TITUS
Ulrich von Eschenbach, Alexander
Part No. 50
Previous part

Chapter: 70  
Das Heer des Darius


Verse: 6005       Des morgens dô der tac erschein,
Verse: 6006    Alexander wart in ein

Verse: 6007    er wolt gerihte gegen Darîô varn.
Verse: 6008    er hete betwungen mit cleinen scharn

Verse: 6009    Cilicôn und ander lant
Verse: 6010    hielt nû gewalteclich sîn hant

Verse: 6011    von dem mer biʒ al dar,
Verse: 6012    von dan er nam der reise war.

Verse: 6013    die wart im nû vil herte.
Verse: 6014    er muoste durch ungeverte,

Verse: 6015    im wurden die stîge enge
Verse: 6016    von gebirge grôʒ gedrenge.

Verse: 6017    durch manegen vinstern walt
Verse: 6018    der unverzagte an manheit balt

Verse: 6019    (als mir die âventiure seit)
Verse: 6020    des tages wol drîʒec mîle reit:

Verse: 6021    alsô gegen strîte stunt sîn ger,
Verse: 6022    des ist her Walther mîn wer.

Verse: 6023       Nû het ouch in der selben naht
Verse: 6024    Darîus sich alsô bedâht,

Verse: 6025    er wolt gegen Alexandrô varn.
Verse: 6026    daʒ hieʒ er rüefen in den scharn.

Verse: 6027    des morgens dô die sunne ergleste,
Verse: 6028    die wîten gezelte veste

Verse: 6029    der admirât hieʒ zerfüeren.
Verse: 6030    dô sich daʒ her begunde rüeren,

Verse: 6031    man sach eʒ zogen berc und tal,
Verse: 6032    wol sehs mîle überal

Verse: 6033    was daʒ velt mit in beströut.
Verse: 6034    des der admirât sich fröut,

Verse: 6035    daʒ er vil volkes mohte hân.
Verse: 6036    er wânde haben disen man

Verse: 6037    als in einem sacke.
Verse: 6038    waʒ er ab im zwacke,

Verse: 6039    daʒ sol her Jupiter im vergeben:
Verse: 6040    jâ kunde der junge wol sîn leben

Verse: 6041    mit strîticlîchen listen
Verse: 6042    vor den vînden fristen.

Verse: 6043    an der Eufrâtes ze tal kêrte
Verse: 6044    Darîus. sich dannoch mêrte

Verse: 6045    sîn her mit ungefüegen scharn,
Verse: 6046    die durch in kâmen dar gevarn.

Verse: 6047    daʒ velt von ritterschaft erblüete,
Verse: 6048    der geverte die luft mit stoube müete,

Verse: 6049    daʒ man sach die sunne truoben.
Verse: 6050    tambûren hôrte man dô uoben:

Verse: 6051    die gâben alsô grôʒen schal,
Verse: 6052    der in die wolken vaste erhal.

Verse: 6053    busînen braht was dô grôʒ,
Verse: 6054    berc und tal dâ gegen dô:

Verse: 6055    mit gemeinem schalle,
Verse: 6056    heide und velt alle

Verse: 6057    mit gegendône erclungen.
Verse: 6058    die vogelîn, die ê sungen,

Verse: 6059    muosten lâʒen süeʒen sanc,
Verse: 6060    des sie der rotten dôn twanc

Verse: 6061    und manger hande seitenspil.
Verse: 6062    man hôrt dâ fremder dœne vil,

Verse: 6063    die sich wurren in einander.
Verse: 6064    ei werder Alexander,

Verse: 6065    waʒ du mich nû sorgen manst.
Verse: 6066    ob du mit sinnen strîten kanst,

Verse: 6067    süeʒer fürste, des ist dir nôt.
Verse: 6068    dise gâhent ûf dînen tôt.

Verse: 6069    nû was sîn schar doch cleine,
Verse: 6070    der Darîus fürsten gemeine

Verse: 6071    mit strîte wolden nemen war:
Verse: 6072    der sich doch werte die cleine schar.

Verse: 6073       Hœrt waʒ volkes mit Darîô was,
Verse: 6074    als mir die âventiure las,

Verse: 6075    die wurben nâch fremdem prîse.
Verse: 6076    eines ich iuch bewîse,

Verse: 6077    des die hêrren phlâgen.
Verse: 6078    mit golde gezieret zehen wagen,

Verse: 6079    die zugen snêwîʒe phert,
Verse: 6080    die giengen vor den fürsten wert.

Verse: 6081    mich hât beriht daʒ mære
Verse: 6082    daʒ ûf ieglîchem karrâtschen wære

Verse: 6083    ein tempel Jovî ze êren,
Verse: 6084    dar inne sie wolden mêren

Verse: 6085    dienst, daʒ sie im tâten;
Verse: 6086    alsô heten sie sich berâten.

Verse: 6087    noch heten sie in ir helfe stiur
Verse: 6088    in ietslîchem tempel viur:

Verse: 6089    die Persân daʒ heilic hieʒen,
Verse: 6090    daʒ sie ze aller zît lieʒen

Verse: 6091    haben in vil schœner phlege.
Verse: 6092    beide dâ heime und ûf dem wege

Verse: 6093    sie êrtenʒ in dem templô.
Verse: 6094    noch sagt uns daʒ mære alsô,

Verse: 6095    daʒ die tempel wârn von golde,
Verse: 6096    dar umbe in helfen solde

Verse: 6097    ze allen zîten in strîtes nôt
Verse: 6098    Jovis ir vil werder got.

Verse: 6099    nâch den tempeln zogten zehant
Verse: 6100    (als mich die âventiure mant,

Verse: 6101    daʒ ich iu sage ze diute)
Verse: 6102    zwelf hande liute,

Verse: 6103    der schar dehein die andern vernam.
Verse: 6104    daʒ volc mit grôʒer hôchvart kam.

Verse: 6105    ir site wâren ungelîche,
Verse: 6106    ir geverte daʒ was rîche,

Verse: 6107    ir harnasch unde ir gewant
Verse: 6108    von wunneclîchem werke erkant.

Verse: 6109    in ietslîcher schar
Verse: 6110    nam man zweinzic tûsent war,

Verse: 6111    die dar kâmen durch strît
Verse: 6112    und Alexandrô truogen nît.

Verse: 6113       Nû sach man komen dar nâch
Verse: 6114    volc, daʒ man untœtlich sprach,

Verse: 6115    ûf gezierten karrâtschen:
Verse: 6116    swert, bogen, schilte, hâtschen,

Verse: 6117    soliche wer was in bî.
Verse: 6118    sie wolden sîn vor tôde frî,

Verse: 6119    dar an sie wâren gar betrogen.
Verse: 6120    ir gote heten in gelogen,

Verse: 6121    die sie dar an wîsten.
Verse: 6122    dar brâhten die geprîsten

Verse: 6123    gezierde manger hande
Verse: 6124    ûʒ israhêlischem lande.

Verse: 6125    als man sie pruofte mit der zal
Verse: 6126    zehen tûsent was ir überal.

Verse: 6127    nâch den selben kâmen geriten
Verse: 6128    fürsten, die hôchvart niht vermiten.

Verse: 6129    sie jâhen des keisers ze mâge,
Verse: 6130    durch den sie wolden in wâge

Verse: 6131    setzen guot und ouch den lîp.
Verse: 6132    sie fuorten gewant alsam die wîp.

Verse: 6133    dar in gecleidet schône
Verse: 6134    nâch minne dienste lône

Verse: 6135    heten sie die wîp bereitet dar,
Verse: 6136    die ir mit minne nâmen war.

Verse: 6137    von ir zierde daʒ velt erlûhte,
Verse: 6138    daʒ die andern rote des dûhte,

Verse: 6139    wie von dem keiserlîchen künne
Verse: 6140    daʒ velt von glaste brünne.

Verse: 6141    hôchvertIc was ir gebâren.
Verse: 6142    mit den fürsten dâ wâren

Verse: 6143    gecleidet rîchlîche
Verse: 6144    mit drin fürsten gelîche

Verse: 6145    fünfzehen tûsent oder baʒ..
Verse: 6146    die sprâchen ûf Alexander haʒ.

Verse: 6147       Dar nâch der Asiânen vogt,
Verse: 6148    Darîus, mit hôchvart zogt

Verse: 6149    ûf einem karrâtschen, (als mir jach
Verse: 6150    die âventiur), dar an man sach

Verse: 6151    guot geworhte von rîcher kost.
Verse: 6152    der karrâtsche von golde glost,

Verse: 6153    dar in verworht gesteine,
Verse: 6154    smaragt, saphîr, karfunkel reine,

Verse: 6155    lieht jachande, rubîn tiur
Verse: 6156    von rœte brunnen als ein viur.

Verse: 6157    der karrâtsche was wît,
Verse: 6158    vorne hinden und besît

Verse: 6159    gesazt der gote bilde,
Verse: 6160    sîner mâge, als der milde

Verse: 6161    sie het erziuget von rîchem gelfe,
Verse: 6162    den goten ze êren, im ze helfe.

Verse: 6163    rîcheit die man bî im sach
Verse: 6164    Darîô keisers namen verjach.

Verse: 6165    ob im ein ar swebte
Verse: 6166    zerbreitet als er lebte,

Verse: 6167    der ouch erlûht von golde.
Verse: 6168    der ar dem fürsten solde

Verse: 6169    schirm vor sunne bieten.
Verse: 6170    hôchvart kunde sich nieten

Verse: 6171    Darîus und die sîne.
Verse: 6172    mit durchliuhtigem schîne

Verse: 6173    sach man vor dem fürsten varn
Verse: 6174    zehen tûsent mit sundern scharn.

Verse: 6175    von golde und silber wîʒen
Verse: 6176    sach man der harnasch glîʒen,

Verse: 6177    ir helme nâch tiurem steine gevar.
Verse: 6178    die werden twanc die minne dar.

Verse: 6179    schilde, die sie brâhten dar,
Verse: 6180    dâ sach man ûf entworfen clâr

Verse: 6181    ze êren der minne
Verse: 6182    Vênus die gotinne,

Verse: 6183    die dar ab gap liehten schîn.
Verse: 6184    sie wolden der minne ritter sîn.

Verse: 6185    minne verlust sît an in clagte,
Verse: 6186    als mir der meister sagte.

Verse: 6187    ritterschaft was ir ger.
Verse: 6188    versilbert ir schefte, vergult ir sper,

Verse: 6189    ir wâpenroc, ir kovertiur:
Verse: 6190    mit silbervarwe stiur

Verse: 6191    wârn ir ors verdecket,
Verse: 6192    mit rîcher kost volrecket,

Verse: 6193    dar în Vênus was verworht.
Verse: 6194    sie heten herze unervorht.

Verse: 6195    ouch riten dem keiser nâhen bî
Verse: 6196    zweihundert ritter von art vrî

Verse: 6197    von werden fürsten erborn.
Verse: 6198    die selben wârn dâ vür erkorn

Verse: 6199    daʒ mit ritters tât die jungen
Verse: 6200    prîs heten errungen.

Verse: 6201    ir harnasch lûht nâch glanze.
Verse: 6202    starke sper, schilde ganze

Verse: 6203    und niuwe fuorte man in mite,
Verse: 6204    dar an Amor: daʒ was ir site.

Verse: 6205    die selbe rote umbevienc
Verse: 6206    drîʒic tûsent volkes ze fuoʒe gienc.

Verse: 6207    der undiet schar was vil grôʒ.
Verse: 6208    solicher wer daʒ volc genôʒ,

Verse: 6209    daʒ man heiʒet helmbarten.
Verse: 6210    die fuoʒgenger solden warten,

Verse: 6211    wann man vîntlich gegen Darîô riet,
Verse: 6212    daʒ sie heten strîtes gegenbiet:

Verse: 6213    alsô het in der keiser geboten
Verse: 6214    bî sînen hulden und bî den goten.

Verse: 6215       Nâch dem keiser kam gevarn
Verse: 6216    sîn muoter, sîn wîp mit schœnen scharn

Verse: 6217    und des keisers kinder.
Verse: 6218    nâch den fuoren hinder

Verse: 6219    fünfzic karrâtschen mit amîen,
Verse: 6220    die in minne niht wolden verzîen.

Verse: 6221    alles des hûses wirde
Verse: 6222    und sînes gemaches zirde

Verse: 6223    der hêrre in hervart sich bewac:
Verse: 6224    soliches siten man dâ phlac.

Verse: 6225    sehshundert mûl mit horde geladen,
Verse: 6226    der rucke von swære dolt den schaden,

Verse: 6227    driuhundert kemmel truogen solt,
Verse: 6228    cleinôt, silber unde golt.

Verse: 6229    zehen tûsent man dar nâch giengen,
Verse: 6230    an den veste schilde hiengen

Verse: 6231    und slingen, dâ mit daʒ volc warf.
Verse: 6232    zehen tûsent mit gabilôten scharf

Verse: 6233    sach man aber dar nâch komen,
Verse: 6234    die im mit helfe wolden fromen.

Verse: 6235    dar nâch in ringem harnasch kam
Verse: 6236    der schar der hûfe die zal benam,

Verse: 6237    nieman sie kunde erahten.
Verse: 6238    Alexanders schaden sie trahten,

Verse: 6239    der ouch die wîle niht enslief.
Verse: 6240    der sælden schîbe im eben lief,

Verse: 6241    die treip er volleclîche,
Verse: 6242    der junge tugende rîche.

Verse: 6243    dô diz her was ûf der strâʒe,
Verse: 6244    der stoup was âne mâʒe,

Verse: 6245    in den lüften dâ von ein dach,
Verse: 6246    daʒ man den himel kûm gesach.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.