TITUS
Heinrich von Meissen, Frauenlob
Part No. 4
Previous part

Text: 3 
III. Minneleich


Strophe: 1 
Verse: 1    O wip, du hoher eren haft,
Verse: 2    durch drier hande selekeit
Verse: 3    mac dich voleren werder man mit sinne.

Verse: 4    Daz erste ist durch geselleschaft,
Verse: 5    daz ander durch der formen cleit,
Verse: 6    daz dritte ist durch der höchsten vrouwen minne.

Strophe: 2 
Verse: 1    ʽHer Sin, nu bildet mir ein wip,
Verse: 2    sit ich ouch trage eines mannes lip.'
Verse: 3    ʽob ich erkenne ir bernden lobes künne,

Verse: 4    Ich tunz mit willeclicher hege.'
Verse: 5    ʽnu secht, welch bilde ich an sie lege.'
Verse: 6    ʽder höchsten ger ein erensedel, wünne,

Strophe: 3 
Verse: 1    Hast du gelesen,
Verse: 2    wie si gewesen
Verse: 3    Hester hie vor?' ʽla mich genesen
Verse: 4    und bilde selber deste baz!'

Verse: 5    ʽGetriuwe, wis,
Verse: 6    kiusch, züchtic ris,
Verse: 7    gehorsam, barmdiemütic : is
Verse: 8    gesmalz nie uf ir wazzers naz.'

Strophe: 1    ʽSprich diner fantasien zu,
Verse: 1    waz feien sach Alanus uf der glanzen gru
Verse: 2    und wie gebriset was ir ordenlicher zesem,

Verse: 3    Ir wat und ouch ir ertlich & sege,
Verse: 4    weistuz?' ʽja wol.' ʽso schicke vürbaz dine wege
Verse: 5    und kere ir phat mit süzer worte lobes besem.'

Strophe: 5 
Verse: 1    ʽDie feie, die Alanus sach,
Verse: 2    truc aller creatiuren dach
Verse: 3    und ouch der elementen vach,
Verse: 4    planeten mit der firme.

Verse: 5    Den allen si besloz ir art,
Verse: 6    complexen und ir mische vart.'
Verse: 7    ʽwie sol ich wip, der triuwen zart,
Verse: 8    gelichen zu der tirme?'

Strophe: 6 
Verse: 1    ʽDaz sage ich dir,
Verse: 2    wiltuz von mir:
Verse: 3    recht alsam jene besloz in ir
Verse: 4    gar aller creatiuren macht,

Verse: 5    Sust vrouwen lip
Verse: 6    und wiplich wip
Verse: 7    besliuzet aller vröuden trip,
Verse: 8    die menschlich herzen sin ie vlacht.

Strophe: 7 
Verse: 1    Recht als Nature wart gegeben,
Verse: 2    daz sie daz wesen und daz leben
Verse: 3    in manige strenge vlichtet,

Verse: 4    Sust vrouwen bilde und vrouwen nam
Verse: 5    menschlicher vrucht zu vröuden quam:
Verse: 6    wip alle wunne tichtet.'

Strophe: 8 
Verse: 1    O wip, du fioliner garte,
Verse: 2    der sich heget uf vrou Minnen warte,
Verse: 3    du zarter liebe ein agetstein,

Verse: 4    Du tougen borte, der sich dringet,
Verse: 5    swenn sich daz golt in golt verspringet
Verse: 6    uz glastes viure, under zwein.

Strophe: 9 
Verse: 1    Selvon, der sach ein dunstlich bilde,
Verse: 2    halp maget, halp man, geteilet nach der lenge,

Verse: 3    Daz truc die vier complexen wilde
Verse: 4    in siner hant, ez vloz in twalmes & henge.

Strophe: 10 
Verse: 1    Kalt unde trucken truc ez in der vrouwen hant,
Verse: 2    warm unde viuchte truc sin manlich ellen.

Verse: 3    Ein sinnic man, der sinnet, waz ez tut bekant.
Verse: 4    spreche ich da von icht mere, ez were gevelle.

Strophe: 11 
Verse: 1    Die forme, halp gecrönet
Verse: 2    nach küniges recht
Verse: 3    und halp ein meitlich borte,

Verse: 4    Sie was so clar geschönet.
Verse: 5    Selvon, der knecht,
Verse: 6    ein got wart in ir worte.

Strophe: 12 
Verse: 1    Swa sie vant bröde sinne,
Verse: 2    dar warf sie nach gewinne
Verse: 3    der brödekeit gelichen twalm.

Verse: 4    Swa danne der twalm erkante
Verse: 5    sin art, gelich dar sante
Verse: 6    die forme ir stricken sunder galm.

Strophe: 13 
Verse: 1    Sus hup sich ganzer liebe vrevel,
Verse: 2    die forme worchte sunder wevel
Verse: 3    die vier complexen dicke in ein

Verse: 4    Niur mit der ougen widerhaft.
Verse: 5    die forme hiez der minnen kraft,
Verse: 6    an tougen buchen daz erschein.

Strophe: 14 
Verse: 1    Sie wart geheizen sie durch ganze süze.
Verse: 2    sich, wip, durch dine süze saffen blumen,

Verse: 3    Sit dir die geiste jen alsüzer grüze.
Verse: 4    ei, man, uf vrouwen pris traget lobes gomen!

Strophe: 15 
Verse: 1    Sit, wip, der süze ersüzen vürbaz reichet,
Verse: 2    ouch alsam der alrunen glanz
Verse: 3    der berendigen vrouwen schranz,
Verse: 4    pinliche bürde weichet,

Verse: 5    Noch süzer dan der forme ir understende,
Verse: 6    noch süzer dan der dürre ein regen,
Verse: 7    noch süzer dan der vorchte ein segen,
Verse: 8    ouch dan der ger ir ende,

Strophe: 16 
Verse: 1    Noch süzer dan ein küler wint dem heizen pilgerine,
Verse: 2    noch süzer dan dem durstendigen ackerman ein kalt ursprinc,

Verse: 3    Noch süzer dan ins lewen hitzic sunne ein schate schine,
Verse: 4    noch süzer dan dem niuwen leben der süzen armonien dinc,

Strophe: 17 
Verse: 1    Noch süzer dan des lewen welf   ir vater quickendiger gelf,
Verse: 2    noch süzer dan ein stolze meit in vlucht dem eingehürne,

Verse: 3    Noch süzer dan dem adelar   in siner muze ein brunne clar,
Verse: 4    noch süzer dan dem fenice sin wandel nach der bürne,

Strophe: 18 
Verse: 1    Noch süzer dan der honiktrage
Verse: 2    der blüte honicsaffec nage,
Verse: 3    noch süzer dan dem salamander viures wage,
Verse: 4    noch süzer dan der luft dem gamalione,

Verse: 5    Noch süzer dan der erden zins
Verse: 6    dem moltwerfe und sins ordens vlins,
Verse: 7    noch süzer dan dem hering dünke wazzers glins,
Verse: 8    noch süzer dan dem vogelin morgens vrone,

Verse: 9    Noch süzer dan dem lebartin
Verse: 10    dri roubes gernde sprünge sin,
Verse: 11    noch süzer dan dem pantier tut sins ruches fin,
Verse: 12    noch süzer dan dem kempfen siges cröne,

Strophe: 19 
Verse: 1    Noch süzer ist der formelicher vröuden tag,
Verse: 2    der dir uz wibes bilde bliczet durch din ougen in dins herzen eigen.

Verse: 3    Wie hochgelobt, wie wunnen rich ein twinclich smac,
Verse: 4    wie gar durchsüzet und durchsenftet und durchliuchtet ist ir lichlich zeigen!

Strophe: 20 
Verse: 1    Wie trutlich zartet spilendiger ougen diez!
Verse: 2    ach, roselechter ummevanc,
Verse: 3    swa munt an munde kusses gert!

Verse: 4    Ei, menlich sin, waz grozer vröuden dir gehiez
Verse: 5    der gotes eben vürgedanc,
Verse: 6    do er uz diner brust dich wert

Strophe: 21 
Verse: 1    So vollic ganz lustlicher ougenweide,
Verse: 2    die uns der hohen engel wol ergetzet.

Verse: 3    Liep unde lust, die han gesworen beide
Verse: 4    zu stricke, swa sich wibes bilde hetzet.

Verse: 5    Meit, wip und vrouwe, ganzer vröuden tempel
Verse: 6    gezirkelt hat sich uf die dri genende.

Verse: 7    Meit sunder schranc ein widerspilnde exempel,
Verse: 8    ein hoch begin der hosten minne brende.

Strophe: 22 
Verse: 1    Wip schribet sich mit drin buchstaben:
Verse: 2    w wunne wil zu diute haben,
Verse: 3    i irdisch in im hat begraben,
Verse: 4    p paradis gesprochen.

Verse: 5    Wol dich der namen immer me,
Verse: 6    wol dich, gebenediter schre,
Verse: 7    dins vruchteclichen brunnen se
Verse: 8    hat manlich leit zerbrochen.

Strophe: 23 
Verse: 1    Wer kan der sorgen siuftic brunst
Verse: 2    erviuchten mit der vröudenrichen wunne regenes vluzze?

Verse: 3    Wer kan des zornes hazzig dunst
Verse: 4    versünen mit der wol gemuten güte segenes duzze?

Verse: 5    Wer kan nach ungemaches bade
Verse: 6    uz senftikeit mit blanken armen süzen twalm erlusten?

Verse: 7    Wer tut uf widermutes phade
Verse: 8    verwunten sin mit linden worten minneclichen justen?

Strophe: 24 
Verse: 1    Wer kan des vrevels & umschaft sweren argen vlins
Verse: 2    erweichen, stillen nit durch zuckerriches wunsches ougenweide?

Verse: 3    Wer kan uz trurekliches herzen grundes zins
Verse: 4    ein smuzlich lachen snüren, tougen zücken liep uz leides vreide?

Strophe: 25 
Verse: 1    Wer kan   werden man   vüren uf der eren plan
Verse: 2    mit gewelbet phellelvarwes mundes kusses bieten?

Verse: 3    Wer treit   sunder weit   aller tugent ganzez kleit?
Verse: 4    wer kan süzen wechsel schenken, ein sich eines nieten?

Strophe: 26 
Verse: 1    Wer himelverbet sinnes ^richen mannes^ mut?
Verse: 2    wer wirfet in des mannes herze minne glut?
Verse: 3    wer zeret & brustlich vroun Minne gut?

Verse: 4    Wer willet man uf mancher hande manlich tat?
Verse: 5    wip, bistuz? ja. wol mich, daz aller vröuden rat
Verse: 6    so volliclichen an dir stat!

Strophe: 27 
Verse: 1    Vrouwe ist ein boum   der vruchteklichen ordenunge,
Verse: 2    mit der blüte vröudenricher süze
Verse: 3    baltlich obez gevromet hat.

Verse: 4    Gepriset soum,   mit sprechendiges lobes zungen
Verse: 5    glanz durchliutert mutlich ernstes blume,
Verse: 6    ach wie trazlich broget din phat!

Strophe: 28 
Verse: 1    Man, du solt prisen vrouwen forme,
Verse: 2    ouch eren nach der alden norme.
Verse: 3    gedenke an hohe vürsten,

Verse: 4    Die sich hie vor durch vrouwen gurten,
Verse: 5    an turnei tjost mit strit behurten:
Verse: 6    sus liez ir ger sich dürsten.

Verse: 7    Da von sie manicvaldez grüzen
Verse: 8    gevlochten mit den worden süzen
Verse: 9    erwurben von den munden.

Verse: 10    Der liebe [ ] smac, der minne künden
Verse: 11    durchvlozzen mit des honiges unden
Verse: 12    noch lit, vrouwe, in den bunden.

Strophe: 29 
Verse: 1    Ich swere, ob mir die volge enget,
Verse: 2    luft, viure, centrum noch daz vret
Verse: 3    nicht hoher dinc besliezen

Verse: 4    Noch edeler vrucht dan vrouwen last.
Verse: 5    swer wart ie minneclicher gast,
Verse: 6    der vröu sich nach dem diezen.

Verse: 7    Mins herzen grunt, mins sinnes kamer,
Verse: 8    min zunge wirke, ob lobes hamer
Verse: 9    ist weich gein der metalle,

Verse: 10    Da vrouwen lop sich wirket abe:
Verse: 11    doch lise ich nach der alden nabe,
Verse: 12    wa lopspise in enphalle.

Strophe: 30 
Verse: 1    Wa lit touwic vriuntlich meie,
Verse: 2    wa lit reiner minne goltgesmide?

Verse: 3    Wa lit triuwer rat, geschreie,
Verse: 4    wa lit züchtic purpur, artic side?

Verse: 5    Wa lit hort der hösten ere,
Verse: 6    wa lit glestic rubin richer güte?

Verse: 7    Wa lit salvei senfter sere,
Verse: 8    wa lit menschlich heil in wernder vlüte?

Strophe: 31 
Verse: 1    Wa lit liep liebes, liep der tougenlicher liebe,
Verse: 2    wa lit die lustlich lust der ho gelobten lüste?

Verse: 3    Wa lit naturlich boum, geblüt gein lobes diebe,
Verse: 4    wa, daz vier ougen zücken herze uz herzen brüste?

Strophe: 32 
Verse: 1    Wa lit aller tugent ein hübisch riche geberinne?
Verse: 2    wa lit daz elementum viur, da sich die jugent mit dem alder werben inne
Verse: 3    zu ere und zu prise und zu hoher minne?

Verse: 4    Wa lit hoffenunge sender herzen, die irret pine?
Verse: 5    wa lit genade und rechter e [ ] geselleschaft, [ ] reine in reinem schine?
Verse: 6    sprich, vroulich truter munt: ʽja, in mins herzen schrine!'

Strophe: 33 
Verse: 1    Sit vrouwen pris solch wirde
Verse: 2    treit in lobes girde
Verse: 3    gepartiret und geschrenket,   gelenket,   gedenket:
Verse: 4    wie gar durchsüzet und geheret

Verse: 5    Waz hat sie dann bespunnen
Verse: 6    unzellicher wunnen
Verse: 7    in erenricher hute   mit vrute,   die gute,
Verse: 8    durch die man alle vrouwen eret!



Next part


This text is part of the TITUS edition of Heinrich von Meissen, Frauenlob.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.