TITUS
Sachsenspiegel
Part No. 132
Previous part

Chapter: XXXVI 
XXXVI. Weme man keiner hanthaften tat zeien muge. Wi man gut anevangen mag. Wi man weren sal. Wie man sich dar zu zin sal.


Paragraph: 1.     Wer ubir den anderen tag sine dube adir sinen roub under eime manne vindet, der daz offenbare gekouft hat unde unverborgen gehalden hat unde des gezug hat, den en mag man keiner hanthaften tat beschuldigen, ab man die dube wol bi im vindet, her en habe sin recht vor verloren. Itlicher muz wol ane des richters orlop sin gut anevangen mit rechte.
Paragraph: 2.    
Wil abir iener im sin gut weren, er ez vor gerichte kome, so bute her in wider keren vor gerichte. Weigeret her des, so schrie her in daz geruchte an unde grife in an vor sinen diep, alse ab die hanthafte tat dar si, wenne her sich schuldig hat gemachet mit der vlucht. Kumt abir iener von willen vor gerichte, her sal sich undirwinden sines gutes zu rechte.
Paragraph: 3.    
Spricht her abir da weder, ab ez tuch iz, her habe ez lazen wirken, ab ez ein phert iz adir vie, her habe ez in sime stalle gezogen, her muz ez mit merrem rechte behalden, iener der ez in geweren hat, ab herz selbe dritte siner gebure gezugen mag, denne ienir der ez anegevangit hat.
Paragraph: 4.    
Spricht abir ienir, her habe ez gekouft uf dem gemeinen markte, her en wisse wider wen, so ist her der dube unschuldig, daz her de stat bewise unde sinen eit darzu thu. Sine phenninge verluset her abir, die her dar umme gap, unde iener behelt sin gut, daz im verstolen ader geroubit waz, ab her sich dar zu zut uffe den heiligen selbe dritte vulkomener lute an irme rechte, die daz wissen, daz ez im duplich ader rouplich geloset si.
Paragraph: 5.    
Spricht abir iener, ez si im gegeben adir her habe ez gekouft, so muz her benomen sinen geweren, wider den herz gekouft habe, unde die stat, da her ez koufte. Her muz abir sweren, daz herz zie zu rechter zucht. So muz im iener volgen ubir vierzchenacht, wor her zut, ane ubir schifriche wasser. Wirt herz gewert alse recht iz, der gewere muz antworten an sine stat, vor daz gut. Wirt abir im broch an den geweren, her muz daz gut mit gewette unde mit buze lazen, unde ziet man in dube ader roubiz dar an, des muz her sich entschuldigen nach rechte. Verluset ez ouch, der ez geanevanget hat, her muz ez lazen mit buze unde mit gewette.
Paragraph: 6.    
Man muz sich wol zin uf manchen geweren, der eine uffe den anderen, also lange, daz man kome uffe den, der ez in sime stalle gezogen hat, ab ez vie iz, adir der ez selber gezuget habe, ab ez gewant iz.
Paragraph: 7.    
Selbe dritte sal her sich dar zu zin, der ez geanevanget hat, ab ieme bruch wirt an den geweren.
Paragraph: 8.    
Undir deme daz gut geanevanget wirt, der sal daz gut behalden in sinen geweren, biz daz ez im mit rechte abe gewunnen werde.



Next part



This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.