TITUS
Wirnt von Grafenberg, Wigalois
Part No. 23
Previous part

Verse group: (23) 
Verse: 599    Nu riten die zwên küene man
Verse: 600    mit vil grôzen vreuden dan

Verse: 601    und kômen in ein wilde lant.
Verse: 602    der herre den gürtel abe bant

Verse: 603    als er die vreise vor im sach.
Verse: 604    zem herren Gâwein er dô sprach

Verse: 605    herre und lieber geselle,
Verse: 606    seht ir daz gevelle

Verse: 607    und die steinwende?
Verse: 608    daz ist âne wende

Verse: 609    wirn müezen rîten dar an.
Verse: 610    nu nemt den gürtel den ich hân;

Verse: 611    behalt in unz an iuwern tôt
Verse: 612    und sît sicher vor aller nôt:

Verse: 613    wan daz ir siglôs sît ersehen
Verse: 614    daz ist von sîner kraft geschehen.

Verse: 615    ichn zel mirz ze deheiner vrümicheit,
Verse: 616    wand ir habt grôze manheit

Verse: 617    begangen allez iuwer leben;
Verse: 618    man hât iu ie den prîs gegeben

Verse: 619    an rehter rîterschefte.
Verse: 620    daz mir von mîner krefte

Verse: 621    diu êre sî gevallen hie,
Verse: 622    den gelouben gewan ich nie,

Verse: 623    wan daz ist ie âne wân
Verse: 624    ezn habe der steine kraft getân.

Verse: 625    iun mac nû nimmer missegên;
Verse: 626    ân angest müget ir bestên

Verse: 627    swaz vreise ir in der werlte welt."
Verse: 628    mit triuwen neic im dô der helt;

Verse: 629    der gâbe wart er harte vrô.
Verse: 630    er gnâdet im und gurte dô

Verse: 631    den gürtel under sîn îsengwant.
Verse: 632    dâ von enpfienc er zehant

Verse: 633    vil grôze sterke und manheit.
Verse: 634    ûf den berc er dô reit

Verse: 635    nâch dem herren in ein lant.
Verse: 636    ich wæn ie iemen würde erkant

Verse: 637    ein lant sô vreuden rîche:
Verse: 638    ez bluot allez gelîche,

Verse: 639    bluomen unde boume.
Verse: 640    wie er in einem troume

Verse: 641    wære, des bedûhte in sâ.
Verse: 642    der vogel sanc was michel dâ.

Verse: 643    daz lant gar âne liute was:
Verse: 644    niwan bluomen unde gras

Verse: 645    der was daz gevilde vol.
Verse: 646    diu ougen weide tet im wol.

Verse: 647    swie ichz doch kurzlîche sage,
Verse: 648    si wârn geriten zwelf tage.

Verse: 649    des drîzehenden morgens vruo
Verse: 650    kômen si geriten zuo

Verse: 651    einem wazzer daz was breit.
Verse: 652    der rîter ez zetal reit

Verse: 653    durch einen wünniclichen walt;
Verse: 654    der was ze vreuden wol gestalt

Verse: 655    von loube und von gesange.
Verse: 656    den riten si unlange

Verse: 657    unz er eine strâze vant;
Verse: 658    diu wîste in in sîn ewigen lant.
Verse: 659    die reise hêt er wol bewant.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.