TITUS
Johannes Fischart, Geschichtsklitterung
Part No. 462
Previous part

Paragraph: 11      Mit solchen vnd dergleichen Worten, wußt dieser schön Discipel seinem Hof vnnd Lehrmeister zubegegenen, daß sie fro worden, zu schweigen, vnd jn machen zulassen51. Derwegen als er nach allem vortheil nun gefrüstuckt52, gieng er zur Kirchen. Dann auff vollem Bauch, steht wol volle andacht, vnd auß der Kuchen in die Kirchen : Da trug man jm in eim grossen ledern Sack ein groß schwer beschlagen vnd vereinpantoffelt Brevirbüchlin nach, welchs roh vnd an prettern, solen, beschläg, Clausuren, Leder vnd Pergamen wag eilff inn die zweilff virteil eins Centners Sechs Pfund 'a la grossa' Venediger gewichts gegen Kaliß malis vnd Malucka respondirend. Page: 314   Da hört er sechs vnd zwentzig inn die treissig Messen auff eim fuß : Dann 'vbi maxima spes, ibi minima res'. Vnnd 'conuersò'. Vnter des kam sein Horasbetter vnd Tonsurat an statt, vnnd ersetzt jhn mit seim matutinal vnnd exequial, schön bestolet, bealbet, bekaselt, verschappliret, versubtilet, behandfanet, vnd behumeralet, wie ein Eul im Schornstein, auch seinen Heiligen atham wol verbinet, vernitet vnd antidotirt mit starckem Weinelenden Sirup. Mit demselben mammelt vnd mummelt er alle seine Kirchen lös vns : vnd erkernet, ertreschet, vnnd erlaß es so eygentlich, das nicht ein einigs körnlin vmbsonst auff die Erd ful, es hett kein frachmentaklaubend Hündlein daruon ein Brösamlein vnder des Herrn Tisch gefunden.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.