TITUS
Sachsenspiegel
Part No. 281
Previous part

Chapter: XXII 
XXII. Binnen welcher zit der son sin gut entphan sal. Wie her thun unde sprechen sal. Ab in der herre zu manne nicht entphan wil. Wenne der manne anderweide sine manschaft biten sal. Wenne der man sine clage vernuwen sal umme sin gut. Ab der herre deme manne but sin gut zu liende.


Paragraph: 1.     Nach des vater thode binnen iar unde tage kome der son zu sime herren unde biete im sine manschaft mit gesammeten henden unde ge im also na, ab der herre stet, daz her in gereichen muge. Sitzt abir der herre, so sal her vor in knien. Sumeliche lute sagen, daz her de hende solle regen kegen deme herren, des en iz doch nicht, wenne alse der man get zu deme herren, da her stet, ader vor in kniet, da her sitzt, so reget sich alle sin lip unde muzen ouch die hende wagen.
Paragraph: 2.     Sus sal der man sprechen, alse her sines gutes sinnet mit gevaldenen henden: »Herre, ich sinne an uch sogetanes gutes, alse ich mit rechte an uch gebracht habe, unde bite uch darumme mine manschaft zume ersten male, zume anderen male unde zume dritten male, unde setze des uwere man zu gezuge.«
Paragraph: 3.     Ab der herre weigeret mit unrechte, daz her in zu manne entpha, der man sal behalden daz gut, dar her sine manschaft umme geboten hat, unde besitzen ane dinst unde en darf nimmer mer des gutes gesinnen, die wile her ez lebende orkunde hat, unde erbet daz gut uf sine kint unde mag da mete vort belenen sine man, wenne her hat mit rechte behalden daz gut, dar im rechtes abe geweigeret waz. Der man en darf nicht anderweide biten sine manschaft, ez en sie, daz im sine gezuge sterben.
Paragraph: 4.     Wor abir dem manne sin gut mit gewalt genomen wirt, der sal sine clage iarlich vernuwen, durch daz her der gewere darbet.
Paragraph: 5.     Biut abir der herre deme manne sin gut, her sal ez alzuhant entphan, ader her versumet sich dar an, wenne der herre bricht ein sine iarzcale mit deme bitene, alse sich der man endet mit deme sinnene.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.