ
Line of edition: 20    ხაზელა̄ლვნეხ ჩა̄ჟს, ჲედ უბელ ჩა̄ჟს ი ჲედ ლუვუნგირს. ჲერხი ქა̄ჲ
Line of edition: 21    აჭმუ̄ნდვნეხ ჩა̄ჟს კაჩუშ ლაგნუშ ჩა̄ჟი შიყჟი, მარა ალე ძღჷდ ლიმარგ
Line of edition: 22    ხაბჟახ. ჲერხი ლუვუნგირ ჩა̄ჟს თხუმს უნგირჟი ხადე̄ს ი ჭიშხარს
Line of edition: 23    მჷდრე̄ცდ აკჩენი ი ეჲჟი ქა̄ჲ ხაზელა̄ლვნე ჩა̄ჟს, მარა ალე თელდ
Line of edition: 24    ხოჩა ლამარგობ ხაბჟახ ამჟი̄ნე მუჩომიშ; ფეთიან ი ხოლა მანკი ჩა̄ჟ
Line of edition: 25    დეშ იმარგ ამკალიბი ლაჩომჟი, ხეკვეს ხოშა სოდომიან ჩა̄ჟ ლე̄სეს,
Line of edition: 26    ერე დო̄მ იფეთავა̄ლდეს ი ლუნყუ̄რად ა̄რდეს. ჲერხი ჩა̄ჟს ხაზნა
Line of edition: 27    ბობშარე ლილა̄ცვე ი დე̄მ ითლე ბობშარს მიჩა ნაფდიათე, მარა ჲერხი
Line of edition: 28    ჩა̄ჟ მა̄ ლი ეჯკალიბ, სოდომიან ლი ი დე̄მ ხათილ ჴეფშვ ი იშთხვშვ ბობშარს.
Line of edition: 29    ჲერხი ჩა̄ჟ აშ ანდიკანდ ლი ჴეფაჲ ი იშთხვაჲ, ჲერხი -- მა̄დე.
Line of edition: 30    ლახვს ერ ხაყახ ჩა̄ჟარ ქალუფი̄შვდ ლუფხვისა ლალგვარდ, აგითე
Line of edition: 31    ლიჴდე ლახ ე̄სა ხაწჷხხ ჩა̄ჟიშ, ეჩქა ლარმეჲდ ი ლაჴდად აგითე
Page of edition: 161  Line of edition: 1    ბობშარს აზზიხ. ჲერხის ჟი ლუმთქვე ხაყახ ჩა̄ჟარ ჯიმი ლა̄მნად ი ქა ერ
Line of edition: 2    ხოხლინეხ ჯიმი მორსი̄ლს, ეჩქა ხოჩა ლერმი ჩა̄ჟარ ი ჯიმი ნამითქვ
Line of edition: 3    ქა ჴედნიხ შიშდ ბობშართე ი ბობშარ ქა ხაჭო̄ნეხ მეჴერს კი̄ნჩხქა,
Line of edition: 4    ჩვარმიხ ი ჩვალბენიხ ჲედ აღვირშვ ი ჲედ აფშარაჲშვ, ჟი ხესგვრიხ
Line of edition: 5    უბელდ ჲეს ეშხუ ბობშ, ჲეს ჲერუ ი ჩუ ჴჷდეხ აგითე ამჟი. ჲერხი
Line of edition: 6    ჩა̄ჟ დე ჯიმთე ჴედნი ი, ბობშს ერ იწვე̄ნე, ქა ხეჭმენი ლაჴეფდ ი ჩუ
Line of edition: 7    ცხაჲ თეშ არმიხ ამკალიბ ჩა̄ჟს ბობშარ. ამკალიბ ხოლა ლერმი ჩა̄ჟი
Line of edition: 8    ლარმეჲდ ხოშე̄ლ ღჷრიხ. ჲეს სგა ინკე̄ლეხ გასკად აგითე ხოლა ლერმი
Line of edition: 9    ჩა̄ჟს ი ჲეს თეს ხოგემხ თეკვიშს ი სგა ერ იგემ ლანთეჲდ მჷსყა
Line of edition: 10    თეკვთე̄ჲსა ხედვა̄ლე ჭიშხს, ეჩქა ქა ხობღერხ თეკუ̄ლს ი ლანთეჲ
Line of edition: 11    სგა ხენგი̄რი ჭიშხთე̄ჲსა ი ამჟი ჩვარმიხ. ჲერხი ხოლა ლერმი ჩა̄ჟს
Line of edition: 12    ლანთეი ლიგემშვი̄ ერ დოშ არმიხ, სასროლი ლიფშვდე ჩი̄ს მა̄ ღალ
Line of edition: 13    ხოხალ, ჲერხისგარ ხოხალ ი ხოლა ლერმი ჩა̄ჟი ლარმეჲთე ქა იწვანიხ
Line of edition: 14    სასროლი ლიფშვდე̄ მოხალ მა̄რას ი ეჩის ხარმა̄ლვნეხ ამკალიბ
Line of edition: 15    ლუქსუვე ხოლა ლერმი ჩა̄ჟს. აკვჲა̄ლვნეხ ჟი ლისგვრეს ეშ ჟი
Line of edition: 16    ლიპერშვ, შიყჟი ხაბა̄ჯგეხ ტოტს ი ჟი ხეპრენიხ ი ჭიშხს ხაცა̄დიხ მე̄რმა
Line of edition: 17    ლესგლექვა ჩა̄ჟს. ჲერხი დეშ ხეპრენი ამჟი ი კჷ̄ლთხი აგის ხაგნე
Line of edition: 18    ჩაჟს -- ჲედ ბრეკს ი ჲედ ნაშხატს ი ეჩხენქა ხეცა̄დი ჩა̄ჟს ჟიქა̄ნთე,
Line of edition: 19    შიყთეჟი, მარა ამჟი ხოშა ვობროდუგარ ხაშდბახ, ოდო ხოჩა ფხოველ
Line of edition: 20    მახე ალმე̄ზიარ შიშდ ჟი ხეპრენიხ ი ეჲჟი ხესგვრიხ. ჲერხი ლუვუნგირ
Line of edition: 21    ჩა̄ჟთეჟი აბჟანდა̄ჲსა ჭიშხი ურკინად აკვჲა̄ლვნე ჟი ლისგვრეს.
Line of edition: 22    ჟი ხატსიხ ტოტს უნგირჟი ი ჟი ხეპრენიხ ი ჟი ხესგვრიხ უნგირჟი.
Line of edition: 23    ამშა ლიჩომ, აბჟანდა̄ჲსა ჭიშხი უგად ჟი ლისგვრე, ეზარ ნამარგ
Line of edition: 24    ი ეზარ ნამურჯი ხაბჟახ. აში ლჷტან მა̄რე ხეთში ამშა მუჩომდ, ოდო
Line of edition: 25    გვამი ტანაშ დეშ ხაკვი̄ ქა ამშა ლიჩომს. ლიჩა̄ჟუნა̄ლ ი ლიჩრი ეჩქადა
Line of edition: 26    დროჲჟი ხახლე̄ნახ ი ჩა̄ჟურაჲ მეზგე დეშ ლემგენო̄ლინ. ათხე̄ დროჲჟი
Line of edition: 27    და̄ს ე̄მთე ხაწჷხ ჩა̄ჟარ ი დეთა̄ჲ ერ აკვჲა̄ლვნე ჟი ლიპერს ი ჩა̄რე
Line of edition: 28    ლიბო̄ცა̄ლს. ყო̄რთეჟი ახა̄ზიხ მარშინე̄ლ ხოჩა ლა̄ზ-ლამჩედი ბედშვ,
Line of edition: 29    და̄ს ე̄მთე ხაწჷხ ბეხი̄ლარშვ ლიზელა̄ლ.



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.