TITUS
Guido de Columnis, Buch von Troja
Part No. 6
Previous part

Paragraph: (6) 
Sentence: 89       Und also nam er orlop von den Krichen und zcoch wider zu seynem konige.
Sentence: 90    Jason und Hercules zcogen ane seumen von dannen mit uff geborgen segiln und quomen in kurczc[r] zceit yn die insuln Colehos und slugen frolich zu stade.
Sentence: 91    In der insilen lag die stat Jaconites, dy was eyn hopt des konigkreiches, schone und groß, wol getestet mit mauren und tormen und vol volgkes, wol gecziret mit woppen der edelen manne.
Sentence: 92    In der stat regniret der konigk Oethes mit vil dyneren.
Sentence: 93    Umbe dy stat waren vil wilt und wiltban, lustige boumgarten und fliessende wasser und fischweide.
Sentence: 94    In die stat zcogen Jason und Hercules mit den yren koniglich unde czcmlich und ordenlich noch einander.
Sentence: 95    Das vorwunderte das volk der stat swinde, das als hobische jungelinge mit sulcher zcucht irschynnen, und ein iczlicher forste mit fleissee wer sy wern, wannen sie kommen und weleh die sache yres [czoges]sein mochte, aber nymant wart des bericht, bis das sie in das konigkliche pallas quomen.
Sentence: 96    Der konigk Oethes von angebornem adel und hoer art stunt uf von synem konigklichen stul von stunt, als er die zukumft vornam der Krichen, und gingk yn entgegen mit vil synen dynern und entphingk sie frolich.
Sentence: 97    Her umb fingk sie und bot yn behegeliche fruntscheffte und furte sie herlich yn syn wolgesmugktes pallas.
Sentence: 98    Als sie nu gesaczt wurden, legete Jason in manhait synes gemutes dem konige vor die sache seiner zukumft und bat umbe anwißunge der erin und abenteuerliche wege der irwerbunge des gulden fleuses noch dem, als ym das uff geleit waß.
Sentence: 99    Der konig Oethes bath Jason mildiglich, seyner bethe gnugk zu thun.
Sentence: 100    Dornach wurden tische gedakt und die sehengk bangk bereith mit vil edelen und teurem gefesse.
Sentence: 101    Als nu der konigk meynte, den Krichen vil zucht zu irbieten, sante er noch seyner tachter Medean, die was wunder schone und ein eyniger erbe des konigreichs, das sie mit den gesten frolich were.
Sentence: 102    Die genante Media, des koniges tochter, was wol irfaren in den siben freuen kunsten, das man in den zceiten kaume iren gleichen fant, und sonderlich waß sie wol irfaren in den swarczcn kunsten.
Sentence: 103    Als Media vornam yres vater geboth, wie wol das sie gar schone was, doch smugkte sie sich noch frewlichem sytten und gingk zu den gesten.
Sentence: 104    Von stunt hyeß sie ir vather bie Jason siczcn.
Sentence: 105    0 dorfftige und torichtige adel, was tustu zucht yn den val dyner ere!
Sentence: 106    Ist is weisheit, zu glouben frewlicher uns[te]tikeit, die noch ny stete wurden, und sunderlich zu den zceiten, so sie manbar syn?
Sentence: 107    0 konigk Oetes, hettestu wyphehe Gebreehlichkeit yn besser achte gehat, so hettestu die entfurunge dyner eynigen tochter yn ein fremde konigkreich mit dynem grossen schaden nicht beweinet, also das du deiner tachter und dynes grossen schaczcs miteinander beraubet pist wurden.
Sentence: 108    Was ist dir nuczc gewest die hute des gotes Mars wider die betriglichkeit und felsch des weybes?
Sentence: 109    Nu saß Medea zcwusehen yrem vater und Jason.
Sentence: 110    Wye in grosser zucht sie was, doch so mochte sie sich nicht enthalden, sie bligkte dennoch Jason liplichen an, sein wonnigliches antlucz, seyne clare augen, syn gelbes har, synen geraden leip mit entczunten gedangken beschawete sie und entphing zu ym hiczige libe.
Sentence: 111    Als das essen ende nam, gingk die junckfraw Medea in ire wanunge.
Sentence: 112    Jason und Hercules wurden auch in eyne kammer geweist.
Sentence: 113    Medea war swinde gequelet von der entpfangen libe zu Jason.
Sentence: 114    Das werte eine woehe alumbe.
Sentence: 115    Is geschaeh dornoch, das der konigk rede und handelunge hatte mit Jason und Hercules yn synem sale und sante aber noch seiner tachter Medean.
Sentence: 116    Die quam wol gesmukt bie yrem vater zu siczcn.
Sentence: 117    Aber von des vaters geheysse ginkh sie zu siczcn bie Jason, uf das das sie frolich und schymplich den gesten were.
Sentence: 118    Das wart Jason gar fro.
Sentence: 119    Als Medea pruffte, das ir vater mit andern in rede kommen was, quam sie mit Jason in sulehe rede:
Sentence: 120    ,Jason, mein frunt, dyn adel sal mir das nicht zu arge keren noch zu frewlicher vorwiczikeit achten, das ich dich unbekanten tar an reden.
Sentence: 121    Ich pin von adels wegen phlichtig zu rathen dir.
Sentence: 122    Du pist der umb uß kommen, das du in torstlicher kunheit meynst, das guldene fleuß zu erwerben.
Sentence: 123    Das muß dir gar sauer werden, wenn is gar ebenteuerlich ist und den schaden des todes kaume vormyden magest, ys sei denn, das du myner anweyßunge und ermanunge volgest.

Next part


This text is part of the TITUS edition of Guido de Columnis, Buch von Troja.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.