TITUS
Vetus Testamentum graece iuxta LXX interpretes
Part No. 783
Previous part

Chapter: 2 
Verse: 1  ᾽Εγὼ ἄνθος τοῦ πεδίου,
κρίνον τῶν κοιλάδων.
Verse: 2 
῾Ως κρίνον ἐν μέσῳ ἀκανθῶν,
οὕτως ἡ πλησίον μου ἀνὰ μέσον τῶν θυγατέρων.
Verse: 3 
῾Ως μῆλον ἐν τοῖς ξύλοις τοῦ δρυμοῦ,
οὕτως ἀδελϕιδός μου ἀνὰ μέσον τῶν υἱῶν·
ἐν τῇ σκιᾷ αὐτοῦ ἐπεθύμησα καὶ ἐκάθισα,
καὶ καρπὸς αὐτοῦ γλυκὺς ἐν λάρυγγί μου.
Verse: 4 
Εἰσαγάγετέ με εἰς οἶκον τοῦ οἴνου,
τάξατε ἐπ' ἐμὲ ἀγάπην.
Verse: 5 
στηρίσατέ με ἐν ἀμόραις,
στοιβάσατέ με ἐν μήλοις, ὅτι τετρωμένη ἀγάπης ἐγώ.
Verse: 6 
εὐώνυμος αὐτοῦ ὑπὸ τὴν κεϕαλήν μου,
καὶ ἡ δεξιὰ αὐτοῦ περιλήμψεταί με.
Verse: 7 
ὥρκισα ὑμᾶς, θυγατέρες Ιερουσαλημ,
ἐν ταῖς δυνάμεσιν καὶ ἐν ταῖς ἰσχύσεσιν τοῦ ἀγροῦ,
ἐὰν ἐγείρητε καὶ ἐξεγείρητε τὴν ἀγάπην, ἕως οὗ θελήσῃ.
Verse: 8 
Φωνὴ ἀδελϕιδοῦ μου·
ἰδοὺ οὗτος ἥκει πηδῶν ἐπὶ τὰ ὄρη
διαλλόμενος ἐπὶ τοὺς βουνούς.
Verse: 9 
ὅμοιός ἐστιν ἀδελϕιδός μου τῇ δορκάδι
ἢ νεβρῷ ἐλάϕων ἐπὶ τὰ ὄρη Βαιθηλ.
ἰδοὺ οὗτος ἕστηκεν ὀπίσω τοῦ τοίχου ἡμῶν
παρακύπτων διὰ τῶν θυρίδων
ἐκκύπτων διὰ τῶν δικτύων.
Verse: 10 
ἀποκρίνεται ἀδελϕιδός μου καὶ λέγει μοι
᾽Ανάστα ἐλθέ, ἡ πλησίον μου, καλή μου, περιστερά μου,
Verse: 11 
ὅτι ἰδοὺ ὁ χειμὼν παρῆλθεν,
ὁ ὑετὸς ἀπῆλθεν, ἐπορεύθη ἑαυτῷ,
Verse: 12 
τὰ ἄνθη ὤϕθη ἐν τῇ γῇ,
καιρὸς τῆς τομῆς ἔϕθακεν,
ϕωνὴ τοῦ τρυγόνος ἠκούσθη ἐν τῇ γῇ ἡμῶν,
Verse: 13 
ἡ συκῆ ἐξήνεγκεν ὀλύνθους αὐτῆς,
αἱ ἄμπελοι κυπρίζουσιν, ἔδωκαν ὀσμήν.
ἀνάστα ἐλθέ, ἡ πλησίον μου, καλή μου, περιστερά μου,
Verse: 14 
καὶ ἐλθὲ σύ, περιστερά μου ἐν σκέπῃ τῆς πέτρας
ἐχόμενα τοῦ προτειχίσματος,
δεῖξόν μοι τὴν ὄψιν σου
καὶ ἀκούτισόν με τὴν ϕωνήν σου,
ὅτι ἡ ϕωνή σου ἡδεῖα, καὶ ἡ ὄψις σου ὡραία.
Verse: 15 
Πιάσατε ἡμῖν ἀλώπεκας
μικροὺς ἀϕανίζοντας ἀμπελῶνας,
καὶ αἱ ἄμπελοι ἡμῶν κυπρίζουσιν.
Verse: 16 
᾽Αδελϕιδός μου ἐμοί, κἀγὼ αὐτῷ,
ὁ ποιμαίνων ἐν τοῖς κρίνοις,
Verse: 17 
ἕως οὗ διαπνεύσῃ ἡ ἡμέρα καὶ κινηθῶσιν αἱ σκιαί.
ἀπόστρεψον ὁμοιώθητι σύ, ἀδελϕιδέ μου,
τῷ δόρκωνι ἢ νεβρῷ ἐλάϕων
ἐπὶ ὄρη κοιλωμάτων.

Next part



This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.