TITUS
Svan Prose Texts IV (Lashkh)
Part No. 142
Previous part

Text: 142 
Page of edition: 170 
Line of edition: 1 
III. საქმიანობა
Line of edition: 2 
CXLII. ლიჭმჲელ ი ლილგმა̄ლ


Line of edition: 3       ხა̄ლ ერე ნა̄რგილ, ეჲჟი ლახვარე ლა̄რე̄ლე ლიჭმო̄რჲელ იბნი
Line of edition: 4    ახანახანღო, ლიჭმი̄რჲელე ლაბნა ლი ახანახა̄ ლადეღ, ჩის ლჷმსკადა̄ლე
Line of edition: 5    ხუღვახ ამჩიქა̄შდ ხოჩა ლურუსუ მერჩლარ, ქა ლჷკვერავა̄ლე
Line of edition: 6    ი ეჯჲარე ლაშე̄რ ბეჩარ ლა̄ჲდი̄ სგობდ ლჷმა̄რა̄ლე. ლიჭმეზუმ გვამი
Line of edition: 7    ლეშდაბ დე ლიჴნი ლი, დე ლიბე̄რგე ი დე იშგენ მა̄ლე ლემშაჲე.
Line of edition: 8    ლიჭმე ღვაჟარსგარ ხა̄ჲმედახ, მჷჭმად ზურალე̄ლ დეშ იმარგხ ი
Line of edition: 9    დეთა̄ჲ აჭმეხ. მჷჭმად მუშვან მა̄რას დეშერ ხასრე, დე̄მსგი ქვეყნი
Line of edition: 10    მა̄რე, ლიბობშნეშ ხა̄რხ სგა ლუმთქვე ლიჭმეს ი გაცხაჲდ ხოჩა მჷჭმე
Line of edition: 11    ლიხ. ხვაჲდინ ხამქარა̄ლნახ ლაჭმა̄ჲსა ქართობჟი შვანარს, ლაჭმად
Line of edition: 12    მე̄ზა̄ლას, მარა ჩიგარ შვანარს ხოსრახ მჷჭმად ჩი̄სგი მა̄რე̄ლეშდ.
Line of edition: 13    ლაგურკა შა̄ლჲა̄ნ მადლიანი ხატ, ათხე ერ ლა̄ჲრაკდ არი ჩჲა̄გ, ალ
Line of edition: 14    ხატ მუშვან მჷჭმას ოხჴი̄და ლამქარა̄ლისა იმრე̄თი მეფე̄შხენ გეგუთი
Line of edition: 15    ლა̄რე̄მი ნაჭმუ̄რ ი ქო̄ხჴი̄და შვანთე ქა̄ცივშ. ათხე ერ კა̄ლს
Line of edition: 16    ლაგურკა̄ ხატ ხასგვჯინა, ამშა მჷჴდემიშდ მჷკა̄ლს ზურა̄ლ ლოხყვინა
Line of edition: 17    ლე̄თშვ ი ეჩა სავპატივდ ხა̄რა ჩუ ლეცვრე ალ ხატ. შა̄ლჲა̄ნიჟი ნაღვნურ
Line of edition: 18    ფურს ხაჴდუნეხ ჩი̄სგი მა̄რას, წორობჟი ესწჷხახა̄ იშგენ გვეშჟი.
Line of edition: 19    ამშა მაღვრა̄ ლიკვშე და̄ს ხე̄ჲმედა̄ნ მუშვან მა̄რას. ალ ხატი ლიქვთერ
Line of edition: 20    ლოქ ხაკვდა საღვშა ხოშა̄მ ი თეს ლოქ ათგენე̄ნა. ათხე̄ დროჲჟი
Line of edition: 21    ლეხკვაჲხ ქა ლიქვთერს სგა̄ნქა ნაჴდვარ, მარა ჟენბორბოტა̄ნხ
Line of edition: 22    თანღა̄რალქა ი შუკვს დეშ ათხვი̄დახ ღოშდ ლატეხდ ი აჯაღ ეჩხა̄ვ
Line of edition: 23    ლეხჴე̄დუნა̄ნხ, იმხენი̄ ერ ნა̄ზვ ლასხ ი კა̄ლარე ზურალე̄ლდ ოთხჷპჷ̄რეხ
Line of edition: 24    ბეჩარშვ თხუმვარ ი ხატ ჩვათცვირვნეხ. ვო, ი გვა̄და გარგლა
Line of edition: 25    ლიჭმე̄ ბედჟი, ახანახას ღჷნშა̄ლ ხემა̄რა̄ლხ, ნეცინ ლაძჲე̄ლსი̄ აძჲენა̄ლიხ
Line of edition: 26    ჲერხი ალ ლადეღ. მჷჭმა მა̄რას ლჷმა̄ნე̄ლე მჷფხჟად ვორთითშვ
Line of edition: 27    ეშხუ ზურა̄ლ ხაჭიმ ი ფხჷჟე ლჷმა̄ნე̄ლს ი ნებოზთე ნაღალდ
Line of edition: 28    ჟი იფცხიხ ქა ლჷფრა ჭემს ი ჩუ იგემხ აჴარდ ი ჲედ მოქვი̄ლარდ ჟი
Line of edition: 29    უმბა̄რად, მარა ხოშანაღალდ ჟამბა̄რეხ ი ეჲჟი იგმხ აჴარდ ლჷჭმა
Page of edition: 171  Line of edition: 1    ლა̄რა̄ჲსა, ამჟი ერე აგითე ლიჲესჷნქა დე̄სამა ხაწჷხ. მახე დოშდულს
Line of edition: 2    ერ ხეწდენიხ ბობშარ, ეჩქა ყჷლეხ, ერე "ახანახე ლოქ ი ქრისდედ
Line of edition: 3    ანკიდ ვარგი ჟახე ლოქ". მახე დოშდული ლიწედ ხოცხახ ხოჩა ალალ
Line of edition: 4    მა̄რე̄მიცახან, ერე ხოჩა მა̄რე̄მი თხუმჟიქა̄ნქა დოშდული ლიწედ ხოჩა
Line of edition: 5    ლოქ ლი ი ამჩიქა ყჷლეხ ამკალიბ ლექსი̄ლს ლუ̄ლჩხუმუდ:

Line of edition: 6       "მთვარე ვნახე ნებისა,
Line of edition: 7       მოყვრის სშენებისა,
Line of edition: 8       მტერის დამარცხებისა,
Line of edition: 9       ჩემი გახრებისა".

Line of edition: 10       აშ მჷრ ხაზნახ მახა დოშდული ლაწედჟი ამშა ლი̄ქვი̄ს. დოშდულს
Line of edition: 11    მე̄ვარ ათშიხ, "ცინცხლარს" ი აშ დოშდულს. დე მეგემს ხაქვცეხ
Line of edition: 12    ასმა̄ჲა̄ქს, ხოჩა დოშდულ ე მო̄დ ეხხვი, დე ფექი ლიჴმარის იბნეხ
Line of edition: 13    ხოჩა დოშდულურ ი დე გზა̄ვრთე ე̄რ ღჷრი ი შომა̄ჲღენ ქა იცა̄დი
Line of edition: 14    დოშდულ, ეჯი̄ჲ ხოჩა̄მდ ხოხალხ. დე ქორწილს ე̄რ იჩო ი თერღლას
Line of edition: 15    ქორთე დე̄მ ჴჷდე, ხოჩა დოშდულ ე მო̄ ხამგჷნახ, დე ბობში ლითნე
Line of edition: 16    ხაჩახ ხოლა ი კუმატიან დოშდულჟი, ხოჩა დოშდულჟი ლჷთნას
Line of edition: 17    "ბედნიერ მა̄რე ლოქ ხეფსი ი ხვაჲ ხანს ლოქ გეჭნი". ლითი̄ ერ
Line of edition: 18    ქა იგა̄თვი, ხოჩა მაჴედობ ლახ ი̄რი, მე̄ვარ ლჷხი̄დე ლიხ ი ლითჲელე
Line of edition: 19    ქა ლიგა̄თვა̄ლს "წიფი ჩათავებას" ხატუ̄ლიხ ი ეჯ ლე̄თ ხოჩა ვახშამს
Line of edition: 20    ამა̄რეხ, წიფი ჩათავება ლოქ ლი ი გემვანდ ივახშმა̄ლხ. არაყს ერ
Line of edition: 21    ითრეხ, უშხვა̄რ ხომზჷრიხ, ერე "ამზავჲა მაჴედ სალხინდ ლეჴმარი̄ვ
Line of edition: 22    ლოქ გვა̄რ, მა̄რე̄მიშ ი კუმში ნაშდობოშ ი ხვაჲ მია̄შუ ლოქ
Line of edition: 23    ოგვჲე̄ნა ჩი̄ს". ლისმინდი̄ ქა ლჷგა̄თვანი̄ ამჟი ხაშდბახ ი ხოჩა სიმინდობ
Line of edition: 24    ე ხე̄რიხ, ლეხამს მო̄შ ათშიხ ტარვალს, ლელა̄ჷ̄რის მო̄შ ხორკინეხ
Line of edition: 25    ქა ლაფრად ი ნალიელთე ლეშდეს ი ლეშხვნის მო̄შ ი ლე̄ჲრაყის
Line of edition: 26    აჯაღ მო̄შ, ე ხეღვე̄ნიხ ამჟი ლეთი̄შუნად. კუმატიან ი ბედნიერ
Line of edition: 27    დოშდულჷნქა ათშიხ აჯაღ სგობინ მეხვჲას (იმთვა̄ლე ლა̄ზჟი, გზავრთე
Line of edition: 28    ი̄რი ა̄, მეგმარე ლაქვცათე, ჲედ იშგენ გვეში ლასყეჲთე). მაშე̄ნა̄მ
Line of edition: 29    ხოკვიბხ ხოლა სგობინ მეხვჲას, ეჯ ლადეღ კუმატიან ხაბჟახ ი დე̄მშა
Line of edition: 30    სოჲდ ხა̄რხ იმედ, ე ხოლა მელხვი̄ჲ ლეხხვიხ მახა ქა ნაჴედჟი ქორხენქა.
Line of edition: 31    სგობინ მოლხვი̄ჲდ ჩუ ხოთრახ ქორა მა̄რე, ჲედ მეზვბელ ი
Line of edition: 32    ქა ხატუ̄ლიხ ქა̄მოვ ლი̄ზა̄ლდ ი სგობინ ლეხხვიხ ჩუ ლჷთი̄რ ხოჩა
Line of edition: 33    სოიან სგობინ მოლხვი̄ჲ. ეჯი ლერსგვენ მეჴერხენ ხეკვეს ლახხვი̄დეს
Line of edition: 34    ი ლი̄ზი ოთმეზრას მე̄ზის. ლერთენხენ ნახვი̄ჲ ლეგ ხაბჟახ. ლავბედრა̄ლდ
Line of edition: 35    ლა̄ზჟი ლერთენ მეჴერხენ ჴა̄ჩუდ ერ ლახტუ̄ლას, სერ ეჯ ლადეღ
Line of edition: 36    ლუკვმატე ხაბჟახ ი დე̄მგვაშ სიკეთეს ახღელიხ, ჴა̄ჩუს ლოქ
Page of edition: 172  Line of edition: 1    ლერთენხენ ლოხტუ̄ლა ი ეჯღა. ე ჴა̄ჩუ ლერსგვენ მეჴერხენ ლახ
Line of edition: 2    ტუ̄ლნე, ეჯი ხოჩე̄მი ლალშან ხაბჟახ ი ჩუ იხი̄დიხ ეჩქა, ჩი ხოჩე̄რება̄მ
Line of edition: 3    ანღლიხ ეჯ ლადეღ, ლუმურჯე ლოქ ლი ლადი̄ ლადეღ, ჴა̄ჩუს
Line of edition: 4    ლერსგვენხენ ლოქ ლოხტუ̄ლა ლადი. შუკვს მე̄ზის რეჭვი ნალხვი̄ჲი̄
Line of edition: 5    ხოლა კუმატიან ხაბჟა, წჷრნი ლჷჩაჩ მა̄რე̄ჲ მა̄მ ხაჩახ მოლხვი̄დ ი
Line of edition: 6    შუკვს მეთხნად. წჷრნი ლჷფათვარს ი ჭჷრელ ლჷთეჲარს გვეფობს
Line of edition: 7    ხაბრალიხ ი ამღა მა̄ ხოცხახ ამკალიბარე სგა ლითხნე. ჲედ სგობინ
Line of edition: 8    მოხვჲა ჴანდ ერ უმბულდ ბღე̄ლ ენკჷდის, ეჯი̄ჲ ხოლე̄მი ლჷშან ხაბჟახ
Line of edition: 9    ი მე̄ვარ ხაყლუ̄ნიხ ამკალიბ უმბულდ ბღუ̄ლი ლიკედიშ. ჲერხი
Line of edition: 10    კუმაშს უბღუ̄ლნად ხაზნა გვალისა ლარდაჟი ლიზჷრზჷნი ნებაშო̄ლდ
Line of edition: 11    ი ამკალიბ კუმში ნარდვ ხოჩე̄მი ლალშან ხაბჟახ, თვალ ლოქ ხუღვა
Line of edition: 12    ჴადისა ი ეჯღა ლოქ ზჷრზნი ამჟი. ეჯკალიბ კუმაშს ქა̄ჲ დე̄მ ვოდიხ.
Line of edition: 13    ნეპო̄ლ ერ ე̄სა ესტუ̄ლნე მა̄რე̄მი ნაფდიას, ეჩქა ყჷლეხ, ერე მახე ამბავ
Line of edition: 14    ლოქ ლოგსჷმი მა̄ლე ი ნეპო̄ლს ხე̄ქვნეხ, ერე "ვოქრე ნიკრატ
Line of edition: 15    ლოქ სი, ხოჩა ამბავი ნაჴდუ̄რ ლოქ. " ლალშანარ ხვაჲ რიგიშ ხოთრახ,
Line of edition: 16    ნიქჭა̄ ლიხე̄რე ლერსგვენიშ, თე̄მი ლიქვთან ი ჟიბე პილი ლიხე̄რე,
Line of edition: 17    "საღვინ ლოქ მჷრ მეჴფი ი ლადი უცხვს ლოქ ე̄რეს ლოხყაი".
Line of edition: 18    ნეპო̄ლარ ლახ ე̄სა ინზო̄რიხ ფიშირ ი ჭიგნეხ, ეჩქა ავდარს ახღელიხ.
Line of edition: 19    ხამ ლახ ე̄სა ხეხე̄რჲელ ლაყვრას ჲედ ლასგვრა სკამს, ეჩქა ლეგლირდედ
Line of edition: 20    ხაყლუ̄ნიხ ი ქა ხოტე̄ვეხ ლესთექა მეხე̄რჲელ ხამს. ციცვ ერ
Line of edition: 21    იცვენი ტოტს ნიჩვლექვა, შტიმსი̄ ე ოხცვიჲნე ტოტს, ეჩქა მე̄რმა
Line of edition: 22    ლადღიშდ დარს ახღელიხ. კვარმალ ლახ ე̄სა ხეწბინახ ნაჲენდგრლექვა
Line of edition: 23    ჯო̄დიდ, ეჩქა ყჷლეხ, ერე ამშა ნანკლათხი მუს ლოქ ლი ანღელს.
Line of edition: 24    მეგმარჟი ერ მანდუ̄რი ხესდენი, ეჩქა ყჷლეხ, ერე აჯაღ ლოქ
Line of edition: 25    მუს ლი ანღელს. დედვ ქათალ ლახ ე̄სა ესტუ̄ლნე ყვიჩშა̄ლ, ეჯი თელდ
Line of edition: 26    ხოლე̄მი ლალშან ხაბჟახ ი ეჯ დედუ̄ლს შიშდ ღალ ჩვაძჲენიხ.

Line of edition: 27       ჲესი-ჲეს ჲერხი ქათალ იდე̄ს ხოხრა ტანა ლჷგრო̄ლს, ეჩის "ნამლევს"
Line of edition: 28    ხატუ̄ლიხ ი ალე̄ჲ ხოლე̄მი ლალშან ხაბჟახ. ნამლევ ქათლა
Line of edition: 29    ლჷგრე ნეპო̄ლი ლჷგრაზუმე̄ლგარ ლი. ჟეღ ლახ იბნე ლიყუ̄ლის,
Line of edition: 30    ეჩქა ჩუ ლოქ იდგარი ჲერვა̄ლე ი მუყუ̄ლი ჟეღს ჟი ხოტე̄ვეხ ი ქა̄რკალიხ
Line of edition: 31    ლესთექა. ლაყუ̄ლიჟი ჟეღს ნიჩვ იმთე̄ჲ ხე̄რი, ეჯ კუთხისა ანჭინხ,
Line of edition: 32    ერე ადგა̄ნდეს ჲერვა̄ლე. ლელე̄თად ჲესი-ჲეს ღორღოლ ჴე̄დნი
Line of edition: 33    ი ტუ̄ლი, ალეჲ თელდ ხოლე̄მი ლალშან ხაბჟახ, ეჯ მეზგა̄ჲსა ლოქ
Line of edition: 34    ედდაგრი ჲერვა̄ლე, იმე̄ჲ ლოქ ღორღოლ ესტუ̄ლნე ლე̄თშვ. შუკვს
Line of edition: 35    ლა̄ხჟი ჩა̄ჟს ერ ხესგვრი ი ჩა̄ჟ ლიცთე̄ჲსა ლეხკვეჲნი ლისე̄რს, ეჯი
Line of edition: 36    ხოლემი ლალშან ხაბჟახ ი დე̄მ ხამბეხ ჩა̄ჟს ლიცისა ლისე̄რს. ხვაჲ
Line of edition: 37    ამკალიბ ლალშანარ ხოთრახ ი ჲერხის ხანწამ ალჲარ მაგ. ღარიბ
Line of edition: 38    ლუშნუ მეზგას, ეშხუ წყება ჲეხვ-ჭაშგარ ერ ი̄რდიხ ქორს, მაშდა̄შვა
Page of edition: 173  Line of edition: 1    მეზგას ხატუ̄ლიბ ამკალიბს ი, ლიზგა̄ლ ერ მო̄დ ედჴაცე̄ნდეს,
Line of edition: 2    ამკალიბს ხორი ეშხუ უ̄ღვა ჴანარ ი ეშხუ ფურო̄ლ ი არგებს ქორ
Line of edition: 3    ხო̄გე̄ნდეს, ე ხეხო̄ლი ლა̄თა̄ლჟი ლახვბახენ. ქორ, ხოშა ნაღალდ,
Line of edition: 4    ხოხრი მუხვბას ხეხვი, ჩუ ერ ი̄თა̄ლხ, ეჩქა ი დი ი მუი̄ ხოხრა მუხვბაცახან
Line of edition: 5    სედნიხ ხოფშირე̄მინ, ხოშა ლახვბა ქორა ფარდს იკედხ ი
Line of edition: 6    ქა ღჷრიხ ლაზგა̄ლდ ეჩხა̄ვ. მანკვი ზექრას იგემხ ი ეჩე̄ჲსა არის ვოდ
Line of edition: 7    დო ლეიმბეცვნეხ მახა ქორი ლიგემს. ქორა ლიგემს ხვა̄ჲ ხარჯ ხაწგხ.
Line of edition: 8    გალდამობჟი, ბეჩი ლახვრჲელაჟი ი ლამა̄ჯიჟი ლუნთისა, მუსობჟი,
Line of edition: 9    ჩიგარ ნადარ ლიხ ლეწვანი ბეჩი მომა̄ჯიდ აგითე. ეშხუ უ̄ღვა
Line of edition: 10    ჴანარშვ ეშხუ ლადეღ, ძინარჷნღო ნებოზდ, ეშხუ ჴოჯ ბეჩგარ
Line of edition: 11    იჴი̄დი ი ქორა ნალგმა̄ლუნდ ხვაჲ ამკალიბ ჴოჯარ ხაწჷხხ ი მე̄ვარ
Line of edition: 12    გვამიდ ლემა̄რა̄ლ ხა̄რხ, ქორა მჷგემდ ლახ იმა̄რა̄ლნიხ. მანკვი ხეკვეს
Line of edition: 13    ჭალა̄ჲ პილლეჟა ბეჩ ანხურჲელახ ი ჩვადგა̄ლახ ჴოჯარდ ვოხუშდე̄შდთექა
Line of edition: 14    ეში̄, ხოფშირა ე მო̄დე. ალეს ეშხუ მა̄რე დეშ ხაჟღუნე,
Line of edition: 15    ნად ხა̄რხ ლეწვანი ი ნადობჟი ხვაჲ ხარჯ ხაწჷხ მელგმა̄ლ მეზგას.
Line of edition: 16    ნადდ ლიწეჲ მახე მელგმა̄ლაშ წეს ლი ი მიჩა ლანხუბვარ, ნა̄თი-მჷნა̄თი,
Line of edition: 17    ნაღლიე̄დუ ი ეზრიე̄დუ მაგ ქა ხაწახ ნადდ ამჩიქა. ბეჩი ლიხვრჲელე
Line of edition: 18    გამდრვალ მუჟღორ იჩმი̄ნი, მუსი ლიჴდა̄ლდ, ოდო მუსმეჴდან
Line of edition: 19    დეშ ახვრჲელეხ ბეჩს, ქორი ნალგმა̄ლუნს. ქრისდე̄ში უჭმისა
Line of edition: 20    იწვანიხ ნადარს ი ეშხუ ლადეღ ვოხუშდე̄შდ ჴოჯს ვოხუშდე̄შდ ლუვღვი̄ნე
Line of edition: 21    ჴანარ სგა იმა̄ჯიხ მჷლგმა̄ლ მეზგათე. თვით ჴოჯგარ იჴი̄დი
Line of edition: 22    ძინარნეშ ნებოზდ ეშხუ უ̄ღვავშ; ლანკვშდია სევ-ჩევ ხო̄ბხ ჴანარდ
Line of edition: 23    ბეჩი მჷმა̄ჯა̄ლას. ეჯ ლე̄თ ბეჩი მჷმა̄ჯა̄ლას ხეკვეს ხოჩა ვახშამ ხა̄მნას
Line of edition: 24    მელგმა̄ლ მეზგად, წეს ლი სამარხვშვ ლიხჷრჯე ი ლეთრე მასარდ
Line of edition: 25    ხეკვეს ლახა̄შის ნადარს ჩი̄ს. ნადობჟი უშხვა̄რე ლამქარა̄ლუშ ამშაჲეხ
Line of edition: 26    მაგ ჲერდგულიანდ, ეჯღა ერე ნადარ მაგ მელგმა̄ლ მეზგე̄მი
Line of edition: 27    მჷნღალ, მეხუბ ი ნა̄თი-მჷნა̄თი ლიხ. ამჟი ხა̄რ ნადარ ლეწვნი
Line of edition: 28    ლალკირა̄ლჟი მჷლგმა̄ლ მეზგას ი აჯაღ ამზუმ ხარჯობ ჩუ ლეჩომ. ამჩიქა
Line of edition: 29    მჷლგმა̄ლ მეზგას ჟი ლუკვჲა̄ლე ხაყა ქორა მჷგემ. ნაჴელვანუ̄რ ეშხუ
Line of edition: 30    ჴანი ლივდი ლას წეს. ჲერუ ჴელვანს, ეშხვს ქა̄მე მჷგემ ჴელვანს ი
Line of edition: 31    მე̄რმას სგა̄მე ჴელვანს, ჲერუ ჴან ხეკვეს ლახო̄მას მჷოგმა̄ლდ, მარა
Line of edition: 32    ქა̄მე ჴელვანს ხეკვეს ხოში̄ლ ლეხვოდე̄ნდეს ნაჴელვანუ̄რიდ. ქა̄მე
Line of edition: 33    ჴელვან ხეკვეს გაცხაჲდ ხოჩა ჴელვან ლე̄სეს, ოდო იშგენ დეშ იმარგ.
Line of edition: 34    სგა̄მე ჴელვანდ მაგ ჟი იმარგ, ლახ ერე ქა̄მეშ ხოჩა ჴელვან ი̄რი.
Line of edition: 35    ჲესი-ჲეს ქორა მჷგემი̄ ჟი იმარგ სგა̄მე ჴელვანდ, კელდ მაჟებ ე ხე̄რი
Line of edition: 36    მჷლგმა̄ლ მეზგე̄მი მა̄რას ი ხვა̄ჲდინ ქა̄მე ჴელვანცახან ქორა მჷგემ
Line of edition: 37    არი სგა̄მე ჴელვანდ. ქა̄მე ჴელვანს ხოშა ლემყალი̄ ხა̄რ ქა ლიშყედდ
Line of edition: 38    ფალანგხენჩუ ი ნამწვინი ქორა ჭვედვარეშ ი მუხურალე ლიგემ ხოშა

Page of edition: 174 
Line of edition: 1       ლევსტატ ი ლეგარჯ გვეშ ლი. სგა̄მენ ჭვედვარ, იმჟი̄ დო ედგიხ
Line of edition: 2    ჟი ერ ენცომიხ, ეში̄ ხაყა. ეშხუ წყება მელგმა̄ლ ჴელვანარს ჲერუ
Line of edition: 3    მჷხლიკი ხაჭიმხ ი ხომა̄ჯიხ ხალიკს ი ნალგმა̄ლუნ ლჷწკატე ბეჩარს
Line of edition: 4    ი ვედნუშ ხაჟღუნეხ ბეჩიშ, ხალიკიშ ი თჷქი ლიმა̄ჯის. თჷქს მჷხლიკა
Line of edition: 5    აგნეხ ჲეზვისა მჷსყა ლათჷქისა ი ხოჴდეხ ჟი ფალანგართეჟი ჴელვანარს.
Line of edition: 6    ჴელვანობ ძღჷდ გვამი ლეშდაბ ლი. მელგმა̄ლ მეზგას ჴელვანარეშდ
Line of edition: 7    ჩი ლადეღ ხოჩა ხარჯ ხა̄რ ლემა̄რე ი ლემნე, ოდო ჴელვან
Line of edition: 8    ლახ ჩვედგვარნი, ლელგმა̄ლ ჩუ ხოსდენიხ ულგმა̄ლად. ჲერუ
Line of edition: 9    თოჲმურგვალ ლუფხვისა̄შ ჟი ხაკუხ ლალგმა̄ლს ი ქა ლახ ასრულეხ, ჩუ
Line of edition: 10    იჩოხ ლიძგრა̄ლს.
Line of edition: 11    ლიძგრა̄ლლე̄თ მელგმა̄ლ მეზგე̄მი ნა̄თიარ ი აქმა̄რელ ჴჷდეხ
Line of edition: 12    ლეზობს ი ლეთრას, მინი̄ ჴედნიხ ლიძგრა̄ლთე ი ეჯ ლე̄თ ძღჷდ
Line of edition: 13    ლიხჲადა̄ლ ხა̄რხ, ერე ქორა ლიგემ ედძჷგრა̄ნ, ქორა პატრონსგარ მა̄დე
Line of edition: 14    ი ალ ქორა მეხვბარალს, ნა̄თი-მჷნა̄თის, ნაღლიე̄დუს ი აქმა̄რე̄ლს ჩი̄ს.
Line of edition: 15    ლიძგრა̄ლლე̄თ ვო̄ბა აგის მენგრე ლაძჲა იძჲო̄ლ, ლახვმარა̄ლ გვეშ
Line of edition: 16    მა̄ ლას ლუშნუ ლჷდჷრბაზ ბეჩი ქორა ლიგემ, ალემაგ ნადობ ი ალემაგ
Line of edition: 17    ხარჯობ ესწჷხჷ̄ნ ი ლიგა̄თვე, მაჲ საკვრელ ლი, ერე მოლგმა̄ლ
Line of edition: 18    მეზგე̄მიშდ სურუ ლეხჲადე გვეშ ლი. ჲესი -ჲეს, ლეპრისდე ბობშ ე
Line of edition: 19    ხეყე̄ნო̄ლ მოლგმა̄ლ მეზგას, ეჩა ლიპრისდესი̄ ლიძგრა̄ლე ლიჩომს
Line of edition: 20    ხოდრენდახ ი ეჯ ლე̄თ აპრისდახ ვო̄ბაშინ. ჴელვან ლიძგრა̄ლლე̄თ
Line of edition: 21    ხოჩა გუჟი არი, ხაჟახ, ერე ხოჩა ქორ ადგე ი ეჯ ლე̄თ ჩვამზჷრიხ
Line of edition: 22    ჴელვანარს თელდ მანკვი. ქორა ჴელვანს მე̄ვარ ხეშგუ̄რა̄ლხ; ვოდ
Line of edition: 23    ლუვარ არი, ქორა ხინს ქა დე̄მგვაშ ხაქდენიხ ი უწჲად დე̄მ ხაყიჩხ.
Line of edition: 24    ლიძგრა̄ლლე̄თია ლეზობ-ლეთრას ეჩქად ჟი უჯგრად დე̄მ ხეყჩენო̄ლხ.
Line of edition: 25    ხვაჲ გარჯ, ხვაჲ ჭირ ი ხვაჲ გაკდაშია ხაწჷხ ლუშნუ ქორა
Line of edition: 26    ლიგემს ი ხვაჲ ხარჯ. ნადობჟი, გალდამობჟი, ლაგემჟი, ლადი̄რაჟი,
Line of edition: 27    ლა̄ნშგიჟი, ლალკირა̄ლჟი ი ლაფიფქავჟი ე მე̄ვარ ხოჩა ლჷმა̄რე მო̄დ
Line of edition: 28    ი̄რო̄ლ მელგმა̄ლ მეზგე, ეჯურ დეშ იგმო̄ლ ლუშნუ ქორ. ეჩქად
Line of edition: 29    ხოფშირა ლჷმარდხ ეშხუ ქორისა, ჲერხიაგის -- აშირ ქუნთექა ღო̄თაშდ
Line of edition: 30    ი ლი̄თა̄ლ ხოშა ძვირდ ხახლე̄ნახ, მარა ათხე̄ხი ხოშა ფიშრა̄მინ ი̄თა̄ლხ
Line of edition: 31    ი ჩუ იკაკლუ̄რა̄ლხ. მაშდა̄შვად მერდე მეზგე ჩიგარ ხოღრიბულდ
Line of edition: 32    ღალ იზგა̄ლ ი ლჷფშირუ ხოჩულდ იზგა̄ლხ. ეშხუ ხოშა მუხვბე
Line of edition: 33    მახვშე ლჷფშირ ქორისა, ეჩა ლუ̄ქვჟი ი ლჷმთორჟი ამშაჲეხ მაგ
Line of edition: 34    ქორა მა̄რე̄ლ ი ღოშგინპილს, ლა̄თა̄ლჟი, ნამხოშუ̄რ ხევდი ეშხუ დაბ.
Line of edition: 35    ხოჩა მეზგე ერ ხე̄ქვი, ეჯკალიბს ვო̄შთხვ-ვოხუშდ უ̄ღვა ჴანარ ხაყა.
Line of edition: 36    მჷშაჲ მა̄რე̄მი შელდჟი თვით უ̄ღვა ჴანარ, იშგვიდ-არა ღე̄თ ხოჩა მე̄შგი
Line of edition: 37    ფურალ, ჲერვეშდ-სემეშდთექა ხამარ ი იშგენ მანცინ კუმაშ,
Line of edition: 38    ჲერხის დაჴჷლ-ღოლჲა̄ქი̄ ფიშირ ხაყახ. იშგნა̄გ ხომჷრხელა̄მდ
Page of edition: 175  Line of edition: 1    ხეყე̄დახ, მატყი გუ̄ნღა სამწჷხ ღოლჲა̄ქარსგარ ირდვნახ ი ათხე̄ჲ ეჲჟი
Line of edition: 2    ხორიხ ჲერხი̄ლუს ი ჯოგობშვ მა̄დე ლენტხელშა̄ლ. ლენტხე̄ლ თაშს
Line of edition: 3    ქუთა̄შთე აჲესდახ ი ვოდდახ, ლუშნუ თაშ მაჩე̄ნე გემაშ ლი, ხოჩა
Line of edition: 4    ბალხო̄რა̄ ბედშვ. ლალდღიარ, ლახვარ, შვანზუმ დე̄მსგი ქვეყანა̄ჲსა
Line of edition: 5    ე̄ს ხუღვახ. შვანე ლახვართე ლელხუნად კუმაშ ი ჩა̄ჟარ მე̄რმა-მე̄რმა
Line of edition: 6    რაჲონალხენ ოხყახ, ვოდი̄შხენ ოხყახ ფურლე ჯოგარ, ლეჩხუმხენ
Line of edition: 7    ი ვოკრიბახენ -- მჷშაჲ ჴანრე ჯოგარ, მალყა̄რხენ -- დაჴჷლ-ღოლჲა̄ქა
Line of edition: 8    ჯოგარ ი გვიანდ მუჟღორგარ იტხეხ ალჲარს მინე სოფლართე. ლალდღიარ
Line of edition: 9    ი ლახვარ აჯაღ ხვაჲუდ სედნიხ უსჷრგებდ. მახა ქორა მჷგემს
Line of edition: 10    მაგ ხაწა -- მიჩა̄მიან ი იშგენი. ლიძგრა̄ლლე̄თ ეჩქადა დროჲჟი "აზმას"
Line of edition: 11    ხაჩმა̄ნდვნახ. მახა ლჷგა ქორისა კუმში ლარდა გვალარს ი
Line of edition: 12    ისგჷნტაფარს მე̄რმა-მესმა ზაისა ხოსყა̄ლიხ. ქორა ჭვედვარე ჟი
Line of edition: 13    ლიცმენის ი თვეთვნად ლიფიფქავის გირწყალშვ მე̄რმა ზაისა ხეჩოხ,
Line of edition: 14    დე̄ფნარს ლა̄ჲდი̄ გამხანიანდ ხოსყა̄ლიხ. ლი̄თა̄ლს ლახვბა, ეშხუ
Line of edition: 15    ქორისა მერდა̄ლა, ხოშა ნაღალდ ზურალე̄ლე ლიცვა̄ლს ხაფსახ,
Line of edition: 16    ლამყე̄რვა ერ დოშ ხოსყიხ უშხვა̄რ, ეჩქა ხეფსი მეზგე̄მი ლი̄თა̄ლ. ლა̄ჲხვა
Line of edition: 17    აფე̄თა̄ლიხ ლაჭშას ი ღოშგინპილს ლე̄თა̄ლდ ხოჴდენიხ გვეშ. დაბლა̄რას
Line of edition: 18    მუხვბე̄მი შელდჟი ა̄თეხ, როჭიკს -- მა̄რე̄მი ქუნე შელდჟი. ჲერხი
Line of edition: 19    ზურალე̄ლს ქორისა ლეთხუმ კეთილ ხუღვახ ი ეჩის იშგნა
Line of edition: 20    უ̄თამა̄თად აჲეს მიჩა პატრონ. ხოჩა მეზგაშე̄რ ჲერუ-სემი ჩა̄ჟი̄ ხეყე̄დახ.
Line of edition: 21    ჩაჟარშვ ეჩქად იჩრჷდახ ლეჩხუმხენ ხოშა ნაღალდ ღვინლა ლა̄ბარს,
Line of edition: 22    იმა̄ჯდახ მუჟღვრა პილთე. ქანს ლჷმჲესინხ ი ლჷჯმარე̄ლს ლეჩხუმთე
Line of edition: 23    ი ღვინელს ხა̄ვდინახ ალჲარისა ი ლჷმჴიდინხ აგითე. ხვაჲ აგის ლეჩხუმს
Line of edition: 24    საკვთარ მამულარ საღვე̄ნახ ქა ლჷბრაჲე მასძელ მუ̄ლჩხუმიშდ
Line of edition: 25    ლე̄ზნანიდ ი მუშვან, მამული პატრონ, ყურძენი ლახორთეგარ
Line of edition: 26    ლჷმჴედო̄ლინ ი აჲესდახ ჟაჴართე ლუგვშა ღვინელს ჴეჩვარშვ ლჷლაჯს,
Line of edition: 27    ერე ჟაჴარ დო̄სა ათცელა̄ნხ შუკვარჟი ი ღვინელ დო̄სა ათბდჷ̄დე̄ნხ.
Line of edition: 28    ფიკვარს ერ აძჲენა̄ლდახ ღჷნჲემურჟი ი ქორწლობარჟი,
Line of edition: 29    ჲერხის ეჯ ფიკვარე ტუფვარს კე̄შარდ იქვმუდახ ი ჲერხის ჟაჴარდ
Line of edition: 30    ასყჷდახ. ღვინლა მჷჩრა̄ლა̄ სგობინ მეხვჲა̄ლას ჩის ხათრახ ღვინელს.
Line of edition: 31    ლეთვნა̄ლი ღვინელ მო̄შ ხუღვა̄ნდახ ჟი ლჷდე ჟაჴარე ნე̄სგა კეხი
Line of edition: 32    არგაბჟი კოტო̄ლ ჟაჴი̄ლშვ ი ხათრახ სგა მოლხვი̄ჲ ფე̄დჲა̄ მოკეთს ი
Line of edition: 33    ნაღლიე̄დუს. ლეთრე̄მი მალტუ̄რ სურუ ლიხ შვანარ, სერთხი̄ ღვინელიშ.
Line of edition: 34    ღვინელს ზურალე̄ლი̄ მე̄ვარ ხეჯა̄ვჲელხ. შვანს ერ მო̄დ ხუღვახ
Line of edition: 35    ვენახარ, ეჯღა ხალატხ ამჟი ღვინლა ლითრე. ვენახი ბედჟი
Line of edition: 36    ამკალიბ არაკ არი სოფელისა: "ქრისდე ღე̄რბეთ ლოქ ლჷმარდ ამა
Line of edition: 37    ბუა̄სდს ი ჩუ ლოქ ოთზელა̄ლა თელდ ქვეყანა ჭიშხნ ი ჭიშხნ ი შვანთე
Line of edition: 38    ლა̄ზდ ერ ახგენე̄ნა მური ბოგხენ ლეჟა ი სოფელ მა̄ზაშნუნ ლოქ
Page of edition: 176  Line of edition: 1    ერ ემჴედე̄ლი, ეჩეჩუ ჲეშმაჲ ლოქ ლახხვიე̄ნა სგობინ ი ხო̄ქვა ლოქ
Line of edition: 2    ჲეშმაჲს ქრისდე̄შდ, ერე ჟა̄ნისა ლოქ ჯეჲ ახჭემა ალ ლაშხური ჴევლექვა
Line of edition: 3    ი ჩჲა̄გ ლოქ ჩოთნერგავა მიჩ ვენას ი ჯეჲ ლოქ ნო̄მამუ ღჷრი
Line of edition: 4    ამჷნ ლეჟა. ალ ამბავ ლოქ ჩოთჯირვა ქრისდეს ჲეშმა̄ჲშდ ი ღოშდ
Line of edition: 5    ლოქ ემტეხე̄ლი მა̄ზაშხენ ი მა̄ზაშნუნ ლოქ ქრისდე̄ ნანერგავ ლიხ
Line of edition: 6    ვენახარ ჩჲა̄გ ი მა̄ზაშჷნლეჟა ლოქ ჲეშმა̄ჲშ, მარა ჲეშმაჲს ვენახი
Line of edition: 7    მჷქაფ მჷნცხარ ლოქ ოთნერგავა ი ქრისდე̄შდ ჩუ ლოქ ოთღორვა
Line of edition: 8    ამჟი, ქრისდეს მიჩა ლჷვილდ ჭიშხ ლოქ ხოყი̄რა ბეჩჟი იემჩედ ლოქ".
Line of edition: 9    ქრისდე̄ ჭიშხი ნაგემ ხა̄ჲშხა ათხე ალ ადგილს ი ბეჩჟი ჟი ხეთრა ლჷჩჴვი̄რე,
Line of edition: 10    მჷგდა̄ჲ ვილიშ ი ქრისდე̄ ჭიშხი ნაგემ ი ამხენქა მჷრე̄ს ანსყე
Line of edition: 11    ხალხდ ალ არაკ. ალ ადგილს ი გიმს ი ეჩექა̄ მიდამს ჩი̄ს ქრისდე̄ ჭიშხი
Line of edition: 12    ნაგემ ხა̄ჲშხა. ათხად ალ ბეჩ ჟი ლჷქჷრთე ლას ჴვილავშ ი ამეჩუ
Line of edition: 13    გზა̄ვრალ უსტა̄რუნს ი̄ჲრენდახ, მარა ათხე ნაქჷრთუნ ჴვილა ჩუ მეხვრე
Line of edition: 14    ლი ი ეჯ ადგილქა მახე შარა შუკვ ლი მჷსყე, მარა ჟახად ეში̄
Line of edition: 15    ჟასსედა ალ მიდამს ქრისდე̄ ჭიშხი ნაგემ. ამჷნლექვა ბარ ლი ი ამჷნლეჟა
Line of edition: 16    ხოშა მჷცხი ხაზნა, საფჷრცაგ ვენახი̄ დე̄მე ხაზნახ ი ლენტხანლეჟა
Line of edition: 17    ჲადურდ დე̄მე არიხ ვენახარ. ალ არაკ სოფელისა მე̄ვარ დო̄სგჷნღო
Line of edition: 18    ისმი ი ჲერხის ათხადა მა̄რე̄ლს გაცხაჲდ ხაჯრავხ, ერე ქრისდე̄
Line of edition: 19    ჭიშხი ნაგემ ლჷმა̄რე̄ლას ბეჩჟი ეჯ მიდამქა ი ეჩჷნლექვა. ლეჩხუმთე
Line of edition: 20    ნაღალდ ჩჲა̄გ ხოჩა ვენახარ არიხ ი ეჯ ნიდამჷნლეჟა გაცხაჲდ
Line of edition: 21    მჷნცხარგარ ცრი ცხეკარისა ი ამღა მჷრე̄ს ენსყა̄ნ ამკალიბ არაკ.
Line of edition: 22    ვენახი ღვინელ ქრისდე̄ ნამზჷრ ლოქ ლი ი ქრისდე̄ ნანერგავ ი
Line of edition: 23    მჷნცხარ ლოქ -- ჲეშმა̄ჲშ. ჲეშმაჲ ლოქ ჩიგარ ამსვა̄ლდა ხოლა̄მ ითჲა̄ლ
Line of edition: 24    ი ჩუ ლოქ ოთღორვა ქრისდე̄შდ ამჟი. ქრისდე̄ ნამზჷრ ლოქ ერ ლი
Line of edition: 25    ვენახ, ზედაშდი̄ ეჯღა ლოქ იჴმარიხ ღვინელს ი მა̄დე იშგენ ლეთრას
Line of edition: 26    იმვა̄ლა̄მ. ათხად ე ამჟი ხანწმჷ̄ნხ, ათხე̄ დროჲა ხალხს მა̄მ ხამწამდ
Line of edition: 27    ამჟი, ეჯღა ერე ათხე მაგ ჩვედთორა̄ნ. ჯვინელ ხალხ ჩვედმეჩა̄ნხ
Line of edition: 28    ი ჟანკად ხოფშირა ი ჩუ ცვირხ ხოშა ნაღალდ მაგ მახე ალმე̄ზიარ
Line of edition: 29    ი ხოფშირა ლჷთორ ალ მახე ალმე̄ზიარისა.

Line of edition: 30       ქორა ნაგბარჟი ქა ლედე̄ს დი̄რალდ ცა̄ჲრა̄ მეგემს ხაქვცეხ. მაჲ
Line of edition: 31    საკვრელ ლი, ერე დი̄რალე ლაქვცაჟი ხოჩა დოშდულს ხეთხე̄ლიხ,
Line of edition: 32    ოდო ხოლა დოშდულჟი ნაქვიც დი̄რალს ბღილ ხესყი ი დო̄სგ ქვერნი.
Line of edition: 33    ლადი̄რა̄ლთე იწვანიხ ნადარს, ჲერვა̄ჲს ერე თელდ ხოჩა ჴანარ ხაყა,
Line of edition: 34    ოდო ხოლა ი ზჷმა̄რ ტანა ჲერხი-ჲერხი ჴანილარ ქა̄ჲ დეშ აქთუნეხ
Line of edition: 35    თავარ დი̄რს. ძღჷდ გაწამაწიაჲშვ ჴჷდეხ ცხეკხენ დი̄რს ნადარ.
Line of edition: 36    ლადი̄რა̄ლჟი კუმატდ ლი ლემყალ, მეკვბად ხოჟოღვხ დი̄რი მჷთრინა
Line of edition: 37    ჴანარს, ქე̄რ ოთშყეხ ჟი ლჷტი̄ხ დი̄რ შუკვხენქა, ჴანარსი̄ ქე̄დყევნი
Page of edition: 177  Line of edition: 1    ი ჩვედმოცალიხ, მარა ხვაჲ ნადი̄რა̄ლ მუჟოღვ ერ ლოხჟოღვნი,
Line of edition: 2    მარცხ დე̄მ ხელკი ეჯკალიბს. დი̄რი ლათრინაჟი ყე̄ვარსი̄ სგა ხობემხ
Line of edition: 3    ჴანარს, ოდო ეშხუ უ̄ღვაგარ დეშ ხემწირ. დი̄რალ ჲადურდ ძღჷდარ
Line of edition: 4    ლიხ, ჯო̄დიარ ი მენგრე. ფიშირღე̄თ ხეკვეს ლე̄სეხ -- ჲერხი თოყა
Line of edition: 5    დი̄რალდ ლჷყა̄რჟი, ჲერხი -- სათავად, ჲერხი -- საბანდ დი̄რდ, ჲერხი --
Line of edition: 6    დარბაზიშდ ი ჲერხი -- ლაცხვენა̄რდ. ალემაგ დი̄რალე ლიჴდე ცხეკხენ
Line of edition: 7    ალა̄ლა გვეშ მა̄ ლი. ფიშირ უ̄ღვა ხოჩა ბჷდრაჲ ჴანარ ხაწჷხ ი
Line of edition: 8    ფიშირ მა̄რე მუმურჯი ლალგმა̄ლჟი ქორაშ ი ეჩა ასმა̄ ლაჴდაჟი.
Line of edition: 9    მაშე̄ნე იგჷრჯილიხ დი̄რალე ლაჴდაჟი ი ლალკირა̄ლჟი, ალჲარ ფე̄დჲას
Line of edition: 10    მა̄დ ითხიხ ი ჯო̄დჲად ლი ლე̄ზი ალჲარე ლიჴდე̄ გუ̄ნღა, ამღა ფე̄დი̄
Line of edition: 11    ნაღალ ი ნა̄თიარ ხონჴრიხ მოლგმა̄ლ მეზგას. ამღა ლი, ერე ბეჩი ქორა
Line of edition: 12    ლიგემს ადვილო̄ლდ დეშერ ხეკვჲენი, მე̄ვარ ლჷმა̄რე მო̄დ ი̄რი
Line of edition: 13    ჩი̄ნოვშ. მოლგმა̄ლ მეზგე̄მი ზურა̄ლ ლირბჲელს ხაშდბა ჴელვანარეშდ
Line of edition: 14    ი აშ მჷშჲარეშდ, ჲესი-ჲეს, მაჟებჟი, თჷქს ი ხალიკსი̄ ხომა̄ჯი ფალანგთეჟი
Line of edition: 15    ჴელვანარს ი თჷქი ლაგნასი̄ ქა ხაწა თჷქი მჷგნა̄ლას. თჷქდ
Line of edition: 16    ჲერუ ნაზჷმს, ჲედ -- სემის, სილაჲს იჩოხ ი მესმა ნა̄თის, ჲედ მე̄ვშთხვა
Line of edition: 17    ნა̄თის -- კირს, მარა ხა̄ლ მოშ ხოშა ლჷკირ ი̄რი თჷქ, ეჯი ხოცხახ.
Line of edition: 18    მჷხნისგა̄მდ ერ კირ ხე̄რი თჷქს ი ხჷნსჷე -- სილაჲ, ეჩქა ხაბჟახ მაჩე̄ნე
Line of edition: 19    თჷქ ი ძღჷდ ბჷგი ხეფსი ეჩქა. კირი მჷგნა̄ლა მა̄ჲზუმსი̄ ხვაჲს აჩდი̄ნნიხ
Line of edition: 20    კირი თჷქს, ეჯზუმშვ ხოშა წიაღ თჷქ ხეფსი ი ხობგა̄მდ ხეჷდურნი
Line of edition: 21    ლალგმა̄ლ ბეჩარს ი ბჷგი ჭვედვარ, ხეფსიხ. ეშხუ ლუშნუ ლჷდჷრბაზ
Line of edition: 22    ბეჩი ქორ ხვაჲ დგმას იცა̄დი. ხოჩა ლჷდი̄რა̄ლე ქორა ლჷყა̄რს
Line of edition: 23    ჩუ ლილღაი̄ჲ მა̄მ ხაწჷხ ლუნთისა ხოშა მუსობჟი ი ამკალიბ
Line of edition: 24    ქორ ივალადეღ გეჭნი ი ხვაჲ აგის ლჷ̄გხ ამკალიბ ჯვინელ დროჲჟინა
Line of edition: 25    ნაგემ ქორალ. აშ ლიხ ჩუ ლუჭყურტუნე მეჲად ლემსგი ნა̄შვ
Line of edition: 26    ი ნაკვა̄მ, ოდო ლიხვერიშ ჲედ ლირეღვიშ დე̄სამა ხეთი̄რიხ. ქა̄მენჟი
Line of edition: 27    ჟაცმენიხ ი ეჩანღო ჟაფიფქავიხ ი სგა̄მენ ლჷჭყურტუნე ეშ კჷ̄რეხ ი
Line of edition: 28    აღლჷნეხ მეშხად ჭვედვარ, დი̄რალ, ჭერ, ლაცხვნა̄რ, ლაწრექვა̄ლ ი
Line of edition: 29    კიდბონარ. ხვაჲხანჲა ქორს ხაწჷხ ჲეს-ჲეს დარბაზი ჭერი ლიცა̄დი,
Line of edition: 30    ბეჩზუმს დეშ გეჭნი მეგმი ასმა ი ჭერ ჩუ ერ ქვერნი, ქა ხოცა̄დიხ
Line of edition: 31    ი მახან ჟავყალიხ. ლაყულფა. მაჲ საკვრელ ლი, ლჷმსკადად არი მჷსყე
Line of edition: 32    მიჩა ლჷკერჲაჲდ. ლაჯჲერა̄შ ი ლაფკანა̄რ ჩი ქორს ხა̄რ დარბაზს
Line of edition: 33    ი მაჩუ̄ბს, ჲერქთა აგის. ისგჷნტაფარი̄ ხვაჲს გეჭნიხ ი ეჯჲარი̄ ჩუ
Line of edition: 34    ლჷმშხა̄ლე ლიხ მეჲად ნაკვა̄მინ. გვალარს ე̄სა ოხცა̄დნეხ, ოდო
Line of edition: 35    ისგჷნტაფარ ხვაჲს გეჭნიხ. ისგჷნტაფარს ხა̄რხ ლანთეჲარ კუმში
Line of edition: 36    თხუმვარე ქა ლაქვჭენდ ლადჲარა̄ლჟი. იკაფ, ერე ჲერუ უ̄ღვა ჴანარე
Line of edition: 37    ლანთეჲარ ხა̄დეს ი ვოხუშდ-უსგვა ლანთეჲ ფურალეშდ ი ჲერუ
Page of edition: 178  Line of edition: 1    ლჷლანთეჲ ლაჩა̄ჟი̄რ. ამჟი ლჷმა̄რ ჯვინელდ წეს, ერე მეზგას, ჲესვა̄ჲ
Line of edition: 2    მეზგე̄მი ჩქიმ ხეგნო̄ლ, ხეკვეს ხაყე̄ნან ჲერუ უ̄ღვა ჴანარ, უსგვა
Line of edition: 3    ფურ ი ჲერუ ჩა̄ჟ ი ისგჷნტაფარი̄ ამჟი მჷსყე ხუღვახ. ისგჷნტაფ ჟიქა̄ნ
Line of edition: 4    ლჷჭერ ლი ი ეჩის ხა̄ჲშხა ნე̄შკა. ამხა̄ვთეჟი აგნახ ლე̄ნშყა ხამარს:
Line of edition: 5    ლე̄ჲღაბს, ლემე̄ჲსარს ი ლეზო̄მახს. ალაგობ არიხ ი ხა̄მნეხ ლუბურდი̄ნა
Line of edition: 6    ქერიშ, ჲედ სიმინდი ჴიცს. აშ ილგვარიხ ეშხუ-ჲერუ თოისა,
Line of edition: 7    ერე გასიმფო̄რ ხეფსი, კამჷლს ღო̄თ იგნე ნალგვარას შიყრა. ჲესვა̄ჲ
Line of edition: 8    ერე ხოლგვარა ხეყე̄ნი ლაძჲა ხამ, ეჯი მე̄ვარ ჟახე ხაბჟახ. ფელკარს
Line of edition: 9    ჩვალვრა̄ლიხ, ჲერხი სგა იდე̄სხ მიჩა წათხთე ი ეჩანღო, ეშხუჲერუ
Line of edition: 10    ნაგზანღო, ქა ხორკინეხ ლაყულფამჷყქა, ერე ლემესდ ქა̄ნსო̄რას
Line of edition: 11    ი ქა̄ნფჷრას ლჷლორ ფელკარ ი ეჩანღო ქა ხორკინეხ ლჷფრა
Line of edition: 12    ფელკარს ლაკვა̄მა აგის ქორა ჭვედს ი მჷწგხჟი ხაქვცეხ თვით ლაგაფს,
Line of edition: 13    ჟაცხვლიხ ი ჟაჯბიხ ლეზობდ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.