TITUS
Sachsenspiegel
Part No. 150
Previous part

Chapter: LIV 
LIV. Welch vie man muz zuhuz behalden. Wer sunderlichen herten haben moge. Von des herten lone unde von siner verlust. Ab ein vie daz andere lemet adir getret wirt vor deme herten.


Paragraph: 1.     Nimant en sal sin vie zu huse lazen, daz deme hirten gevolgen mag, ane zuwe, die verkil zut, de selben sal man bewaren, daz se nicht en schade.
Paragraph: 2.     Nimant en muz ouch sunderlichen hirten haben, da her deme hirte sin lon mete minre der gemeine, her en habe dri hoven adir me, die sin eigen sin adir sin len, der muz wol sunderlichen schafehirten haben.
Paragraph: 3.     Waz man abir deme hirten lones gelobit von den hoven unde nicht von dem vi, daz lon en muz nimant enthalden durch daz, daz daz dorf nicht hirtelos en blibe.
Paragraph: 4.     Waz man vor den hirten tribit, en brenget herz nicht wider in daz dorf, her muz ez gelden. Waz abir im de wulfe nemen adir die rouber, blibit her ungevangen unde beschriet her sie nicht met deme geruchte, so daz herz gezug haben muge, her muz ez gelden.
Paragraph: 5.     Belemet ein vie daz andere vor deme hirten adir wirt ez getret adir gebissen, unde schuldiget man den hirten dar umme, her muz benumen daz vie, daz den schaden getan hat, unde muz darzu sweren. So sal iener, des daz vie ist, halden daz gewundete vie in siner phlage, biz daz ez zu velde muge gen. Stirbit ez, her sal ez gelden nach sime gesetzten wergelde.
Paragraph: 6.     Beschuldiget man den hirten, daz her ein vi nicht habe zu dorfe bracht, tar her sine unschult dar zu tun, her iz ledig dar abe. Wer abir sines viez vermisset unde zuhant zu dem hirten get unde in dar umme beschuldiget mit orkunde zwier manne, so en mag der hirte da nicht vor sweren. Spricht abir der hirte, daz ez vor in nicht getriben si, daz muz der man baz gezugen mit zwen mannen, die ez sagen, daz man ez in sine hute treip, den ez der hirte unschuldig werden muze.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.