TITUS
Svan Prose Texts IV (Lashkh)
Part No. 143
Previous part

Text: 143 
Page of edition: 178 
Line of edition: 14 
CXLIII. ლითჲა̄ლი


Line of edition: 15       ლიმრიე̄ თოისა იბნი კვეცნარეშ, მალფხვ მანა̄შარეშ, ხულგვარეშ
Line of edition: 16    ი ქერალე ლითჲა̄ლი. მჷთი̄დ ხოშანაღალდ ზურალე̄ლ ლიხ ი
Line of edition: 17    ღვაჟარ მჷკე̄ნად ხაჭიმხ. სემი-ვო̄შთხვ მჷთი̄ ზურა̄ლს ეშხუ მჷკე̄ნე
Line of edition: 18    ჟი ხაჟღუნე ლიკე̄ნეს. ჲესი-ჲეს მე̄ვარ ხემქარა̄ლხ უშხვა̄რ მჷთი̄
Line of edition: 19    ზურალე̄ლ ი ღოშგინ მეჭემ მჷკე̄ნე მა̄რე. ნებვზაპილთე ეჯ ლადეღი
Line of edition: 20    ნათი̄ს ჩი̄ს ჩვა̄ჲჴა̄ლიხ ი ლჷ̄ჲჴე დაბისა ჩუ ლჷ̄გხ აჴარ ჲერუ-სემი
Line of edition: 21    ნაგზი, ერე ნამშავს მა̄ჲ ზჷსყი ბალხო̄რა ხენჩჷდი, მაგ ერ ქე̄ნზჷსკენდეს
Line of edition: 22    ი ზჷსყი ნამშავი̄, მახე ლჷთჲე, ხოჩა̄მდ ენფჷრე̄ნდეს ი აჴარდ
Line of edition: 23    ამღა აგა̄ლიხ ი ჩუ̄ჲ ამღა ხარა̄გვნეხ დაბისა ლჷგა ლეჲჴას. ნამშავარს
Line of edition: 24    იმა̄ჯიხ ლჷფა̄რცხ სევარშვ, თვით ჲერუ აჴ ნამშავს ხოსყიხ
Line of edition: 25    სევჟი ი ეშხუ უ̄ღვა ჴანარ ქა ხემწირხ ლათრინად. ხოლა შუკვარე
Line of edition: 26    ბედშვ ი გოლიჲ ადგილარხენ ლიჴდე̄ ბედშვ ურმალ და̄ს ხუღვახ ი
Line of edition: 27    მა̄მ ლიხ სგა ლუმთქვე ურმალე ლიჴმარის ი ლისყის, მარა ჴანარ
Line of edition: 28    შვანთა̄ნ დე̄მე ხაყახ -- ხოჩა ტანაშ, ხოჩა თვალაშ, ხოჩა ლუმუჭ ი ხოჩა
Line of edition: 29    ლამჷრგიშ ი ლჷჴმაშ მჷბდერ. მჷშაჲ ჴანარს ლიღბანჟი იყდა̄ლის
Line of edition: 30    ი აგის ხოჩა̄მდ ერ ხო̄ზნანდახ, ძღჷდ ტანაშარ ხეფსო̄ლდახ. ჴანარს
Line of edition: 31    ლჷჴანს მა̄მ ჴჷდახ, მაგ მახე ღაბნო̄ლარ ლასხ, ხოშა ნაღალდ, ბახსანხენ,
Line of edition: 32    ჯეგემხენ ი მალყა̄რხენ ნაყდვარ, აშ ყარჩახენი̄ ხვაჲდინ ჴჷდახ,
Line of edition: 33    მარა ლჷყჷრჩუს დეშ ხეფსო̄ლხ ამთა̄ნ ბჷგი მჷშაჲ -- ბახსანიშ,
Line of edition: 34    ჯეგმიშ ი მალყა̄რხენ ნაჴიდთა̄ნ. ლაჭმადი̄ ვო̄ბაშინ ღჷ̄რდახ ლესვი̄რათე.
Page of edition: 179  Line of edition: 1    ი ქაშაგთე გუშგვეურე̄ლ ი ეჩე ეშხუ-ჲერუ თოჲ ჩუ ხერა̄გო̄ლხ,
Line of edition: 2    აჭმახ სავჲარე ლა̄რე̄ლს ი ნაჭმუ̄რისა ხა̄ვდუდახ ქირაჲდ ღაბნარს
Line of edition: 3    ჲერუ-სემი ლჷზჲარს ი ქა ჴჷდახ აგითე ი ალჲარს ხეფსო̄ლხ ხოჩა
Line of edition: 4    ჴანარ. აშ ლჷქშაგუ ჴანარი̄ ხეყე̄დახ, ათხე̄ჲ ვო̄ბა აგის ცვირხ
Line of edition: 5    ლესვი̄რახენ ნაჴიდ ხოჩა ი ხოშა მენგრე ტანი ჴანარ. ნა̄რგილ ჴანარს
Line of edition: 6    ხოხრა ტანაშე̄ლარ ხეფსო̄ლხ ი ამღა მა̄მ ხა̄ზდახ ლჷგონ. ხოჩა გვამი
Line of edition: 7    სევს დეშ ათრინეხკ ოტო̄ლ ტანი ნა̄რგილ ჴანი̄ლარ ი დე ლადი̄რა̄ლჟი
Line of edition: 8    მოშ იმარგხ დამბალ ჴანი̄ლარ; ლუსუ ჴანარ, ჲერხი ეში̄,
Line of edition: 9    კამბჩარს ხასრეხ მჷბდერდ ი მჷმგემიდ. ლანჭლიჟი ბობშარს ჴანარე
Line of edition: 10    სგობინ მუჟოღვდ ინჴრა̄ნეხ, ცარჲელ სევ ერ ოსთირიხ ჴანარს ნამშავი
Line of edition: 11    ლაჴდად, ეჩქა ჴანარე სგობინ მუჟოღვდ ლჷჲე ბობშ ჟი ხესგვრი
Line of edition: 12    ცარჲელ სევჟი, ხოძხალი ჴანარს ი ჟი ერ ოსსყე̄ჲნეხ სევჟი ნამშავს,
Line of edition: 13    ეჩქა ბობშ სგობინ ხოჟოღვ ჴანარს, ლეთხვმარს ხოგდური ი
Line of edition: 14    სევ დე̄მამ ხებკი ეჩქა. მჷნჭლი მა̄რე ქა დეშ ხეყვტენი სევს გოშის
Line of edition: 15    ნამშავშ, დო̄სა ედკა̄ფე̄ნდეს ი დო̄სა ეთპი̄ნტე̄ნდეს ალემაგ ნაჭი̄რ ნამშავი
Line of edition: 16    სევ. დი̄ნო̄ლარ დეშ იმარგხ ჴანარე მუჟოღვდ, აშ თელდ ლჷზარგალე
Line of edition: 17    დი̄ნო̄ლარ მო̄დ ი̄რიხ. მუჟოღვდ ლიბობშნეშ ხამთქვეხ
Line of edition: 18    ჭყინტო̄ლარს, ე მე̄ვარ ლჷსო̄ყე ი ფეთიან ჴანარ მო̄დ ი̄რის ქალეჟოღვ,
Line of edition: 19    მარა ხვაჲდინ ლუსუ ჴანარ ფეთიან ლიხ, სერთხი̄ მე̄ვარ ლუშვი̄ნა̄ლე
Line of edition: 20    ლუსუ ჴანარ. ნა̄რგილ ჴანარს ბობშ იზურა̄ლ მაგ ქა ხოჟოღვ, ალჲარ
Line of edition: 21    მე̄ვარ შვიდობიან ლიხ ი ლემყალ და̄ს ხარხ, დე ბურჯაჲ ჴედნიხ
Line of edition: 22    ნა̄რგილ ჴანარ, ლუსუარ მე̄ვარ ბურჯაჲ ლიხ ჲერხი ი ბობშარს ამღა
Line of edition: 23    ხაყლუ̄ნიხ ლუსუ ჴანარე ლიჟოღვდ. აშ ჩი̄ს მა̄ ხაწჷხხ ლუვღვი̄ნა
Line of edition: 24    ჴანარს ქა მუჟოღვ, დე ლაჴანჟი, დე ლა̄ჲნეულაჟი, დე ლანჭლიჟი
Line of edition: 25    ი დე ლაკლავჟი, ამსვა̄ლდშა̄ლ ხესმიხ პატრონი ნა̄ქვ "იშ, იშ" ლოქ
Line of edition: 26    ი "ხი, ხი" ლოქ ი ლაჴანჟი გაგფი̄რიანდ ლიჭო̄ნე, ე̄რ ხატუ̄ლი ღენწუში
Line of edition: 27    მუგდური "ანტახ, ანტახ"-ს, ი ლა̄ზჟი ლაჴანი კვალქა "ჟიხ
Line of edition: 28    ი ჩუხ", მჷგდა̄ჲ მა̄რაშა̄ლ ხესმო̄ლდეხ, ეჲჟი თასმაშა̄ლ იჭო̄ნანჲელხ
Line of edition: 29    მჷჴნი̄ ლუ̄ქვჟი ი მანდაჟი. ამკალიბარ ხეფსიხ ჲერხი ნა̄რგილ
Line of edition: 30    ჴანარს. ათხად, ლუსუარ ერ ითხო̄ლხ, ნა̄რგილ ჴანარს მა̄მ ხა̄ზდა
Line of edition: 31    ეჯზუმ ლჷგონ, მარა ათხე ლუსუ ღაბნარე ლიჴდე ერ ჟენძვირა̄ნ,
Line of edition: 32    მე̄ვარ ლჷგონ ესდა̄ნ ნა̄რგილ ჴანი̄ლარს ი ლეჴნჷ̄რი ღუნვარს მე̄ვარ
Line of edition: 33    ირდა̄ლიხ. ათხად ე ლეჴნჷ̄რის ჴჷდა მეზა̄ლ ფურ, ეჯი ლაძჲად
Line of edition: 34    ხამკახჷ̄ნხ ი ღუნობჟი აძჲენდახ ღჷნჲემურჟი ი ჲედ მუშგვრი̄შვდ ი
Line of edition: 35    მუშგვრიანობჟი, მარა ათხე ლერდიდ ხოშა ხამკახხ ლეჴნჷ̄რი ღუნვარ.
Line of edition: 36    ლეფვრა̄ლი ღუნვარს დე̄მ აძჲენა̄ლდახ, სერთხი̄ ხოჩა მე̄შგი ფური
Line of edition: 37    ღუნს, ჟი ირდჷდახ ი ფურს ხაფსახ. ლერდი ღუნს ხოშა ხვა̄ჲ

Page of edition: 180 
Line of edition: 1       ხანს ხაქმინეხ მიჩა დის ლაჩგვანდ "ხოჩა ლოქ ეხფასი" ი ლეძჲე.
Line of edition: 2    ნი ღუნს თოჲ ი ჲედ ვოხუშდ ნაგზიგარ ხაჭმინეხ ი ეჩანღო ქა
Line of edition: 3    ხაყვლეხ ი ჩვაძჲენიხ. ხვა̄ჲ ხანჲა ლუყვი̄ლ ღუნს მა̄ ხაყა ლაძჲად,
Line of edition: 4    ჩუ ჩხეფნი ი ხოლა ლეღვ ხა̄რ, მახა ნაყვილსგარ ხაყა ლეძჲენიდ ი
Line of edition: 5    ღუნი ლეღვ ხაბჟახ ი ბატკიშ თელდ მაჩე̄ნე ლეზობ იშგენ ლეღვარისა,
Line of edition: 6    კვიცრა̄ ლეღუნქა. ეჩქადა დროჲჟი ლეურგა აძჲენა̄ლდახ ფიშრე̄მინ
Line of edition: 7    ღუნვარს ი ძღვენდი̄ ღუნვარს ხოჴდახ ლეურგას მინე გლეხარ,
Line of edition: 8    მარა ათხე ე̄ს ხეყე̄ნი ლეძჲენი ღუნ, ჯეჲ აძჲენი მიჩაშვდ ი
Line of edition: 9    ძღვენდ ლეჲეს მა̄მ ხა̄რ. ღუნი ტუფვარს მე̄ვარ ხემკახა̄ლდახ ათხად,
Line of edition: 10    ქა̄ციარდ ხამკახჷ̄ნხ, მარა ათხე̄ დროჲჟი̄ და̄რ იშგდე ქა̄ციარე ლიცვემს,
Line of edition: 11    სერთხი̄ ათხე̄ დროჲა მახეღვაჟარ. ჲერხის კე̄შდ ლექვემდი̄
Line of edition: 12    ხამკახჷ̄ნ ღუნი ტუფ. კე̄შდ მაჩე̄ნე ხაბჟახ კვიცრა̄ ტუფ, ნათხვიარე̄მიშ,
Line of edition: 13    ილვიშ ი დეშდვეშ. ფიკვი ტუფი̄ ჩუ ლი ლჷლგონ, მარა ფიკვი ტუფვარს
Line of edition: 14    ჟაჴარდ ი კუპრალდი̄ ასყჷდახ ი მე̄ვარ ლჷგონ ხა̄ზდა. ღუნი
Line of edition: 15    ტუფ ლუნთისა ლეჩფჷლდი̄ ხამკახხ ლათნაღდ, ამშა ჩაფლარ ჟი დე̄მ
Line of edition: 16    იკვრემიხ ი ეჯღა ლიხ ხოჩა თანაღქა ლა̄ზჟი. ლათნაღდ დაჴლა ჴემრა̄ლე
Line of edition: 17    ჩაფლართა̄ნ დე̄სამა ლი, დე̄სა ლი ლემყალ ჟი ლიკვრემედ ი
Line of edition: 18    ლიშხუ̄რედ. ფათვარულაჲ სგელ ჩაფლარშვ მჷთნაღ დეშ იმარგ, ჟი
Line of edition: 19    ხეკვრემი ჭიშხარ ი ქა ხეშხუ̄რი. თანღა̄რალქა ლაზელა̄ლჟი ხვაჲ
Line of edition: 20    ღალ ლუშხუ̄რე̄ლი ეჩქად, მარა ათხე̄ დროჲჟი და̄ს ხა̄რ ლეთნაღი,
Line of edition: 21    ღე̄რბათშვ, შუკვარე მჷსყან, მა̄დე̄ჲ დეცქა მეპე̄ნა̄ლ აეროპლან იზელა̄ლ
Line of edition: 22    ჩი ლადეღ მესტიათე ქუთა̄შხენ ი ეჯნოვშ ხეღრისა̄ნ მუშვანს
Line of edition: 23    ქა ლიპე̄ნე შვანხენ ქუთა̄შთე თანაღს ლითნაღი̄ მჷქაფ ი ჭიშხარე
Line of edition: 24    ლიშხუ̄რედ და̄ს ხა̄რ ლემყალ ი დე დაჴლა ჴემრა ლეჩფჷლარ ე̄ს ხაწჷ̄ხ
Line of edition: 25    ალ დროისა. მაშე̄ნე ალო̄ თხუმ შვანე გიმჟი ლიმრიე̄ თოჲ ლი.
Line of edition: 26    ალ თოისა ლი ლიჭმი̄რჲელ ლახვარისა, ლიჴდე ლახვხენ ჭემარეშ.
Line of edition: 27    აგი̄ დაბრე ლითჲა̄ლი ი ლინჭლი ლეკლავი ნამშავიშ, ლილჩა̄ლი
Line of edition: 28    სიმინდარეშ ი სიმინდშვ ლჷლა̄შა დაბარისა კვეცნარე ლილა̄ში ი მანა̄შარეშ
Line of edition: 29    მანჟღორიშ. ვოდ სიმინდარ ჟი̄ქჩო̄ლდეხ, ეჩქად ჴედნიხ ი
Line of edition: 30    კაჩუშ მერდა სიმინდარისა ქა̄ლა̄შიხ მანჟღორ კვეცენს ჲედ ხულუგვს
Line of edition: 31    "ყუბლაჲს" ი ეჩანღო ქალჷლა̄შას ქა̄ბე̄რგეხ ბერგალშვ ი ამჟი
Line of edition: 32    ლჷლა̄შე მანჟღორ ხონ კიდბონისა ხუღვე̄ნდეხ ხოჩა ლუვზერე ამშა
Line of edition: 33    მაჴედ, ეჲჟი ხაბჟახ. ამკალიბჩიქა ნალა̄შ მანჟღორ ლუფხვისა დო̄სგ
Line of edition: 34    ლეთი̄ჲდ ჴედნი ი წვარ მანჟღორიშ ი ვოჴ ლა̄ჲდი̄ ხოჩა ჭემს ხასრე,
Line of edition: 35    ეჲჟი ხასჲამ კუმაშს ლეზობდ, ოდო მალფხვ ნამშავი ვოჴ ი წვარ
Line of edition: 36    მე̄ვარ წაიდ ლეზობ ხა̄რ კუმაშს ი ამშა გუ̄ნღა ლი, ერე ამჟი მჷწხა̄რ
Line of edition: 37    მია̄შისა იჭი̄რეხ თხუმს ი ჩვალა̄შიხ მანჟღორალს. ჲედ ხეკვეს ეშ
Page of edition: 181  Line of edition: 1    ამჩიქა ედლა̄შე̄ნდეხ მანჟღორალ, დო̄რი̄ მე̄ვარ გვიან მუჟღორ, მჷხარ
Line of edition: 2    ერ მუს ანჴდენი ი ლადი ჟი ლჷლა̄შე ი̄რი მანჟღორშვ დაბ ი კაკლარ
Line of edition: 3    სგა ლეხნახი მუსს, ეჩქა ლოქ ხოჩა მაჴედ ჴედნი, ეჯ ზაისა. ჟი
Line of edition: 4    ლჷლა̄შან ე კვარმობ ი̄რი ი გიმს აკვრემნი, ეჩქა მანჟღორი კაკლარი̄ ჩუ
Line of edition: 5    ლოქ თქვესნიხ ი მე̄ვარ ლემყალ ლი ხოლა მაჴედობაშ ეჯ ზაისა ეჯ
Line of edition: 6    დაბარხენქა. სიმინდარისა ქა ლჷლა̄შე მანჟღორ ჟი ხოჩშე მუსი ლიჴედს
Line of edition: 7    ი კვარმობს ჟი ლიცვალეს ი ცივალდ მეჴდე მანჟღორ ერ ლეხნახი
Line of edition: 8    მუსს, ეჩქა სერ მა̄მ ლი ლემყალ ლიდა̄ვშენ ი ხოჩა მაჴედობ ლი
Line of edition: 9    ანღელს ეჯ ზაისა მანჟღორალეშ, კვეცნარ ი̄რიხა̄ მანა̄შარ, მა̄მ ხედეხუდე
Line of edition: 10    ლიხ. მია̄შიე̄რუ შვანისა ლიგურკე̄შ ი ლიმრიე̄ თოჲარ ლიხ ი
Line of edition: 11    მაშე̄ნე მჷწხიე̄რუი̄ ალ თოჲარისა ლიხ, კელდ ე ხოჩა სიამუამ ამინდარ
Line of edition: 12    ედგენიხ ალ თოჲარისა. ე ღალ ხოლა ავდრა̄ლობ ედგენი ი ჲედ
Line of edition: 13    გვალიობ, ეჩქა დეშ ლი ანღელს ეჯ ზაისა ხოჩა მაჴედობ, დე ლილხვი̄რი
Line of edition: 14    მოშ იჩმი̄ნი, ეჯღა ერე ავდრა̄ლობჟი ლაჭმად ლახვართე
Line of edition: 15    დეშერ ღჷრი, ჩუ ერ ადჭემახ ავდარისა, ჭემარე ქა ლაფრა ეში̄ დე̄სა
Line of edition: 16    ლი დარულაჲ ი ხოჩა მჷჟა̄რულაჲ ი ლჷჭმე ლჷმა̄ნე̄ლ ჟესქვერნიხ
Line of edition: 17    ი ჩვედდა̄ვშიხ ჭემარ ი მჷჭმას აშ ცუდდ ლიჭმეგარ ლეხსედნი.
Line of edition: 18    მაჴედობ ხოჩა ი ხოლა ამინდი გვეშ ლი ჩჲა̄გ შვანისა. ა̄რიხ ხოჩა
Line of edition: 19    ამინდარ -- ი̄რი მაჴედობ, ხა̄ლ ჯეჯლო̄რა̄შ, ეჯჟი სიმინდარეშ ი ი̄რი
Line of edition: 20    ხოლა ამინდობ -- ი̄რი ხოლა მაჴედობ ეჯ ზაისა ი მაგ ლჷღლატე სედნი
Line of edition: 21    მაჴედხენ. ამშა ლჷყა̄ლვე ერ ლჷმა̄რხ, ეჯღა ოხგადა̄ლახ ხვაჲ
Line of edition: 22    შუმი ნაგად უქმარ, ჩიტობ ლოქ ლი̄ა, პწკალობ ლოქ ლია̄ ი ხვაჲ
Line of edition: 23    იშგენ ამკალიბარ ი ხვაჲ რიგი ლიდბაშა̄ლი დაბარისა ლი
Line of edition: 24    ლიმზჷრლიჴერა̄ლ მაჴედხენ. მო̄შ ჴა̄ჩუარხენ ლიხ ლელჩე ლჷსმინდ დაბარ,
Line of edition: 25    დეშდვარხენ ლილჩეს ერ ელყეჩედ, ოდო დეშდვარ, სიმინდარსგარ
Line of edition: 26    მა̄დე̄ჲ, ყუბლაჲ ხულუგვსი̄ დე̄მ ცურეხ უბურსლავად. ავდრა̄ლ
Line of edition: 27    მია̄შიე̄რუჟი ჭემრე ლიმა̄რე, ლითი̄, ლიკლავა̄ლი ი ლინჭლი მაგ ქა ქეხნიხ,
Line of edition: 28    მიჩა-მიჩა დროჲჟი ი ალო̄ თხუმჟი მა̄მ იჩმი̄ნიხ, ლჷთჲე ნამშავარ
Line of edition: 29    ლეჲაჴა̄ჲსა ქვერნიხ. ლითჲა̄ლი ლა̄ჲდი̄ ერ დოშ იჩმი̄ნი მიჩა დროჲჟი,
Line of edition: 30    ეჩქა ჩუ ლიშჷ̄დდ ლი ლემყალ კაკლარეშ ი ცარჲელ ღერალგარ
Line of edition: 31    დე̄მნარ ლემკახე ლიხ. ლიკლავჲელ ლა̄ჲდი̄ ქა ქეხნი ი ჟი ლჷმცხა̄ნან
Line of edition: 32    ლეგ ლეკლავი ლი. ი ავდრობჟი ჟი დო̄სგ იმცხა̄ნი, ამჟი ყჷლეხ
Line of edition: 33    არაკს, ერე "ლიმრიეს ლოქ მჷცხი კერჲაჲჟი ისგვრი" ი ამჟი ლი,
Line of edition: 34    ერე შვანე მჷკთილე ი მჷჴცე მია̄შიე̄რუჟი̄ნა ამინდარ ლიხ. ი̄რი ხოჩა
Line of edition: 35    ამინდ ი ტებდი̄ ქუნე̄გ ე ჴან, ი̄რი ხოჩა მაჴედობ ი, ლავბედრა̄ლდ,
Line of edition: 36    ი̄რი ხოლა ამინდობ ი მჷცხი̄ ქუნე̄გ, ეჩქა ანღელს ლი ხოლა მაჴედობ
Line of edition: 37    ი მიჩა მჷნჴრი მაიდობ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.