TITUS
Johannes Fischart, Geschichtsklitterung
Part No. 541
Previous part

Paragraph: 6      Der hinderharrenwertig Nachzug ward bestimpt dem Hörtzogen von Rackedennarren : Inn mitteler Feldschlachtordnung ließ sich der König sampt seinen Landfürsten selber finden, mit Keihel, Wecken vnd Monordnungen, von siben tausent Janitscharen, grad gerechnet, vmbgeben. Also kurtz vberschlagen vnd gerüstet, ehe sie sich in den Anzug begaben, oder den Feind anwendeten vnnd ersuchten, schickten sie mit dem Hauptmann Eugulewind von Klatterbuß, drey hundert leichte Page: 392   Pferd das Land zuberennen, ob jrgends ein verborgener Hinderhalt versteckt lige. Aber nach dem sie es fleissig erspehet, befunden sie die gantze Landschafft Page of re-edition: 303  daselbs herumb gantz still vnnd sicher, ohn einige auffwickelung, vergaderung oder widerstand. Welches so bald es dem König Picrocholo verkundschafft worden, befahl er das alle Fänlin zu gleich streng fortzuziehen sich nicht saumeten. Darauff fulen sie mit gewalt ein, zertheileten sich auff beide seit, streiffeten ferr vnnd weit, verderbten, jagten, blünderten, raubten, garteten, brandschatzten alles was sie ankamen, ohn einige ansehung der Person, wer arm oder reich : Kirchen oder Klöster, Witwen oder Weisen : war alles preiß, triben hinweg Ochssen vnd Küh,26 Lemmer27 vnd Hemmel : Geiß vnd Böck, Han vnd Hennen, Henn28 vnnd Hünlin, Antrach vnd Enten, Ganß vnnd Ganser, Moren29 vnd Säu, kein30 Vogel war inn seim Nest sicher, namen die Taubhäuser auß, frasen das Nest mit dem Vogel, liessen den Wein außlauffen, schossen, warffen vnd schlugen alle Nuß herab, machten inn eim augenblick den Herbst ein, namen die zäun hinweg, als ob sie auff Moscouitisch für Polotzko schantzkörb tragen wolten31, knipfften vnd kuppelten Mägd vnd Knecht, Jungfrawen vnnd Junge Knaben zusamen, vnd tribens vor jhnen her, stürmeten die Binenkörb : wiewol mit gefahr, dann sie mußten das Visier fürthun : schmissen die schönsten öpffel, Biren, Kütten vnnd Nespeln von bäumen herab, ja hiewen die fruchtbarn Beum vmb, wie der Fucker zu Bredau, stiessen alle thüren auff vnd liessen kein Nagel inn der Wand? Ach es war ein jämerliche vngestalte vnordnung, als ob sie vmb den löffel renten32, welcher jhn am ersten der Braut bring. Vnd da fanden sie keinen widerstand, Juncker Page: 393   Frechmut saß im Sattel, vnd Jungfraw Reutrut dahinden : Wa sie hinkamen ergab sich ein jeder33 auff gnad, bittend zu dem freundlichsten mit jhnen zufahren, auß betrachtung daß sie allzeit gute liebe Nachbauren gewesen weren,34 Vnnd jhnen nie nichts vnbilles oder gewalts zugefügt hetten,36 Gott werds gewiß36 nicht vngestraffet lassen37, wa sie vber die Schnur hawen. Ja ja Liebe Nußheintzen, hett ich seidher gelt zuzehlen, sprachen sie, biß ewer straff kommet, Botz todenbaum, wir wöllen euch die Käßkrapffen gesegnen, daß euch alle Plag vnd Beulen schend : biß Gott selbst kompt, haben wir Vogel vnd Nest weg geraumt.



Page of re-edition: 304 
Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.