TITUS
Text: Alex. 
The Middle High German Books on
The Great Alexander
Author: Lampr. 
Version: Vor. 
Vorauer Alexander (Lamprecht)


On the basis of the edition
Lamprechts Alexander nach den drei Texten
mit dem Fragment des Alberic de Besancon und den lateinischen Quellen,
hrsg. v. Karl Kinzel,
Halle 1884
entered by Stefanie Heine
and edited by Ralf Schlechtweg-Jahn,
Bayreuth 2000;
TITUS version by Ralf Schlechtweg-Jahn and Jost Gippert,
Bayreuth, 12.07.2000 / Frankfurt, 19.4.2002 / 2.3.2003


[The assignment of numbers to chapters is provisional. J.G.]




Chapter: Prol.  
Prolog


Verse: 1    Diz lît, daz wir hî wurchen,
Verse: 2    daz sult ir rehte merchen.

Verse: 3    sîn gevûge ist vil reht.
Verse: 4    iz tihte der phaffe Lambret.

Verse: 5    er tâte uns gerne ze mâre,
Verse: 6    wer Alexander wâre.

Verse: 7    Alexander was ein wîse man,
Verse: 8    vil manec rîche er gewan,

Verse: 9    er zestôrte vil manec lant.
Verse: 10    Philippus was sîn vater genant.

Verse: 11    diz mugit ir wol hôren
Verse: 12    in libro Machabeorum.

Verse: 13    Alberîch von Bisinzo
Verse: 14    der brâhte uns diz lît zû.

Verse: 15    er hetez in walhisken getihtet.
Verse: 16    nû sol ich es iuh in dûtisken berihten.

Verse: 17    nîman enschulde sîn mich:
Verse: 18    louc er, sô liuge ich.

Verse: 19       Dô Alberîch diz lît inslûc,
Verse: 20    dô heter ein Salemones pûch,

Verse: 21    dâ er ane sach
Verse: 22    vanitatum vanitas:

Verse: 23    daz ist allez ein îtelcheit,
Verse: 24    daz diu sunne umbegeit.

Verse: 25    daz hete salemon wol virsûht.
Verse: 26    dar umbe swar in sîn mût.

Verse: 27    er ne wolte niht langer ledec sitzen,
Verse: 28    er screip von grôzen witzen,

Verse: 29    wande des mannes mûzecheit
Verse: 30    ze deme lîbe noh ze der sêle niht versteit.

Verse: 31    dar ane gedâhte Alberîch.
Verse: 32    den selben gedanc hân ich.

Verse: 33    unt ich ne wil mih niwit langer sparn,
Verse: 34    des liedis wil ich volvarn.

Verse: 35       Rîcher chunege was genûc:
Verse: 36    daz ne saget uns nehein pûch

Verse: 37    noh neheiner slahte mâre,
Verse: 38    daz deheiner sô rîche wâre,

Verse: 39    der in alten zîten
Verse: 40    mit sturme oder mit strîte

Verse: 41    î so manec lant gewunne
Verse: 42    oder sô manegin kunic bedwunge,

Verse: 43    herzogen irslûge
Verse: 44    unde andere vursten genûge,

Verse: 45    sô der wunderlîche Alexander:
Verse: 46    im ne gelîchet nehein ander.

Verse: 47       Der von Chrîchen was geborn
Verse: 48    unde wart dâ ze einem kunige irchorn

Verse: 49    unde was der allerhêrste man,
Verse: 50    den î Chrîhlant ze kunege gewan.

Verse: 51    iz wâren ouh chunege creftic
Verse: 52    uber manec dît gewaltic,

Verse: 53    vil michel was ir sâlicheit,
Verse: 54    ir list unde ir kundecheit,

Verse: 55    ir scaz der was vil grôz:
Verse: 56    der ne wart nî neheiner sîn genôz,

Verse: 57    der mit listen oder mit mahten
Verse: 58    sînen willen î sô volbrâhte,

Verse: 59    sô der selbe man,
Verse: 60    umbe den ich is began.

Verse: 61       Diser rede wil ich mich irvaren.
Verse: 62    Salemon der was ûz getân,

Verse: 63    der sich ûz allen kunegen nam.
Verse: 64    dô diu frowe regina austri zû im kom,

Verse: 65    unde si sînen hof gesach,
Verse: 66    mit rehter wârheit si sprah,

Verse: 67    daz von mannes geburte
Verse: 68    nî sô frumer kunic wurte.

Verse: 69    man mûste in wol ûz sceiden,
Verse: 70    wande Alexander was ein heiden.




Chapter: 4  
Über Alexander


Verse: 71       Nû sprechent bôse lugenâre,
Verse: 72    daz er eines goukelâres sun wâre.

Verse: 73    di ez imer gesagent,
Verse: 74    di liegent alsô bôse zagen,

Verse: 75    oder di es î gedâhten.
Verse: 76    er was rehter cheiser slahte.

Verse: 77    nimer geloube ez nehein frum man.
Verse: 78    sînen vater ich wol genennen kan.

Verse: 79    sîn geslahte daz was hêrlîch,
Verse: 80    ubir al Chrîchen was er gewaltic.

Verse: 81    Philippus hîz der vater sîn,
Verse: 82    al Macedonenlant was sîn.

Verse: 83    sîn ane was ein gût kneht,
Verse: 84    uber al daz mer gî sîn reht.

Verse: 85    er trûc eine tugentlîche maht.
Verse: 86    awî wî manic volcwîc er vaht

Verse: 87    wider den kunic Xersen.
Verse: 88    harte ellenthafte uberwant er den.

Verse: 89       Philippus nam im ein wîp,
Verse: 90    si trûc einen frumeclîchen lîp.

Verse: 91    ich sage iu, wî ir name was:
Verse: 92    si hîz diu scône Olimpias.

Verse: 93    daz was Alexanders mûter.
Verse: 94    diu frowe hete einen brûder,

Verse: 95    der was ouh Alexander genant,
Verse: 96    ze Perse heter daz lant.

Verse: 97    der was ein vurste alsô getân,
Verse: 98    er ne wolte neheinem kunige wesen undertân.

Verse: 99    er ne wolte ouh nî ûz neheineme sturme geflîhen,
Verse: 100    swî im sîniu dinc dâ irgîngen.

Verse: 101    er was ein tûerlîch degen
Verse: 102    unde wolte ouh rehter herscefte phlegen.




Chapter: 12  
Alexanders Geburt


Verse: 103       Nû wil ich iu sagen von Alexanderes geburte
Verse: 104    wî si alhî gewurte.

Verse: 105    sîn mûter frow Olimpias
Verse: 106    ze den stunden dô siu sîn genas,

Verse: 107    dô wart ir ein vil michel nôtfal:
Verse: 108    diu erde erbibete uberal.

Verse: 109    dô was der doner vil grôz.
Verse: 110    awie starke daz weter ave gôz.

Verse: 111    der himel der wandelôte sich
Verse: 112    unt der sunne verdunchelôte sich,

Verse: 113    er hete vil nâch sînen schîmen verlorn,
Verse: 114    dô Alexander wart geborn.

Verse: 115       Nû ne freiscit ich ê noh sint
Verse: 116    alsus geborn nehain chint.

Verse: 117    gloubet mir des ich iu sage:
Verse: 118    der dêch baz in drîn tagen

Verse: 119    dan al ander chint,
Verse: 120    sô si drîer mânôt alt sint,

Verse: 121    unt alsô im ieht gescach,
Verse: 122    daz ime ubel ze hôren was,

Verse: 123    sô sah er alsô der wolf toet,
Verse: 124    sô er obe sîneme ezzen stêt.

Verse: 125    daz ich iu von ime sage, daz ist wâr:
Verse: 126    strûb unde rôt was ime sîn hâr,

Verse: 127    nâh eineme viske getân,
Verse: 128    den man in dem mere mach vâhen;

Verse: 129    ez was ime ze mâzen dicke,
Verse: 130    grispe alsô lewen locke.

Verse: 131    umbe sîn gesûne wil ich iuch bereiten:
Verse: 132    ein ouge daz was weithin,

Verse: 133    getân nâch eineme drachen.
Verse: 134    daz chom von den sachen:

Verse: 135    dô in sîn mûter bestunt ze tragene,
Verse: 136    dô chômen ir freislîch pilide ze gegene;

Verse: 137    daz was ein vil michel wunder.
Verse: 138    swarz was ime daz ander,

Verse: 139    nâch eineme grîfen getân.
Verse: 140    alsus sagent die in ie gesâhen.

Verse: 141       Sîn hals was ime wol gescaffen,
Verse: 142    sîn brust was ime wol offen,

Verse: 143    sîn arme wârin ime vone grôzer maht.
Verse: 144    alles sînes mûtes was er wol bedâht.

Verse: 145    sîn bûch ne was ime ze lanc noh ze breit:
Verse: 146    a wie wole dem jungelinge daz stêt.

Verse: 147    scône er ze tale wert scein
Verse: 148    peidiu uber fûz unt uber pein.

Verse: 149    unt uber allen sînen lîp
Verse: 150    sô was er als êrlîh.

Verse: 151    daz sag ich iu ze wâre:
Verse: 152    in sînem êrstem jâre

Verse: 153    sô wôss ime maht unt sin
Verse: 154    mêre den ainem andren in drîn.

Verse: 155       Nû vernemt, wie sich Alexander vur nam:
Verse: 156    swâ sô ein frumich rîter zû zim chom,

Verse: 157    dem bôt er lîp unt gût.
Verse: 158    er ne chêrte cheinen sînen mût

Verse: 159    weder an chint noch an tumben man;
Verse: 160    a wie wol den hêren daz gezam.

Verse: 161    ime was ouch sîn gebâre,
Verse: 162    alser ein furste von allen landen wâre.




Chapter: 13  
Alexanders Erziehung


Verse: 163       Die meister die Alexander ouch gewan,
Verse: 164    si wâren wol gerehte man.

Verse: 165    si begunden in wîsheit lêren
Verse: 166    unt zugen in zû grôzen êren.

Verse: 167    si lêrtin in sturm unde volcwîc,
Verse: 168    sô des nie wart gelîch.

Verse: 169    der liste der er dannen gewan,
Verse: 170    der wart er ein frumer man.

Verse: 171       Der êrste meister sîn
Verse: 172    der lêrtin chriechisch unde latîn

Verse: 173    unt pûchstabe sezzen an eineme perment.
Verse: 174    noch tô was er ein lutzel chint.

Verse: 175    unt lêrtin vil manich pûch
Verse: 176    und ander wîsheit genûch.

Verse: 177    Der ander meister, den er gewan,
Verse: 178    der lêrtin wol mûsicam

Verse: 179    unt lêrtin seitin ziehen,
Verse: 180    daz alle thôni dar in giengen,

Verse: 181    roten unt ouch der lîren chlanc,
Verse: 182    unt von ime selben heven daz gesanc.

Verse: 183       Der dritte frumt ime harte wol:
Verse: 184    er lêrtin allir dinge zal,

Verse: 185    er lêrtin alle wîsseheit,
Verse: 186    wie verre der sunne von der mânin gêt;

Verse: 187    unt lêrtin ouch den list,
Verse: 188    wie hôch von dem wazzer zem himele ist.

Verse: 189       Der vierde meister, den er gewan,
Verse: 190    daz was Aristotiles der wîse man.

Verse: 191    er lêrtin al die chundicheit,
Verse: 192    wie der himel umbe gêt,

Verse: 193    unt stach ime die list in sînen gedanc
Verse: 194    zerchennen daz gestirne unt ouch sînen ganc,

Verse: 195    dâ sich die vergen mit pewarent,
Verse: 196    dâ si in dem tiefen mere varnt.

Verse: 197       Ein meister gewan sint
Verse: 198    Alexander daz edele chint,

Verse: 199    der lêrtin mit gewâven faren,
Verse: 200    unt wie er sich mit eineme scilte solte bewarn,

Verse: 201    unt wie er sîn spere solte tragen
Verse: 202    ze dem, dem er wolte scaden,

Verse: 203    unt wie er den erchiesen mahti
Verse: 204    unt gestechen, sô daz tohte;

Verse: 205    unt alsô der stich wêre getân,
Verse: 206    sô lêrtern zû dem swerte vâhen

Verse: 207    unt dâmit chundiclîchen slahen,
Verse: 208    unt wie er sînen vîant solde vân;

Verse: 209    unt lêrtin, wie er sich solte bewar
Verse: 210    vor deme, der ime wolde scaden;

Verse: 211    unt wie er sînen fianden lâgen solte,
Verse: 212    die er dâ dwingen wolte,

Verse: 213    unt wie er zen rîtern solti gebâren
Verse: 214    umbe daz, daz sim willich wâren.

Verse: 215       Der sehste bestunt in mit wizzen
Verse: 216    unt lêrtin ze dinge sizzen

Verse: 217    unt lêrtin, wie er daz bedâhte,
Verse: 218    daz er von deme unrehti beschiede daz rehte,

Verse: 219    unt wie er lantreht bescheiden chunde
Verse: 220    allen den ers gunde.

Verse: 221       Umbe diz unt umbe manech ander
Verse: 222    alsus wart daz chint Alexander

Verse: 223    beide listich unt geweltich unt balt.
Verse: 224    dô alrêrst was er zwelf jâr alt.

Verse: 225    alsô stâtich was ime sîn mût,
Verse: 226    umbe al wertlîch gût

Verse: 227    sô wolter nî nieht geliegen
Verse: 228    noch sich fone cheiner wârheit gezien.




Chapter: 18  
Alexander tötet Nectanabus


Verse: 229    a wie wol einem sînem meister daz erschain:
Verse: 230    er stîz in ze tal uber einem stein,

Verse: 231    daz ime sîn hals enzwei brast,
Verse: 232    wande er im ain luge zû sprach.

Verse: 233    nû sprechent bôse lugenâre,
Verse: 234    daz der sîn vater wâre.

Verse: 235    a wie ubele ich daz gelouben mach,
Verse: 236    wande er im sîn hals enzwei brach.




Chapter: 15  
Bucephalus


Verse: 237       Von Philippus stûde wil ich iu sagen:
Verse: 238    dar under wart ein ros getragen,

Verse: 239    daz was wunderlîch.
Verse: 240    iz was irre unt strîtich,

Verse: 241    snel unt ernisthaft,
Verse: 242    fon sîner gescephte joch von sîner chraft.

Verse: 243    der munt was im als einem esele getân.
Verse: 244    di nasen wâren ime wîte ûf geslân.

Verse: 245    sîn ôren wârin im vil lanc,
Verse: 246    daz houbet mager unde swanc.

Verse: 247    sîn ougen wârin im al der vare
Verse: 248    als eim flîgenten arn.

Verse: 249    sîn hals was im lockehte,
Verse: 250    ich wâne ez wêre lewengeslehte.

Verse: 251    ûf den goffen habtiz rinderhâr,
Verse: 252    an sînen sîten liebartes mâl:

Verse: 253    sô Sarrazîn noch christenman
Verse: 254    nichein pezzer ros gewan.

Verse: 255       Daz ros wart mit îseren gebunten,
Verse: 256    alsô daz dâ tobet ze allen stunden,

Verse: 257    unt wart fur den chunich Philippus geleit.
Verse: 258    unt als er vernam sîn gelegenhait,

Verse: 259    Buzival hiez erz namen,
Verse: 260    daz tûhte sie gût alle samt.

Verse: 261       Man hiez daz ros in einen marstal thûn,
Verse: 262    daz si dâ fur mehten gerûn.

Verse: 263    zû dem ros getorste niemen gên,
Verse: 264    wan umbe den ez alsô was getân,

Verse: 265    dem verteilet was daz leben,
Verse: 266    den mûse man dem rosse geben.




Chapter: 15  
Alexander reitet Bucephalus und wird als Philipps Nachfolger prophezeit


Verse: 267       Dem chunige wart ein bote gesant
Verse: 268    von dem, dem daz ros was chunt,

Verse: 269    unt hiez ez paz pewaren.
Verse: 270    er sprach, man solte ez noch an im ervaren,

Verse: 271    wem des chuniges gewalt
Verse: 272    nâch sînem lîbe wurde fersalt.

Verse: 273    er sprach: 'daz sol dem, derz alrêrst bescride,
Verse: 274    wandiz nie chein man ne gerite.'

Verse: 275       Unt als Alexander haim chom,
Verse: 276    al di scrift er wol vernam,

Verse: 277    wîs was er zummâzen;
Verse: 278    tô alrêrst heter sîne meister verlâzen.

Verse: 279    des umbe daz ros was gesciet,
Verse: 280    des inhabt er noh tô vernomen nieht.

Verse: 281       Eines tages als er ûffen der palenze gêt, -
Verse: 282    Geste habt in dar gelait -

Verse: 283    dô hôrderz ros waien,
Verse: 284    daz stunt in sîner tobeheit scrîen.

Verse: 285    Alexander sprach zen chinden,
Verse: 286    die mit ime uber die palinze gingen:

Verse: 287    'ich ne weiz waz mir scillet inz ôre,
Verse: 288    ez ne lât mich nieht gehôren.

Verse: 289    ich ne weiz wederz ein ros oder ein lewe det,
Verse: 290    wan ez dâ in beslozzen stêt.'

Verse: 291    Btholomeus sprach zû dem chinde:
Verse: 292    'hêre, iz ist Buzival, ein ros vil swinde.

Verse: 293    daz hât iuwer vater în getân.
Verse: 294    under der stût ne mohte nechein bezzer gegên.

Verse: 295    (er sprach:) hêre, ez ne hât nehain marscalch in hûte.
Verse: 296    wande ez erbîzet ubele unde gûte.'

Verse: 297       Unt dô diz Alexander vernam,
Verse: 298    niwiht er ne beite, ê er zû dem rosse chom.

Verse: 299    er rief den chinden
Verse: 300    unt hiez im den sluzzel gewinnen.

Verse: 301    ir neheiner getorste daz ros dâ fur ziehen,
Verse: 302    want sie alle vil ungerne dar în gingen.

Verse: 303    Alexander erzurnet daz,
Verse: 304    die tur er nider brach.

Verse: 305    er hîz sie alle abe stân,
Verse: 306    er wolte aleine dar în gân.

Verse: 307       Alsô Buzival gegen im ûz wolte varn
Verse: 308    unt ez Alexander ane begunde starn,

Verse: 309    ez erblûcte sich aller sîner maht
Verse: 310    unt wolte ime wesen dienesthaft.

Verse: 311    ez chnîte fur im dar nider,
Verse: 312    ez ne gerûrthe sich ouch nimer sider;

Verse: 313    alsô chundeclîch was dem rosse al sîn gebâre,
Verse: 314    alsez des chindes wol gewone wâre.

Verse: 315       Alexander begunde dô streichen
Verse: 316    ein ros, daz nie nichein man begunde weichen,

Verse: 317    sô der nie seil noch zôm ane chom.
Verse: 318    mit der mane erz nam.

Verse: 319    er habet ellenthaften gedanc:
Verse: 320    ûfen sînen rucke er ime spranc.

Verse: 321    ûzer deme gademe erz reit,
Verse: 322    daz was ein michel paltheit.

Verse: 323       Ein pote îlte dem chunge daz sagen,
Verse: 324    er ne getorste es nieht verdagen,

Verse: 325    waz sîn sun hete getân.
Verse: 326    ûf spranc der chunich sâ

Verse: 327    unt zehenzoch sînes gesindes,
Verse: 328    dô frout er sich sînes chindes.

Verse: 329    di mêre er gerne vernam.
Verse: 330    unt alse der chunich gegen im charn

Verse: 331    unt alsô in Alexander vernam,
Verse: 332    er thet als im wol gezam:

Verse: 333    er warf sich nider unde giench -
Verse: 334    Vestian daz ros entfienc

Verse: 335    mit eime guldînen bridele -
Verse: 336    unde giench sîneme vater gegene.

Verse: 337    unt alsô si zesamene chômen,
Verse: 338    mit handen si sich nâmen.

Verse: 339    ir rede was vil minnesam,
Verse: 340    als ir hie muget ferstân.

Verse: 341    'heil dich', sprach Philippus, 'sun mîn,
Verse: 342    mich tunchet, du solt chunich sîn.

Verse: 343    der gewalt sî dir vil gereit
Verse: 344    alsô wît sô mîn rîch gêt.'

Verse: 345    'heil iuch', sprach Alexander, 'fater mîn,
Verse: 346    got lâz iuch iemer sâlich sîn.

Verse: 347    alles gûtes ich iu vil wol getrûwe.
Verse: 348    vil lange mûzet ir iuwer rîche mit genâden bûwen.




Chapter: 20  
Alexanders erster Kriegszug gegen Nicolaus


Verse: 349    (Er chot:) fater, nû bin ich funfzên jâr alt,
Verse: 350    daz haben ich rehte gezalt,

Verse: 351    unt bin alsô chomen ze mînen tagen,
Verse: 352    daz ich wole wâfen mach tragen.

Verse: 353    unt swer eigen tugent iemer sol gewinnen,
Verse: 354    der sal sîn in sîner jugende beginnen,

Verse: 355    unte seh er sich sculdich,
Verse: 356    niwiht versûmer sich.'

Verse: 357    der chunich ne wolte es niwiht beiten,
Verse: 358    er hîz daz chint bereiten.

Verse: 359    waz mage ich iu sundere gesagen:
Verse: 360    er det im wâfen fur tragen,

Verse: 361    sô mans unter eines chuniges gesinden
Verse: 362    aller bezzest chunde finden;

Verse: 363    unt widerchurs Alexander,
Verse: 364    man gewunne im aber ander.

Verse: 365       Unt alsô daz chint nâch dem site
Verse: 366    was wol gewâfen unt geriten,

Verse: 367    dô was er ein scôner jungelinc.
Verse: 368    si grûzten in als ein chunich.

Verse: 369    er sprach, wâ si des gedâhten,
Verse: 370    daz sim eins chuniges namen anleiten

Verse: 371    al die wîl, als er sô vil chunicrîches niuht hete,
Verse: 372    dâ er sînen vinger ûf geleite.

Verse: 373       Er sprach: 'woldet ir eine wîle gerûwen,
Verse: 374    unze ich aine tugent mahte getûn:

Verse: 375    an einem chunige wil ich es beginnen,
Verse: 376    unt mach ich den uberwinden,

Verse: 377    daz ich dem die chrôni abe ziehe
Verse: 378    unt ûz dem velde tûn geflîhen,

Verse: 379    sô muget ir mir chuniges namen geben
Verse: 380    alsô lange sô ich iemer gelebe.'

Verse: 381       Ein chunich was Nycolaus genant.
Verse: 382    Alexander fûr in sîn lant

Verse: 383    Cesaream fur die grôzen stat.
Verse: 384    dâ wart der rîche chunich ensat.

Verse: 385    Alexander faht ime den sige ane,
Verse: 386    er fûrte die corône mit im dane.




Chapter: 21  
Philipps Heiratsversuch


Verse: 387    unt als er dô wider haim gesan,
Verse: 388    ein lait nûmâre er im vernam:

Verse: 389    sîn fater habet sich sîner mûter geloubet
Verse: 390    unt saz in foller brûtlofe.

Verse: 391    er lîz die sîne mûter;
Verse: 392    die frowe diu hiez Cleopatra.

Verse: 393       Alsô Alexander haim chom,
Verse: 394    er giench fur sînen fater stên

Verse: 395    unt nam die corône, die er mit samt ime dâ hete,
Verse: 396    sînem fater ers ûf sazthe.

Verse: 397       Er sprach: 'fater, nement tiz mit minnen,
Verse: 398    daz ich mit sturme hân gewunnen,

Verse: 399    unze ich es baz mach getûn;
Verse: 400    des habet ir êre unde rûm.

Verse: 401    wan eines tinges trag ich iu ubelen mût,
Verse: 402    daz tunchet mich ze newiht gût:

Verse: 403    daz ir mîne mûter liezet iuwers willen
Verse: 404    unt habet ein uberhûr gestellet.

Verse: 405    ter rede willich nû gedagen,
Verse: 406    iuwer ezzen willich newiht fersagen.

Verse: 407    nû wêwen sô mir die ougen, dâ ich mit kesihe;
Verse: 408    ich kedanche sîn allen den hie,

Verse: 409    die disen rât habent gefrumit,
Verse: 410    daz er niemer zêren chumt.'

Verse: 411       Ein rîter hiez Lisias,
Verse: 412    der stolz unt redehaft was.

Verse: 413    dem was daz vil ungemach,
Verse: 414    daz daz chint sô erre sprach,

Verse: 415    unt antwurtim ein smâheit,
Verse: 416    alsô dicke der stolze man tût.

Verse: 417    dô hete der chunich einen naff swâr,
Verse: 418    dâ an stunden guldîne plâchmâl.

Verse: 419    den habet Alexander ûf der hende
Verse: 420    unt slûg en Lisian fur die zende,

Verse: 421    daz sim in sîne chelen risin.
Verse: 422    er sprach: 'lâ du dîn rede wesen.'

Verse: 423       Der chunich ûf fon der taveln spranch,
Verse: 424    wande in sîn zorn twanc;

Verse: 425    wan im der strît niweht wol geviel.
Verse: 426    dô trat er vor unde viel,

Verse: 427    daz im sîn schenkel zebrast
Verse: 428    unt daz er âne tugent lach.

Verse: 429    unt alsô der chunich der nider viel,
Verse: 430    Alexander sîn blût wiel,

Verse: 431    sîn zorn in der zû trûch,
Verse: 432    daz er mit tem swerte umbe slûch.

Verse: 433    unt swer dâ wider wolte stân,
Verse: 434    der ne mohte im mit dem leben nieht engân.

Verse: 435    ich ne freiscte nie den, der fernâme,
Verse: 436    war diu brût ie bechôme.

Verse: 437    Alexander gemâzet sich es tô
Verse: 438    unt giench sînem fater zû

Verse: 439    unt tete im hail sîn bain
Verse: 440    und brâht in unt sîne mûter in ein.




Chapter: 22  
Alexander erobert eine Burg


Verse: 441       Unde alsô daz was gendet,
Verse: 442    dô wart ein bote gesendet

Verse: 443    unt sagete Philippus daz,
Verse: 444    daz er bewaren hîze baz

Verse: 445    sîne burch z' Antonia
Verse: 446    unt fûre dar mit her gâch

Verse: 447    unt nâme die burch in sîne gewalt;
Verse: 448    dâ wâren die rede manechfalt:

Verse: 449    es wâre der sezmanne wille,
Verse: 450    daz reiten sie under in stille,

Verse: 451    wie si sich fon ime gezugen
Verse: 452    unt in lasterlîche betrugen,

Verse: 453    unt si sich an dem besatten,
Verse: 454    der die burch for im behate.

Verse: 455       Unde alsô der chunich diz fernam,
Verse: 456    harte sêre er sîn erchom.

Verse: 457    er woltes niht langer bîten:
Verse: 458    den sun hîz er dar rîten.

Verse: 459    Alexander sich besante.
Verse: 460    wie stolzlîch er dar rante.

Verse: 461    helde folk giench im nâh
Verse: 462    funf werbe zehinzoch.

Verse: 463    einen sturm tet er mit listen
Verse: 464    unt gewan die selben veste.

Verse: 465    fil frôlîche er widere ze lante chom,
Verse: 466    daz er neheinen scaden genam.




Chapter: 23  
Alexander fertigt Darius' Zinsboten ab


Verse: 467       Nû vernement, waz ich iu hie zele:
Verse: 468    fur dem chunige in dem sale

Verse: 469    dâ vant er boten Darios
Verse: 470    aines geweltigen chuniges,

Verse: 471    der den zins von sînem fater Philippus wolde enfân,
Verse: 472    wander Dario was undertân.

Verse: 473    diz was Darios ter in Danigel stêt,
Verse: 474    der mit dem chriechiscen chunige streit.

Verse: 475    diz was den Daniel slâfinde gesach
Verse: 476    in einem troume dâ er lach;

Verse: 477    dâ sah er fehten ainen boc unt ainen wider.
Verse: 478    daz bezeichent die zwêne chunige sider.

Verse: 479    daz Philippus den zins galt
Verse: 480    in Darios gewalt

Verse: 481    dannen uber manegen tach,
Verse: 482    daz was tem sune ungemach.

Verse: 483    Darius wart umbe den selben zins erslagen.
Verse: 484    daz ich iu sal wâre sagen.

Verse: 485       Alexander spranc ûf al gerihte
Verse: 486    zû der boten gesihte.

Verse: 487    des zinses er newiht galt.
Verse: 488    ir hêren er bôslîch scalt.

Verse: 489    er sprach: 'iuwer hêre ne hât anderes neheine frumicheit,
Verse: 490    wan daz er scaz uber ein ander leit.

Verse: 491    er was ein harte tumb man,
Verse: 492    daz er zinses an uns gesan.

Verse: 493    er ne wirt ime niemer gesant
Verse: 494    hinnen ûzer Chriechlant

Verse: 495    bî mînen zîten.'
Verse: 496    die boten hîz er rîten,

Verse: 497    ê si ersturben an der stund,
Verse: 498    daz sis ir hêren tâten chunt:

Verse: 499    alsô lange sô er des zinses neweht wolte enbern,
Verse: 500    er solt in sîn dâ haime wern

Verse: 501    mit alsô getâner mâze,
Verse: 502    er solte ime sîn houbet lâzen.

Verse: 503    diz inbôt er ime alsô.
Verse: 504    des wâren die boten riuwich unt frô:

Verse: 505    si wârn vil frô, daz si des lîbes genâsen,
Verse: 506    unt wâren harte riuwich, daz er ir hêren wolte verdwâsen.




Chapter: 24  
Philipps Tod


Verse: 507       Unde alsô diz wart gendet,
Verse: 508    dô wart ein bote gesendet

Verse: 509    unt saget Philippus, waz man reit
Verse: 510    von ainer sîner untertâner diet,

Verse: 511    von sînen mannen ze Thelemône,
Verse: 512    daz sim unrehte wolten lônen

Verse: 513    der triwen, der er mit in hâte begangen.
Verse: 514    si heten zeim anderen gevangen

Verse: 515    und wolten ummâze wider in stellen.
Verse: 516    Alexander nam sîne gesellen,

Verse: 517    frumeclîchen er dar reit,
Verse: 518    alsô dicke der stolze man det.

Verse: 519    in die burch er giench,
Verse: 520    den burcgrâfen er dar ûffe fiench,

Verse: 521    die bôsen er drabe stiez,
Verse: 522    die sînen er drûf liez,

Verse: 523    unt nam ir scaz unt gewant
Verse: 524    unt allez daz er dâ fant

Verse: 525    unt lêhnte alle sîne man
Verse: 526    mit dem daz er dâ gewan.

Verse: 527    unt alser dô wider reit,
Verse: 528    dô begagent ime ein mêror arbeit:

Verse: 529    dâ widerreit ime Pausonias,
Verse: 530    der ein rîcher marcgrâfe was,

Verse: 531    unt fûrte die chunigin in sîne gewalt.
Verse: 532    a wie sêre ers dâ ze stede engalt.

Verse: 533    daz was diu scône Olimpias,
Verse: 534    diu Alexanders mûter was.

Verse: 535    sînen vater lie er thôtwunt.
Verse: 536    daz wart ime dâ gitân rihte chunt.

Verse: 537    Alexander was ein helt frumeclîch,
Verse: 538    den schilt zuht er vur sich,

Verse: 539    unt alser ime was wol nâch,
Verse: 540    ûf rihte er sînen scaft,

Verse: 541    sprancde, dâr Pausoniam gesach.
Verse: 542    durh sînen bûch er in stach,

Verse: 543    zû der erde er in warf.
Verse: 544    er sprach: 'dis stîffaters ich niuht bedarf.'

Verse: 545       Alexander sprach zû den gesinden
Verse: 546    unt hîz den marcgrâfen ûfpinden.

Verse: 547    er fûrt in lemptigen in sîn lant.
Verse: 548    a wie siech er sînen vater vant.

Verse: 549    der wunden er niuht genas
Verse: 550    die ime slûch Pausonias.

Verse: 551    alsô Alexander heim chom,
Verse: 552    er giench fure sînen vater stân.

Verse: 553    er sprach: 'vater, wil du iwet sprechen,
Verse: 554    du maht dich haizen rechen.'

Verse: 555    er sprach: 'sun, du heiz in slahen.'
Verse: 556    daz was vil schiere getân.

Verse: 557    dar nâch uber ummanegen tach
Verse: 558    Philippus dâ tôt lach.




Chapter: 27  
Alexander übernimmt die Herrschaft in Macedonien/ Griechenland


Verse: 559       Unde alsô Philippus was begraben,
Verse: 560    dô wart Alexander ze chunige erhaben.

Verse: 561    starche wôss ime sîn gewalt,
Verse: 562    dô alrêrist was er zwainzec jâre alt,

Verse: 563    daz er mit listen unt mit mahten
Verse: 564    sîn rîche wol berihten mohte.

Verse: 565    ich sage iu, wie ers began.
Verse: 566    er nam sîn aller getriwisten man,

Verse: 567    die ime ze sîner nôte
Verse: 568    ie wâren einmûthe.

Verse: 569    er sprach: 'hêren, wir ne haben niuht ze bîtene,
Verse: 570    wir mûzen her laiten

Verse: 571    Chriechlande zêren;
Verse: 572    dar an gedenchent, hêren,

Verse: 573    daz man ie uber unser lant
Verse: 574    die aller thûriste chunege vant.

Verse: 575    des lâzen wir die enkelten,
Verse: 576    die uns den zins hiezen kelten

Verse: 577    hundert jâr unde mê,
Verse: 578    daz in ze laster ergê,

Verse: 579    daz wir des zinses werden lôs.
Verse: 580    swer dâ wil snellez ros,

Verse: 581    beidû wâfen unde gewât,
Verse: 582    des thûn ich ime alles gûthen rât

Verse: 583    ân alle sîne arbeit.
Verse: 584    swer noch mit mir bestêt,

Verse: 585    deme teilich lîb unte gût
Verse: 586    unde trage ime imer willigen mût.'

Verse: 587    unde als er diz gesagete,
Verse: 588    ir nehein langer dagete,

Verse: 589    si sprâchen alle mit ainer zungen:
Verse: 590    'got behûte uns disen chunich jungen,

Verse: 591    daz er mit genâden vil lange mûze leben in sînem rîche.
Verse: 592    sô wê dem, der ime geswîche.'




Chapter: 29  
Alexander erobert Italien (Rom)


Verse: 593       Er hiez dô gebieten herrevart
Verse: 594    alsim dô gerâten wart;

Verse: 595    dar zû was ime vil liebe.
Verse: 596    er sante boten unde briefe

Verse: 597    ze Chriechen unde ze Mazedôn;
Verse: 598    den bôt er den starchen lôn.

Verse: 599    ze Kalabre er enpot,
Verse: 600    daz sim hulfen zû der nôth.

Verse: 601    ein stat heizet Nicomedias,
Verse: 602    dâ sancte Pantaleon gemarteret was.

Verse: 603    die fûrin sîne hervart mit manegem helide,
Verse: 604    tûsent brâhten sie ime ze helfe.

Verse: 605    dô hîz er uber lant gebieten
Verse: 606    mit trô joch mit miete,

Verse: 607    daz sime ze helfe chômen,
Verse: 608    alsô sie sîne nôte vernâmen,

Verse: 609    unde swem daz versmâte,
Verse: 610    daz er sîn houbet verlorn hête.

Verse: 611       Vil êrhaft er sîn gerête scûph
Verse: 612    des tages, dô er sich ûz hûb.

Verse: 613    sibenzech tûsent was sînes hers,
Verse: 614    daz schiphet er uber ain ende des mers,

Verse: 615    unde hiez den zins dâ enphân.
Verse: 616    daz was wider Dario getân.

Verse: 617    er fur dannen in Sicilienlant
Verse: 618    unde ferweltigôt alle die er dâ vant

Verse: 619    unde tete sie swergen herrevart;
Verse: 620    daz sîn vater nie erwarph.

Verse: 621    alsus mêret er sîn her
Verse: 622    unde schiphte sich dâ uber mere

Verse: 623    unde fûr ze Itale wart
Verse: 624    unde verlie sich an die scarphen swert.

Verse: 625       Unde alsô die Rômêre daz fernâmen,
Verse: 626    a wie êrhapte sie im ze gegene chômen.

Verse: 627    sie brâhten im ze der stund
Verse: 628    silbers hundert thûsint funt

Verse: 629    unde einen mantel alsô edele,
Verse: 630    sô chunich under dieseme himele

Verse: 631    von phelel noch von gimme
Verse: 632    nie neheinen mohte gewinnen;

Verse: 633    unt eine chorône diu was al rôt golt;
Verse: 634    alsus macheten si in den chunich holt.

Verse: 635    diu gâbe was ime dancnâme,
Verse: 636    des lobet er die gûten Rômâre.




Chapter: 31  
Alexander landet in Afrika


Verse: 637       Zehen hundert er mit ime nam
Verse: 638    dôr von Rôme dar chom,

Verse: 639    unde fûr zen Africanen
Verse: 640    den Darios undertânen.

Verse: 641    mit gewalte reit er dâ durch
Verse: 642    ze Kartagine in die burch.

Verse: 643    die burgâre tâten ime die sicherheit.
Verse: 644    vil lutzel er mit ime reit;

Verse: 645    wande si in ummûth wâren
Verse: 646    wider Rômâre die mâren.

Verse: 647       Dannen wurden sîne boten gesant
Verse: 648    uber al Meridienlant,

Verse: 649    dannen in Bethaniam
Verse: 650    unde dannen in Galatiem.

Verse: 651    Kartanensen er enbôt,
Verse: 652    .....

Verse: 653    sie ne chômen unt wurden ime undertân,
Verse: 654    er hiez si alle an daz crûce slahen.

Verse: 655       Unde als si daz vernâmen,
Verse: 656    newiht langer si ne wâren,

Verse: 657    si chômen al gerihte
Verse: 658    zû des chuniges gesihte.

Verse: 659    sie brâhten silber unde golt
Verse: 660    unde macheten in den chunich holt.

Verse: 661    er ne wolte ir goldes newiht enphâhen,
Verse: 662    er bestunt sie mit genâden.

Verse: 663    wande si dûhten in frumich unt balt.



Chapter: 36  
Alexander gründet Alexandria (in Ägypten)


Verse: 664    er nam er ein thûsint in sîne gewalt

Verse: 665    unt fûrti sie in Egypto allesamt
Verse: 666    unde stifte dâ zêren sînes namen

Verse: 667    eine burch, diu wart nâh im genant.
Verse: 668    er erfûre al diu lant,

Verse: 669    er ne gesâhe niemer neheine stat,
Verse: 670    diu zû ir mohte werden gezalt.

Verse: 671       Babilonia ne wart nie sô wît,
Verse: 672    sô man sie noch ane siht.

Verse: 673    Troja ne mohte sich zir niht gemâzen.
Verse: 674    .....

Verse: 675    a waz Gapadotia gebrach,
Verse: 676    daz si wâre alsô vast!

Verse: 677    Pede noch Kartagô
Verse: 678    ir newedere was sô.

Verse: 679    rîcher was disiu burch noch
Verse: 680    danne Rôme oder Antioch.

Verse: 681    Alexandria si hiez.
Verse: 682    sînen namen er drinne liez.




Chapter: 37  
Alexander erobert Syrien


Verse: 683    dannen er durch daz lant brach.
Verse: 684    er tede ein michel ungemach.

Verse: 685    er was Dario gram.
Verse: 686    er stôrte Galileam.

Verse: 687    dâ wart in Neptalimlant
Verse: 688    al ferhert unde ferbrant.

Verse: 689    alsô tet er Zabulon,
Verse: 690    die rîchen burch Naason.

Verse: 691    er zestôrte Samariam.
Verse: 692    alsô tet er Syriam.

Verse: 693    diz was dâ Naaman inne was,
Verse: 694    der von der miselsuhte genas.

Verse: 695    er zestôrte ouch Bethuliam,
Verse: 696    dâ Judith Holofern sîn hôbet nam.

Verse: 697    unde zestôrte ouch judeisc lant.



Chapter: 97  
Alexander in Jerusalem


Verse: 698    dar nâch wart Jerusalem ferbrant

Verse: 699    unde Bethlehem diu dâ bî stêt.
Verse: 700    sô niemen mit ime streit,

Verse: 701    al biz er Tyre zû treib.
Verse: 702    a waz ime dâ helede tôt peleib!




Chapter: 93  
Alexander belagert Tyros


Verse: 703       Tyre was ein stat grôz,
Verse: 704    daz mere si alle umbeflôz.

Verse: 705    dâ wârn die mûre harte
Verse: 706    von quâdrestein geworhte,

Verse: 707    mit îserenen spangen
Verse: 708    was al daz werch befangin,

Verse: 709    unde dâ zû morter unde blî,
Verse: 710    wie mehte siu vester sîn.

Verse: 711    drî wâren der mûre,
Verse: 712    umbe waz solte si daz gût vertûrem

Verse: 713    daz golt sie ne hâlen:
Verse: 714    sie thâten die turne mâlen,

Verse: 715    daz daz rôthe golt dar ab schein
Verse: 716    gemûseth oben an den stein.

Verse: 717    dan zwiscen gingen de bogen,
Verse: 718    si wâren al mit golde bezogen.

Verse: 719    die turne stunden vil nâch,
Verse: 720    wît was der hof dâ.

Verse: 721    vil grôz scade daz was,
Verse: 722    das si Alexander zebrach

Verse: 723    durch sîn ubermûtecheit.
Verse: 724    siu was einer mîle breit.

Verse: 725    er ne waiz in anders neheine scult,
Verse: 726    niewan si wâren einem chunige holt:

Verse: 727    daz was Darios rex Persarum,
Verse: 728    deme sie undertân wâren.

Verse: 729       Nû vernement ouch ein ander:
Verse: 730    zû zin sante Alexander

Verse: 731    unt sprach, ob si in ze chunige wolten entfân
Verse: 732    unde ime wesen undertân

Verse: 733    unde die burch gâben in sîne gewalt.
Verse: 734    dâ saz inne vil manec helt,

Verse: 735    die alle wider zim santen,
Verse: 736    wande si sîn niewiht bechanden.

Verse: 737    sie sprâchen, daz sie in niene forhten,
Verse: 738    noch si sîn ze niehte bedorften,

Verse: 739    wan sie trûgen ime willigen mût
Verse: 740    unde gâben ime gerne durch minne ir gût.

Verse: 741    unt alsô dise boten wider chômen,
Verse: 742    vernement, wie in Alexander vernâmi:

Verse: 743    mit zorn er der nider saz;
Verse: 744    bî sînem hals er sich vermaz;

Verse: 745    er sprach, ez en solte sîn porlanch
Verse: 746    er wolte si hân âne ir allir danch.

Verse: 747       Dô nam er sîner fursten drî -
Verse: 748    ouch ne waiz ich, wie ir name sî -

Verse: 749    unt sante si dar widere in die stat
Verse: 750    unde hiez den altsten sagen daz:

Verse: 751    war sie ir sin thâdin,
Verse: 752    daz si den chunich fersmâten,

Verse: 753    der Rôme mit sîner crapht
Verse: 754    unt al Chrîchen under sich hiete brâht.

Verse: 755    unt alsô die boten fur chômen
Verse: 756    unt die burgâre ir rede vernâmen,

Verse: 757    si thâden stolzen liuten gelîch
Verse: 758    unde hingen sie alle ûf ein zwîch.

Verse: 759       Nû beviench Alexander die burch mit here
Verse: 760    mit den scephen in dem mere.

Verse: 761    mit sturme er sie starche dwanc,
Verse: 762    er drûg in ubelen gedanc.

Verse: 763    si werten sich vone prîse wole.
Verse: 764    der werlte ne was nehein zal,

Verse: 765    der in der burch was
Verse: 766    zwainzech thûsent unde baz.

Verse: 767    alsô vil sclûgen si ime sînes hers,
Verse: 768    daz die unde des mers

Verse: 769    von dem plûte wurden rôt.
Verse: 770    der wint tet in vil nôt,

Verse: 771    daz sîner scephe ein hundert versunchen
Verse: 772    unt sîne helde all ertrunchen.

Verse: 773    dô Alexander daz gesach,
Verse: 774    daz ir alsô vil thôt lach,

Verse: 775    des sturmes hiez er abe stân,
Verse: 776    er thete die sceph wider in die habe gân.

Verse: 777       Alexander bedâhte sich
Verse: 778    des schaden ummâzlîch.

Verse: 779    er was ein listich man,
Verse: 780    grôze poum er gewan

Verse: 781    unde thede die zesamene spannen
Verse: 782    von chundigen zimbermannin

Verse: 783    unde hiez daz mit steinen vullen.
Verse: 784    daz was an sînem willen:

Verse: 785    swane er sîn ebenhôch zem turne brâhte,
Verse: 786    daz er lange poume darabe rihti,

Verse: 787    die der zû den zinnen mahten gân.
Verse: 788    er wolte sie mit nîde bestân.

Verse: 789       Einluph tûsint santer sînes hers
Verse: 790    nâch den poumen uber mer

Verse: 791    unde hiez die poume vellen,
Verse: 792    er wolte perfrit stellen,

Verse: 793    ûf einen perc, heizet Libanus,
Verse: 794    dâ stêt ûf manch cêdrus.

Verse: 795    diz ist Libanus der in Arabien stêt,
Verse: 796    dâ der Jordan ûz gêt.

Verse: 797    diz ist noch der selbe walt,
Verse: 798    den der chunich Salemon galt

Verse: 799    wider einen chunich, der hiez Hiram.
Verse: 800    er gab ime halb Galileam,

Verse: 801    wande im die poume wol gevielen
Verse: 802    ze zimber unde ze chielen.

Verse: 803    si nerfûlent ouch niemer mê
Verse: 804    weder durh regen noch durch snê.

Verse: 805       Nû de Arabati alsô daz befunden,
Verse: 806    die Tyrin wole gûtes gunden,

Verse: 807    newiht langer si nenthwalten:
Verse: 808    die den forst valten,

Verse: 809    si nâmen ein ungezogenlîch phant
Verse: 810    unt erslûgen ein tûsint.

Verse: 811    dô Alexander daz vernam,
Verse: 812    vier tûsent er nam

Verse: 813    des hers, daz er noch dô habete.
Verse: 814    ein herzoge hiez sich Gracto

Verse: 815    unde ein ander der was Perdix genant,
Verse: 816    den bevalch erz gesez in die hant

Verse: 817    unde fûr dô selbe ûz
Verse: 818    ze dem berge Libanus,

Verse: 819    unde bewarte sîne holden,
Verse: 820    die dâ zimberin solten,

Verse: 821    biz iz alliz gereite wart.
Verse: 822    dô nam er die widervart

Verse: 823       Nû was Alexander mit here
Verse: 824    nâch den poumen uber mere.

Verse: 825    des wurden die burgâre stolz unt balt.
Verse: 826    si ranten ûz mit gewalt.

Verse: 827    ubirmûtechliche si sich râchen,
Verse: 828    ein castel si im zebrâchen.

Verse: 829    eines morgens frû
Verse: 830    mit fiure gingen sime zû

Verse: 831    unde sclûgen unde fiengen
Verse: 832    alle die si drûffe begiengen.

Verse: 833    noch mag ich iu sagen mêre:
Verse: 834    si besencten sich in den sê,

Verse: 835    daz man si in allem tage niene sach,
Verse: 836    ê man die gruntfeste zebrach.

Verse: 837    sie sancten sich in des sêwes grunt
Verse: 838    unt chômen after ûz wider gesunt.

Verse: 839       Unde alsô daz castel was endwart,
Verse: 840    dô hûb sich ein sturm hart

Verse: 841    von den herzogen zwein.
Verse: 842    dô beleib der burgêr nie nechein.

Verse: 843    a wie maneger des sturmes enchalt;
Verse: 844    ze zwain hundert wâren sie gezalt,

Verse: 845    die dâ thôt piliben,
Verse: 846    al dâ sis von den porten triben.

Verse: 847    dâ wart in gescadet vil sêre.
Verse: 848    dô alrêrist chom ir hêre.

Verse: 849    owê daz Tyre dô niht genas,
Verse: 850    alsô wol ir begagent was.

Verse: 851       Nû willich sagen allen, die des niene chunnen,
Verse: 852    wie Tyre wart gewunnen.

Verse: 853    Alexander chom mit grôzer chrefte
Verse: 854    unt tet sceph zesamen hephten

Verse: 855    imer zwai unt zwai neben;
Verse: 856    unt hîz den îsrîne pente geben,

Verse: 857    unt tet die mit hûten alsô uberziehen,
Verse: 858    daz die unden dar în niene giengen.

Verse: 859    perfrit dar ûff si sazten
Verse: 860    von den aller lengisten poumen, die sie habeten,

Verse: 861    unde triben si zû den zinnen.
Verse: 862    alsus wolten si die burch gewinnen.

Verse: 863       Der chunich hiez die mûre hauwen
Verse: 864    mit stêliner gezowe.

Verse: 865    dâ hûb sich ein sturm vil grôz.
Verse: 866    a wie man warf unde scôz

Verse: 867    von den ainen zen andern,
Verse: 868    daz alle die mahte wundern,

Verse: 869    die ie dechainen sturm gesâhen.
Verse: 870    von der werlte, diu dâ tôt lach,

Verse: 871    sô wart daz mere allez ein blût.
Verse: 872    des wôhs dem chunige wol sîn mût,

Verse: 873    er bestunt sie mit nîde.
Verse: 874    von den perfriden hiez er sie trîben.

Verse: 875    die wâren hôher danne die turni.
Verse: 876    daz tet er in ze zorne.

Verse: 877    dâ wurden die schônen turne mit den bogen
Verse: 878    in daz wazzer gezogen,

Verse: 879    unt brâchen dâ der besten mûre eine,
Verse: 880    die ie burch gewan deheine.

Verse: 881       Alsô si ze der ander chômen,
Verse: 882    zêderboumi sie der nâmen

Verse: 883    unde dar zû lange dannen.
Verse: 884    dô hiez er perfride spannen

Verse: 885    unde rihte die ûf mit listen
Verse: 886    unde sazte si ûf zû der feste.

Verse: 887    Alexander steich ûf daz obrist gewer
Verse: 888    unt gebôt den sturm uber al daz here

Verse: 889    unde liez dô mit der werlte
Verse: 890    den êristen sturm werden.

Verse: 891    mit hameren man die burchmûre zebrach.
Verse: 892    a waz dâ werlte tôt belach!

Verse: 893    Alexanders schilt was helfenbein,
Verse: 894    bezzer wart nie nechein.

Verse: 895    sîn helm was alsô gût,
Verse: 896    sô der nî nechein swert durch gewût.

Verse: 897    in der hende trûch er einen gêr
Verse: 898    von golde gedrâjet vil hêr.

Verse: 899    dô sach er den herzogen stân,
Verse: 900    dem al Tyre was undertân,

Verse: 901    kegen ime ûf der mûre.
Verse: 902    er lie sich es niuht fertûren,

Verse: 903    er scôz in mit tem gêre durch
Verse: 904    unde falt in tôt in die burch.

Verse: 905       Dô tet der chunich ainen sprunc,
Verse: 906    mit im manich helt junc

Verse: 907    fon den perfriden ûf die zinnen.
Verse: 908    alsus wolden sie die burch gewinnen.

Verse: 909    vier tûsint ir mit ime spranch,
Verse: 910    sie trûgen ubelen gedanc.

Verse: 911    mîn wân ne triege mich,
Verse: 912    dâ gespranch ir etelîch,

Verse: 913    daz er dâ zestunt
Verse: 914    niemer mêre wart gesunt,

Verse: 915    daz ir ein hunderet tôt lach
Verse: 916    ân andere ungemach.

Verse: 917    dâ brâchen sie die besten mûre zû der erde,
Verse: 918    diu der ie dehein solte werden.

Verse: 919       Dâ was daz velt vil wît,
Verse: 920    dâ hûb sich der bitteriste strît,

Verse: 921    dâ ich noch ie abe hôrte gesagen.
Verse: 922    dâ ne gesach man nechein zagen.

Verse: 923    dâ mahti man manegen degen scouwen
Verse: 924    al durch den helm verhouwen,

Verse: 925    unde manegen rîter junch
Verse: 926    al durch die halsperge verwunt,

Verse: 927    daz er der wunde niht genas,
Verse: 928    want daz swert scarf was.

Verse: 929    durch den scilt flôch der gêr
Verse: 930    unde machet manegen helt sêr.

Verse: 931    dâ hete jâmer ein alsô der ander
Verse: 932    âne der wunderlîche Alexander.

Verse: 933    er slûch des liutes die menige.
Verse: 934    gebeizet was sîn brunne

Verse: 935    in eines wurmes blûte.
Verse: 936    er stunt ime stolzes mûtes.

Verse: 937    hurnen was siu veste.
Verse: 938    ez chom vone grôzen listen.

Verse: 939    ez lâgen thûsint unt aver thûsint,
Verse: 940    ûf der erde mahte niemen gân,

Verse: 941    alsô vil lag ir dâ erslagen,
Verse: 942    daz iz iu unzellîch ist ze sagen.

Verse: 943    die chûnen von Tyre,
Verse: 944    des lebenes vil gîre,

Verse: 945    si fuhten alsô wildiu swîn,
Verse: 946    swes tôt nieht solte sîn.

Verse: 947       Die umbe die burch lâgen,
Verse: 948    sie ne dorften sich des siges niemer gerûmen.

Verse: 949    wande die burgêre brâchen si durch
Verse: 950    unt wichen aber wider in die burch.

Verse: 951    dâ verlôs er manegen dûren chneht,
Verse: 952    Alexander tet in grôz unreht.

Verse: 953       Harte zurnt sich Alexander dô.
Verse: 954    mit nîde giench er der porten zû.

Verse: 955    die dar ûf wâren,
Verse: 956    si tâten scaden mêre.

Verse: 957    ûf ter porte stunten drîe turni;
Verse: 958    dâ geschiet er abe mit zorni

Verse: 959    des mordes, des er an sînen holden gesach.
Verse: 960    mit sînen fursten er sprach:

Verse: 961    'hêren, bedenchet iuch sîn enzît,
Verse: 962    wandir tiure chnehte sît:

Verse: 963    nement si nû die obere hant
Verse: 964    sô ist unser spot uber daz lant.'

Verse: 965    der rât, der ime dô wart getân,
Verse: 966    den mugent ir schiere verstên.

Verse: 967    sie rieten, daz er mange getâte richten
Verse: 968    unde lieze die turni brechen.

Verse: 969    zwô unde sibenzech mange wurden dâ gestalt,
Verse: 970    sie wurfen alle mit gewalt.

Verse: 971    si wâren vil wol gesailet.
Verse: 972    si wurden in driu getailet.

Verse: 973    si wurfen fûr unde witi,
Verse: 974    daz was Alexanders site:

Verse: 975    daz er chriechisc fûr chunde wurchen
Verse: 976    unde liez iz niemen merchen,

Verse: 977    von welher liste iz im chom,
Verse: 978    daz ez in dem wazzere bran.

Verse: 979    daz warf er in zû der burch.
Verse: 980    dâ mite brante er sie al durch unt durch

Verse: 981    unde dar zû manegen herten stein.
Verse: 982    dô belaib der burgâre nie nehein,

Verse: 983    si mûsen dô alle von der zimlen gân.
Verse: 984    wande si ne getorsten dâ nie langer gestân

Verse: 985    for des fûres forhten.
Verse: 986    Alexander der tranch zû der porte,

Verse: 987    mit nîde er sie der nider brach.
Verse: 988    a waz ime dâ helede tôt lach!

Verse: 989    des wârim sêre mê gesciet,
Verse: 990    forhten si der mange wurfe nieht.

Verse: 991    sô solt im diu burch werden tiure,
Verse: 992    gewunners nieht mit chriechiscen fiure.

Verse: 993       Alexander wolte sich wole rechen:
Verse: 994    er hiez die trîe turne nider brechen,

Verse: 995    die daz fur hiete verlâzen.
Verse: 996    der aller rîchisten burgâre, die in der burch sâzen,

Verse: 997    der thede er driu tûsint fâhen
Verse: 998    unde hiez sie blenden unde hâhen

Verse: 999    wider sînen furstin drîn,
Verse: 1000    die er dâ for sante der în.

Verse: 1001    des siges, des er dâ nam,
Verse: 1002    wêrez ein wole bedâht man,

Verse: 1003    er ne wurdes niemer ze frô;
Verse: 1004    wande ez gescah sît alsô,

Verse: 1005    daz ir mêre was der ime dâ tôt belaib,
Verse: 1006    .....

Verse: 1007    tan der inerhalb Tyre wâre
Verse: 1008    weder geste oder burgâre.

Verse: 1009    al zestôret was dô Tyrus.
Verse: 1010    die stifte sint ter chunich Apollonios,

Verse: 1011    den Antioch uber mere jagete,
Verse: 1012    wande er ime sagete

Verse: 1013    daz rêtsce an einem brieve,
Verse: 1014    daz er mit sîner tohter sliefe.

Verse: 1015    Tyre is noch diu selbe stat,
Verse: 1016    dâ daz heiden wîb unseren hêren pat,

Verse: 1017    daz er ir tohter erlôste
Verse: 1018    von dem ubelen geiste, der sie nôte.




Chapter: 45  
Darius' 1. Brief an Alexander (Geschenke)


Verse: 1019       Dar nâch uber unlanch stunt
Verse: 1020    sô wart Dario chunt

Verse: 1021    von einem, der vone Tyren entran,
Verse: 1022    daz Alexander der chûne man

Verse: 1023    sîne liute habete gevangen
Verse: 1024    unde geblentet unde erhangen,

Verse: 1025    unt diu schône Tyre lâgen cholen
Verse: 1026    unde er sie hieze daz laster dolen.

Verse: 1027    er sprach, er mohte sich scamen
Verse: 1028    sînes chunichlîches namen,

Verse: 1029    daz er in niuht ze helfen chôme,
Verse: 1030    dô er ir grôze nôt fernâme.

Verse: 1031       Ain rîcher chunich was Darios.
Verse: 1032    derwider dâhter alsus:

Verse: 1033    Alexander dûhte in lutzel.
Verse: 1034    er sante im eines chindes stuzel

Verse: 1035    unde dar zû ein scûhpant,
Verse: 1036    alsô erz in sînem herzen vant,

Verse: 1037    unde ein wênich choldes in einer lade.
Verse: 1038    er wânde er ime iemer mohte gescaden.

Verse: 1039    unt sante im dise drîe sache
Verse: 1040    unt tet des einen brîf machen,

Verse: 1041    daz ez der brîf benante,
Verse: 1042    umbe waz er ime die drîe gebe sante.

Verse: 1043       Ain stuzel sante er im umbe daz,
Verse: 1044    daz ime daz stunde michel baz,

Verse: 1045    daz er mit den chinden spilen gienge,
Verse: 1046    danner sîne liute cholte oder hienge.

Verse: 1047    daz bezêchinôt daz scûchpant,
Verse: 1048    daz Alexander wart kesant,

Verse: 1049    daz er ime tagelîchen dienen solte,
Verse: 1050    ob Darios wolte,

Verse: 1051    wanten scûchpant nuzet man tagelîch;
Verse: 1052    daz er dar an bedâchte sich

Verse: 1053    unde lieze sîn irreheit stân
Verse: 1054    unt wâre sîneme hêren undertân,

Verse: 1055    alsô ander sîne forderen teten,
Verse: 1056    die sich nie wider ime gesazten.

Verse: 1057       Daz bezeichnôt daz cholt:
Verse: 1058    daz er rehte merchen solt,

Verse: 1059    daz daz ter zins wâre, den ime sîn vater chulte
Verse: 1060    aller jârilîch turch sîne hulde,

Verse: 1061    daz er in des prâcht innin
Verse: 1062    unt fûr im den zins gewinnen;

Verse: 1063    unt daz er des choldes solde leben
Verse: 1064    unde er niemen niuht solte nemen,

Verse: 1065    unz er wider haim chôme;
Verse: 1066    daz er niemen sînes niuht nâme,

Verse: 1067    unde daz er schiere dannen rithe
Verse: 1068    unde niuht langer bite.

Verse: 1069    unt dêter iwiht mêre wider sînen willen,
Verse: 1070    er hiez in mit dem besemen villen.




Chapter: 46  
Alexanders 1. Brief an Darius (Auslegung der Geschenke)


Verse: 1071       Unde alsô Alexander den brîf gelas,
Verse: 1072    owî wie smâhe ime was,

Verse: 1073    daz man ime trôte ze slahen.
Verse: 1074    die boten hiez er alle ûfhâhen.

Verse: 1075    der boten ainer zim sprach:
Verse: 1076    'hêre, tût uns nehain ungemach;

Verse: 1077    wande ez ne dûcht iuch gnâde noch reht,
Verse: 1078    swâ sô iwer chneht

Verse: 1079    iwer botescaf tribe,
Verse: 1080    daz er drumbe tôt belibe;

Verse: 1081    unde niene scentet iweren namen.
Verse: 1082    wir jehen des, hêre, alle samt,

Verse: 1083    daz under disen chunigen allen
Verse: 1084    neheiner ziu mach gevallen,

Verse: 1085    der mit alsô grôzer frumicheit
Verse: 1086    sîn here uber lant leit,

Verse: 1087    sô ir, hêre chunich, tût.
Verse: 1088    nû bedwinget iweren mût

Verse: 1089    unde habet unser mâze.
Verse: 1090    wande wir getorsten die botscaf niet lâzen.'

Verse: 1091       Alexander bedâhte sich,
Verse: 1092    er wart den boten genâdich.

Verse: 1093    er ne waiz in nieht umbe die scult,
Verse: 1094    er gab in wider daz selbe golt,

Verse: 1095    daz ime von ir hêren bechom.
Verse: 1096    er sprach: 'awî wie ubele ich ime des gan,

Verse: 1097    daz mir iwer hêre drowet ze slahen.
Verse: 1098    er hât gelîche getân

Verse: 1099    alsô der bôse rude toet:
Verse: 1100    des nahtes alsô er iwiht verstêt,

Verse: 1101    sô ne getar er sich dar nâher niuht geziehen,
Verse: 1102    er beginnet ûzwerd flîhen

Verse: 1103    unde wîzet iz allez mit sîner cheln
Verse: 1104    und beginnet darwert belen.'

Verse: 1105    Er sprach: 'iwers hêren brief mir niuht gevellet,
Verse: 1106    wande er zer gebe niene gehillet.

Verse: 1107    diu gâbe diu ist lobelîch
Verse: 1108    unt der brief der ist redelîch.

Verse: 1109    er bezeichenet alle ein ander',
Verse: 1110    sprah der chunig Alexander.

Verse: 1111    'der stuzel, den mir iwer hêre hât gesant,
Verse: 1112    dâmit hât er mir rechte bechant,

Verse: 1113    daiz allez ane mir sul bestân,
Verse: 1114    swaz sô unter deme himele is betân,

Verse: 1115    unt ich is alles hêre sul werden
Verse: 1116    ûf der scîbligen erde.

Verse: 1117       Den riemen, den er mir sante,
Verse: 1118    dâ mite er mir bechante,

Verse: 1119    daz er sich mir zeigen welle geben
Verse: 1120    unt iht in mînen genâden iemer welle leben,

Verse: 1121    daz er mîn dienest welle sîn
Verse: 1122    ze allen herverten mîn.

Verse: 1123    daz golt, daz ir mir habet prâht,
Verse: 1124    dâ mit habet er mir gesaget,

Verse: 1125    daz iz mir al einem wol gezeme,
Verse: 1126    daz ich den zins von ime neme

Verse: 1127    unde dar zû von allen landen,
Verse: 1128    unde bedwinge die ze mînen handen.'

Verse: 1129       Diz sazte man dô allez an einen brief,
Verse: 1130    daz was dem chunige Alexander lieb.

Verse: 1131    er screib in selbe mit sîner hant.
Verse: 1132    er wart dem chunige Dario gesant.

Verse: 1133    er inbot im ouch dâmite,
Verse: 1134    daz er noch trîe mânôt bite.

Verse: 1135    er sprach, er ne wolte niuht langer lengen,
Verse: 1136    zehinzech tûsint wolte er bringen

Verse: 1137    uber daz wazzer Eufrates,
Verse: 1138    niweht gedanchet er des,

Verse: 1139    ze Babilonii fur die grôze stat.
Verse: 1140    alsus wart an den brîf gesazt.

Verse: 1141    alsô lange sô er des zinses nieht ne wold enpern,
Verse: 1142    er solte sîn dâ heime wern

Verse: 1143    mit alsô getâner mâze,
Verse: 1144    er solt im sîn houbet lâzen.

Verse: 1145    unde ob er daz tagedinch liezi,
Verse: 1146    daz er niemer chunich kehieze,

Verse: 1147    er bestunde daz volcwîc.
Verse: 1148    Darios was ein chunich rîch.

Verse: 1149    unde alsô der brîf fur in chom,
Verse: 1150    freislîch er in vernam.

Verse: 1151    mit zorn er ûf fur,
Verse: 1152    bî sînem rîche er swûr.

Verse: 1153    er sprach: 'daz mich ie der bescalt,
Verse: 1154    des vater mir den zins chalt:

Verse: 1155    ich salz an die schande chêren,
Verse: 1156    iz ne regêt im niemer zêren',

Verse: 1157    er sprach, noch ouch niemer gût ende genâme,
Verse: 1158    daz er ie durch sîn laster ûz chôme.




Chapter: 47  
Darius' Brief an seine Hauptleute


Verse: 1159       Darius sante einen brief
Verse: 1160    zewein herzogen, die wâren ime lieb,

Verse: 1161    unt bat, daz si Alexander diu scef pesparten
Verse: 1162    unde ime daz lant werten,

Verse: 1163    unde daz si in wider stiezen
Verse: 1164    unt uber daz wazzer niene liezen,

Verse: 1165    uber daz wazzer Eufrates;
Verse: 1166    daz was Marios unde Typotes;

Verse: 1167    daz si in selben sazten dernider
Verse: 1168    unde in bunten alsein wider,

Verse: 1169    daz sir manheit gedâhten,
Verse: 1170    daz si in lemtigen brâhtin.

Verse: 1171    er sprach, wie gerne er ime helfen solte
Verse: 1172    zallen den êren, er wolte

Verse: 1173    der hôiste sîn ûf der erde
Verse: 1174    unt mûste daz an ainem galgen werden.




Chapter: 49  
Darius' Hauptleute berichten in einem Brief


Verse: 1175       Dô sprâchen die zwêne herzogen:
Verse: 1176    'unser hêre ist vil sêre betrogen,

Verse: 1177    daz er uns den man heizet vâhen,
Verse: 1178    dem alliu lant sint undertân,

Verse: 1179    unt die fursten habet gevangen
Verse: 1180    unt sîn wille ist regangen

Verse: 1181    uber Jerusalem unt uber Tyre.
Verse: 1182    sîn selbes ist er gîre.

Verse: 1183    Rôme und Egyptelant
Verse: 1184    stênt beidiu in sîner hant.

Verse: 1185    Kartago diu rîche burch
Verse: 1186    mit gewalte reit er dâ durch

Verse: 1187    unt hât manege gûte burch zestôret,
Verse: 1188    die unseren hêren ane hôrent.

Verse: 1189    unt unser hêre hât iz allez versezzen.
Verse: 1190    der chunich Alexander hât sich noch aines mêren vermezzen,

Verse: 1191    daz ern in sînem aigeneme lande vâhe,
Verse: 1192    mit grôzem urliuge bestâ.'

Verse: 1193    si sprâchen: 'unser hêre hantil iz noch mit sinne,
Verse: 1194    ich wâne ers michel scande gewinne.'




Chapter: 44  
Alexanders erste Schlacht mit den Persern (Granicus)


Verse: 1195       Unde alsô der bote wider chom
Verse: 1196    unt Darios der zweier herzogen rede vernam,

Verse: 1197    sêre zurnet er sich des.
Verse: 1198    dô nam er ainen herzogen, der hiez sich Mennes,

Verse: 1199    unde dar zû zênzic tûsint man,
Verse: 1200    die er alle uber naht gewan,

Verse: 1201    unde sante si Alexander gegen
Verse: 1202    unde hiez den zwein herzogen sagen,

Verse: 1203    liezen sin uberz wazzer varen,
Verse: 1204    ez solt in iemer mêre scaden.

Verse: 1205    si ne gewunnen sîn niemer frumen,
Verse: 1206    noch si ne getorsten niemer fur sîne ougen chomen.

Verse: 1207    er sprach, wurde Alexanders wille gendeth,
Verse: 1208    si wurden alle der mite gescendeth.

Verse: 1209       Die zwêne herzogen getorsten niuht lâzen,
Verse: 1210    al dâ ir man sâzen,

Verse: 1211    si santen al gerihte
Verse: 1212    uber allez ir gerihte;

Verse: 1213    die sie zesamene brâhten,
Verse: 1214    ze zehen tûsint mahti man si ahten

Verse: 1215    unde drîzech tûsint dar zû.
Verse: 1216    Alexander genante sih ouch dô,

Verse: 1217    er hâte einen ubermûten mût.
Verse: 1218    er sciffet sich zeforderest uber die flût.

Verse: 1219    an eime stade chômen si im enkegen,
Verse: 1220    alsus hôrt ich maister Alberîchen sagen.

Verse: 1221    dâ hûb sich ein sturm vil grôz,
Verse: 1222    ein tûsint beleib ime dâ tôt,

Verse: 1223    von chriechiscen chunne,
Verse: 1224    ê Alexander den furt ie gewunne.

Verse: 1225       Dô chom Alexander selbe geriten,
Verse: 1226    alsô ers vil chûme habeti gebiten.

Verse: 1227    ûf Buzival er reit,
Verse: 1228    dô slûg er alsô der thoner deit,

Verse: 1229    for dem sich niemen mach bewarn.
Verse: 1230    swer in fon ferre sach gevaren,

Verse: 1231    ê er hinder sich gesach,
Verse: 1232    sô heter sîn ainen slach,

Verse: 1233    daz er sîn plût allez spê
Verse: 1234    unde lebte ouch dar nâch nieweht mê.

Verse: 1235    sîn schaft was mâre grôz.
Verse: 1236    sweme wart ein slach oder ein stôz,

Verse: 1237    der was des gewissen tôdes
Verse: 1238    unde ern beiz dar nâch niemer brôtes.

Verse: 1239       Mennes was ein herzoge genant,
Verse: 1240    den Darios hete dar gesant,

Verse: 1241    der was ein helt vrumeclîch.
Verse: 1242    ein hundert rîter hâter umbe sich

Verse: 1243    mit swerten vil gûten,
Verse: 1244    die tâten si im ze hûte.

Verse: 1245    zime mahte niemen brechen,
Verse: 1246    wan ders lebenes wolte vergezzin.

Verse: 1247    Alexander want sîn vanen,
Verse: 1248    er begunde sîne helide manen.

Verse: 1249    er sprenget ze Mennes wert
Verse: 1250    unt liez iz niuht durch die scarphen swert,

Verse: 1251    durch alle die sîne er brach.
Verse: 1252    Mennes er durch den schilt stach,

Verse: 1253    daz daz plût begunde rinnen.
Verse: 1254    Mennes stach hine wider durch den sînen,

Verse: 1255    der was feste helfenpein,
Verse: 1256    daz daz plût an dem spere schain.

Verse: 1257    ir iewedere stach den anderen nider.
Verse: 1258    aldâ grifen si zen swerten sider.

Verse: 1259    a wî daz fûr dar ûz spranch,
Verse: 1260    dâ ein stahel wider den ander dranch.

Verse: 1261    grôzer slege wurden nie getân,
Verse: 1262    sie ne slûge wîlen Samson,

Verse: 1263    der die grôzen maht an ime trûch,
Verse: 1264    daz er mit eines eseles bachen ein tûsint liutes erslûch.

Verse: 1265    a wie mahte daz ie werden:
Verse: 1266    Mennes der slûch Alexandern zû der erde.

Verse: 1267    aldâ wart ime der helm abgeprochen.
Verse: 1268    dâ was vil nâch gerochen .

Verse: 1269    Darius der tûre degen
Verse: 1270    der manegen grôzen slege,

Verse: 1271    der der chunich Alexander finch,
Verse: 1272    dô Mennes ime zû giench.

Verse: 1273    unt wâre er alsô wol gewâfent nieht,
Verse: 1274    er ne bescowet niemerz tages lieht,

Verse: 1275    wane daz sînes tôdes noch neweht solte sîn.
Verse: 1276    ein rîter der hiez Daclym,

Verse: 1277    der was mit Alexander dâ
Verse: 1278    unde stunt ime des tages vil nâ.

Verse: 1279    der ander hiez Jubal,
Verse: 1280    der sich vil ungerne in dem sturme hal.

Verse: 1281    der was dar chomen mit teme herzogen
Verse: 1282    unde hiete daz swert erzogen

Verse: 1283    unde wolde Alexander geben ainen slach,
Verse: 1284    dâ er im den hals plôz gesach.

Verse: 1285    Daclym wart der êror:
Verse: 1286    er lôste sînen hêren.

Verse: 1287    er slûch Jubal von oberest sîner zende
Verse: 1288    al nider durch die lende

Verse: 1289    unde machet zwêne halbe man.
Verse: 1290    a wie gût ainen lob daz swert gewan.

Verse: 1291       Daclym den helm gebranc,
Verse: 1292    sînem hêren ern ûf daz houbet pant.

Verse: 1293    sîn houbet was ime erscellet,
Verse: 1294    dâ er der nider wart gevellet.

Verse: 1295    niweht verwielt er sich sîner rede,
Verse: 1296    er was in grôzer unhuge.

Verse: 1297    er warf sich umbe alsô ain helit:
Verse: 1298    'nû werth iuch, hêre chunich',

Verse: 1299    alsus sprach sîn rîter Daclym,
Verse: 1300    'hiute sî iwer ellen schîn.

Verse: 1301    wande ir ein diure kneht sît,
Verse: 1302    nû zîhet swert, des ist zît.'

Verse: 1303       Unde Alexander wart lôs,
Verse: 1304    dô spranc er ûf sîn ros.

Verse: 1305    sîn ougen wâren freislîch;
Verse: 1306    sîne fient erforhten sich.

Verse: 1307    unde alsô er zim selben chom,
Verse: 1308    Buzifal er mit den sporn nam,

Verse: 1309    er tete Daclyme danch
Verse: 1310    unde frumit manegen swertslach.

Verse: 1311    under die menege er reit:
Verse: 1312    alsô der daz kras nider sleit,

Verse: 1313    sô strouwet Alexander;
Verse: 1314    diz ne mohte nehain ander.

Verse: 1315    diu menige diu was mâre grôz,
Verse: 1316    die der hêre slûch unde schôz.

Verse: 1317    alsô vil lag er dâ reslagen,
Verse: 1318    daz iu unzallîch wâre ze sagene,

Verse: 1319    Persen unde Chriechen
Verse: 1320    ân wunden unde âne siechen.

Verse: 1321    man saget von dem sturm der ûf Wolfenwerde gescach,
Verse: 1322    dâ Hilten vater tôt gelach,

Verse: 1323    zewisken Hagenen unde Waten:
Verse: 1324    sô ne mohter herzô nieth katen.

Verse: 1325    iedoch ne mohte nechain sîn,
Verse: 1326    noch Herewîch noch Wolfwîn,

Verse: 1327    der der ie gevaht volcwîch
Verse: 1328    dem chunige Alexander gelîch.

Verse: 1329    man list von gûten chnehten,
Verse: 1330    die wol getorsten vehten,

Verse: 1331    in Troiâre liede,
Verse: 1332    ê sich der sturm geschiede,

Verse: 1333    Achilles unde Hector,
Verse: 1334    Paris unde Nestor,

Verse: 1335    die manich tûsint erslûgen
Verse: 1336    unt die ouch scarfe gêre trûgen:

Verse: 1337    sô moht under in allen
Verse: 1338    zû Alexander niuht gevallen.

Verse: 1339       Pincun was ein grâve genant,
Verse: 1340    der vûrte den vanen an der hant,

Verse: 1341    den er Alexander abe brach,
Verse: 1342    den Mennes der nider stach.

Verse: 1343    unde alsô er den grâven hâte erchorn,
Verse: 1344    dô rûrt erz ros mit den sporn:

Verse: 1345    zû dem grâven er reit.
Verse: 1346    er sprach: 'daz was ein michel chintheit,

Verse: 1347    daz mîn vane chom in iwer hant;
Verse: 1348    iz wirt iu ze laster gewant.'

Verse: 1349    der grâve daz ros umbe warf.
Verse: 1350    a wie schîrer dâ restarb.

Verse: 1351    er sprach: 'gewisse fûr ich einen vanen,
Verse: 1352    der churze wîle mit mir sol wonen.

Verse: 1353    ich sol dirn alsô wider geben,
Verse: 1354    daz ez dir gât an dîn leben.'

Verse: 1355    mit samt deme worte
Verse: 1356    sô stach er in mit dem orte,

Verse: 1357    daz an dem spere was,
Verse: 1358    daz er der wunden wol genas.

Verse: 1359    oberhalb der ougbrâ
Verse: 1360    dâ was ter stich ketan.

Verse: 1361    nû vernement, waz Alexander sprach,
Verse: 1362    alsin Pincun gestach:

Verse: 1363    'dû solt lugenâre wesen
Verse: 1364    unde ich sol des stiches wol genesen.'

Verse: 1365    mit dem selben worte
Verse: 1366    gab er im einen slach mit dem swerte.

Verse: 1367    ûf daz houbet ern slûch
Verse: 1368    durch den hals unde durch den hût.

Verse: 1369    der slach was unsûze,
Verse: 1370    daz houbet viel ime vur die fûze.

Verse: 1371       Unt Alexander sînen vanen wider gewan,
Verse: 1372    Mennes aber ime zû chom,

Verse: 1373    den herzogen er der nider stach.
Verse: 1374    dô gab er im mit dem swert ainen slach:

Verse: 1375    ûf den arm er in slûch,
Verse: 1376    dâ er daz swert inne trîch.

Verse: 1377    der slach was vone grôzer maht,
Verse: 1378    durch den arm unde durch den scaph

Verse: 1379    sô chom daz swert gedrungen,
Verse: 1380    unde want ime an der lungen.

Verse: 1381    aldâ viel Mennes dernider.
Verse: 1382    Persi ne fuhten niweht sider,

Verse: 1383    ûzer dem velde si fluhen:
Verse: 1384    si ne getorsten in selben nieht getrûwen.




Chapter: 55  
Alexander erobert Phrygia


Verse: 1385       Des wart Alexander vil palt:
Verse: 1386    er belaib dâ mit gewalt

Verse: 1387    zû den selben stunden,
Verse: 1388    al biz im geheilten sîne wunden;

Verse: 1389    unde genâhete sich Dario baz.
Verse: 1390    aine burch er ime besaz,

Verse: 1391    diu was Sardix kenant.
Verse: 1392    von den sînen wart siu verbrant.

Verse: 1393    dô nam er silber unde golt,
Verse: 1394    er machet ime manegen degen holt.

Verse: 1395    diu selbe burch Sardix,
Verse: 1396    von ir saget uns daz bûch Apocalipsis,

Verse: 1397    daz si der siben purge ainiu wâre,
Verse: 1398    die got unser hailâre

Verse: 1399    in sînem obristen himel nante,
Verse: 1400    dô er sante Johannes dar ze poten sante.




Chapter: 70  
Darius' Heerschau


Verse: 1401       Unt dô man Dario diz gesagete,
Verse: 1402    niuht sêre er ne chlagete:

Verse: 1403    er tete, alsô der stolze man tût,
Verse: 1404    der durch sîne ubermût

Verse: 1405    sich sô verre verwellet,
Verse: 1406    daz er fur sînen argoren vellet,

Verse: 1407    unde er sich niuht warnet enzît:
Verse: 1408    owî wî dicke er laster gesiht.

Verse: 1409    iedoch sô swûr er ain teil.
Verse: 1410    er sprach, sô hulfe im sînes rîches heil,

Verse: 1411    iz ne solte niemer vierzehen naht entgân,
Verse: 1412    er solte Alexander ûf einen poum hâhen,

Verse: 1413    daz inz gevugel êze,
Verse: 1414    des er sich ie wider in vermâze.

Verse: 1415       Dannen wurden sîne poten gesant
Verse: 1416    uber wazzer unde uber lant

Verse: 1417    unde hiez sînen fursten daz sagen
Verse: 1418    unde manegem rîchen chunige chlagen,

Verse: 1419    herzogen unde grâven,
Verse: 1420    daz sis ime rât kâben

Verse: 1421    unt chômen mit sô frumen chnehten,
Verse: 1422    die wol getorsten vehten,

Verse: 1423    mit allen ir menegen
Verse: 1424    in daz felt Mesopotamiam.

Verse: 1425    in der breiten owen
Verse: 1426    dâ wolte er sîn her bescowen.

Verse: 1427    er sprach, a wî gerne er vernâme
Verse: 1428    die manegen scar, die ime chôme.

Verse: 1429    nû wil ich iu chunden uber al,
Verse: 1430    wî vil ain scare haben sal,

Verse: 1431    allen den, die des niuht enwizzin:
Verse: 1432    sehs tusint unde sehs hunderet sehsic,

Verse: 1433    des wil ich iuch niht verhelen.
Verse: 1434       die fursten wil ich zellen

Verse: 1435    unt die menige, diu mit samit in chom,
Verse: 1436    alsô Dario wol gezam.

Verse: 1437    wande er de geweltigiste chunich was,
Verse: 1438    dâ man von ie gelas.

Verse: 1439    vil wîten ginch sîn gewalt.
Verse: 1440    ze zwein unde drîzech wâren sie gezalt

Verse: 1441    die chunige, die zim chômen,
Verse: 1442    dô si sîne nôth vernâmen.

Verse: 1443    grâven chômen ime ouch.
Verse: 1444    zwei hundert unde sibenzoch

Verse: 1445    herzogen zim chêrten,
Verse: 1446    daz sich sîne rîter mêrethen.

Verse: 1447    die zalt man, sô ich sicher bin,
Verse: 1448    zaht hundert unde trîn.

Verse: 1449    von Persin wurden ime gesant
Verse: 1450    helide sibenzich tûsint.

Verse: 1451    wol hulfen ime des
Verse: 1452    die chûnen Zinnonenses.

Verse: 1453    si chômen mit funzich tûsint chnehten,
Verse: 1454    die wole getorsten vehten.

Verse: 1455    die Panfilien dâten harte wale,
Verse: 1456    si brâhten die selben zal.

Verse: 1457    noch dô chom im ain scar grôz,
Verse: 1458    die des wîges lutzel bedrôz,

Verse: 1459    alsô si in chunigis reise wol gezam,
Verse: 1460    wande si von Medinrîche quam.

Verse: 1461    Medinrîch ist noch daz selbe lant,
Verse: 1462    dar der engel mit Tobia wart gesant.

Verse: 1463    Cilicien heizet ein lant,
Verse: 1464    si brâhtin im ahzech tûsint.

Verse: 1465    von Ninive wurden ime gesant
Verse: 1466    ain unde zwainzich tûsint.

Verse: 1467    die ûzer Armeninlant
Verse: 1468    si brâhten ime aht tûsint.

Verse: 1469    si ne mohten ouch dô nieht baz.
Verse: 1470    diz was dâ diu archa gesaz,

Verse: 1471    diu ûf dem wazzer swebete,
Verse: 1472    dâ Noe inne lebete.

Verse: 1473    ime santen die von Gâze,
Verse: 1474    die uber Filistin sâzen,

Verse: 1475    di im wol ze trôste mohten wesen,
Verse: 1476    zwirent funf hunderet starcher risen.

Verse: 1477    noch dô sâzen sîne frîe man
Verse: 1478    ferre uber Frigiam.

Verse: 1479    die trûgen ime gûten willen.
Verse: 1480    si nâmen zweinzeh tûsint gesellen

Verse: 1481    unde tâtin zim chêren,
Verse: 1482    si gunden im sîner êren.

Verse: 1483    alsô man sînen willen vernam
Verse: 1484    ferre uber Indiam,

Verse: 1485    zwelf tûsint si nâmen,
Verse: 1486    gereitechlîchen zim chômen.

Verse: 1487    noch dô chom im ain wênich here,
Verse: 1488    daz santen ime die von dem rôten mere:

Verse: 1489    ain tûsint sneller helede
Verse: 1490    ze wîge wol erwelte.

Verse: 1491    nû vernement, war zû man diz her nam,
Verse: 1492    dô iz al zesamene chom:

Verse: 1493    ze sehs hunderet tûsint wâren si gezalt,
Verse: 1494    dâ was der hof manichfalt,

Verse: 1495    unde dar zû drîzech tûsint.
Verse: 1496    alsus hete sich Darius besant.




Chapter: 84  
Alexander besiegt Darius (Issos)


Verse: 1497       Unde alsô diz Alexander vernam,
Verse: 1498    er manete sîne getrûe man,

Verse: 1499    die im ze sîner nôte
Verse: 1500    ie wâren ainmûthe.

Verse: 1501    mit ainer minner menige
Verse: 1502    sô reit er in zegegene,

Verse: 1503    ze Mesopotamie
Verse: 1504    dâ chômen sie zesamene

Verse: 1505    in der breiten ouwe.
Verse: 1506    man mohte nie beschowen

Verse: 1507    schar also edele
Verse: 1508    vor eineme chunige,

Verse: 1509    die der ie zesamene chômen
Verse: 1510    unte sô grôzen schaden genârnen.

Verse: 1511    alle die volchwîch
Verse: 1512    .....

Verse: 1513    die von Darios zît
Verse: 1514    al bizher sint geschên,

Verse: 1515    si ne mohten dar zû gelîchen niet.

Verse: 1516    dâ was daz felt vil breit
Verse: 1517    mit ten tôten uberspreit.

Verse: 1518    dâ Alexander durch daz wale brach,
Verse: 1519    a waz dâ helede tôt lach.

Verse: 1520    unde alsô êrhin mûz iz nû alsô ergân.
Verse: 1521    'ir sulten zins hie infâhen,

Verse: 1522    dâ ir vil manegen tach habeth nâch gesant.
Verse: 1523    den hân ich iu brâht in diz lant.'

Verse: 1524    mit tem selben worte
Verse: 1525    sô gab er im mit dem swerte

Verse: 1526    ainen slach, der was mâre grôz,
Verse: 1527    daz imz houbet vur daz march scôz.

Verse: 1528    dâ geschieth sich daz volcwîc.
Verse: 1529    sus saget uns maister Albrîch

Verse: 1530    unde der gûte phaffe Lampret.
Verse: 1531    diz liet ist wâr unde rehth.

Verse: 1532    hie dûhte si beide diu mâze.
Verse: 1533    nû ist zîth daz lâzen.


Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.