TITUS
Johannes Fischart, Geschichtsklitterung
Part No. 569
Previous part

Paragraph: 5      Ist dann Italien eingenommen, seh da, so ist gleich an der hand Neaplis,24 dasselb groß Ey gewinnen wir mit hülff des Königs Caroli von Aniou Zauberer, der macht vns auß einer Wolck ein Bruck ins Mör : aber da schrenck keiner Hend noch Finger kreutzweiß, wir hetten sonst vnser Tod vnd Rot Mör genug daselbst. Von Sicilien macht man ein steglein mit eim krengel auff Italien, vnd ein Fallbruck inn Sardinien. Maltha nimpt man vnter den arm. Ich wolt auch gern, sagt Picrochol, gen Laureto, ein Walfahrt zum fliegenden stiebenden Marienkämmerlin zuthun : nein, nein, sprachen sie, es schickt sich nit, das geschicht wol im wider vmbkeren. Darnach bezwingen wir Candien, Cipren, Rhodiß, die Cicladische Insulen, Moream, sampt dem gelobten Land. So will ich alsdann, sprach er, gleich Salomons Tempel25 bawen. Neyn, sprachen sie, wartet noch ein wenig, nit eilet also mit der Geiß auff den Marckt26. Wißt jhr was Keyser Octauian sagt, 'Festina lente', Eil mit weil. Jhr müßt vor klein Asien, Carien, Lycien, Pamphilien, Cilicien, Lydien, Phrygien, Mysien, Bitinien, Charasien, Satalien, Samagetien27, Castamena, Luga, Sauasta biß an den Euphratem haben. Werden wir auch, fragt König Koderbitter28, Babel sehen, welchs von keim Kalck, sonder von Judenleim auß dem Gomorrischen Bechpful anffgebawet ist, vnnd leichtlich mit angezünten Schäubenhüten zugewinnen were29 : Jtem auch30 den Berg Sinai sehen? Es ist, antworten sie, für dißmal nicht vonnöten : Ist es nicht genug vmbgezogen, wann man vber das Hircanisch Mör hat gesegelt, beide Armenien vnnd die Trei Arabien durchgeritten? Auff mein trew, sprach er, wir närren vns, ach arme Leut (wie so? wurffen sie darunder31) was werden wir in derselben32 öden wüsten33 Page: 434   stäubigen stibigen Sandschandban der sandschampanien zusauffen haben? Dann Keyser Julian vnd sein gantz Hör starben daselbs durstes34 : es ist allda ein rechter Gottsacker der Cammel, vnnd ein stets hochzeitfest der Geiren : darzu stäubt eim der sand in hals, das verursacht ein vnseglichen durst : Wir, antworteten35 sie, haben dem schon rhat gefunden. Im Sirischen Mör werd jhr neun Tausent virtzehen groser Nauen mit bestem wein geladen haben, Page of re-edition: 335  von dannen segeln sie auff Japhes : Allda werden allzeit zwey vnnd zwantzig hundert tausent Camel vnd sechtzehenhundert Elephanten ordenlich nach dem Compaß vber Land zutragen warten, welche jhr in einer jagt bey Sigeilme, wann jhr ohn das durch Lybien reiset, fangen köndt : Vnd zum vberfluß köndt jhr die gantz Choroana,36 oder die Caravanische Cameelsaum vnnd Gesellenschar, die von vnnd auff Mecha37 Walfartenweiß wie die Aumeisen auß vnd einziehen mit Kauffmanschatz beladen, zum vortheyl haben : Da wolln wir den MörRäubern zu Land, oder viel mehr Arabischen SandRäubern vnd Staubstäubern das streiffen legen. Oder der Zambei in Wüst Arabien leihet euch sein 1000 stuten, die ein tag hundert Meiln lauffen : oder leihet euch sein künstlich Armbrost, darauff man euch darschieß : Ist das nit ein vortheil, in dem dürstigen land so vil leut vnd viech zu38 land vnd mör zum besten haben? Sorgt jhr noch, die können euch nit Wein genug zufüren? Nicht deß minder, antwort er, werden wir39 den Wein dannoch nicht frisch trincken. Bey Sanct Franciscus leiden, sprachen sie, nicht vmb ein kleins heller werts schneider Fischlein : Ein Held, ein Landzwinger, einer der nach allgemeiner Erdbeherrschung vnd WeltKeyserthumb trachtet, kan nicht alles so geschliffen Page: 435   nach seim willen haben : Er muß zuzeiten mit40 Keyser Cyro auß einer schmotzigen Beckelhaub trincken, vnnd mit dem Kärntischen Fürsten auß eim gebichten Filtzhütlin, vnnd mit König Gwischard auß Mörmuscheln, vnnd mit jenem vertreibenen41 König auß einer schaffschellen, vnd mit den hoffleuten auß der schwertzgespickten hulfter, oder gar auß der Schwertzbüchs, oder auß dem dolchenknopff am Reuterbock : Man kan eim Kriegs Fürsten nicht nach der Päpstlichen ordnung, wie den Cardinäln auff dem Concily zu Trient jhre Sammate Scheißstül vnnd Bespiegelte Seichkacheln, oder ein Wagen Credentzter vnnd Versecretierter gelinder Arßwisch nachführen. Aber das können wir thun, vnnd von Casir die schiff auff Cameeln ins Rot Mör vbertragen lassen, wider die Indier zukriegen : Doch wöllen wir vor die von Alexandro Magno mit Eisenbalcken versperrte Caucasische Clausen inn den Caspischen Gebürgen erbrechen, es kriechen darnach Teuffel, Türcken, Geschnäbelt Leut, blau oder Rot Juden oder was es will herauß. Nun, kommen wir nicht schier Page of re-edition: 336  wider herumbher? Wir sind fro42 daß jr vnd euwer Volck so gesund vnnd frisch biß zum43 Tigerfluß ankommen seidt, o wie keichen sie schon, wie wird jnen der wein so wol schmacken.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.