TITUS
Johannes Fischart, Geschichtsklitterung
Part No. 560
Previous part

Paragraph: 3      HOehers3 vnnd kümerlichers4 hertzenleid mag einem auff Erden nicht zustahn, als so er von dannen, daher er allen guten willen solt gewertig sein, hingegen allerley widerwillen, vndanckbarkeit vnnd feindschafft muß erfaren. Deßhalben dann jhrer viel, die ein solcher vnfall vbereilt gehabt, vnd in dise klammer geraten, nicht ohn vrsach (wiewol wider vernunfftbescheiden Recht) denselbigen so hertzlich zu mut gezogen, daß jhnen jhr lieb Leben darob Bitter vnd schmäh worden, vnd dasselbige weniger5 als den vnbill erträglich6 vnd leidlich geschetzet : also, daß da sie den plötzlichen ruckwend vnd spott des glücks weder durch sanffsame noch gewaltsame mittel zuverbesseren gewußt noch vermocht, dahin sinnverrucklich sind verfüret7 worden vnnd verfallen, das jhnen die8 gantze Welt vnnd alle Menschliche beywonung dermassen abscheulich ist erleidet9, daß sie derwegen auß verzweiffelung solchen jhnen widerfahren vnfall widerumb abzubringen, sich10 selber dises Liechts entsetzt vnd zur ewigen Todenfinsternuß Page: 418   eigner hand haben gefördert11. Ist derwegen nicht zuuerwunderen, wa auch nun zumal der Großmächtig König Großgurglier12 mein gnädigster Herr ab deinem wütigen vnd feindlichem einfall etwas grosses mißfallens vnnd beschwernuß trägt. Ja vil mehr stünd es zuverwundern, wann S. Mt : sich den manigfaltiggeübten vberfall vnd mutwill von dir vnnd den deinen an jhm vnd den seinen angewendt vnnd geübt, nicht zu treuen hertzen fürete. Dann vber diß, das seiner Kön : Page of re-edition: 323  Würde dero liebe Vnterthane sehr ängstlich, wie eim Vatter seine Kinder angelegen, so thut es dero insonderheit weh, solch schmach vnd tratz von dir vnd deim Volck zuerfaren, mit welchem doch S. Mt : vnnd dero Vorreltern von alten ohnhinderdencklichen zeiten her inn fester Nachbarlicher Erbverbündnuß allweg ist gestanden. Dieselbige auch biß hieher also vnuerbrüchlich Heilig vnd steiff beiderseits gehalten worden, daß es nicht allein bey seiner Mt : sondern auch den Barbarischen oder Ferrfarenden Nationen jhenseit der Zucker Insel Canarien vnnd Isabelle ein solch ansehen gehabt, daß vil leichter das Firmament zuzerrütten, vnnd der abgrund vber die Wolcken auffzurichten, als euer beider Mayestat bund zutrennen sein geschinen : auch dise Länder denselbigen also gescheuet, daß sie auß forcht eines vnd des andern, gegen keim theyl, oder deren Bundverwanten niemals etwas feindlichs haben vnterstehen dörffen : sonder noch wol zuzeiten inn die Gemeinschafft der einigung auffgenommen zuwerden angelanget. Ja sich gutwillig jhrer ein ansehlich theyl zinßbar gemacht : der ein mit Dänischen Pferden, der ander mit Frisischen Ochssenhäuten, der dritt mit Specerei, der viert mit Frantzosenholtz, der fünfft mit Papegeifedern : Page: 419   der sechst mit Thüringischen Sauhäuten : der sibend mit Bambergischen weissen Pferden, der acht auff Eßlingisch vnd Leberauisch mit eim Wagen mit Flachs, vnnd ein Sester voll Haller : der neunt mit eim Englischen Docken : Dann sie jhrem keim den hon thun wolten, wie Keiser Henrich der Vogler, den Hunischen Vngarn, daß sie jhnen schäbige gemutzte vnnd gestutzte Hund solten für Tribut aufferlegt haben. Was für vnsinn treibt dich dann nun, so liederlich alle freundschafft außzutilgen, alle Bündnuß zutrennen, alles recht zu vndertretten, vnd vnuerursacht oder vngereitzt die Nachbarschafft verherglich vnd arglich anzufechten vnd zubetrüben. Wa ist treu vnd glauben? Ist diß recht vnd billichkeit? Heißt dz Menschlich vnd vernünfftig bei einander gewonet? Förcht man also Gott? Meinst Göttliche allgemeine gerechtigkeit, welche allen vnbill sihet vnd richtet, werd dich allein vbersehen? Nemm dirs nur nicht inn sinn : Gedenck an mich, diser hochmut wird dir noch zur demütigung gereichen, wie gemeinlich allen Königreichen, die sich jhrer Macht vberhebt, geschehen? Dann die auff der höchsten Page of re-edition: 324  Spitze stehen, die stehen nicht satt, es wird jhnen nichts meher, dann daß sie wie im Spil der faulen brucken, einmal die händ zusammen schlagen vnnd jauchtzen, vnnd alsdan wider herab springen, ritschen vnnd13 bürtzeln : ja wann sie sich nit recht vortheilhafftig inn die Wag stellen, darff sie die spitze des gewalts durchtringen vnnd vmbringen. Die auff der höhe des Baums hangen, stehen gefehrlicher als die so die14 Mitte, da der Baum am stercksten ist vmbfangen15. Derwegen hast du den gipffel des Thurns erlangt, so gedenck nit vber den knopff, sonst wirdest keinen bestand noch hafftung antreffen. Wiewol etwan einer Page: 420   sagt, wer am höchsten schweb, der zerstoß kein kopff, so sagt doch einer hinwider, ob wol nit den Kopff, doch dermassen die Knie, das der Kopff hernach bürtzelt. Aber, wa es jhe also Gott verhenglich vorbestimmet16, zumal deiner Wolfahrt vnnd Rhu entsetzt zuwerden, ist es mir leid, daß es sich eben inn betrübung meins Gnädigsten Herrn Königs, durch den du eingesetzt vnd allzeit bestandhafftiget gewesen, schicken : vnd der fall deines Hauses durch disen17, der es gezieret, befördert18 werden soll : Leyd ist es mir, das daß vndergestützte Hauß sich wider seine eigene Stützen vnd Pfeiler, von denen es seine Auffenthalt19 hat, setzet vnnd strebet. Sintemal es gantz vnd gar wider alle vernunfft streitet, vnnd von keim Sinnbegabten Menschen kan gebilichet werden : Sondern von allen Einheimischen vnd Fremden, zu denen dise vngeschicht außbricht, wol für ein Exempel vnd muster menschlicher vnbestendigkeit, mag auffgenommen, vnnd zur Warnung auff einigerlei Menschengeschäfft vnd kräfft, wie hoch es auch versichert, vnd beeidheiliget ist, nicht zu trauen noch zubauen, dienlich behalten werden. Wa dir vnnd deim Reich einiger gewalt von vns begegnet, wa wir deinen Feinden etwas gonstes oder vorschubes beweisen20, nicht allen vnraht gewendet, inn deinen nöten nicht beyständig, deiner Würden vnd Ehren verletzlich gewesen weren : Oder, es näher zubegreiffen, vns vileicht ein hinderruck verlügender Geist vnd vergifft schandmaul, durch dückische verblendung vnd arge geschraubte Lugenwort bey dir vertragen hette, stunde es doch inn alle weg deiner hohen Würden wol an, zuvor desselbigen einen grund zuerforschen, vnnd alsdann vns dessen zuerinnern : so solt es Page of re-edition: 325  vnsers theils bescheidener billichkeit halben Page: 421   nicht also glimpffvergeßlich fehlen, das wir vns nicht entweders21 der beschuldigten aufflagen entlediget, oder darumb ehrengemäsen abtrag gethan hetten : Aber, ach du ewiger Gott im Himel, was kanst du andere, dises deines freuels vnd vnthat22, vrsachen anziehen oder fürwenden? als eben den gewalthätigen mutwill vnd gelüstige begewaltigung, damit du vns nun augenscheinlich auß hochmut vnd vermessener rachgir, eigenes mutwillens meyneidig, Räuberisch vnnd Tyrannisch anwendest. Daurt dich nit dein Liebes Völcklin, welchs du inn die Brü führest : Es daurt doch etwann den von Hagenbach nicht so sehr sein kopff, welchen er durchs Schwerdt verlieren mußte, als das gut Volck, welchs Ertzhertzog Carl sein Herr, jhnen zurechen, wirde verwagen. Kein wunder wers daß dich, vmb verhütung zukönfftiges Jamers, ein Donnerstral dritthalb Centner schwer, inmassen23 einer zu Enßheim inn der Kirchen hengt, inn die Hell hinab schlüge, gleich wie die Auffrührer Dathan vnd Abiron. Jedoch was wirstu mit deiner vnweiß24 gewinnen? Zwar nichts anders, als alle Wüterich, die Gott vnnd Ehren vergessen an eigner Herschafft vnbenügig,25 andere vnbefügt anfallen. Dan hastu jhe vnsern Gnädigsten Herrn also vnuerstendig vnd vnbehutsam erfaren, daß er also gereitzt nit wolt, oder also machtloß an volck, gelt, Raht vnd Kriegserfarenheit gespürt, das er nit köndt vnd solt deim vnköniglichem trotzigen einfall widerstehen? Derwegen hab dir dz zu entlichem bescheid, zihe von stundan on ferrner betrübung von dannen, dz du zum aller lengsten des morgigen tags in deins Lands Grentzen vnd Boden legerst vnnd stallest : vnd zal für den abzug vnd abtrag tausent Besanten oder siben tonnen golts : dz halb vff morgen Page: 422   zuerlegen, das vberig auff nächstkünfftigen ersten Mey : Vnnd dessen zuverbürgung, schaff vns zu Geiseln die Hertzogen von Tournemole, von Treibmül, von Wentdenhaspel, von Baßdefesses, von Schnaubdibillen, von Menual26 : auch den Dom de Nalga, vnd Waivoda von Polrzitki : sambt dem Vicegrauen von Morpiaille, Herr27 zu Schüpeneck, vnd dem Printzen von Grateln28, sampt dem Jungherrn Goschenberger von Waffeleck.



Page of re-edition: 326 
Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.