TITUS
Sachsenspiegel
Part No. 279
Previous part

Chapter: XX 
XX. Welch son mit sines vater lene beerbit werde. Von gedinge zu brechene. Ab der herre deme manne mit unrechte entsait. Bischofe gut unde vanlen sal der koning ganz lien.


Paragraph: 1.     Wenne der son nach des vater thode lebet also lange, daz man sine stimme gehoren mag in vier wenden des huses, so ist her beerbet mit sines vater lene unde hat ez entphernet allen den, de ez gedinge dar an hatten. Der sun, der da stirbit er deme vater, der en iz kein lenerbe, wenne her mit keime lene beerbit en iz. Dar umme en bricht her nimande sin gedinge an des vater lene.
Paragraph: 2.     Welcheme manne man sin gut verteilet, ader her ez uf lesit, was im kein gedinge gelegen, des sal her darben mit samet deme gute.
Paragraph: 3.     Wor der son dem vater nicht ebenbortig en ist, des vater man mogen wol mit rechte weigeren, ire gut von im zu entphande, alleine lebe der son nach des vater thode, her entphernet nimande kein gedinge an verlegenem gute sines vater.
Paragraph: 4.     Ab ein herre zu unrechte sinem manne entsaget unde der man deme herren nicht, der man en verluset gedinge noch len damete unde beheldet daz gut ane dinst zu sime libe, mit deme her nicht vorbas volgen en mag.
Paragraph: 5.     Bischofe gut unde vanlen sal der koning ganz lien unde nicht zweigen. Wer ouch von eime vorsten belent ist, der vanlen hat, her en darf daz len von nimande entphan, der vanlenes darbet, alleine sie her ein geboren vorste.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.