TITUS
Alexanderroman (Johann Hartlieb)
Part No. 188
Previous part

Chapter: 188  
Paragraph: 184  
Alexanders Brief an Dindimus

Line: 4514   Wie Allexander dem kunig pragmanorum ainen brief schraib. CLXXXIIII


Line: 4515     'Dindime, es ist gar offt mitt rede zu meinem gehore komen, wiee daz ir ain
Line: 4516     lebenn fuerett, daz von allen lebenden menschen außgeschayden sey vnd daz ir
Line: 4517     annders, dann alle menschen ewch haldentt. Wann es ist vns gesagtt, daz ir
Line: 4518     weder erde noch wazzer pawett, noch kainerlay narung habtt, dann die ewch
Line: 4519     selber wachs. Mier ist auch shunst souil fromder ding von ewrem leben
Line: 4520     vnd wesenn gesagtt, daz es vil lewtten vngelawbleichen ist. Darumb hab ich
Line: 4521     gedachtt, dier, Dynndime, zuschreiben, daz du mich aygenttleich vnderweysest
Line: 4522     vnd mier verkundest, wiee ewr leben sey vnd was gesacztt ir habtt vnd was
Line: 4523     ewr narung sey vnd durch was sach willen ir so gar abgeschayden seytt von
Line: 4524     allem menschleichem leben. Schreibtt auch mier, ob ir daz thuentt von lernung
Line: 4525     der kchunst phylozophya oder von ander sach wegen, daz woltt ich vast gerenn
Line: 4526     wißen. Wann thatt ir daz von lernung wegenn, so hett ich daran ain gancz
Line: 4527     wolgefallen, wann was zu vnderweysung der weyßhaitt gehorett, darczue wellen
Line: 4528     wier helffen vnd ratten vnd vermainen, vns auch zu geben in die schuel vnd
Line: 4529     gehorsam der lernung, wann was wier piss her yee gethan haben, so haben
Line: 4530     wier allweg die weyßhaitt vnd die vernunfft allen dingen vor gesacztt. Darumb
Line: 4531     ist vns in allen dingen, wye sy sindt streyttleich oder rättleich gewesen, allczeitt
Line: 4532     wol gelungen. Nun begeren wier, daz ir vns auch schreibtt ewr leben vnd
Line: 4533     wesen, wann was wier vns in vnnserm standt dauon mugen zupezzern, daz
Line: 4534     thuenn wier. Darumb sawmbtt vns nichtt vnd verschreibtt vns paldt, daz wier
Line: 4535     vnnser czeitt vnd weyl nichtt verlyerenn, wann wier kain großere verlust nyee
Line: 4536     gewunnen, wann so wier die czeitt verlieren vnd daz die czeitt also hingeett,
Line: 4537     daz wier nichtcz nucz darynne schaffenn'. Diser brief wardt gesanntt Dindimo,
Line: 4538     kunig der lanndt pragmannorum.




Next part


This text is part of the TITUS edition of Alexanderroman (Johann Hartlieb).

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.