TITUS
Svan Prose Texts IV (Lashkh)
Part No. 141
Previous part

Text: 141 
Page of edition: 167 
Line of edition: 1 
CXLI. ლიბგვი


Line of edition: 2       ეჩქად ლეჩხუმთე ლი̄ზი ერ ხაკვდახ, ლადგა̄რჲელთე ლი̄ზის ერ
Line of edition: 3    ხემა̄რა̄ლნი, ეჲჟი ღალ ხამა̄რა̄ლნახ გზავრთე ლი̄ზის. ჩა̄ჟ ჲედ ჩა̄ჟი
Line of edition: 4    მჷჲეს მა̄რე ლუვარ ანტხენო̄ლ, ა დოშ, ალე და̄ს ხახლე̄ნა, ეჲჟი ხოლა
Line of edition: 5    შუკვ ი ზჷზ ლჷმა̄რ. ჲეს ღალ მა̄რე ლჷმშყედო̄ლინ ქა ხოლა ბოგქა
Line of edition: 6    ლა̄ზჟი, ჲედ კო̄ჯს ი ჲეს ჩა̄ჟ. ხვაჲს ხაშყიდ, ერე მიჩა ლჷლა̄ბდ ხაშყდას
Line of edition: 7    ქა ჩა̄ჟ ლანზა̄რავჟი ი პატრონ ცარჲელ მეტხე̄ლი აგითე. მჷლა̄შხს
Line of edition: 8    ათხე̄ჲ ხოვზენეხ, ჩა̄ჟ ერ ათშყედა ლაწლა̄ნდაშ, მური ბოგმოყ.
Line of edition: 9    ჩუ ერ ემშყედ ჩა̄ჟ ი ჩვალდა̄ვშე̄ლი, ჩვემჩედ მჷლა̄შხ ი ქო̄ხქვი̄ცა
Line of edition: 10    ჭიშხ ჩა̄ჟიშდ, ჟოხჴი̄და შუკვთეჟი ი ხაყლო̄ნა ჩა̄ჟი ჭიშხს: "ა საბრა
Line of edition: 11    უქ კავშაჲ! ამეჩუ ლოქ ერ ეჯგე̄ნ ჭიშხ ი ამეჩუ, მა̄მ ლოქ აშყდენო̄ლ
Line of edition: 12    კოჯქა". ამჟი ღალ ლჷმჭი̄რა̄ლინხ ლა̄ზ-ლამჩედჟი. აგიხენ
Line of edition: 13    ნა̄ზვ თვით ნაგზი ხაკვდა ლეჩხუმდ ლი̄ზის. ჩა̄ჟშვ ლი̄ზი ი ჭიშხშვ
Line of edition: 14    ლი̄ზი მეგვი ლას. ლელე̄თად ლჷმგენო̄ლინხ ქვაბვარისა აშარლექვა,
Line of edition: 15    ლემესს ლუმუ̄შვინხ ი ქვაბვარ აშარლექვა ჩუ ლუკვმუნე ლიხ ათხე̄ჲ.
Line of edition: 16    შომასი̄ აშარს დოშ ლჷმა̄ზნხ, ნაფდიე̄მი გუ̄ნღა ლენჴერახენ
Line of edition: 17    ლჷმა̄ზნხ ლეჩხუმთე სტა̄რუნი̄ში თანაღქა, მარა ლენჴე̄რალექვა სურუ
Line of edition: 18    ხოლა შუკვარ ლჷმა̄რ. მეჲად ლიცარქა ლჷმა̄რ ლე̄ზი ჲეს ეჩხენთე
Line of edition: 19    ი ჲეს ამხენთე, ამჟი ლეტე̄ხვრჲელ მეჲად; ჲესინ ლიც, ლაჯა̄ნურ,
Line of edition: 20    ჟი ლჷმცხემინ, ჲედ ჩა̄ჟს ლჷმჲესინ ი ჲედ მა̄რას. ლაშხს ჟი
Line of edition: 21    ლჷმხურჲელო̄ლინხ ი ლჷმზჷზინხ ლენჴე̄რათე მუბვგა̄ლას ჩი ზაჲ;
Line of edition: 22    მუჟღორთენაღალდ ხაჭმენო̄ლნახ ჟა̄ნისა ლაჯა̄ნურს ლექვა ი ჩჲა̄გ ქა
Line of edition: 23    ლჷმბოგინხ მურგვალ ჭერი̄ლარშვ. მჷსყე ბოგო̄ლი̄ საელბედიო ლჷმა̄რ,
Line of edition: 24    ჭერი̄ლართე̄ჲსა სგა ხაკტე̄რო̄ლნა ჭიშხ ჩა̄ჟს ი ჲეს ქა ლჷმკვიშინ
Line of edition: 25    ი ჲეს ჩა̄ჟ ი ლა̄ბარ სგა ხაშყდენო̄ლნახ მე̄ზი ლიცთე̄ჲსა. ალ ამბვარ
Line of edition: 26    შუკვარეშ ვოდ ათხანუნ ლას, ამშა მჷ̄ჲრენისი̄ ჩუ მაშყიდ. მუბვგა̄ლა
Line of edition: 27    ქა ერ ლჷმგა̄თვინხ ლიბგვის, ქა ლჷმტეხო̄ლინხ ლა̄შხთე ი
Line of edition: 28    ნაბგვუ̄რს ლჷმზორინხ სოფელისა, ბეგარდ ხაგდე̄ნახ ჩი ზაჲ ნაბვგუ̄რ
Line of edition: 29    კაკლარე ლიჴდე. ათხე̄ხი ოხსყახ ნეცინ შუკუ̄ლ სტა̄რუნი̄ში
Line of edition: 30    თანაღქა ი ღო ლენჴე̄რალექვა, მარა შუკვარე მჷპლანავი მჷლეშკაშ
Line of edition: 31    ხუტულ გოგებაშვილ ლჷმა̄რ ი ეჩის ეჯკალიბ აგილეჟა ოთპლანავა
Line of edition: 32    შუკვ, ერე გზა̄ვრი ლემკახე მა̄მ ლჷმა̄რ; ლეჩხვმარს ოთჲახ შუკვ
Line of edition: 33    ხვირი ცხეკლეჟა, ეჩხენისა ლჷმჲესინხ მეგმარს ი ზექს ი ათხე̄ჲ ოსღვახ
Line of edition: 34    ლიცრუ̄შ ზექ ი მეგმარ. ალ შუკვ ლენჴე̄რაშ ჟესღრი ხოშა
Line of edition: 35    ლჷცხეკ ტე̄ვრთე̄ჲსა ი ეჩანღო ჩუ იჭო̄ნე ლანქორი თანღი ღელთე̄ჲსა,
Line of edition: 36    ჲერუ-სემი ნაზჷმშვ ხოჯვდა ლი ი ლეჩხვმარე ლემკახეგარ ლი,
Page of edition: 168  Line of edition: 1    ოდო ლა̄შხიშ -- მა̄მა. სერ ეჩანღო ჩვემსედ ლენჴე̄რა̄ შუკვარ ამჟი ი
Line of edition: 2    ვოდ ათხანუნ აშ მესდე ლი. ლიბგვი ხახლე̄ნახ ლახქორნეშ ლიცრე
Line of edition: 3    თხუმლექვა, ხვირი ვოკერჩუქვა̄ნქა. მუჟღორთენაღალდ ლჷმბინინხ
Line of edition: 4    ლიჩრის; ღვინელს ლჷმჴიდინხ ჟაჴარშვ, ქეშელაჲშვ, ჴეჩვარისა
Line of edition: 5    ლჷჭო̄ნას. ეშხუდ ინზო̄რო̄ლხ ფიშირ, ჲეშდვოხუშდთექა მჷჩრა, ი ხოლა
Line of edition: 6    შუკვარქა ლა̄ზჟი უშხვა̄რ ღალ ხამურჯნახ. ეშხუ ლე̄თ ლეჩხუმხენ
Line of edition: 7    ნა̄ზვ მჷჩრა სგა ლჷმჴედო̄ლინხ ხვირი ვოკერთე̄ჲსა; ეჩეჩუ̄ნა ქვაბვარისა
Line of edition: 8    ჩუ ლჷმგენო̄ლინხ ლელე̄თად ი მე̄რმა ლადეღ ხაცვმინახ ლა̄ბარს
Line of edition: 9    ჩა̄რს ი ქა ხაგნო̄ლნახ ხვირმჷყქა ტე̄ვრს ი ჟი ლჷმჴედო̄ლინხ
Line of edition: 10    სტა̄რუნი̄ში თანღი ლჷცხეკი თხუმთეჟი. ეჩეჩუ კოჭო̄ლ ნაკი̄ლარ ხა̄რ
Line of edition: 11    ი ჩა̄რე ლაბლახ ხა̄რახ ლელე̄თად ი ამეჩუ ლჷმგენო̄ლინხ. ალ მიდამს
Line of edition: 12    ხა̄ჲშხა ლანქორ, კოტო̄ლ ბეჩი ქორო̄ლარ ხაგმე̄ნახ ამეჩუ, ლანქორისა,
Line of edition: 13    მინე ლარდა, ჴვილაშა̄ლ მჷსყე ი ჟიქა̄ნ კა̄რალშვ ლჷ̄ნშგ,
Line of edition: 14    კარავე̄ლარშა̄ლ. ამექა ქვაბვარ მა̄მ ხა̄რ ი მჷჩრი̄ ლაგნად ლჷმა̄რხ ალ
Line of edition: 15    ქორო̄ლარ ჟი მჷსყე. ათხე̄ჲ ჩვარიხ ეჯ ქორო̄ლარე ნამხვირვალ. ლანქორნეშ
Line of edition: 16    მე̄რმა ძინარს ქა ლჷმთანღინხ ი ვედშვ, ქუნ მჷწლე̄ბი,
Line of edition: 17    მესმა ლადეღ სგა ლჷმჴედო̄ლინხ მინე-მინე აგიართე, ჲედ შვიდბიან
Line of edition: 18    ი ჲედ მე̄ვარ ზარალიან-ლუკვმატე. კეცარ ეჯი მაგ არიხ ლა̄შხისა,
Line of edition: 19    ერე იმჟი̄ი ლეჩხუმს, მარნალი̄ ხუღვახ ი ხაღვე̄ნახ ბეჩიშ; მაგ ლჷმჴიდინ
Line of edition: 20    ღვინელს ლეჩხუმხენ. ლეჩხუმს აშ ლჷმშენინ ყურძენს, ერე
Line of edition: 21    ხოშა მეგმართეჟი ხაღვე̄ნახ ლჷფი̄შვდ ვენახ ი თვით მეგემხენჩუ
Line of edition: 22    თვით ლა̄ბ ყურძენს ლჷმხორინხ. მუღვარალაჲდ ხაღვე̄ნახ ღვინელ
Line of edition: 23    ლეჩხვმარს, ეჯიმაგ ხაჴდენო̄ლნახ, შედი̄ ძვირ ხა̄რახ ღვინლაშ ი
Line of edition: 24    ამღა თელდ ჩალი ფასდ ხა̄ვდინახ შვანარს ღვინელს. ეშხუ და̄დჲა̄ნა
Line of edition: 25    ლაზმა დორაჲ ეშხუ აბაზდ ლჷმარდ; მანათდ ძღჷდ გლაჯიაჲ ლა̄ბს
Line of edition: 26    ლჷმყიდინხ ღვინლაშს. ყჷლეხ, ერე ეჩქად თაბარობ ლოქ ლჷმა̄რ
Line of edition: 27    ი ეჯღა ხპჴდენო̄ლნახ ალემაგ ღვინელ. ქალაკოდა̄ჲ სდუგვარს
Line of edition: 28    ლჷმჲესინხ შვანარ ლეჩხუმთე ლუნთისა ლენა̄ყუნიდ ი ქალაკოდა̄ჲ
Line of edition: 29    სდუგვისა თვით დორაჲ ღვინელს ხა̄ვდინახ. და̄დჲა̄ნა ლაზმა დორაჲ ჲე-
Line of edition: 30    რუ ფუთდ ხოშა ლჷმა̄რ. ჲერხი ქანა თხუმვარს ლჷმჲესინხ ი ეჩე̄ჲსა
Line of edition: 31    ხა̄ვდინახ ლა̄ბ ღვინელს, ჲედ ლჷჯმარე̄ლს ლჷმჲესინხ ი ლჷჯმარე̄ლისა
Line of edition: 32    ლჷმჴიდინხ ღვინლა ლა̄ბარს. ლეჩხუმს თელდ მუღვარალაჲდ
Line of edition: 33    ხაღვე̄ნახ ღვინელ, ლიცს და̄რ ლჷმთჷრინხ, ჩიგარ ღვინელ ხაღვე̄ნახ
Line of edition: 34    ლეთრად. კეცარს შვანს დეშ ლჷმსყეინხ ი ხეთი̄რი, ერე მა̄ჲ შვანისა
Line of edition: 35    კეცარ ჩუ ე̄სა არიხ, მაგ ლაკო̄დუშ ხეკვეს ლჷმა̄რე̄ლას ნაჴიდ; ნადდ
Line of edition: 36    ხაწე̄ნო̄ლნახ უშხვა̄რ ი ეჲჟი ლაკო̄დუშ ახღვე̄ნახ კეცარ. კეცარ ჲერხი
Line of edition: 37    ეჲზუმ ლიხ, ერე უსგვე̄შდ-იშგვიდე̄შდ ფუთ ხასკდა სგა. ათხე̄ჲ
Page of edition: 169  Line of edition: 1    ჩვარიხ ეჯ კეცარ. შვანისა კეცია̄ქ ვორ, ვოყალ, დე̄სა არი ი დემოშ
Line of edition: 2    ათხე ენთხეხ, ამხენქა ლი ლეჭნე, ერე კეცარ მაგ სგა̄ნქა, საირმეხენ,
Line of edition: 3    ნაჴიდ ხეკვეს ლე̄სეს. გვიან გამდვრალ მუჟღორდ ლჷმზელა̄ლინხ
Line of edition: 4    სტა̄რუნი̄ში თანაღქა. ეჩქად მუს მე̄ვარ გვიანდ ლჷმჴედო̄ლინ, ამშა
Line of edition: 5    მჷჲრენი̄ ბაბა ყჷლა, ერე ეშხვინ ლუნთისა, ბარბლაშიერმჷყქა,
Line of edition: 6    სტა̄რუნი̄ში თანაღქა ჭიშხაგარ ლოქ ემჴედე̄ლი ი ეშხუ ცალ ჟაჴ, გოში
Line of edition: 7    ღვინელშვ, შიყჟი ლოქ ხაცვმე̄ნა. ათხე̄ დროჲჟი ეჲჟი ლჷმცხა̄ნე ლი,
Line of edition: 8    ერე სტა̄რუნი̄შქა ბარბლაშიერ ნეპო̄ლი̄ლი დეშ პერნი, ოდო მა̄რე
Line of edition: 9    ლა̄ჲდი̄ ცხაჲ დეშერ ათნაღი. ეჯზუმ მუსს ხადე̄ს, ერე ქა ლიჭბი და̄ს
Line of edition: 10    ხა̄ჲმედა. ღო ლუნთისა სტა̄რუნი̄შ ხოლა ლეთნაღი თანაღ ლი. ხვაჲ
Line of edition: 11    მა̄რე ლჷდა̄ვშე̄ლი სტა̄რუნი̄ში თანაღი ლათნაღჟი ათხე̄ხია̄რა;
Line of edition: 12    ლანგხზა̄რავხენ ნა̄ზვ ჩუკუ̄ლარ, ჲერუ-სემი მა̄რე ეშხუდ მჷთნაღი, ჩვედღა̄ვშა̄ნხ
Line of edition: 13    სტა̄რუნი̄ში თანაღჟი, ალჲარ ხაბაჲშა ღვაჟარ ლჷმა̄რხ.
Line of edition: 14    ლაბოგთე მე̄ზა̄ლა, ბოგო̄ლარს ერ ქა ხადე̄სნახ ლაჩრიჟი̄ნაშვდ, ქა ერ
Line of edition: 15    ლჷმტეხო̄ლინხ ლა̄შხთე, ნაბგუ̄რ ნაზორ კაკლარშვ სკარს ლჷმჩომინხ
Line of edition: 16    ლემზაგო̄რს ი ძღჷდ ქეიფ ხა̄რახ; ამშა მაშყდვა̄რ მა̄რე̄ლ ათხე̄ჲ
Line of edition: 17    ხვა̄ჲ არიხ ჩიქე ლუვარ ი ა̄მბვიხ ეჩქადა გვეშარს: -- ათხე, გორა,
Line of edition: 18    განათლება ლოქ ემჴედე̄ლი ი ჲას ლოქ ხელო̄ნი დირდე. ლაჩერჟი
Line of edition: 19    ჩა̄რს ვოხუშდ დორჲან ღვინლა ლა̄ბარს ერ ხაცვმინახ, ლა̄ბი ქა მეჭემ
Line of edition: 20    მა̄რე ლჷმცვემინ ეშხუ დორაჲ ღვინელს ი ეჲჟი ხაჭმენო̄ლნა ქა
Line of edition: 21    ლჷლა̄ბ ჩა̄ჟს, ეჲჟი ლჷჴმაშ ლჷმა̄რხ ეჩქადა ღვაჟარ. შიყჟი ლუცვე
Line of edition: 22    ღვინელს შუკვჟი̄ნა ლეხჷრჯავიდ ხაბი̄შდო̄ლნახ მასძელარს ლეჩხუმს.
Line of edition: 23    თვით მასძელ მუშვან მა̄რას ჩი̄ს ხაყე̄ნა ი ათხე̄ჲ ხაყახ; ჲერხის მინე-
Line of edition: 24    მინე ვენახარ ხაღვე̄ნახ ლჷყიდ ლეჩხუმს, სგი ხაბრიე̄ნახ მასძელიშვდ
Line of edition: 25    ი მუჟღორ ლჷმა̄ზხ, ლჷმხორინხ მინე ვენახისა ყურძენს ი ეჩა ღვინელს
Line of edition: 26    ქა ლჷმჴიდინხ აგითე; ათხე̄ჲ ხაცვირხ ლეჩხუმს ვენახ ჲერხი
Line of edition: 27    შვანარს, მარა ღვინელს ღალ დეშ ჴჷდეხ, ათხე̄ დროჲჟი ხვაჲ ლი̄ზნანი
Line of edition: 28    ხაკუ ვენახს ი ეჩა შვანარს დე̄სამა ხომჴერახ; ჲერხიდ ჟოხჩიშხ
Line of edition: 29    ქა ლივდა̄ლი ვენახარეშ ალ დროჲა ლიჴდა̄ლდ.


ა. ონიანი. 31. VIII. 1958




Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.