TITUS
Author: Gottfr. 
Gottfried von Straßburg
Book: Trist. 
Tristan


On the basis of the edition by
Rüdiger Krohn,
Stuttgart 1980
entered by Thorsten Parchent
and edited by Ralf Schlechtweg-Jahn,
Bayreuth 1999;
TITUS version by Ralf Schlechtweg-Jahn and Jost Gippert
Bayreuth, 2.12.1999 / Frankfurt, 2.3.2003



Chapter: 1 
1: Prolog


Verse: 1    Gedaehte mans ze guote niht,
Verse: 2    von dem der werlde guot geschiht,

Verse: 3    sô waere ez allez alse niht,
Verse: 4    swaz guotes in der werlde geschiht.

Verse: 5    Der guote man swaz der in guot
Verse: 6    und niwan der werlt ze guote tuot,

Verse: 7    swer daz iht anders wan in guot
Verse: 8    vernemen wil, der missetuot.

Verse: 9    Ich hoere es velschen harte vil,
Verse: 10    daz man doch gerne haben wil:

Verse: 11    dâ ist des lützelen ze vil,
Verse: 12    dâ wil man, des man niene wil.

Verse: 13    Ez zimet dem man ze lobene wol,
Verse: 14    des er iedoch bedürfen sol,

Verse: 15    und lâze ez ime gevallen wol,
Verse: 16    die wîle ez ime gevallen sol.

Verse: 17    Tiure unde wert ist mir der man,
Verse: 18    der guot und übel betrahten kan,

Verse: 19    der mich und iegelîchen man
Verse: 20    nâch sînem werde erkennen kan.

Verse: 21    Êre unde lop diu schepfent list,
Verse: 22    dâ list ze lobe geschaffen ist:

Verse: 23    swâ er mit lobe geblüemet ist,
Verse: 24    dâ blüejet aller slahte list.

Verse: 25    Rehte als daz dinc z' unruoche gât,
Verse: 26    daz lobes noch êre niene hât,

Verse: 27    als liebet daz, daz êre hât
Verse: 28    und sînes lobes niht irre gât.

Verse: 29    Ir ist sô vil, die des nu pflegent,
Verse: 30    daz si daz guote z' übele wegent,

Verse: 31    daz übel wider ze guote wegent:
Verse: 32    die pflegent niht, si widerpflegent.

Verse: 33    Cunst unde nâhe sehender sin
Verse: 34    swie wol diu schînen under in,

Verse: 35    geherberget nît zuo z' in,
Verse: 36    er leschet kunst unde sin.

Verse: 37    Hei tugent, wie smal sint dîne stege,
Verse: 38    wie kumberlîch sint dîne wege!

Verse: 39    die dîne stege, die dîne wege,
Verse: 40    wol ime, der si wege unde stege!

Verse: 41    Trîbe ich die zît vergebene hin,
Verse: 42    sô zîtic ich ze lebene bin,

Verse: 43    sône var ich in der werlt sus hin
Verse: 44    niht sô gewerldet, alse ich bin.

Verse: 45    Ich hân mir eine unmüezekeit
Verse: 46    der werlt ze liebe vür geleit

Verse: 47    und edelen herzen z' einer hage,
Verse: 48    den herzen, den ich herze trage,

Verse: 49    der werlde, in die mîn herze siht.
Verse: 50    ine meine ir aller werlde niht

Verse: 51    als die, von der ich hoere sagen,
Verse: 52    diu keine swaere enmüge getragen

Verse: 53    und niwan in vröuden welle sweben.
Verse: 54    die lâze ouch got mit vröuden leben!

Verse: 55    Der werlde und diseme lebene
Verse: 56    enkumt mîn rede niht ebene.

Verse: 57    ir leben und mînez zweient sich.
Verse: 58    ein ander werlt die meine ich,

Verse: 59    diu samet in eime herzen treit
Verse: 60    ir süeze sûr, ir liebez leit,

Verse: 61    ir herzeliep, ir senede nôt,
Verse: 62    ir liebez leben, ir leiden tôt,

Verse: 63    ir lieben tôt, ir leidez leben.
Verse: 64    dem lebene sî mîn leben ergeben,

Verse: 65    der werlt wil ich gewerldet wesen,
Verse: 66    mit ir verderben oder genesen.

Verse: 67    ich bin mit ir biz her beliben
Verse: 68    und hân mit ir die tage vertriben,

Verse: 69    die mir ûf nâhe gêndem leben
Verse: 70    lêre unde geleite solten geben:

Verse: 71    der hân ich mîne unmüezekeit
Verse: 72    ze kurzewîle vür geleit,

Verse: 73    daz sî mit mînem maere
Verse: 74    ir nâhe gênde swaere

Verse: 75    ze halber senfte bringe,
Verse: 76    ir nôt dâ mite geringe.

Verse: 77    wan swer des iht vor ougen hât,
Verse: 78    dâ mite der muot z' unmuoze gât,

Verse: 79    daz entsorget sorgehaften muot,
Verse: 80    daz ist ze herzesorgen guot.

Verse: 81    ir aller volge diu ist dar an :
Verse: 82    swâ sô der müezege man

Verse: 83    mit senedem schaden sî überladen,
Verse: 84    dâ mêre muoze seneden schaden.

Verse: 85    bî senedem leide müezekeit,
Verse: 86    dâ wahset iemer senede leit.

Verse: 87    durch daz ist guot, swer herzeclage
Verse: 88    und senede nôt ze herzen trage,

Verse: 89    daz er mit allem ruoche
Verse: 90    dem lîbe unmuoze suoche.

Verse: 91    dâ mite sô müezeget der muot
Verse: 92    und ist dem muote ein michel guot;

Verse: 93    und gerâte ich niemer doch dar an,
Verse: 94    daz iemer liebe gernde man

Verse: 95    dekeine solhe unmuoze im neme,
Verse: 96    diu reiner liebe missezeme:

Verse: 97    ein senelîchez maere
Verse: 98    daz trîbe ein senedaere

Verse: 99    mit herzen und mit munde
Verse: 100    und senfte sô die stunde.

Verse: 101    Nû ist aber einer jehe ze vil,
Verse: 102    der ich vil nâch gevolgen wil:

Verse: 103    der senede muot sô der ie mê
Verse: 104    mit seneden maeren umbe gê,

Verse: 105    sô sîner swaere ie mêre sî.
Verse: 106    der selben jehe der stüende ich bî,

Verse: 107    wan ein dinc, daz mir widerstât:
Verse: 108    swer inneclîche liebe hât,

Verse: 109    doch ez im wê von herzen tuo,
Verse: 110    daz herze stêt doch ie dar zuo.

Verse: 111    der inneclîche minnen muot,
Verse: 112    sô der in sîner senegluot

Verse: 113    ie mêre und mêre brinnet,
Verse: 114    sô er ie sêrer minnet.

Verse: 115    diz leit ist liebes alse vol,
Verse: 116    daz übel daz tuot sô herzewol,

Verse: 117    daz es kein edele herze enbirt,
Verse: 118    sît ez hie von geherzet wirt.

Verse: 119    ich weiz es wârez alse den tôt
Verse: 120    und erkenne ez bî der selben nôt:

Verse: 121    der edele senedaere
Verse: 122    der minnet senediu maere.

Verse: 123    von diu swer seneder maere ger,
Verse: 124    der envar niht verrer danne her.

Verse: 125    ich wil in wol bemaeren
Verse: 126    von edelen senedaeren,

Verse: 127    die reiner sene wol tâten schîn:
Verse: 128    ein senedaere unde ein senedaerîn,

Verse: 129    ein man ein wîp, ein wîp ein man,
Verse: 130    Tristan Isolt, Isolt Tristan.

Verse: 131    Ich weiz wol, ir ist vil gewesen,
Verse: 132    die von Tristande hânt gelesen;

Verse: 133    und ist ir doch niht vil gewesen,
Verse: 134    die von im rehte haben gelesen.

Verse: 135    Tuon aber ich diu gelîche nuo
Verse: 136    und schepfe mîniu wort dar zuo,

Verse: 137    daz mir ir iegelîches sage
Verse: 138    von disem maere missehage,

Verse: 139    so wirbe ich anders, danne ich sol.
Verse: 140    ich entuon es niht: sî sprâchen wol

Verse: 141    und niwan ûz edelem muote
Verse: 142    mir unde der werlt ze guote.

Verse: 143    binamen si tâten ez in guot.
Verse: 144    und swaz der man in guot getuot,

Verse: 145    daz ist ouch guot und wol getân.
Verse: 146    aber als ich gesprochen hân,

Verse: 147    daz sî niht rehte haben gelesen,
Verse: 148    daz ist, als ich iu sage, gewesen:

Verse: 149    sîne sprâchen in der rihte niht,
Verse: 150    als Thômas von Britanje giht,

Verse: 151    der âventiure meister was
Verse: 152    und an britûnschen buochen las

Verse: 153    aller der lanthêrren leben
Verse: 154    und ez uns ze künde hât gegeben.

Verse: 155    Als der von Tristande seit,
Verse: 156    die rihte und die wârheit

Verse: 157    begunde ich sêre suochen
Verse: 158    in beider hande buochen

Verse: 159    walschen und latînen
Verse: 160    und begunde mich des pînen,

Verse: 161    daz ich in sîner rihte
Verse: 162    rihte dise tihte.

Verse: 163    sus treip ich manege suoche,
Verse: 164    unz ich an eime buoche

Verse: 165    alle sîne jehe gelas,
Verse: 166    wie dirre âventiure was.

Verse: 167    waz aber mîn lesen dô waere
Verse: 168    von disem senemaere,

Verse: 169    daz lege ich mîner willekür
Verse: 170    allen edelen herzen vür,

Verse: 171    daz sî dâ mite unmüezic wesen.
Verse: 172    ez ist in sêre guot gelesen.

Verse: 173    guot? jâ, inneclîche guot.
Verse: 174    ez liebet liebe und edelet muot,

Verse: 175    ez staetet triuwe und tugendet leben,
Verse: 176    ez kan wol lebene tugende geben;

Verse: 177    wan swâ man hoeret oder list,
Verse: 178    daz von sô reinen triuwen ist,

Verse: 179    dâ liebent dem getriuwen man
Verse: 180    triuwe und ander tugende van:

Verse: 181    liebe, triuwe, staeter muot,
Verse: 182    êre und ander manic guot,

Verse: 183    daz geliebet niemer anderswâ
Verse: 184    sô sêre noch sô wol sô dâ,

Verse: 185    dâ man von herzeliebe saget
Verse: 186    und herzeleit ûz liebe claget.

Verse: 187    liebe ist ein alsô saelic dinc,
Verse: 188    ein alsô saeleclîch gerinc,

Verse: 189    daz nieman âne ir lêre
Verse: 190    noch tugende hât noch êre.

Verse: 191    sô manec wert leben, sô liebe vrumet,
Verse: 192    sô vil sô tugende von ir kumet,

Verse: 193    owê daz allez, daz der lebet,
Verse: 194    nâch herzeliebe niene strebet,

Verse: 195    daz ich sô lützel vinde der,
Verse: 196    die lûterlîche herzeger

Verse: 197    durch vriunt ze herzen wellen tragen
Verse: 198    niwan durch daz vil arme clagen,

Verse: 199    daz hie bî z' etelîcher zît
Verse: 200    verborgen in dem herzen lît!

Verse: 201    War umbe enlite ein edeler muot
Verse: 202    niht gerne ein übel durch tûsent guot,

Verse: 203    durch manege vröude ein ungemach?
Verse: 204    swem nie von liebe leit geschach,

Verse: 205    dem geschach ouch liep von liebe nie.
Verse: 206    liep unde leit diu wâren ie

Verse: 207    an minnen ungescheiden.
Verse: 208    man muoz mit disen beiden

Verse: 209    êre unde lop erwerben
Verse: 210    oder âne sî verderben.

Verse: 211    von den diz senemaere seit,
Verse: 212    und haeten die durch liebe leit,

Verse: 213    durch herzewunne senedez clagen
Verse: 214    in einem herzen niht getragen,

Verse: 215    sone waere ir name und ir geschiht
Verse: 216    sô manegem edelen herzen niht

Verse: 217    ze saelden noch ze liebe komen.
Verse: 218    uns ist noch hiute liep vernomen,

Verse: 219    süeze und iemer niuwe
Verse: 220    ir inneclîchiu triuwe

Verse: 221    ir liep, ir leit, ir wunne, ir nôt;
Verse: 222    al eine und sîn si lange tôt,

Verse: 223    ir süezer name der lebet iedoch
Verse: 224    und sol ir tôt der werlde noch

Verse: 225    ze guote lange und iemer leben,
Verse: 226    den triuwe gernden triuwe geben,

Verse: 227    den êre gernden êre:
Verse: 228    ir tôt muoz iemer mêre

Verse: 229    uns lebenden leben und niuwe wesen;
Verse: 230    wan swâ man noch hoeret lesen

Verse: 231    ir triuwe, ir triuwen reinekeit,
Verse: 232    ir herzeliep, ir herzeleit,

Verse: 233    Deist aller edelen herzen brôt.
Verse: 234    hie mite sô lebet ir beider tôt.

Verse: 235    wir lesen ir leben, wir lesen ir tôt
Verse: 236    und ist uns daz süeze alse brôt.

Verse: 237    Ir leben, ir tôt sint unser brôt.
Verse: 238    sus lebet ir leben, sus lebet ir tôt.

Verse: 239    sus lebent si noch und sint doch tôt
Verse: 240    und ist ir tôt der lebenden brôt.

Verse: 241    Und swer nu ger, daz man im sage
Verse: 242    ir leben, ir tôt, ir vröude, ir clage,

Verse: 243    der biete herze und ôren her:
Verse: 244    er vindet alle sîne ger.





Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.