TITUS
Wirnt von Grafenberg, Wigalois
Part No. 88
Previous part

Verse group: (88) 
Verse: 2967    Mit vreuden gie diu naht hin.
Verse: 2968    des andern morgens wâfent in

Verse: 2969    diu künigîn von Persîâ
Verse: 2970    und vil manic vrouwe dâ

Verse: 2971    mit vlize in sîn îsengwant
Verse: 2972    unde vuorten in zehant:

Verse: 2973    dâ er messe vernam,
Verse: 2974    als ez dem helde wol gezam,

Verse: 2975    von den drin genenden.
Verse: 2976    dô si ir bet verenden

Verse: 2977    und messe wart gesungen,
Verse: 2978    die rîter zuo im drungen

Verse: 2979    und trôsten in als einen man
Verse: 2980    dem diu werlt guotes gan.

Verse: 2981    sîn ors wart im gezogen dar;
Verse: 2982    daz was wol bedecket gar

Verse: 2983    mit einer kovertiure,
Verse: 2984    im wart dâ ze stiure.

Verse: 2985    gegeben manic reiner segen.
Verse: 2986    si bâten sîn got alle pflegen

Verse: 2987    beidiu arme und rîche.
Verse: 2988    vil vermezzenlîche

Verse: 2989    spranc er ûf daz ors sîn.
Verse: 2990    den schilt reicht im diu kunigîn,

Verse: 2991    daz sper diu maget wol getân
Verse: 2992    der er gewalt hêt getân

Verse: 2993    mit dem er solde strîten.
Verse: 2994    nu sach er gegen im rîten

Verse: 2995    den selben rîter sâ zehant.
Verse: 2996    der was dâ bî wol bekant:

Verse: 2997    sîn wafen daz was allez rôt;
Verse: 2998    an sînem schilte was der Tôt

Verse: 2999    gemâlet vil griulîche.
Verse: 3000    "wichâ, herre, wîche!"

Verse: 3001    die garzûn alle riefen
Verse: 3002    die dâ vor irn liefen.

Verse: 3003    si wârn siges an im gewon.
Verse: 3004    dô schiet ab in dâ von

Verse: 3005    sîn unreht und sîn hôchvart.
Verse: 3006    ein rinc in gemachet wart

Verse: 3007    daz si zesamne mohten komen,
Verse: 3008    mit nîde wurden dô genomen

Verse: 3009    diu ors beidiu mit den sporn.
Verse: 3010    dâ wart manic sper verlorn

Verse: 3011    in vil kurzen stunden.
Verse: 3012    der rôte hêt dâ vunden

Verse: 3013    alrêrst sînen gestrîten.
Verse: 3014    si begunden vaste rîten

Verse: 3015    beide einander ûf daz leben.
Verse: 3016    dem jungen rîter wart gegeben

Verse: 3017    ein starkez sper in sîne hant.
Verse: 3018    dô kêrte er an den wîgant

Verse: 3019    nâch sînes vater lêre.
Verse: 3020    dône mohter niht mêre

Verse: 3021    gewern vor dem kinde:
Verse: 3022    er stach in alsô swinde

Verse: 3023    von dem orse ûf daz gras
Verse: 3024    daz im der sprâche zerunnen was.

Verse: 3025    daz was im dâ vor nie geschehen.
Verse: 3026    zesamne begundens alle sehen,
Verse: 3027    mit worten im des prîses jehen.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.