TITUS
Sachsenspiegel
Part No. 308
Previous part

Chapter: L 
L. Ab der herre ader der man uz deme lande vert binnen des mannes iarzal. Wie man die iarzal lengit adir korczet. Ab sich der herre hutet. Stirbit ein man ober mer ader stirbit ein herre unwissentliche sinen mannen, wenne die iarzal an get.


Paragraph: 1.     Ab der herre uz deme lande vert binnen des mannes iarzale, de wile her sin gut entphan sal, daz en schadet deme manne nicht zu sime rechte. Wenne aber der herre weder kumt, so get des mannes iarzale an. Suchet aber der man den herren binnen siner iarzale zu hove ader zu huse ader zu teidingen, nach des daz der herre komen iz, unde en sinnet her noch entphet her sin gut von im nicht, her versumet sich an sime gute. Veret ouch der man uz deme lande binnen siner iarzale, her en lenget siene iarzale da mete nicht.
Paragraph: 2.     Also alse der man sine iarzale lenget, ab her sines gutes sinnet, unde ez im der herre mit unrechte weigeret, also kurtzet se im der herre, ab her im daz gut biut.
Paragraph: 3.     Behelt sich der herre ader besluzit her sich uf einer burg, daz der man nicht zu im komen en kan, ez en schadet deme manne nicht zu sime rechte, ab her ez gezug hat, daz her sinen herren gesucht habe zu hove unde zu huse, da sin uzvart iz unde sin invart, unde manschaft geboten habe umme sin gut ader sin gut uz gezogen habe nach rechte.
Paragraph: 4.     Sterbit ein man obir mer ader anderes wor, alse sine kindere sinen thoit allir erst irvreischen, dar nach get ez an ire iarzale, ire gut zu entphande. Stirbit ouch ienes mannes herre unwißentlich sinen manen, wenne sie sinen tot erst verhoischen, dar get an ire iarczale ir gud zu enpfane.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.