TITUS
Svan Prose Texts IV (Lashkh)
Part No. 218
Previous part

Text: 218 
Page of edition: 223 
Line of edition: 13 
CCXVIII. ლელმერ (\ ლერმელ)


Line of edition: 14       ალე სასა̄შარე ფურალე ლარდვნა ლახვ ლი, მებცარ ი ლეკოსა̄ნდარი̄
Line of edition: 15    ჴჷდეხ ამხა̄ვ ფურალს. ლელმერს ჲერხი ლერმელს ხატუ̄ლიხ.
Line of edition: 16    სტა̄რუნი̄ში თანღი ლესგისა ლი ალ ლახვ, ლეღმუ̄რა̄ თხუმისა. ამეჩუ
Line of edition: 17    ზექრე̄ლ ხო̄გხ ალ სოფლარს მჷ̄შგი ზურალე̄ლე ლარდა ი ფურალეშდ
Line of edition: 18    ლა̄ჲდი̄ -- ქარბაქალ. ჩუ ე̄რ ი̄შგა̄ლიხ ფურალს ძინრუ̄შ, ეჩანღო
Line of edition: 19    ჟაგნეხ ლაბლახდ შიშველთე ი ნებვზა პილთე ჟი ხეთხე̄ლნიხ, ჩუ ჴჷდეხ
Line of edition: 20    აგითე, ჩუ ი̄შგა̄ლიხ ი ეჩანღო ჩვაჭბიდა̄ლიხ ფურალს ქარბაქალისა,
Line of edition: 21    სგა ხეგნიხ თაში ლაყე̄ლას ი ჟი ლჷყე̄ლა თაშს ჲერუ-სემი,
Line of edition: 22    ლადეღისა ეშხვინ ჩვაზზიხ აგითე, აგის ჩვაჯმეხ ი ჩვაშხვნიხ ხალმრისა
Line of edition: 23    ჲედ კეცარისა. ლა̄შგა̄ლდ სეგდე̄ლ ხუღვახ ზექიშ. ლე̄თშვ ქა,
Line of edition: 24    ჴედნიხ ყო̄რქა ი იქქანა̄ლხ, ნადირ ლოქ დო̄სა ოხშგებეს ფურალს.
Line of edition: 25    ჲერხის ჟეღარი̄ ხაყახ ამე მინეცახან ი ჟეღარ ერ ლიჴშდეს იბნეხ
Line of edition: 26    ლე̄თშვ, ეჩქა ქა ჴედნიხ ყო̄რქა ი ლიქქანა̄ლს იბნეხ. ჲეს დეშდვ
Line of edition: 27    ხოშგბენიხ ფურალს ი ჲეს -- თხე̄რე, მარა შომა̄ჲ ერ იქქანა̄ლხ, ეჩქა
Line of edition: 28    დეშ აბდავი ნადირ ლიშგებს. ფურალცახან მავრანდალ ხაყახ ფურალე
Line of edition: 29    მუვრიდ. ჩუ ამეჩუ ი̄ჲშდექიხ ფურალ. ათხად უსხვე̄ლ ხეყე̄დახ
Line of edition: 30    ხოფშირა ფურალე მუვრიდ, მარა ათხე̄ხი მე̄ვარ ძვირდგარ ხაყახ
Line of edition: 31    უსხვაჲ. ნადმოყდ მესდე ფურალ ხოშა დო̄სგ ივრიხ ამეჩუ. აგის
Line of edition: 32    ლითჲელ ერ ქა იგა̄თვი ი დაბ-ლა̄რე̄ლ ერ ჟი იმე̄ვრიხ, ეჩქა ჩუ ჴჷდეხ
Line of edition: 33    ფურალს სოფელთე ი აგის ხაყახ. ჴანარე ლარდა ლახვ მო̄შ ლი ი
Page of edition: 224  Line of edition: 1    ღვაჟარ ხაქიმხ მჷლდღად. ჴანარს დეშ ხოშგბენი ნადირ, ერ ოხშგებეს,
Line of edition: 2    შიშდ ჟი იქორქოციხ ეშხუდ ჴანარე ჯოგ ი ხოჩა ლუმუჭ ჴანარ
Line of edition: 3    ი ხოჩა ჴანარ, ხედჲარი̄ ერე ხოშა თავარ ლიხ, ღოშგმა̄ვ აგნეხ
Line of edition: 4    ხოლა ლუმუჭს ი ხოშა მახვრე̄ნე ჴანი̄ლარს ი ხოჩა ჴანარ სგობდ იგნიხ
Line of edition: 5    ნადირი მუვჩიდ ი ნადირ დეშსა ხობდავი ჴანარე ჯოგს სგა ლიშგებს,
Line of edition: 6    ეშხვს ე დო̄მ ენდარნე ნადირ მო̄შ მერდას. ხა̄ლ ოხშგებნი ნადირ
Line of edition: 7    ეშხვ ი ჲედ ჲერუ ჴანს, შიშდ ლიყუ̄ლის იბნეხ ი ეჩქა იშგენ
Line of edition: 8    ჴანარ, ამგვარ მაჲ ჯო̄დჲას ა̄რდეხ, ეში̄ შიშდ ეშჩუ ხერღვენიხ,
Line of edition: 9    იმხენი̄ ერე ლიყუ̄ლი ლეხსჷმახ ი ნადირს შიშდ სგა ხეშჲა̄ლხ მუჭვარშვ.
Line of edition: 10    ამჟი ლიწე̄ნა̄ლ ხოხალხ უშხვა̄რეშ ჴანრე ჯოგს ი ჩა̄ჟრეშსი̄.
Line of edition: 11    ფურალს მა̄ ხა̄ჲმედახ ამკალიბობ ი ამღა ხა̄რხ ლელჩე ხოშანაღალდ

Line of edition: 12       ზურალე̄ლს. ლელმერისა ჯვინელ ნასჷყდარ ხეთრა ი ეჩქად ლიმზჷრი
Line of edition: 13    ხაგდე̄ნახ ამეჩუ, მარა ათხე და̄რ ხემზგრხ. სტა̄რუნი̄ში ზაგარჟი,
Line of edition: 14    ჯვინელ ნასჷყდარმჷყ, ზურალე̄ლ ლიდბაშს ხეშდაბდახ ი თაშა̄რ
Line of edition: 15    პიტი̄ლარს, ტაბლელარს, ხამზჷრდახ ი ჩუ იზბჷდახ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.