TITUS
Johannes Fischart, Geschichtsklitterung
Part No. 567
Previous part

Paragraph: 3      NAch dem die Semkuchen in Clemaltburg4 geführt5 gewesen : erschinen vor dem Gallenkollerigen König Kyklopocol, der Großhertzog von Testamale, der Hertzog von Page: 428   Tandmäringen, Graff Spadassin, Freyherr von Schnaderentingen, vnd Hauptman Michel Merdaille genant Sichelzull, sampt seim Litenant Eberzan Tonnerbotz, vnnd sagten jhm : Gnädigster Herr, wir wöllen E. Mt : heutiges tags ein rhat geben, der die mächtiger vnnd glückhaffter als den grossen Alexander machen soll. Wie da? Seit gedeckt, sprach Picrochol : Danck haben E. L. sagten sie, Gnädigster Herr, wir thun vnser gebür : Aber zur Sach : vnser bedencken ist diß, E. Mt. laß hie einen Haubtman inn besatzung mit etwas Volcks, diese feste zu halten : vnd theil alsdann jhr Hör inn zwey theil, wie die am besten verstaht : Deren das ein den Großguchier vnnd sein Volck vberfall : den werdet jhr im ersten zug vnd flug gleich haben : Da werd jhr Gelt vollauff finden, dann der Filtz hats bei der schwäre : Filtz sag ich, dann ein hochgeadelt Fürstlich gemüt hat nimmer kein Haller, die grobe vnuerstendige Filtzhüt schatzen vnd sammelen nur Thaler. Das ander Hör zihet dieweil auff Xanton, Angolme, vnnd Gasconien, da gewint sie Stätt vnd Land ohn widerstand : zu Baion, zu Sant Jan von Luc, vnnd Fontarabien nemmet jhr alle Schiff, damit jhr gegen Gallicien vnnd Portugal streiffet6, vnnd alle Möranstössig Land biß gen Vlisbona plündert7, oder rüstet daselbst euch mit einem Kriegsgemäsen Schiffzeug als ein Zugherr, etwas einzunemmen8. Ho, bei hundert tausent Lastwegen9 Lamenten, Spanien ergibt sich : dann10 es sind nur Moranische Granatbutzen Page of re-edition: 331  vnd Magsamen Köpff. Nur dem Draco vnd Frofischer darwider geschickt. Wir wöllen auch den Don Anthonio einsetzen, dann sie haben doch gern Bastart vnd Don Joan ist gestorben. Da werd jhr durch die Sibyllische Enge rauschen, vnnd viel stattlicher Seulen als des Herculis Page: 429   daselbs zu ewigem gedenckmal auffrichten, vnnd wird dieselbig gegene forthin das Kyklopocolisch Bittergallisch vnnd Picrocholisch Mör heissen. Wie? wann ich, sprach der König, daselbst die Gaditanisch Enge des Mörs wider zuwürffe? welche Hercules mit grosser mühe außgegraben hat, darmit er daselbst das Mitländisch Mör herein brächt? so könt man darnach allzeit truckens fuß auß Europa inn Affricam vnnd Asien spacieren : vber die andern Mör machen wir Brucken : oder wolt sich etwa ein Mör widersetzen, so geisseln wir es wie Xerxes, vnnd lassen jhm das Loch voll streichen : Dann jhr wüßt, das Hör der flüchtigen auffrhürischen Knecht ward gleich flüchtig, da jre Herren mit handvölligen Peitschen vnd Ruten gegen jhnen zur Schlacht traten : O hett mans im Baurenkrieg gethan, vnnd wer mit Flegeln wider sie außgezogen, viel Bauren weren bei Leben blieben : Aber du Sichelzull sag, wer hat den Baurenkrieg11 gemacht? Hay12, ich meyn die Hafner. Aber, wo schiffen wir auff dem Mör? Wan aber manchs Mör, wie ein böses Kind, nicht auff die Ruten gebe? Da müßt mans wie die Venediger mit güte gewinnen, jhm ein Ring darein werffen, vnnd es vns vermählen : thets dann wie ein ander halßstarrig Weib, so öffnet man den verlornen Lauffgraben zum Mon, vnnd laßt es inn den Mon ablauffen. O wie werden da die Türckische Weiber inn dem Mon, inn dem Machometischen Weiberhimmel not ruffen, wann diese Weibersündfluß13 käme. Der Monsüchtig fluß Nilus inn Egypten wirds auch nit gelachen. Wir wolten alsdann auß dem Egiptischen Δ ein schön Λ machen : wir wöllen auch wie Caligula Berg ins tieffst Mör setzen, vnd schlösser drauff bawen, damit die müde Vögel, wann Page: 430   sie vber Mör fliegen, drauff rhuen mögen : vnd die Berg ins Thal ziehen, die Mör entweder außfüllen oder zusamen graben, die See pflästern, das Mör durchziehen, Brucken von eim Berg zum andern machen, vber das Mör zugehn vnnd vbers Land zuschiffen.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.