TITUS
Johannes Fischart, Geschichtsklitterung
Part No. 564
Previous part

Paragraph: 5      Als sie nun an das Statthor kamen, begerten sie von wegen des Grandgusiers mit dem Picrochol zu sprachen, aber er wolt sie nit einlassen, auch nit zu jhnen hinauß, dann er ließ fürwenden, er wer sonst mit geschäfften beladen, solten aber alle jhre Werbung bei dem Hauptmann Duckedilen anbringen, welcher on das auff der Maur ein stuck Büchssen beschoß : Dem sagt nun der abgesant Heralt : Herr Hauptmann, euch18 nit lang auffzuhalten, vnnd gegenwertiger vnrhu vnnd aller außred, inn die altgewonte Freundschafft zutretten, zuentheben, so vbergeben wir euch jetzumal die Käßkrapffen, derenhalben der hefftig streit ist : vnser Volck nam jr fünff totzent, doch mit erfolgter erbarer bezahlung : Page of re-edition: 328  gleichwol sind wir also fridgeflissen, daß wir euch 5 Kärch voll wider geben : vnter denselben soll dieser so der breitest, des Marxen Saurimgeseß sein, welcher sich am mehsten beschwert fület : vnd zum vberfluß jhn gentzlich zuuernügen, secht da huntert siben tausent vnd trei Engergroschen19, die ich jm vberlifer : Page: 425   Deßgleichen für allen weiteren anspruch20, vbergeb ich jhm die freie Erbnutzung der Meyerei zu Gaggenpfill, oben an den Regenbach, vnten auff die Junckhern von Adelstoll stossend, vnnd zur seiten auff Fritzenlippen Matten, vnd Schultheisen Lentzenpopp Senne, jhm vnnd seinen Nachkommenen ewiges bestands erbnutzlich, in bester form Erbrechts, laut der gegenwertigen exhibirten verschreibung darüber auffgericht : vnnd laßt vns vmb aller Heyligen willen forthin fridlich miteinander leben, ziehet mit freuden wider heim in ewer Land, laßt vns diese Landwehr, darzu jhr gar nichts befügt, vnvorgehalten, vnd bleibet Freund wie vor. Haubtmann Trockenteller zeigts alles seim König Picrochol an, doch mit zusatz vnd vergifften nebenhetzworten, sprechend. Botz hundert tausent Regiment, die Knebel förchten sich rechtsinnig, die Katz laufft jn den rucken auff, es träumt jhnen vom Teuffel. Bei Jobs Hunden, Großbruchier scheißt schon vor angst inn die Hosen, es ist dem armen Weinlepper vngewont in Krieg zuziehen, aber hinter die Krüg geb er ein Schützen, er ziehet lieber inn die Häfen als inn Krieg21, so kan er sicherer herauß kommen. Mein meynung wer, man22 schickt jhnen jhre Notelkrapffen vnd Gelt wider heym,23 ließ sie ein Pfeffer darüber machen : Vnnd wir führen inn alle Macht fort, wie angefangen. Dann sehen sie E. Mt. für ein Bonenwibel vnnd Rattenkönig an, daß sie die mit jhren Käßfladen mästen wollen? da sicht sie was es ist, ewer grosse freundlichkeit, die jhr jhnen vor der zeit erzeigt gehabt, gereicht euch jetzt bei jhnen zu einer verachtung. Salbt den Schelmen, so sticht er euch, stecht den Schelmen, so salbet er euch. Da, da, da, sprach Koklopocol, bei tausent Page: 426   Elenwunden, sie habens nur darumb gethan, wie du gesagt hast.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.