TITUS
Wirnt von Grafenberg, Wigalois
Part No. 40
Previous part

Verse group: (40) 
Verse: 1316    Dô man sîn ernest rehte ersach,
Verse: 1317    sîn muoter, vrouwe Flôrîe, sprach

Verse: 1318    "lieber sun, nu volge mir,
Verse: 1319    wan du erkennest wol daz wir

Verse: 1320    sîn hân gebiten (wol) zweinzic jâr.
Verse: 1321    hie bî mahtu nemen war,

Verse: 1322    als ichz von im hân vernommen,
Verse: 1323    lebter, er wære wider komen.

Verse: 1324    ich erkande sîne triuwe wol;
Verse: 1325    er was ganzer triuwen vol.

Verse: 1326    owê, daz ich in ie erkôs
Verse: 1327    mir ze vriun, sît in verlôs

Verse: 1328    sô wunderlîche, ichn weiz wie.
Verse: 1329    sîn gelîche dern wart nie

Verse: 1330    und wirt ouch nimmer mê geborn.
Verse: 1331    sol ich in alsô hân verlorn,

Verse: 1332    sô muoz ich jâmer unde nôt
Verse: 1333    lîden unz an mînen tôt.

Verse: 1334    herre got, der mägde kint,
Verse: 1335    sît dir diu herze offen sint

Verse: 1336    und alle willen ûf getân,
Verse: 1337    wie hâstu mich alsô verlân!

Verse: 1338    keiser, herre, reiner Krist,
Verse: 1339    sît dir niht verborgen ist

Verse: 1340    und ân dich niht genesen mac,
Verse: 1341    lâ mich geleben noch den tac

Verse: 1342    daz ich gesehe den ich trage
Verse: 1343    in mînem herzen alle tage
Verse: 1344    beidiu mit jâmer und mit klage!"


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.