TITUS
Lancelot und Ginover I: Prosalancelot
Part No. 5
Previous part

Page: (18) 
Sentence: 45    geweltiget mich der burg, und ich geb sie uch wiedder off solch rede das ir zuhant werdent myn man und alles uwer lant habent von mir zu lehen.« »Des enthun ich nit«, sprach der konig Ban, »ich wúrd meyneydig wiedder den konig Artus, des man ich bin zu dienst.« »So wil ich uch sagen was ir sollent thun«, sprach konig Claudas, »sendent hinweg zum konig Artus das er uch zu hilff stand in dißen vierczig tagen; und ob er uch nit wil helffen, gebent mir die burgk uff und werdent myn man von uwerm land!
Sentence: 46    So mach ich uch rych von großen lehen.« Da sprach der konig Ban, er wolt sich des beraten und wolt es im antworten des nehsten tages oder enbieten was er da mit thun wolt, eintweder offgeben oder laßen.
Sentence: 47    Da schied der konig Ban dannen, und sin truchses was ein wenig verliben hindann (da Claudas mit im sprachet).
Sentence: 48    Da sprach Claudas zu dem truchses:
Sentence: 49    »Truchses, ich weiß wol das dirre unselig ist und ein unglúckig mensch, wann vom konig Artus gewinnet er nymer hilff und muß alles verliesen mit ungewißem beyten.
Sentence: 50    Nu ist mir vil leyt das ir sint mit solchem man der uch keyn gut mag gethun, wann manch tugent ist mir von uch gesagt, und darumb ratt ich uch das ir mit mir weset; und wißent was ich uch wil thun:
Sentence: 51    ich wil uch geloben mit myner truwe das ich uch wil geben diß rych alles, wann ich es gewinne, und ir solt syn herre alles myns guts.
Sentence: 52    Und muß ich uch vahen mit gewalt, das ist mir leytt, wann ich muß uch vil ungemachs thun, wann ich han es gesworn off den heiligen, wer in dißem urlag mit gewalt wirt gefangen, er werd in behaltniß geleytt da er númmer uß kume, oder er werd erschlagen.« So viel hatten sie zuhauff gerett das der truchseße im sichert zu helffen sin macht, one zu verraten synen herren noch zu verkauffen.
Sentence: 53    Und Claudas sichert im zuhant, als schier als Trebe wúrd gewunnen, das er im das lant wolt offgeben, und er solt wiedder werden syn man.
Sentence: 54    Da schieden sie zwen, und Claudas fur wiedder zu synen luten.
Sentence: 55    Und der truchses fur wiedder zu Trebe und sprach zu dem konig Ban das Claudas vil mit im hett geredet, das er vil gern wer syn frunt.
Sentence: 56    »Was redest du das?« sprach der konig Ban.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.