TITUS
Svan Prose Texts IV (Lashkh)
Part No. 165
Previous part

Text: 165 
Page of edition: 200 
Line of edition: 18 
CLIXV. ლამანა̄შურ


Line of edition: 19       ალე ლახვი̄ ლი ი ღელი̄, მარა კჷ̄ლთხი ლახვ მა̄მ ლი, ლაკვმაშდ
Line of edition: 20    ხუღვახ მოაშარას. ლამანა̄შური ღელ ლეგვე̄რალს ჟასპჷნე,
Line of edition: 21    ეჲზუმ ლი. ალეს ხოლა ლილუ̄ხვა̄ლ მა̄მ ხაზნი. ამეჩუ იზგეხ ვო̄ბა
Line of edition: 22    მეზგო̄ლარ ი მე̄რმა ჟახად ნაკანტორაჲსი̄ ხატუ̄ლიხ. ეშხუ აგის შუკვისა
Line of edition: 23    ლამანა̄შურს ხაზვიბ ხოჩა ქვე̄რ სარაგე̄ლ ი ძღჷდ ბეჩ ხაკვა̄რა
Line of edition: 24    სარაგე̄ლმგყ ი ეჯ ტყელ ბეჩს ხეთრა ნე̄სგაჟი ლჷჩჴვი̄რო̄ლ ჭიშხი
Line of edition: 25    ნაზჷმჟი ი ა̄მბვიხ არაკდ ამჟი, ერე ალე ლოქ ლი ქრისდე̄ ნაგემ, ამავ
Line of edition: 26    ლოქ ემჴედ ქრისდე, ამჷნლექვა ჩჲა̄გ ვენახ ლოქ ოთნერგავა, ამეჩუ
Line of edition: 27    ლოქ ჲეშმაჲ ლახხვე̄ნა სგობინისა ი ეჩის ლოქ ხო̄ქვა, ერე ამჷნლეჟა
Line of edition: 28    მიჩ ლოქ ოთნერგავა ვენახ ი მიჩ ლოქ მა̄მ ხა̄რ სერ ლეჟა ლე̄ზი
Line of edition: 29    ი ღოშდუ ლოქ ატახ ამხენისა. ქრისდეს ჩუ ლოქ ოთჯირვა ალ ამბავ
Line of edition: 30    ჲეშმა̄ჲშდ, ხოყი̄რა ლოქ ჭიშხ ალ ტყელ ბეჩჟი ი ღოშდ ლოქ ემტეხ
Line of edition: 31    ამხენისა ი ამჟი ჩუ ლოქ ოთქადვნა ჲეშმაჲს. გაცხაჲდ ამჷნლეჟა
Page of edition: 201  Line of edition: 1    დე̄სა არი ვენახ ი ამჷნლექვა ხვაჲ ხოჩა ვენახარ არიხ ლექვა̄ აშარისა
Line of edition: 2    ი ლეჩხუმს ცხაჲ ხვაჲ. ამჷნლეჟა̄ვ ჲეშმაჲს ლოქ ოთნერგავა
Line of edition: 3    წა̄ნწოფ ი მუჴვა̄რი ი ქრისდე̄შ ოთღორვა, ერე ვენახ ლოქ ოთნერგავა.
Line of edition: 4    ათხე ჩვარი ლუქსურს ვენახ, მარა ეჯი ათხე̄ხი̄ნაშ ლოქ ლი ი
Line of edition: 5    მა̄დე -- ეჩქა̄შიშ. ლექსურს ადესა̄ჲ ჯიში ვენახე̄ლარ ხუღვახ მა̄დხვაჲგარ.
Line of edition: 6    ათხად ამეჩუ საჯვარე̄ლ ხო̄გა̄ნხ ქრისდე̄ ჭიშხი ნაგემ ბეჩჟი,
Line of edition: 7    სარაგე̄ლმჷყ, ი ამექა მოლაკ გზა̄ვრალ იშმინახ ამეჩუ, ლიცს ჩუ ითრახ
Line of edition: 8    ი უსტა̄რუნს ე̄ჲრენდახ ჩიგარ, მარა ათხე̄ დროჲჟი მახე შუკვ
Line of edition: 9    ეხლაკა̄ნ ალეს ი ჟანჟომე ალ ბეჩ ი უსტა̄რუნი ლა̄ჲრენი̄. ალ მიდამს
Line of edition: 10    ჩი̄ს ჟახად ქრისდე̄ ჭიშხი ნაგემ ხა̄ჲშხა ათხე̄ჲ ი ეჩქად ლა̄ჲდი̄; მაჲ
Line of edition: 11    საკვრელ ლი, ერე ალ ჟახე ხეჲშხა̄ნ ამექა̄ მიდამს ჩი̄ს.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.