TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 763

Hymn: 40_(752)
Verse: 1
Halfverse: a    पु॑ना॒नो अ॑क्रमीद॒भि विश्वा॒ मृधो॒ विच॑र्षणिः ।
   पु॑ना॒नो अ॑क्रमीद॒भि
   पु॑ना॒नः अ॑क्रमीत् अ॒भि
   पु॑ना॒नो अ॑क्रमीद् अ॒भि

Halfverse: b    विश्वा॒ मृधो॒ विच॑र्षणिः ।
   विश्वाः मृधः विच॑र्षणिः ।
   विश्वा मृधो विच॑र्षणिः ।

Halfverse: c    शु॒म्भन्ति॒ विप्रं॑ धी॒तिभिः॑ ।।
   शु॒म्भन्ति॒ विप्रं॑ धी॒तिभिः॑ ।।
   शु॒म्भन्ति विप्र॑म् धी॒तिभिः ।।
   शु॒म्भन्ति विप्रं धी॒तिभिः ।।

Verse: 2
Halfverse: a    आ योनि॑मरु॒णो रु॑ह॒द्गम॒दिन्द्रं॒ वृषा॑ सु॒तः ।
   आ योनि॑मरु॒णो रु॑हद्
   आ योनि॑म् अरु॒णः रु॑हत्
   आ योनि॑म् अरु॒णो रु॑हद्

Halfverse: b    गम॒दिन्द्रं॒ वृषा॑ सु॒तः ।
   गम॑त् इन्द्र॑म् वृषा सु॒तः ।
   गम॑द् इन्द्रं वृषा सु॒तः ।

Halfverse: c    ध्रु॒वे सद॑सि सीदति ।।
   ध्रु॒वे सद॑सि सीदति ।।
   ध्रु॒वे सद॑सि सीदति ।।
   ध्रु॒वे सद॑सि सीदति ।।

Verse: 3
Halfverse: a    नू नो॑ र॒यिम्म॒हामि॑न्दो॒ ऽस्मभ्यं॑ सोम वि॒श्वतः॑ ।
   नू नो॑ र॒यिम्म॒हामि॑न्दो
   नु+ नः र॒यिम् म॒हाम् इन्दो
   नू नो र॒यिम् म॒हाम् इन्दो

Halfverse: b    ऽस्मभ्यं॑ सोम वि॒श्वतः॑ ।
   अ॒स्मभ्य॑म् सोम वि॒श्वतः ।
   अ॒स्मभ्यं सोम वि॒श्वतः ।

Halfverse: c    आ प॑वस्व सह॒स्रिण॑म् ।।
   आ प॑वस्व सह॒स्रिण॑म् ।।
   आ प॑वस्व सह॒स्रिण॑म् ।।
   आ प॑वस्व सह॒स्रिण॑म् ।।

Verse: 4
Halfverse: a    विश्वा॑ सोम पवमान द्यु॒म्नानी॑न्द॒वा भ॑र ।
   विश्वा॑ सोम पवमान
   विश्वा सोम पवमान
   विश्वा सोम पवमान

Halfverse: b    द्यु॒म्नानी॑न्द॒वा भ॑र ।
   द्यु॒म्नानि इन्दो आ भ॑र ।
   द्यु॒म्नानि इन्दव् आ भ॑र ।

Halfverse: c    वि॒दाः स॑ह॒स्रिणी॒रिषः॑ ।।
   वि॒दाः स॑ह॒स्रिणी॒रिषः॑ ।।
   वि॒दाः स॑ह॒स्रिणीः इषः ।।
   वि॒दाः स॑ह॒स्रिणी॑र् इषः ।।

Verse: 5
Halfverse: a    स नः॑ पुना॒न आ भ॑र र॒यिं स्तो॒त्रे सु॒वीर्य॑म् ।
   स नः॑ पुना॒न आ भ॑र
   स नः पुना॒नः आ भ॑र
   स नः पुना॒न आ भ॑र

Halfverse: b    र॒यिं स्तो॒त्रे सु॒वीर्य॑म् ।
   र॒यिम् स्तो॒त्रे सु॒वीर्य॑म् ।
   र॒यिं स्तो॒त्रे सु॒वीरि॑यम् ।

Halfverse: c    ज॑रि॒तुर्व॑र्धया॒ गिरः॑ ।।
   ज॑रि॒तुर्व॑र्धया॒ गिरः॑ ।।
   ज॑रि॒तुः व॑र्धय+ गिरः ।।
   ज॑रि॒तुर् वर्धया गिरः ।।

Verse: 6
Halfverse: a    पु॑ना॒न इ॑न्द॒वा भ॑र॒ सोम॑ द्वि॒बर्ह॑सं र॒यिम् ।
   पु॑ना॒न इ॑न्द॒वा भ॑र
   पुना॒नः इ॑न्दो आ भ॑र
   पुना॒न इ॑न्दव् आ भ॑र

Halfverse: b    सोम॑ द्वि॒बर्ह॑सं र॒यिम् ।
   सोम द्वि॒बर्ह॑सम् र॒यिम् ।
   सोम द्वि॒बर्ह॑सं र॒यिम् ।

Halfverse: c    वृष॑न्निन्दो न उ॒क्थ्य॑म् ।।
   वृष॑न्निन्दो न उ॒क्थ्य॑म् ।।
   वृष॑न् इन्दो नः उ॒क्थ्य॑म् ।।
   वृष॑न्न् इन्दो न उ॒क्थिय॑म् ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.