TITUS
Svan Prose Texts IV (Lashkh)
Part No. 233
Previous part

Text: 233 
Page of edition: 237 
Line of edition: 22 
CCXXXIII. თაშ, ლჷჯმარე, კაზალ, თაშმჷჯაბ, ლჷმე̄რწვე,
Line of edition: 23 
ləcpek ი ქაქ


Line of edition: 24       თაშ შვანთა̄ნ დე̄მსგი̄შ ლი; ჩიქ ლი, ერე ერბოს დე̄მ ხოკედხ ი
Line of edition: 25    ღო ბალახ ლი ალპიურ ლახვარეშ ი ხოჩა გემა თაშ ხეფსი. თაშს
Line of edition: 26    ზჷსყიდ -- თაშდი̄ -- იზბიხ ი ჩუ̄ჲ აჯმიხ ლეშხვნიდ ი ეჩანდო ყველჲერისა
Line of edition: 27    ი აღბიერისა იზბიხ. თაშს ჟაჭყრი̄ნტეხ ი, ჯიმს ერ ხეჩოხ, ლატეხ
Line of edition: 28    გემა თაშა̄რალს ანყეხ. ლუშნუ ქუთვარ, ათვი-ათვი, ლა̄ჲრაკდ არიხ,
Line of edition: 29    ჲერვა̄ჲს ერ ხო̄მა. თაშს ქა̄ჲ ხვაჲს ვოდიხ, აგის ლეჴმარის იმვა̄ჲ მოშ
Line of edition: 30    ოხმასდუ̄ნნეხ. თაში ლაყე̄ლა ლალდჷ̄რს, მაჭიკს ი ლჷჴს მინ ასყიხ
Line of edition: 31    აგის ი ეჯნოვშ ავდინეხ ლჷჯას. ფურალ ჩიგარ ფიშირ ხაყე̄ნახ
Page of edition: 238  Line of edition: 1    ჯვინელდ ი მახად თაშო̄რა̄ დამწა̄რ, ოდო ლუნთისა ხვაჲ ლიჩფე ხაწჷხ
Line of edition: 2    ფიშირ ფურს. თაშს ჟი ერ იყე̄ლეხ, ვოდ ჩუ დო ედმჷი ხოჩა̄მდ, ეჩქად
Line of edition: 3    დე̄მ იჴმარიხ. თოთ თაშს და̄რ იჴმარი. თაშო̄რა̄ მოხელობ ზურალე̄ლე
Line of edition: 4    გვეშ ლი ი ეჯჲარ მახვშეხ ღვაჟრე უნჩჷდა̄ლად. მჷ̄შგა̄ლიდ
Line of edition: 5    ეშხუ ზურა̄ლ ხაყახ ი ფურალი̄ ეჩის ხამთქვახ; ლჷმთქვა ზურა̄ლს,
Line of edition: 6    მჷ̄შგა̄ლის, ყედნაჲ ფურალი̄ ჩუ თერხ ი ქა ვოდიხ ეჩაცახან ლჷჯას.
Line of edition: 7    თაში ლი̄ზნანი ათხე ხოჩულდ ხოხალდ, ეჩქად მა̄მ ხახლე̄ნახ ათხე̄შა̄ლ
Line of edition: 8    წყვლჲანდ ლიშდაბ, ღო ეჩქად ჯიმო̄ ხანძვრენახ ი ლუშხუნ
Line of edition: 9    თაშს ხვაჲდინ მჷტარ ხაჭვა̄დო̄ლნახ, მარა ათხე ჯიმი̄ ითხი ი ლი̄ზნანის
Line of edition: 10    ი ნაწყჷლჲანის ხოშა ლეხცხა̄ნ ი თაში̄ ლექე̄ბი̄ნე ლი ლუშნუ,
Line of edition: 11    თაშ ზავჲა მაჴედი მჷხნისგი ლი, თაშცახან დიარ ხოხრა ხაწჷხხ ი
Line of edition: 12    მაყი̄რიანი̄ ლი თაშნანჩჷდ ლეზობ ი ამღა ხო̄ზხ მაშე̄ნე ლჷგონ თაშდ.
Line of edition: 13    თაშურ მეზგე მაჴედსი̄ ხვაჲს იმკვედე ი ჩიგარ ლჷმა̄ჲდუ̄ნად არი
Line of edition: 14    სამარხვჟიგარ მერდე.

Line of edition: 15       ლჷჯმარას ასყიხ ხოჩა ლჷმჲა ზჷსყი მახა მედუ̄წა̄ლ თაშიშს.
Line of edition: 16    ჩიქ ჟი იწვე̄ნეხ ქივი ნაფიცხუ̄ლს ლემესჟი ლჷ̄ჲთვა ასტამჟი ი
Line of edition: 17    ლიდუ̄წეს ე იჩო, ეჩის ხაყა ლჷჯმარად ი ჟასყიხ ამკალიბ თაში ლჷჯმარას
Line of edition: 18    თეფშჟი ი ჲედ გობჟი, ჯიმი̄ლს ხეჩოხ ი ეშხუ ლე̄თ ჩუ ცურეხ მიჩა
Line of edition: 19    წათისა ი ეჩანღო ქა იდე̄სხ ლაფრად. მახე მჷსყე ლჷჯმარე სურუ
Line of edition: 20    ხოჩა გემაშ ლი; ეჩა ლიზობს დე̄სამა ხოჩა. ქა ერ იზსკი ლჷჯმარე,
Line of edition: 21    ჟი იბგი ი ქა ლჷფრან ჩვაშხვნიხ მჷწჷხჟი̄ნაშდ. საყვლიერ ლჷჯმარას
Line of edition: 22    ასყი ჲერხი გობზუმს ი ყველჲერისა იზბიხ. ქა მე̄ვარ იფრი ლჷჯმარე
Line of edition: 23    ი ლიხჷრჯავი შომა̄ჲ ხაკუხ, ფჷრი ლჷჯმარას ჲედ ჩვა̄ჲთვეხ ათვი
Line of edition: 24    მამფუა ლიცისა ი ჲედ ჟატყბიხ ლემესჟი ლახლინუშ ი თელდ ლატეხ
Line of edition: 25    გემა ლეზობ ლი. ლჷჯმარე̄ლს ზჷმა̄რი̄ლარს ასყა̄ლიხ -- ჲედ ეშხუ
Line of edition: 26    ქივიშს ი ჲედ ჲერვმიშ, ხოჩულდ იფრიხ ზჷმა̄რ ლჷჯმარე̄ლ ი ჩუ დე̄მ
Line of edition: 27    იცდავიხ. ქა ლივდინ, ჲესი-ჲეს ყო̄რთეჟი ერ ანჴდენი მჷყდი ლჷჯმარე̄მიშ,
Line of edition: 28    ოდო ჯო̄დჲათე ლავოდდ და̄რ აჲესხ ფჷრი ლჷჯმარე̄ლს. აშ
Line of edition: 29    თაშდ ხოშა̄მდ ლჷჯმარე ილგონი.

Line of edition: 30       კაზალს ხატუ̄ლიხ ლჷჯიმ თაშს წათხისა ნაღვე̄ნს. წათხისა, კელდ
Line of edition: 31    ე ხოჩა ლჷჯიმ ი̄რი, დე̄მ იდა̄ვში თაშ. თვით ქივ ისგდ მექცვე ლი ი
Line of edition: 32    ეჩჟი ხასყა სგა წათხისა. კაზალ თაშს აჲესხ ლავოდთე ლემტხე̄ლ
Line of edition: 33    ქუთა̄შთე ი ლუშნუ თაშ ხოჩა ფასდ ხევდიხ. ეშ გჷ̄ნჯე მაგ ლუშნუ თაში
Line of edition: 34    ლათხე̄ლის, ჩუ ე ხეთხიხ ლეყდიდ. კაზალ თაშ ჟი ლჷბგე ლი წათხისა
Line of edition: 35    ნარდვ ი ჩუ დე̄მ იფცხჷ̄რი ი მორსდ დე̄მ ისპი.

Line of edition: 36       თაშმჷჯაბს ასყიხ ზურალე̄ლ, შომასი̄ მე̄ვარ ლეშგუ̄რა̄ლ მუშგვრი
Line of edition: 37    ე̄სა ხოჴდენიხ, ოდო აშ ალა̄ლად დე̄მ ასყიხ თაშმჷჯაბს. ცხვადთე

Page of edition: 239 
Line of edition: 1       შჷდეხ თაშმჷჯაბია̄ქ თაშს ლუფურშგვი̄ნას, ჩუ ხოწბინეხ ლემესჟი
Line of edition: 2    ი აჩდი̄ნეხ, ჩუ ერ ი̄ჲნი თაშ ცხვადისა, ეჩქა ხეჩოხ კვეცნა ფექს,
Line of edition: 3    ჲედ სიმინდიშს, ი ჟიუდ აჩდი̄ნეხ ფიშრა̄მინ ი ერ ხათერხ, ერე ლიჯბი
Line of edition: 4    ქა ლოქ ხე̄რი, ჩუ იკედხ ი ქა ხეფსი მედუ̄წა̄ლ ლეზობ, მარა ამთა̄ნ
Line of edition: 5    მაყ დეხდა ლეზობს ხა̄რ; ეშ გვიდგვიდი ნალგვარი თაშიშ ი ამღა ლი
Line of edition: 6    ამჟი მაყი̄რიან. ყველჲერი აღაბლე̄თი̄ ხაზნახ თაშმჷჯაბი ლისყი.
Line of edition: 7    ცხუნილ დიარალე ნაცმჷნდი̄ თაშმჷჯაბს ასყიხ.

Line of edition: 8       ლჷმე̄რწვად ასყიხ ლჷფი̄ნა შველი ქაქს, ხოფშირა̄მინ სიმინდი
Line of edition: 9    ფექიშს ი, ჲესვა̄ჲ ხუღვა, ფეტვი ფექიშსი̄. მჷსყა ქაქს ქა̄გვშეხ
Line of edition: 10    გობთეჟი ი სგა ხეჩოხ მედუ̄წა̄ლ თაში ნახვიტუ̄ლარს, ჟაჩდი̄ნეხ ჩოგანშვ
Line of edition: 11    ი ლიდუ̄წა̄ლს იბნე ქაქ ი ეჩანღო იზბიხ. ლა̄შგობჟი, ლუფხვისა,
Line of edition: 12    ლელე̄თად ლჷმე̄რწვა ქაქს ფიშრა̄მინ ასყიხ. ფექს ხოხრა̄მ იმკვედე,
Line of edition: 13    მაყი̄რიან მე̄ვარ ლი, ლეზობდ მე̄ვარ ლესჲამე ლი ი ფექი̄ ჩუ ხეზა̄რიხ.
Line of edition: 14    ამის იზბიხ შიშდ მახა ნამე̄რწვს ჩუ უქვე̄ლად, ოდო ჩუ ლახ
Line of edition: 15    იქვე̄ლი, ეჩანღო ლიდუ̄წა̄ლსი̄ ჩუ ქუცე ი გემაში̄ მა̄მ ლი ხოჩა.
Line of edition: 16    ლადეღვშ ი ლამშაჲთე ლაზჟი და̄რ ასყი ლჷმე̄რწვა ქაქს, ეჯღა ერე დო̄სგ
Line of edition: 17    ხეჴჩენი ქა მა̄რას ი დო̄სგ იმა̄ჲდუ̄ნი ლამშაჲჟი ი ლელე̄თად, ლევახშამდ,
Line of edition: 18    ამღა ხაზნახ ამშა ლისყი.

Line of edition: 19       ლჷცფექდ შველს აფი̄ნეხ ი კოტო̄ლ ფექი̄ლს ხეჩოხ ლჷფი̄ნა
Line of edition: 20    შველთე ი ჟიუდ აფი̄ნეხ. ალე მე̄ვარ დჷთხელ ლი ი ეშ ლეხუ̄ლიდგარ
Line of edition: 21    ხაყა. ხვაჲდინ ალეს ნა̄ყუნდ იჴმარიხ დიარიშ, შომა̄ჲ ერ ნა̄ყუნ
Line of edition: 22    მო̄ ხუღვახ; ბობშარსი̄ ხვაჲდინ ხოსყიხ. შველ შომა̄ჲ მო̄ ხუღვახ,
Line of edition: 23    ლჷჯიმ ლჷფი̄ნა ლიცისა ასყიხ ლჷცფექს. ამის ქორი მა̄რასგარ ხა̄მნეხ,
Line of edition: 24    ოდო მუშგვრი̄ცახან და̄რ ათნე ლჷცფექს ი დე ლეზობდ ე̄რ მოშ
Line of edition: 25    ხაჭრაჟი.

Line of edition: 26       ქაქს ასყიხ შველიშს, მარა ჟი დე̄მ ამე̄რწვეხ, ლჷცფექდ
Line of edition: 27    ხონსგლულს იჩოხ ი ეშ იზბიხ ტებდიჟი. ქაქს ბობშარს ხოსყიხ ფიშრა̄მინ.
Line of edition: 28    მახა შველი ქაქ, ჟი უმე̄რწვა, გვარჲან ლეზობ ლი, აშ ლჷჯე̄მი
Line of edition: 29    ქაქ ლატეხ ლი ი ლეგმერდას ხვაჲდინ ხოსყიხ. უმე̄რწვა ქაქს
Line of edition: 30    მუშგვრის და̄რ ხაშგდე, მინე ლეზობდგარ იჴმარიხ ჲეს-ჲეს, ჲერვა̄ჲს
Line of edition: 31    ხალატ ქაქი ლიზობ. ჲესვა̄ჲ თაშობ მო̄ ხა̄რ, ეჯკალიბ მეზგე ე̄სა
Line of edition: 32    ანსყე̄ჲნე უმერწვა ქაქს, ოდო აშ და̄რ; უმე̄რწვა ქაქს მა̄მ ხა̄ზ ლჷგონ


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.