TITUS
Wirnt von Grafenberg, Wigalois
Part No. 26
Previous part

Verse group: (26) 
Verse: 742    Als uns diu âventiure seit,
Verse: 743    sô was diu juncvrouwe gekleit

Verse: 744    nâch ir rehte harte wol,
Verse: 745    als ein edel maget sol.

Verse: 746    sie truoc einen roc wîten,
Verse: 747    von zwein samîten

Verse: 748    gesniten vil gelîche,
Verse: 749    eben unde rîche;

Verse: 750    der eine was grüene alsam ein gras,
Verse: 751    der ander rôter varwe was,

Verse: 752    mit golde wôl gezieret.
Verse: 753    der was gefurrieret

Verse: 754    mit vil grôzem vlîze:
Verse: 755    herme vil wîze

Verse: 756    hêt er bedecket;
Verse: 757    der pelz was gestrecket

Verse: 758    neben dem rocke gelîche.
Verse: 759    gerigen meisterlîche

Verse: 760    ein hemde was dar under;
Verse: 761    des nam den rîter wunder

Verse: 762    daz ez sô rehte lûter was:
Verse: 763    als ein liehtez spiegelglas

Verse: 764    was daz selbe hemde;
Verse: 765    ez dûhte in harte vremde

Verse: 766    daz ez sô kleine mohte sîn;
Verse: 767    ez was wîz sîdîn

Verse: 768    mit guldîner næte.
Verse: 769    ouch gezam vil wol der wæte

Verse: 770    ein gürtel den diu maget truoc;
Verse: 771    daz was ein borte guot genuoc

Verse: 772    von golde und von gesteine,
Verse: 773    grôz unde kleine.

Verse: 774    ûz einem smaragde was,
Verse: 775    rehte grüene alsam ein gras,

Verse: 776    diu rinke wol ergraben,
Verse: 777    von golde ein ar dar ûf erhaben

Verse: 778    mit gesmelze harte wæhe;
Verse: 779    daz werc daz was spæhe.

Verse: 780    daz diu spängel solden sîn
Verse: 781    daz wâren tier guldîn,

Verse: 782    geworht mit grôzem vlîze;
Verse: 783    dâ enzwischen berle wîze

Verse: 784    wâren gestecket.
Verse: 785    sus was er bedecket

Verse: 786    mit edelem gesteine.
Verse: 787    ichn gesach ir nie deheine -

Verse: 788    geworht âne zungen -
Verse: 789    diu sô wol bedrungen

Verse: 790    mit gezierde wære
Verse: 791    als an disem mære.

Verse: 792    ouch was ein edele rubîn
Verse: 793    durch sînen wünniclîchen schîn

Verse: 794    in den gürtel vor geleit;
Verse: 795    als si dehein swachez leit

Verse: 796    truobte in ir gemüete,
Verse: 797    sô benam des steines güete

Verse: 798    mit süezem schîne ir ungemach,
Verse: 799    sô si sîn varwe rehte ersach;
Verse: 800    an tugende was er niht swach.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.