TITUS
Johannes Fischart, Geschichtsklitterung
Part No. 571
Previous part

Paragraph: 7      Damals, als sie diß fürprachten, war eben auch zugegen ein alter erfahrener vom Adel, ein rechter nasser Kund vnnd ein Schnautzhan inn Kriegen60, genannt Echephron von Hattmut vom geschlecht Cyneæ, deß Epyrischen Königs Pyrrhi wol vertrauwten Rahts, welcher, als er diß traumkriegen angeben höret, sprach er. Ich besorg, das all diser anschlag werd außschlagen wie dem Einsidel im Buch der alten Weisen : wie war das? antwort, 'In illo tempore', da die Thier redten, ja da die gemalten vnnd Götzen bestelte Wänd Predigten, Page: 439   vnd die Menschen schwigen, vnnd die Häuser mit S. Loreto61 vber Mör flogen, vnnd die Ostien das Wasser hinauff schwamen, da62 war ein wilder Mönch,63 ein Waldbien, ein Waldbruder, aber kein Waldenser : jedoch ein Bruder Clauß in der Clausen, aber ein äsiger, doch kein Häuschreckenäsiger, sonder Honigfräsiger, dem schickt der König zu aufenthaltung seins Lebens allzeit seine Speiß, vnnd darbei für Senff etwas Honigs, dann er hett auch ein Englisch Zuckermaul : Die Speiß aß er, den Honig spart er, vnd that denselbigen64 in ein grossen jrrdinen Cananeischen Krug vber seiner Bettstatt hangend, biß er voll ward, da kam ein grosse thewrung inn den Honig. Dann der Welsch Bapst hett dasselbig Jar Weidvergiffter außgesant, also daß der Kütreck, darauß die Binen wachssen, vbel gerhaten war. Das hett nun diß Honigmaul vorlengst wol im Traum durch S. Francisci holen Stab am Gestirn gesehen vnd Prognosticirt, vnd deßhalben den Honig wie Joseph auff die siben magere Jar auffgeschüttet : hieß derhalben sein Seel, wie der reich Mann, frölich sein vnd essen, vnnd frewet sich des Honigsterbens vnnd Kühtreckvergifftens Page of re-edition: 339  wol so fast als die Kornjuden wann Sanct Gregor auff eim falben Hengst daher reut : Als er nun eins morgens frü im Bett lag, vnd dichtet wie Marcolfus, bawet Schlösser inn Spanien vnnd Stätt inn die lufft, da sah er sein liebes Honigkrüglin vber jm zu haupten hangen, lacht es an, vnd redet mit jhm selber. O du mein Hertzensefftlin, du kompst mir jetzund wol, du wirst mich noch reich machen, dann jetzund kan ich dich vmb siben gulden verkauffen, vmb dieselbigen kauff ich mir zehen Schaf die tragen alle Jar zweimal Lämmer, also werden eins Jars zweintzig, inn zehen Jaren Tausent : alsdann Page: 440   verkauff ich dauon Milch, Käß vnd Woll, vnd kauff für daselb gelt Kü, vnd je für Fünff Schaff eyn Ochsen, die machen vil Mist, leih als dan den Bauren auff die Aecker, vnd löß sie an mich, vnter deß haben sich Ochssen vnd Kü gemeret, die treib ich zu Marck, löß viel Gelt, ding mir damit Mägd vnd Knecht zu Hauß vnd zu Feld, werd also von Tag zu Tag Reicher, bau schöne Häuser, halt Königs Artus hoff, vnnd nem alsdan eyn frisch, das ist, From, Reich, Jung, schön Weib von grosem Geschlecht, dan wer wolt mich nicht, wan mir die schwer Täsch also den Latz eintruckt? Da schertz ich dan mit jr, Käterle geb mir eyn schmutz, vnd schlaff bei jren an jren Schneweisen Armen, vnd truck sie, daß sie vber eyn Jar eyn holdseliges Sönlin pringt, das heiß ich alsdan wie mich, vnd zih es fein inn aller Lehr vnd Gottsforcht auff : Dan es ist kein Hur so verrucht, sie zög dannoch gern eyn From Kind. Aber wann mir65 daß Cläußle nit folgen wolt, Botz Krisam, so wolt ich jhn so jämmerlich abbören mit diesem Stecken (dann er hett eben damals seinen Stecken, damit er das Bett macht, inn der Hand, vnd Fantasirt dran) daß jm nach Gott vnd der welt wee müßt sein : zuckt damit den stecken, vnd wolt jm selbs weisen wie er66 das vngeborn Sönlin so hart schlagen vnd abbören wolt, vnd traff im streich sein vnschuldigs Krüglin, daß es zu scherben zerfuhr, vnd jhm der Honig ins angesicht, haar vnd bart floß vnd spritzt, vnd jhm die augen verkleibet vnd das Bett beschiß : Ach, da lag aller anschlag im treck, da lag67 der Honigträumer im Honig vergult biß vber die Oren, beschiß sich hinden vnd fornen, da waren schon die Häuser auß gebauet, daß Sönlin war Page of re-edition: 340  schon so wol gerhaten, daß es jhm den Honigkrug zerprach, vnnd gewan Page: 441   von allem seim Armen jüdischen Sinn wuchern nichts meher, als daß er sich vnnd das Bett wischen vnnd weschen müßt : O du arm jrdin glück, warumb bist nicht stälin? O Honigglück wirst so bald Konig? sichst im hafen Guldenfarb, vnnd im Bett Kindstreckfarb. Secht liebe Herren also gerhiet diesem Bruder das Honigwuchern, da er gar reich wolt werden, het er nicht meh zuessen, der jrdin anschlag plib jrdin vnd zerful jrdin. Derhalben habt jhr wol fürzusehen, daß wann jr nach Schne zihet, er villeicht vergeh, eh jr dahin kommet : wann jr nach graß zihet, es schon abgemäiet sei : Oder jhr vergeht eh jhrs secht : Oder eyn Berg steht68 dazwischen, daß jr nicht ins ander thal sehen könt : Vnnd laßt das stuck Fleysch im maul fallen vnd schwimt nach dem schatten. Gedenckt an Hertzog Lupolds Narren, welcher, da er hört, daß sein Kriegs Räht jm all rhieten wie er in das Schweitzergebirg käm, sprach er, ich hör wol rhaten wie man hinein komm, aber keyner sagt wie man wider herauß komm, der Fisch kompt wol ins Reiß, wie in die Fall die Mauß, aber nicht wider herauß. Es gieng auch also : darumb war der Fuchß gescheider, der zum Krancken Löwen nicht inn die Hül wolt : 'quia me Vestigia terrent' : sprach Keyser Rudolff von Habspurg, als man jhm rhiet, er solt wie andere Keyser inn Italien ziehen69 : die spur ist wol hinein gericht, aber keine herauß nicht sicht. Ist derwegen vnvonnöten außzutheilen die Beut, eh erhalten ist der streit : Die Bärenhaut verkauffen, eh der Bär gestochen ist : die Pruck zum anzug vber das Mör wie Xerxes, vnnd vber den Rein bei Mentz wie Julius Cæsar anwerffen, vnnd zur flucht abwerffen. Vnd lieber sagt mir, was wird das end sein solches ziehens vnd bemühens? Das wirds sein, antwort Bittergroll70, das wann wir wider kommen, Page: 442   vns zur rhu begeben, vnnd guts muts sein. Darauff fragt Habmut, vnnd wann jhr villeicht nicht wider kämen? sintemal der weg weit vnd gefehrlich ist : wers nit besser daß wir vns jetzund zur rhu begeben, eh wir vns inn die gefahr wagten? Dann die Wittib, deren Keysers Traians Son das Kind zu tod hat gesprengt, wolt dem Keyser den Rechtspruch darüber zugeben nicht so lang sparen, biß er auß seim vorhabenden Zug wider käm : O, sprach der Herr von Page of re-edition: 341  Schnaderentingen, botz Erdrich, secht da den guten alten Koderer, er kodert dannoch nit so gar vbel : hei wol an, hats die meynung, so laßt vns inn ein eck beim Camin schrauben, oder für Ofen ziehen auffs Spanbett, vnd dafür allda vnser weil mit schönen Frawen zupringen, newe Däntz vnnd trachten erdencken, Perlein einfademen, Corallen einstechen, den Anspin vnnd Würten treiben, den Meidlein die Agen schütteln, die Rocken anstecken, oder, wie Sardanapal, Gold spinnen vnd tapffer schupffen : Was? sagt nit Salomon, wer sich nicht darff wagen, bekompt weder Pferd noch Wagen :71 Hingegen sagt nicht Malcon, wer sich, sprach Hattmut, zu viel waget, Wagen vnd Roß verwaget72. Geltgeitz wird offt zur Gelbscheiß, Ehrgeitz zu eim Erbkreutz, vnnd der Landgeitz zu eim Landschalck. Nun fortan, sprach Picrochol, was haben wir weiters zum besten. Ich förcht mich nur vor des Grandgusiers73 Legion Teuffeln vnter des wir drinnen inn Mesopotamien stecken : Wann sie hinden inn vns fallen da rhaten zu was man da thu? Gar wol, antwort Merdaille, dann wann E. M. obgedachter Rhat nit gefällig, schicken74 sie nur ein feine kleine Commission an den Moscoviter, so schickt er euch inn eim schnaps vier hundert fünftzig tausent außerlesenes Volcks, welche Page: 443   nur mit eim rauchspeienden Tartarkopff alle Schlesieroren ablassen76 vnd allen Polen bigaice machen, oder beschreibt des Delphins Armegecken vnd Schinder auß klein Britannien, die kommen als dann mit den Edeln Zigeinern auß klein Egypten, vnd stelen vnd hencken das Land auß. O wann jhr mich zu ewerem Lieutenant setzten, ich fräß jhren ein gantzen Sträl voll vmb ein geringen Solt, wann es schon Leuß für Leut weren, Pa, Ich sterb vor lust, ich platz an, ich fall an, ich schmeiß, ich zerreiß, ich beiß, ich schiß, spey Fewer, schlag auß, werff mit Steinen, stoß mit Ferssen, schlag tod, ohn genod. Auff, auff, rufft Picrochol, truckt, ruckt hernach, vngesaumpt, wer mich lieb hat, folg mir, thu wie ich, der Teuffel hol den letzten, den nächsten beim Kachelofen, den hindersten fauln arß wöllen wir auch wie die Scythen dem Mars opffern : 'Occupet extremum scabies'. Das Glockfewr schlag dem hindersten ins Loch, daß alles verprenn, was kompt hernach. Es ist nimmer gut der letzt sein. Dann vnder den Storcken, welcher am letzten Page of re-edition: 342  inn Asia ankompt, den zerreissen die andern. Trommenschleger schlag drauff, Trommeter Plaß auff : zuckt, haut, stecht : werfft alle Nuß vnd Holtzöpffel herab, dann die stumpffe Stoßdegen sind mächtig gut dazu : aber nicht die stumpffe Zän. Nun stumpfft, kumpff, rumpff, vnd stumpff : Thut die Augen auff vnnd die händ zu : speiet fornen Fewer vnnd scheißt hindenauß funcken : schnurrt, murrt vnd burrt wie dort der Heyden hauff : brumpt ein Baß wie ein Hurnauß inn eim Stiffel : haltet den Schilt wider den Trüssel, vnd schreiet das es widerhallt, als käm der Teuffel mit gewalt. Dann wie Homerus schreibet, welchs theil76 vnder den Troianern vnd Griechen am besten hat schreien77 können, dasselb78 hats müssen Page: 444   gewinnen. Dann hie gewints 'non ordo, sed horror'. Nemm ein jeder ein Strick mit, daß wir sie all hencken, Gott behüt vnsere Hälß.



Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.