TITUS
Wirnt von Grafenberg, Wigalois
Part No. 76
Previous part

Verse group: (76) 
Verse: 2603    "Vrouwe", sprach der rîter dô,
Verse: 2604    "sît der rede ist alsô,

Verse: 2605    sô sulen wir mit minnen
Verse: 2606    daz pfärt wider gewinnen

Verse: 2607    und swaz er iu genomen hât."
Verse: 2608    diu vrouwe sprach "die rede lât;

Verse: 2609    irn wæret dan so manhaft
Verse: 2610    daz ir im mit rîterschaft

Verse: 2611    den sic möht behaben an;
Verse: 2612    des hân ich abe deheinen wân,

Verse: 2613    wan niemen lebt bî dirre zît
Verse: 2614    der wider in deheinen strît

Verse: 2615    gehaben müge ân den tôt."
Verse: 2616    der rîter sprach "daz wære ein nôt

Verse: 2617    sold er uns allen an gesigen;
Verse: 2618    ich wil dâ tôt von im geligen,

Verse: 2619    ode er tuot iu, vrouwe, reht.
Verse: 2620    ist er ein sô guot kneht

Verse: 2621    als man iu gesaget hât,
Verse: 2622    ich weiz wol daz er mich bestât.

Verse: 2623    nu rîtet vur und wîset mich dar!"
Verse: 2624    diu vrouwe sprach "nu sagt mir: war?"

Verse: 2625    "hin, dâ die rîter sint."
Verse: 2626    "deiswâr, sô duht ir mich ein kint,

Verse: 2627    unde wolt ir den bestân
Verse: 2628    dem sô manic biderbe man

Verse: 2629    an rîterschaft des prîses jach
Verse: 2630    und als ich selbe an im wol sach.

Verse: 2631    iu ist sîn manheit unkunt."
Verse: 2632    die maget bat er unz an die stunt.

Verse: 2633    swie ez ir doch wære leit,
Verse: 2634    daz ers mit guote des überstreit
Verse: 2635    daz si mit im wider reit.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.