TITUS
Wirnt von Grafenberg, Wigalois
Part No. 98
Previous part

Verse group: (98) 
Verse: 3419    Her Gwîgâlois was ein man
Verse: 3420    der nie zagheit gewan

Verse: 3421    noch nie bôsheit begie;
Verse: 3422    sîn herze dâ von vreude vie

Verse: 3423    als im dehein manheit
Verse: 3424    ze tuone wart vür geleit.

Verse: 3425    dô er vernam des rîters muot,
Verse: 3426    das vreute er sich und dûhte in guot,

Verse: 3427    wand er hêt sich des bewegen
Verse: 3428    swes iemen wolde mit im pflegen

Verse: 3429    ze rîterlîcher manheit,
Verse: 3430    dar ûf was sin lîp bereit,

Verse: 3431    wand er ie nâch êren ranc.
Verse: 3432    der rede sagter dem herren danc,

Verse: 3433    wand er wol sach daz sîn muot
Verse: 3434    was ze rîterschefte guot;

Verse: 3435    des wart her Gwîgâlois vil vrô.
Verse: 3436    wider den rîter sprach er dô

Verse: 3437    "herre , welt ir des niht enbern
Verse: 3438    ichn müeze iuch strîtes hie gewern,

Verse: 3439    sô teilt mit mir gelîche:
Verse: 3440    der sper sît ir ze rîche

Verse: 3441    und habt driu schoeniu ros hie
Verse: 3442    und zwelf vrume knappen, die

Verse: 3443    wartent iuwer, daz ist ir reht;
Verse: 3444    sô hân ab ich deheinen kneht,

Verse: 3445    niwan mîn ors und min sper;
Verse: 3446    niht mêr gesindes brâhte ich her

Verse: 3447    noch helfe ze disem strîte;
Verse: 3448    anders ich niht rîte

Verse: 3449    niwan mîn ors den langen tac;
Verse: 3450    dâ von ez niht getûren mac

Verse: 3451    zer selben rîterschefte.
Verse: 3452    ouch hân ich lützel krefte

Verse: 3453    ir seht wol selbe ich bin ein kint."
Verse: 3454    dô sprach der herre "sît iu [nu] sint

Verse: 3455    diu ors und knappen tiure,
Verse: 3456    sô gibe ich iu ze stiure

Verse: 3457    daz beste ors daz ich hân;
Verse: 3458    dar zuo sô sîn iu undertân

Verse: 3459    sehs knappen die ich brâhte her;
Verse: 3460    und nemt vünf und zweinzic sper

Verse: 3461    daz ir des strîtes iht abe gêt."
Verse: 3462    dô erz alsus geteilet hêt,

Verse: 3463    des vreute sich der küene man.
Verse: 3464    sehs knappen hiez er vür sich stân;

Verse: 3465    die tâten im des sicherheit
Verse: 3466    daz im ir dienest wære bereit

Verse: 3467    an dem selben strîte.
Verse: 3468    nu was ez an der zîte

Verse: 3469    das man solde ezzen;
Verse: 3470    desn wart niht vergezzen

Verse: 3471    im engæbe der wirt wirtschaft
Verse: 3472    und alles des die überkraft

Verse: 3473    des er haben mohte,
Verse: 3474    als ez im ze nemen tohte.

Verse: 3475    dar nâch bettet man in
Verse: 3476    under daz gezelt hin

Verse: 3477    beidiu ûf loube und ûf gras;
Verse: 3478    vil manic guot kulter was

Verse: 3479    ûf daz loup gedecket;
Verse: 3480    dar ûf wâren gestrecket

Verse: 3481    vil wîziu lîlachen.
Verse: 3482    die knappen hiez man wachen

Verse: 3483    die naht mit vlîze unz an den tac.
Verse: 3484    ein walt in dâ nâhen lac,

Verse: 3485    dar inne manic nahtegal
Verse: 3486    uobte ir wünniclîchen schal;
Verse: 3487    diu vreude in in daz herze hal.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.