TITUS
Svan Prose Texts IV (Lashkh)
Part No. 191
Previous part

Text: 191 
Page of edition: 212 
Line of edition: 5 
CXCI. ქვიშ


Line of edition: 6       გიმარს ხა̄ჲშხახ ქვიშიერუ სასა̄ში ვოკერს ი გიმარი̄ სასა̄შრეშ
Line of edition: 7    ლიხ, ჲერხი ლაჴან-ლალა̄შენ ი ჲერხი ლეჭმე̄ლ. ალ გიმრე ჟიქა̄ნ
Line of edition: 8    კჷ̄ლთხი ლჷცხეკ ზაგარჟი ლჷ̄გ ქვიში საყდარ, მე̄ვარ ჯვინელ საყდარ
Line of edition: 9    ლი თა̄რიძელი ჟახაჟი. ღოშგმე თანაფს ხაზნახ ამეჩუ სკარობ
Line of edition: 10    ი ლიმზჷრ ი ხვაჲ ხალს იხვრჲელი ალ ლადეღ ამეჩუ. მულზონა
Line of edition: 11    ხატარს ასგვჯინეხ ამხა̄ვ ალ ლადეღ დიდება თა̄რიძელა̄ ლაღრა̄ლუშ.
Line of edition: 12    ღუნს აძჲენიხ ი ხვაჲ ტაბლარ ი არაყ ხოჴდენიხ მულზონას ალ
Line of edition: 13    ლადეღ მომზჷრ ხალხხენქა. მულზონას ხატცახან ბა̄ჲრახალ ხოყდა̄ნახ,
Line of edition: 14    ჩუ იღვლაჲეხ ი კვირჲა̄ ლიღრა̄ლს ყჷლეხ ი ეჩანღო მომზჷრდ
Line of edition: 15    მეჴდა̄ლას ჩვამზჷრიხ ამე̄ნი ლა̄ქვი̄სუშ ი ეჩანღო ჩუ ისგვრიხ ლასკარდ.
Line of edition: 16    ლეზობ-ლეთრე ჩი̄ს მიჩა-მიჩა ნაჴიდ ხუღვახ ი ილხნეხ, ჭიშხაშსი̄
Line of edition: 17    ხვაჲ რიგიშს იჩოხ. მულზონა ალ ლადეღ სოფლი ქვითს ი
Line of edition: 18    მავინი მუჩომს ჩს ჩვაჭთუნეხ ი ბა̄ჲრახჟი ჟი ხოკცენიხ, ერე ვოდ
Line of edition: 19    ლოქ ალ ფჷრი ბა̄ჲრახ დო ედზჷსყე̄ნდეს ი ბალარ მო̄დ ენჴჷდის,
Line of edition: 20    ეჩქად ლოქ, ჲერვა̄ჲს ერ ადჭათვნიხ, ეჩა საშველ ნო̄სა̄ვ ლი ი ჲერვა̄ჲდ
Line of edition: 21    ლოქ ლადი ჟენჷლხინას ი ხოჩა̄მდ ა̄რდეს, ეჩის ლოქ მაშედუ
Line of edition: 22    ხა̄რ თა̄რიძელ ქვიშაშიშ; ალ ქვიში საყდარხენ ქვიშობლადღი მე̄რმა
Line of edition: 23    ლადეღ თა̄რიძელი ხატს ლეჟაუდ ასგვჯინეხ სასა̄ში საყდართეჟი
Line of edition: 24    მულზონა დიდება თა̄რიძელა̄ ლაღრა̄ლუშ ი ლასგვჯინაჟი ხატიშ
Line of edition: 25    სოფლი მეზგე̄ლ ხოხვჲენიხ ლალგენე̄ლს, ხოშა ნაღალდ გიცრალს, ი
Line of edition: 26    მულზონა ჟი ხოლგენიხ მუტვარშვ ნიგბაჟი ი ლერსგვენ ბარჯჟი
Line of edition: 27    ხოცხვლიხ ი სერ ქვიში თა̄რიძელი ლალგენა ლი ეჯ გიცარ ი ჟახად
Line of edition: 28    ქვიშარაჲ ხეჟხი ალ ლადეღჷნღო ი შომა̄ჲ ერე ჩვადძი̄ჲნეხ, ლერსგვენ
Line of edition: 29    ბარჯ ი გულჩონჩხ ხეკვეს მულზონას ოთჴჷდიხ, ჟი მჷლგენა̄ლას,
Line of edition: 30    ი ჩუ ხეკვეს ქვიშობლადეღ ედძიე̄ნდეს ალ ქვიშარაჲ ქვიში საყდარჟი;
Line of edition: 31    ქვიში საყდარი მჷგემ ვონჲა̄ნშა ხოშა, ქორონო, ლოქ ლჷმა̄რ.
Line of edition: 32    ალ ქორონო ი მიჩა მუხვბე თაფუ ლოქ ემჴედე̄ლიხ ეჩხე̄ შვანხენ,
Line of edition: 33    სოფელ ცხჷმარხენ, მა̄რე ლოქ ლახდაგრახ ცხჷმარს ი ეჯღა ლოქ
Line of edition: 34    ხა̄რახ ქა ლექა̄ბი მინე სოფელხენ ი ლჷსგიმ ლაზგას ლოქ ხათხე̄ლნახ,

Page of edition: 213 
Line of edition: 1       ცხჷმარს სგიმ ხაზვიბ ი ეჯღა ხაკვდახ ლჷსგიმ აგის ალზიგე̄ლასხ
Line of edition: 2    ი ჟათლაკე̄ნახ სასა̄შ სგიმს ი ჩვალზიგე̄ლიხ ამეჩუ ი ეჯ ჲერუ ლახვბა
Line of edition: 3    ლჷმა̄რხ ა̄რღვლა̄ნა გვარიშ, თაფუ̄ ნაყარ ლიხ ათხე̄ სასა̄შ მეზგა̄ლა
Line of edition: 4    გვარალ: თაისავშე̄რალ, გოგიშე̄რალ ი ზურაბშე̄რალ. ალჲარე ლუშნუ
Line of edition: 5    გვარ ლას ათხად თაფუშა, მარა ეჩანღო ჯამლათშა ოსჟახახ, მინე
Line of edition: 6    ხოშა ჯამლათ ლჷმა̄რ თაფუ̄შჷნღო ი ამღა. ქორონო̄ ნაყარ ლიხ ათხე̄
Line of edition: 7    ვონჲა̄ნშე̄რალ, ლეკოშე̄რალ ი ჲეზჲაჲშე̄რალ ი სამლაზვდი̄ ეშხუდ
Line of edition: 8    არიხ ალ გვარალ ქვიშობჟი̄ნე. ვოხუშდ მეზგო̄ლგარ იზგახ ესრენ
Line of edition: 9    ეჩქად სასა̄შ, მარა ათხე 100 მეზგე ლიხ. სასა̄შ მეზგა̄ლა ათხე
Line of edition: 10    ბექოშე̄რალ მა̄ ლიხ ცხჷმარხენ ნაჴედ, ალ ბექოშა გვარი მეზგეგარ
Line of edition: 11    ასხვე̄ნახ ქა ნაჴედ ლახვბას -- თაფუს ი ქორონოს. ალ გვეშს სასა̄შარი̄
Line of edition: 12    ამჟი ა̄მბვიხ ი ცხჷმრალი̄, ჩი̄ს აშ ხასმა ალ არაკ ი ცხჷმრალ --
Line of edition: 13    ა̄რღვლა̄ნა გვარიშალ -- ათხე̄ჲ ამჟი ხენხუბხ სასა̄შ მეზგა̄ლა ონჲა̄ნა
Line of edition: 14    გვარიშალს.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.