TITUS
Rg-Veda: Rg-Veda-Samhita
Part No. 397
Previous part

Hymn: 43_(397) 
Verse: 1 
Halfverse: a    आ धे॒नवः॒ पय॑सा॒ तूर्ण्य॑र्था॒ अम॑र्धन्ती॒रुप॑ नो यन्तु॒ मध्वा॑ ।
   आ धे॒नवः॒ पय॑सा॒ तूर्ण्य॑र्था
   आ धे॒नवः पय॑सा तूर्ण्य॑र्थाः
   आ धे॒नवः पय॑सा तूर्णिअ॑र्था

Halfverse: b    अम॑र्धन्ती॒रुप॑ नो यन्तु॒ मध्वा॑ ।
   अम॑र्धन्तीः उप नः यन्तु मध्वा ।
   अम॑र्धन्तीर् उप नो यन्तु मध्वा ।

Halfverse: c    म॒हो रा॒ये बृ॑ह॒तीः स॒प्त विप्रो॑ मयो॒भुवो॑ जरि॒ता जो॑हवीति ।।
   म॒हो रा॒ये बृ॑ह॒तीः स॒प्त विप्रो
   म॒हः रा॒ये बृ॑ह॒तीः स॒प्त विप्रः
   म॒हो रा॒ये बृ॑ह॒तीः स॒प्त विप्रो

Halfverse: d    मयो॒भुवो॑ जरि॒ता जो॑हवीति ।।
   म॑यो॒भुवः जरि॒ता जो॑हवीति ।।
   म॑यो॒भुवो जरि॒ता जो॑हवीति ।।


Verse: 2 
Halfverse: a    आ सु॑ष्टु॒ती नम॑सा वर्त॒यध्यै॒ द्यावा॒ वाजा॑य पृथि॒वी अमृ॑ध्रे ।
   आ सु॑ष्टु॒ती नम॑सा वर्त॒यध्यै
   आ सु॑ष्टु॒ती नम॑सा वर्त॒यध्यै
   आ सु॑ष्टु॒ती नम॑सा वर्त॒यध्यै

Halfverse: b    द्यावा॒ वाजा॑य पृथि॒वी अमृ॑ध्रे ।
   द्यावा वाजा॑य पृथि॒वी अमृ॑ध्रे ।
   द्यावा वाजा॑य पृथि॒वी अमृ॑ध्रे ।

Halfverse: c    पि॒ता मा॒ता मधु॑वचाः सु॒हस्ता॒ भरे॑भरे नो य॒शसा॑वविष्टाम् ।।
   पि॒ता मा॒ता मधु॑वचाः सु॒हस्ता
   पि॒ता मा॒ता मधु॑वचाः सु॒हस्ता
   पि॒ता मा॒ता मधु॑वचाः सु॒हस्ता

Halfverse: d    भरे॑भरे नो य॒शसा॑वविष्टाम् ।।
   भरे॑भरे नः य॒शसौ अविष्टाम् ।।
   भरे॑भरे नो य॒शसा॑व् अविष्टाम् ।।


Verse: 3 
Halfverse: a    अध्व॑र्यवश्चकृ॒वाँसो॒ मधू॑नि॒ प्र वा॒यवे॑ भरत॒ चारु॑ शु॒क्रम् ।
   अध्व॑र्यवश्चकृ॒वाँसो॒ मधू॑नि
   अध्व॑र्यवः चकृ॒वांसः मधू॑नि
   अध्व॑र्यवश् चकृ॒वांसो मधू॑नि

Halfverse: b    प्र वा॒यवे॑ भरत॒ चारु॑ शु॒क्रम् ।
   प्र वा॒यवे भरत चारु शु॒क्रम् ।
   प्र वा॒यवे भरत चारु शु॒क्रम् ।

Halfverse: c    होते॑व नः प्रथ॒मः पा॑ह्य॒स्य देव॒ मध्वो॑ ररि॒मा ते॒ मदा॑य ।।
   होते॑व नः प्रथ॒मः पा॑ह्य॒स्य
   होता इव नः प्रथ॒मः पा॑हि अ॒स्य
   होते॑व नः प्रथ॒मः पा॑हि अ॒स्य

Halfverse: d    देव॒ मध्वो॑ ररि॒मा ते॒ मदा॑य ।।
   देव मध्वः ररि॒म+ ते मदा॑य ।।
   देव मध्वो ररि॒मा ते मदा॑य ।।


Verse: 4 
Halfverse: a    दश॒ क्षिपो॑ युञ्जते बा॒हू अद्रिं॒ सोम॑स्य॒ या श॑मि॒तारा॑ सु॒हस्ता॑ ।
   दश॒ क्षिपो॑ युञ्जते बा॒हू अद्रिं
   दश क्षिपः युञ्जते बा॒हू अद्रि॑म्
   दश क्षिपो युञ्जते बा॒हू अद्रिं

Halfverse: b    सोम॑स्य॒ या श॑मि॒तारा॑ सु॒हस्ता॑ ।
   सोम॑स्य या श॑मि॒तारा सु॒हस्ता ।
   सोम॑स्य या श॑मि॒तारा सु॒हस्ता ।

Halfverse: c    मध्वो॒ रसं॑ सु॒गभ॑स्तिर्गिरि॒ष्ठां चनि॑श्चदद्दुदुहे शु॒क्रमँ॒शुः ।।
   मध्वो॒ रसं॑ सु॒गभ॑स्तिर्गिरि॒ष्ठां
   मध्वः रस॑म् सु॒गभ॑स्तिः गिरि॒ष्ठाम्
   मध्वो रसं सु॒गभ॑स्तिर् गिरि॒ष्ठां

Halfverse: d    चनि॑श्चदद्दुदुहे शु॒क्रमँ॒शुः ।।
   चनि॑श्चदत् दुदुहे शु॒क्रम् अं॒शुः ।।
   चनि॑श्चदद् दुदुहे शु॒क्रम् अं॒शुः ।।


Verse: 5 
Halfverse: a    असा॑वि ते जुजुषा॒णाय॒ सोमः॒ क्रत्वे॒ दक्षा॑य बृह॒ते मदा॑य ।
   असा॑वि ते जुजुषा॒णाय॒ सोमः
   असा॑वि ते जुजुषा॒णाय सोमः
   असा॑वि ते जुजुषा॒णाय सोमः

Halfverse: b    क्रत्वे॒ दक्षा॑य बृह॒ते मदा॑य ।
   क्रत्वे दक्षा॑य बृह॒ते मदा॑य ।
   क्रत्वे दक्षा॑य बृह॒ते मदा॑य ।

Halfverse: c    हरी॒ रथे॑ सु॒धुरा॒ योगे॑ अ॒र्वागिन्द्र॑ प्रि॒या कृ॑णुहि हू॒यमा॑नः ।।
   हरी॒ रथे॑ सु॒धुरा॒ योगे॑ अ॒र्वाग्
   हरी रथे सु॒धुरा योगे अ॒र्वाक्
   हरी रथे सु॒धुरा योगे अ॒र्वाग्

Halfverse: d    इन्द्र॑ प्रि॒या कृ॑णुहि हू॒यमा॑नः ।।
   इन्द्र प्रि॒या कृ॑णुहि हू॒यमा॑नः ।।
   इन्द्र प्रि॒या कृ॑णुहि हू॒यमा॑नः ।।


Verse: 6 
Halfverse: a    आ नो॑ म॒हीम॒रम॑तिं स॒जोषा॒ ग्नां दे॒वीं नम॑सा रा॒तह॑व्याम् ।
   आ नो॑ म॒हीम॒रम॑तिं स॒जोषा
   आ नः म॒हीम् अ॒रम॑तिम् स॒जोषाः
   आ नो म॒हीम् अ॒रम॑तिं स॒जोषा

Halfverse: b    ग्नां दे॒वीं नम॑सा रा॒तह॑व्याम् ।
   ग्नाम् दे॒वीम् नम॑सा रा॒तह॑व्याम् ।
   ग्नाअं दे॒वीं नम॑सा रा॒तह॑व्याम् ।

Halfverse: c    मधो॒र्मदा॑य बृह॒तीमृ॑त॒ज्ञामाग्ने॑ वह प॒थिभि॑र्देव॒यानैः॑ ।।
   मधो॒र्मदा॑य बृह॒तीमृ॑त॒ज्ञाम्
   मधोः मदा॑य बृह॒तीम् ऋत॒ज्ञाम्
   मधो॑र् मदा॑य बृह॒तीम् ऋत॒ज्ञाम्

Halfverse: d    आग्ने॑ वह प॒थिभि॑र्देव॒यानैः॑ ।।
   आ अ॑ग्ने वह प॒थिभिः देव॒यानैः ।।
   आग्ने वह प॒थिभि॑र् देव॒यानैः ।।


Verse: 7 
Halfverse: a    अ॒ञ्जन्ति॒ यम्प्र॒थय॑न्तो॒ न विप्रा॑ व॒पाव॑न्तं॒ नाग्निना॒ तप॑न्तः ।
   अ॒ञ्जन्ति॒ यम्प्र॒थय॑न्तो॒ न विप्रा
   अ॒ञ्जन्ति यम् प्र॒थय॑न्तः न विप्राः
   अ॒ञ्जन्ति यम् प्र॒थय॑न्तो न विप्रा

Halfverse: b    व॒पाव॑न्तं॒ नाग्निना॒ तप॑न्तः ।
   व॒पाव॑न्तम् न अ॒ग्निना तप॑न्तः ।
   व॒पाव॑न्तं न अ॒ग्निना तप॑न्तः ।

Halfverse: c    पि॒तुर्न पु॒त्र उ॒पसि॒ प्रेष्ठ॒ आ घ॒र्मो अ॒ग्निमृ॒तय॑न्नसादि ।।
   पि॒तुर्न पु॒त्र उ॒पसि॒ प्रेष्ठ
   पि॒तुः न पु॒त्रः उ॒पसि प्रेष्ठः
   पि॒तुर् न पु॒त्र उ॒पसि प्रयि॑ष्ठ

Halfverse: d    आ घ॒र्मो अ॒ग्निमृ॒तय॑न्नसादि ।।
   आ घ॒र्मः अ॒ग्निम् ऋ॒तय॑न् असादि ।।
   आ घ॒र्मो अ॒ग्निम् ऋ॒तय॑न्न् असादि ।।


Verse: 8 
Halfverse: a    अछा॑ म॒ही बृ॑ह॒ती शंत॑मा॒ गीर्दू॒तो न ग॑न्त्व॒श्विना॑ हु॒वध्यै॑ ।
   अछा॑ म॒ही बृ॑ह॒ती शंत॑मा॒ गीर्
   अछ+ म॒ही बृ॑ह॒ती शंत॑मा गीः
   अछा म॒ही बृ॑ह॒ती शंत॑मा गीर्

Halfverse: b    दू॒तो न ग॑न्त्व॒श्विना॑ हु॒वध्यै॑ ।
   दू॒तः न ग॑न्तु अ॒श्विना हु॒वध्यै ।
   दू॒तो न ग॑न्तु अ॒श्विना हु॒वध्यै ।

Halfverse: c    म॑यो॒भुवा॑ स॒रथा या॑तम॒र्वाग्ग॒न्तं नि॒धिं धुर॑मा॒णिर्न नाभि॑म् ।।
   म॑यो॒भुवा॑ स॒रथा या॑तम॒र्वाग्
   मयो॒भुवा स॒रथा आ या॑तम् अ॒र्वाक्
   मयो॒भुवा स॒रथा या॑तम् अ॒र्वाग्

Halfverse: d    ग॒न्तं नि॒धिं धुर॑मा॒णिर्न नाभि॑म् ।।
   ग॒न्तम् नि॒धिम् धुर॑म् आ॒णिः न नाभि॑म् ।।
   ग॒न्तं नि॒धिं धुर॑म् आ॒णिर् न नाभि॑म् ।।


Verse: 9 
Halfverse: a    प्र तव्य॑सो॒ नम॑उक्तिं तु॒रस्या॒हम्पू॒ष्ण उ॒त वा॒योर॑दिक्षि ।
   प्र तव्य॑सो॒ नम॑उक्तिं तु॒रस्य
   प्र तव्य॑सः नम॑उक्तिम् तु॒रस्य
   प्र तव्य॑सो नम॑उक्तिं तु॒रस्य

Halfverse: b     ॑अ॒हम्पू॒ष्ण उ॒त वा॒योर॑दिक्षि ।
   अ॒हम् पू॒ष्णः उ॒त वा॒योः अ॑दिक्षि ।
   अ॒हम् पू॒ष्ण उ॒त वा॒योर् अदिक्षि ।

Halfverse: c    या राध॑सा चोदि॒तारा॑ मती॒नां या वाज॑स्य द्रविणो॒दा उ॒त त्मन् ।।
   या राध॑सा चोदि॒तारा॑ मती॒नां
   या राध॑सा चोदि॒तारा मती॒नाम्
   या राध॑सा चोदि॒तारा मती॒नां

Halfverse: d    या वाज॑स्य द्रविणो॒दा उ॒त त्मन् ।।
   या वाज॑स्य द्रविणो॒दौ उ॒त त्मन् ।।
   या वाज॑स्य द्रविणो॒दा उ॒त त्मन् ।।


Verse: 10 
Halfverse: a    आ नाम॑भिर्म॒रुतो॑ वक्षि॒ विश्वा॒ना रू॒पेभि॑र्जातवेदो हुवा॒नः ।
   आ नाम॑भिर्म॒रुतो॑ वक्षि॒ विश्वा॑न्
   आ नाम॑भिः म॒रुतः वक्षि विश्वा॑न्
   आ नाम॑भिर् म॒रुतो वक्षि विश्वा॑न्

Halfverse: b    आ रू॒पेभि॑र्जातवेदो हुवा॒नः ।
   आ रू॒पेभिः जातवेदः हुवा॒नः ।
   आ रू॒पेभि॑र् जातवेदो हुवा॒नः ।

Halfverse: c    य॒ज्ञं गिरो॑ जरि॒तुः सु॑ष्टु॒तिं च॒ विश्वे॑ गन्त मरुतो॒ विश्व॑ ऊ॒ती ।।
   य॒ज्ञं गिरो॑ जरि॒तुः सु॑ष्टु॒तिं च
   य॒ज्ञम् गिरः जरि॒तुः सु॑ष्टु॒तिम् च
   य॒ज्ञं गिरो जरि॒तुः सु॑ष्टु॒तिं च

Halfverse: d    विश्वे॑ गन्त मरुतो॒ विश्व॑ ऊ॒ती ।।
   विश्वे गन्त मरुतः विश्वे ऊ॒ती ।।
   विश्वे गन्त मरुतो विश्व ऊ॒ती ।।


Verse: 11 
Halfverse: a    आ नो॑ दि॒वो बृ॑ह॒तः पर्व॑ता॒दा सर॑स्वती यज॒ता ग॑न्तु य॒ज्ञम् ।
   आ नो॑ दि॒वो बृ॑ह॒तः पर्व॑ता॒दा
   आ नः दि॒वः बृ॑ह॒तः पर्व॑तात् आ
   आ नो दि॒वो बृ॑ह॒तः पर्व॑ताद् आ

Halfverse: b    सर॑स्वती यज॒ता ग॑न्तु य॒ज्ञम् ।
   सर॑स्वती यज॒ता ग॑न्तु य॒ज्ञम् ।
   सर॑स्वती यज॒ता ग॑न्तु य॒ज्ञम् ।

Halfverse: c    हवं॑ दे॒वी जु॑जुषा॒णा घृ॒ताची॑ श॒ग्मां नो॒ वाच॑मुश॒ती शृ॑णोतु ।।
   हवं॑ दे॒वी जु॑जुषा॒णा घृ॒ताची
   हव॑म् दे॒वी जु॑जुषा॒णा घृ॒ताची
   हवं दे॒वी जु॑जुषा॒णा घृ॒ताची

Halfverse: d    श॒ग्मां नो॒ वाच॑मुश॒ती शृ॑णोतु ।।
   श॒ग्माम् नः वाच॑म् उश॒ती शृ॑णोतु ।।
   श॒ग्मां नो वाच॑म् उश॒ती शृ॑णोतु ।।


Verse: 12 
Halfverse: a    आ वे॒धसं॒ नील॑पृष्ठम् ।!। बृ॒हन्त॒म्बृह॒स्पतिं॒ सद॑ने सादयध्वम् ।
   आ वे॒धसं॒ नील॑पृष्ठम्बृ॒हन्त॑म्
   आ वे॒धस॑म् नील॑पृष्ठम् बृ॒हन्त॑म्
   आ वे॒धसं नील॑पृष्ठम् बृ॒हन्त॑म्

Halfverse: b    बृह॒स्पतिं॒ सद॑ने सादयध्वम् ।
   बृह॒स्पति॑म् सद॑ने सादयध्वम् ।
   बृह॒स्पतिं सद॑ने सादयध्वम् ।

Halfverse: c    सा॒दद्यो॑निं॒ दम॒ आ दी॑दि॒वाँसं॒ हिर॑ण्यवर्णमरु॒षं स॑पेम ।।
   सा॒दद्यो॑निं॒ दम॒ आ दी॑दि॒वाँसं
   सा॒दद्यो॑निम् दमे आ दी॑दि॒वांस॑म्
   सा॒दद्यो॑निं दम आ दी॑दि॒वांसं

Halfverse: d    हिर॑ण्यवर्णमरु॒षं स॑पेम ।।
   हिर॑ण्यवर्णम् अरु॒षम् सपेम ।।
   हिर॑ण्यवर्णम् अरु॒षं स॑पेम ।।


Verse: 13 
Halfverse: a    आ ध॑र्ण॒सिर्बृ॒हद्दि॑वो॒ ररा॑णो॒ विश्वे॑भिर्ग॒न्त्वोम॑भिर्हुवा॒नः ।
   आ ध॑र्ण॒सिर्बृ॒हद्दि॑वो॒ ररा॑णो
   आ ध॑र्ण॒सिः बृ॒हद्दि॑वः ररा॑णः
   आ ध॑र्ण॒सिर् बृ॒हद्दि॑वो ररा॑णो

Halfverse: b    विश्वे॑भिर्ग॒न्त्वोम॑भिर्हुवा॒नः ।
   विश्वे॑भिः गन्तु ओम॑भिः हुवा॒नः ।
   विश्वे॑भिर् गन्तु ओम॑भिर् हुवा॒नः ।

Halfverse: c    ग्ना वसा॑न॒ ओष॑धी॒रमृ॑ध्रस्त्रि॒धातु॑शृङ्गो वृष॒भो व॑यो॒धाः ।।
   ग्ना वसा॑न॒ ओष॑धी॒रमृ॑ध्रस्
   ग्नाः वसा॑नः ओष॑धीः अमृ॑ध्रः
   ग्नाअ वसा॑न ओष॑धीर् अमृ॑ध्रस्

Halfverse: d    त्रि॒धातु॑शृङ्गो वृष॒भो व॑यो॒धाः ।।
   त्रि॒धातु॑शृङ्गः वृष॒भः व॑यो॒धाः ।।
   त्रि॒धातु॑शृङ्गो वृष॒भो व॑यो॒धाः ।।


Verse: 14 
Halfverse: a    मा॒तुष्प॒दे प॑र॒मे शु॒क्र आ॒योर्वि॑प॒न्यवो॑ रास्पि॒रासो॑ अग्मन् ।
   मा॒तुष्प॒दे प॑र॒मे शु॒क्र आ॒योर्
   मा॒तुः प॒दे प॑र॒मे शु॒क्रे आ॒योः
   मा॒तुष् प॒दे प॑र॒मे शु॒क्र आ॒योर्

Halfverse: b    विप॒न्यवो॑ रास्पि॒रासो॑ अग्मन् ।
   वि॑प॒न्यवः रास्पि॒रासः अग्मन् ।
   वि॑प॒न्यवो ? रास्पि॒रासो अग्मन् ।

Halfverse: c    सु॒शेव्यं॒ नम॑सा रा॒तह॑व्याः॒ शिशु॑म्मृजन्त्या॒यवो॒ न वा॒से ।।
   सु॒शेव्यं॒ नम॑सा रा॒तह॑व्याः
   सु॒शेव्य॑म् नम॑सा रा॒तह॑व्याः
   सु॒शेवि॑यं नम॑सा रा॒तह॑व्याः

Halfverse: d    शिशु॑म्मृजन्त्या॒यवो॒ न वा॒से ।।
   शिशु॑म् मृजन्ति आ॒यवः न वा॒से ।।
   शिशु॑म् मृजन्ति आ॒यवो न वा॒से ।।


Verse: 15 
Halfverse: a    बृ॒हद्वयो॑ बृह॒ते तुभ्य॑मग्ने धिया॒जुरो॑ मिथु॒नासः॑ सचन्त ।
   बृ॒हद्वयो॑ बृह॒ते तुभ्य॑मग्ने
   बृ॒हत् वयः बृह॒ते तुभ्य॑म् अग्ने
   बृ॒हद् वयो बृह॒ते तुभ्य॑म् अग्ने

Halfverse: b    धिया॒जुरो॑ मिथु॒नासः॑ सचन्त ।
   धि॑या॒जुरः मिथु॒नासः सचन्त ।
   धि॑या॒जुरो मिथु॒नासः सचन्त ।

Halfverse: c    दे॒वोदे॑वः सु॒हवो॑ भूतु॒ मह्य॒म्मा नो॑ मा॒ता पृ॑थि॒वी दु॑र्म॒तौ धा॑त् ।।
   दे॒वोदे॑वः सु॒हवो॑ भूतु॒ मह्य॑म्
   दे॒वोदे॑वः सु॒हवः भूतु मह्य॑म्
   दे॒वोदे॑वः सु॒हवो भूतु मह्य॑म्

Halfverse: d    मा नो॑ मा॒ता पृ॑थि॒वी दु॑र्म॒तौ धा॑त् ।।
   मा नः मा॒ता पृ॑थि॒वी दु॑र्म॒तौ धा॑त् ।।
   मा नो मा॒ता पृ॑थि॒वी दु॑र्म॒तौ धा॑त् ।।


Verse: 16 
Halfverse: a    उ॒रौ दे॑वा अनिबा॒धे स्या॑म ।
   उ॒रौ दे॑वा अनिबा॒धे स्या॑म ।।
   उ॒रौ दे॑वाः अनिबा॒धे स्या॑म ।।
   उ॒रौ दे॑वा अनिबा॒धे सि॑याम ।।


Verse: 17 
Halfverse: a    सम॒श्विनो॒रव॑सा॒ नूत॑नेन मयो॒भुवा॑ सु॒प्रणी॑ती गमेम ।
   सम॒श्विनो॒रव॑सा॒ नूत॑नेन
   सम् अ॒श्विनोः अव॑सा नूत॑नेन
   सम् अ॒श्विनो॑र् अव॑सा नूत॑नेन

Halfverse: b    मयो॒भुवा॑ सु॒प्रणी॑ती गमेम ।
   म॑यो॒भुवा सु॒प्रणी॑ती गमेम ।
   म॑यो॒भुवा सु॒प्रणी॑ती गमेम ।

Halfverse: c    आ नो॑ र॒यिं व॑हत॒मोत वी॒राना विश्वा॑न्यमृता॒ सौभ॑गानि ।।
   आ नो॑ र॒यिं व॑हत॒मोत वी॒रान्
   आ नः र॒यिम् वहतम् आ उ॒त वी॒रान्
   आ नो र॒यिं व॑हतम् ओत वी॒रान्

Halfverse: d    आ विश्वा॑न्यमृता॒ सौभ॑गानि ।।
   आ विश्वा॑नि अमृता सौभ॑गानि ।।
   आ विश्वा॑नि अमृता सौभ॑गानि ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.