TITUS
Atharva-Veda-Samhita (Saunaka)
Part No. 484
Previous part

Hymn: 2 
Verse: 1 
Halfverse: a    túbʰyam ágre páry avahant sūryā́ṃ vahatúnā sahá /
Halfverse: c    sá naḥ pátibʰyo jāyā́ṃ dā́ agne prajáyā sahá //1//

Verse: 2 
Halfverse: a    púnaḥ pátnīm agnír adād ā́yuṣā sahá várcasā /
Halfverse: c    dīrgʰā́yur asyā yáḥ pátir jī́vāti śarádaḥ śatám //2//

Verse: 3 
Halfverse: a    sómasya jāyā́ pratʰamáṃ gandʰarvás té 'paraḥ pátiḥ /
Halfverse: c    tr̥tī́yo agníṣ ṭe pátis turī́yas te manuṣyajā́ḥ //3//

Verse: 4 
Halfverse: a    sómo dadad gandʰarvā́ya gandʰarvó dadad agnáye /
Halfverse: c    rayíṃ ca putrā́ṃs cādād agnír máhyam átʰo imā́m //4//

Verse: 5 
Halfverse: a    ā́ vām agant sumatír vājinīvasū ny àśvinā hr̥tsú kā́mā araṃsata /
Halfverse: c    ábʰūtaṃ gopā́ mitʰunā́ śubʰas patī priyā́ aryamṇó dúryām̐ aśīmahi //5//

Verse: 6 
Halfverse: a    sā́ mandasānā́ mánasā śivéna rayíṃ dʰehi sárvavīraṃ vacasyàm /
Halfverse: c    sugáṃ tīrtʰáṃ suprapāṇáṃ śubʰas patī stʰāṇúṃ patʰiṣṭʰā́m ápa durmatíṃ hatam //6//

Verse: 7 
Halfverse: a    yā́ óṣadʰayo yā́ nadyò3 yā́ni kṣétrāṇi yā́ vánā /
Halfverse: c    tā́s tvā vadʰu prajā́vatīṃ pátye rakṣantu rakṣásaḥ //7//

Verse: 8 
Halfverse: a    émáṃ pántʰām arukṣāma sugáṃ svastivā́hanam /
Halfverse: c    yásmin vīró ná ríṣyaty anyéṣāṃ vindáte vásu //8//

Verse: 9 
Halfverse: a    idáṃ sú me naraḥ śr̥ṇuta yáyāśíṣā dáṃpatī vāmám aśnutáḥ /
Halfverse: c    yé gandʰarvā́ apsarásaś ca devī́r eṣú vānaspatyéṣu yé 'dʰi tastʰúḥ /
Halfverse: e    syonā́s te asyaí vadʰvaì bʰavantu mā́ hiṃsiṣur vahatúm uhyámānam //9//

Verse: 10 
Halfverse: a    yé vadʰvàś candráṃ vahatúṃ yákṣmā yanti jánām̐ ánu /
Halfverse: c    púnas tā́n yajñíyā devā́ nayantu yáta ā́gatāḥ //10// {7}

Verse: 11 
Halfverse: a    mā́ vidan paripantʰíno yá āsī́danti dáṃpatī /
Halfverse: c    sugéna durgám átītām ápa drāntv árātayaḥ //11//

Verse: 12 
Halfverse: a    sáṃ kāśayāmi vahatúṃ bráhmaṇā gr̥haír ágʰoreṇa cákṣuṣā mitríyeṇa /
Halfverse: c    paryā́ṇaddʰaṃ viśvárūpaṃ yád ásti syonáṃ pátibʰyaḥ savitā́ tát kr̥ṇotu //12//

Verse: 13 
Halfverse: a    śivā́ nā́rīyám ástam ā́gann imáṃ dʰātā́ lokám asyaí dideśa /
Halfverse: c    tā́m aryamā́ bʰágo aśvínobʰā́ prajā́patiḥ prajáyā vardʰayantu //13//

Verse: 14 
Halfverse: a    ātmanváty urvárā nā́rīyám ā́gan tásyāṃ naro vapata bī́jam asyām /
Halfverse: c    sā́ vaḥ prajā́ṃ janayad vakṣáṇābʰyo bíbʰratī dugdʰám r̥ṣabʰásya rétaḥ //14//

Verse: 15 
Halfverse: a    práti tiṣṭʰa virā́ḍ asi víṣṇur ivehá sarasvati /
Halfverse: c    sínīvāli prá jāyatāṃ bʰágasya sumatā́v asat //15//

Verse: 16 
Halfverse: a    úd va ūrmíḥ śámyā hantv ā́po yóktrāṇi muñcata /
Halfverse: c    mā́duṣkr̥tau vyènasāv agʰnyā́v áśunam ā́ratām //16//

Verse: 17 
Halfverse: a    ágʰoracakṣur ápatigʰnī syonā́ śagmā́ suśévā suyámā gr̥hébʰyaḥ /
Halfverse: c    vīrasū́r devŕ̥kāmā sáṃ tváyaidʰiṣīmahi sumasyámānā //17//

Verse: 18 
Halfverse: a    ádevr̥gʰny ápatigʰnīhaídʰi śivā́ paśúbʰyaḥ suyámā suvárcāḥ /
Halfverse: c    prajā́vatī vīrasū́r devŕ̥kāmā syonémám agníṃ gā́rhapatyaṃ saparya //18//

Verse: 19 
Halfverse: a    út tiṣṭʰetáḥ kím icʰántīdám ā́gā aháṃ tveḍe abʰibʰū́ḥ svā́d gr̥hā́t /
Halfverse: c    śūnyaiṣī́ nirr̥te yā́jagántʰót tiṣṭʰārāte prá pata méhá raṃstʰāḥ //19//

Verse: 20 
Halfverse: a    yadā́ gā́rhapatyam ásaparyait pū́rvam agníṃ vadʰū́r iyám /
Halfverse: c    ádʰā sárasvatyai nāri pitŕ̥bʰyaś ca námas kuru //20// {8}

Verse: 21 
Halfverse: a    śarma vármaitád ā́ harāsyaí nā́ryā upastíre /
Halfverse: c    sínīvāli prá jāyatāṃ bʰágasya sumatā́v asat //21//

Verse: 22 
Halfverse: a    yáṃ bálbajaṃ nyásyatʰa cárma copastr̥ṇītʰána /
Halfverse: c    tád ā́ rohatu suprajā́ yā́ kanyā̀ vindáte pátim //22//

Verse: 23 
Halfverse: a    úpa str̥ṇīhi bálbajam ádʰi cármaṇi róhite /
Halfverse: c    tátropavíśya suprajā́ imám agníṃ saparyatu //23//

Verse: 24 
Halfverse: a    ā́ roha carmópa sīdāgním eṣá devó hanti rákṣāṃsi sárvā /
Halfverse: c    ihá prajā́ṃ janaya pátye asmaí sujyaiṣṭʰyó bʰavat putrás ta eṣáḥ //24//

Verse: 25 
Halfverse: a    ví tiṣṭʰantāṃ mātúr asyā́ upástʰān nā́nārūpāḥ paśávo jā́yamānāḥ /
Halfverse: c    sumaṅgaly úpa sīdemám agníṃ sáṃpatnī práti bʰūṣehá devā́n //25//

Verse: 26 
Halfverse: a    sumaṅgalī́ pratáraṇī gr̥hā́ṇāṃ suśévā pátye śváśurāya śaṃbʰū́ḥ /
Halfverse: c    syonā́ śvaśrvaí prá gr̥hā́n viśemā́n //26//

Verse: 27 
Halfverse: a    syonā́ bʰava śváśurebʰyaḥ syonā́ pátye gr̥hébʰyaḥ /
Halfverse: c    syonā́syai sárvasyai viśé syonā́ puṣṭā́yaiṣāṃ bʰava //27//

Verse: 28 
Halfverse: a    sumaṅgalī́r iyáṃ vadʰū́r imā́ṃ saméta páśyata /
Halfverse: c    saúbʰāgyam asyaí dattvā́ daúrbʰāgyair vipáretana //28//

Verse: 29 
Halfverse: a    yā́ durhā́rdo yuvatáyo yā́ś cehá járatīr ápi /
Halfverse: c    várco nv àsyaí sáṃ dattā́tʰā́staṃ vipáretana //29//

Verse: 30 
Halfverse: a    rukmáprastaraṇaṃ vahyáṃ víśvā rūpā́ṇi bíbʰratam /
Halfverse: c    ā́rohat sūryā́ sāvitrī́ br̥haté saúbʰagāya kám //30// {9}

Verse: 31 
Halfverse: a    ā́ roha tálpaṃ sumanasyámānehá prajā́ṃ janaya pátye asmaí /
Halfverse: c    indrāṇī́va subúdʰā búdʰyamānā jyótiragrā uṣásaḥ práti jāgarāsi //31//

Verse: 32 
Halfverse: a    devā́ agre ny àpadyanta pátnīḥ sám aspr̥śanta tanvàs tanū́bʰiḥ /
Halfverse: c    sūryéva nāri viśvárūpā mahitvā́ prajā́vatī pátyā sáṃ bʰavehá //32//

Verse: 33 
Halfverse: a    út tiṣṭʰetó viśvāvaso námaseḍāmahe tvā /
Halfverse: c    jāmím icʰa pitr̥ṣádaṃ nyàktāṃ sá te bʰāgó janúṣā tásya viddʰi //33//

Verse: 34 
Halfverse: a    apsarásaḥ sadʰamādaṃ madanti havirdʰā́nam antarā́ sū́ryaṃ ca /
Halfverse: c    tā́s te janítram abʰí tā́ḥ párehi námas te gandʰarvartúnā kr̥ṇomi //34//

Verse: 35 
Halfverse: a    námo gandʰarvásya námase námo bʰā́māya cákṣuṣe ca kr̥ṇmaḥ /
Halfverse: c    víśvāvaso bráhmaṇā te námo 'bʰí jāyā́ apsarásaḥ párehi //35//

Verse: 36 
Halfverse: a    rāyā́ vayáṃ sumánasaḥ syāmód itó gandʰarvám ā́vīvr̥tāma /
Halfverse: c    ágant sá deváḥ paramáṃ sadʰástʰam áganma yátra pratiránta ā́yuḥ //36//

Verse: 37 
Halfverse: a    sáṃ pitarāv ŕ̥tviye sr̥jetʰāṃ mātā́ pitā́ ca rétaso bʰavātʰaḥ /
Halfverse: c    márya iva yóṣām ádʰi rohayaināṃ prajā́ṃ kr̥ṇvātʰām ihá puṣyataṃ rayím //37//

Verse: 38 
Halfverse: a    tā́ṃ pūṣaṃ cʰivátamām érayasva yásyāṃ bī́jaṃ manuṣyā̀3 vápanti /
Halfverse: c    yā́ na ūrū́ uśatī́ viśráyāti yásyām uśántaḥ prahárema śépaḥ //38//

Verse: 39 
Halfverse: a    ā́ rohorúm úpa dʰatsva hástaṃ pári ṣvajasva jāyā́ṃ sumanasyámānaḥ /
Halfverse: c    prajā́ṃ kr̥ṇvātʰām ihá módamānau dīrgʰáṃ vām ā́yuḥ savitā́ kr̥ṇotu //39//

Verse: 40 
Halfverse: a    ā́ vāṃ prajā́ṃ janayatu prajā́patir ahorātrā́bʰyāṃ sám anaktv aryamā́ /
Halfverse: c    ádurmaṅgalī patilokám ā́ viśemáṃ śáṃ no bʰava dvipáde śáṃ cátuṣpade //40// {10}

Verse: 41 
Halfverse: a    devaír dattáṃ mánunā sākám etád vā́dʰūyaṃ vā́so vadʰvàś ca vástram /
Halfverse: c    yó brahmáṇe cikitúṣe dádāti sá íd rákṣāṃsi tálpāni hanti //41//

Verse: 42 
Halfverse: a    yáṃ me dattó brahmabʰāgáṃ vadʰūyór vā́dʰūyaṃ vā́so vadʰvàś ca vástram /
Halfverse: c    yuváṃ brahmáṇe 'numányamānau bŕ̥haspate sākám índraś ca dattám //42//

Verse: 43 
Halfverse: a    syonā́d yóner ádʰi bádʰyamānau hasāmudaú máhasā módamānau /
Halfverse: c    sugū́ suputraú sugr̥haú tarātʰo jīvā́v uṣáso vibʰātī́ḥ //43//

Verse: 44 
Halfverse: a    návaṃ vásānaḥ surabʰíḥ suvā́sā udā́gāṃ jīvá uṣáso vibʰātī́ḥ /
Halfverse: c    āṇḍā́t patatrī́vāmukṣi víśvasmād énasas pári //44//

Verse: 45 
Halfverse: a    śúmbʰanī dyā́vāpr̥tʰivī́ ántisumne máhivrate /
Halfverse: c    ā́paḥ saptá susruvur devī́s tā́ no muñcantv áṃhasaḥ //45//

Verse: 46 
Halfverse: a    sūryā́yai devébʰyo mitrā́ya váruṇāya ca /
Halfverse: c    yé bʰūtásya prácetasas tébʰya idám akaraṃ námaḥ //46//

Verse: 47 
Halfverse: a    yá r̥té cid abʰiśríṣaḥ purā́ jatrúbʰya ātŕ̥daḥ /
Halfverse: c    sáṃdʰātā saṃdʰíṃ magʰávā purūvásur níṣkartā víhrutaṃ púnaḥ //47//

Verse: 48 
Halfverse: a    ápāsmát táma ucʰatu nī́laṃ piśáṅgam utá lóhitaṃ yát /
Halfverse: c    nirdahanī́ yā́ pr̥ṣātaky àsmín tā́ṃ stʰāṇā́v ádʰy ā́ sajāmi //48//

Verse: 49 
Halfverse: a    yā́vatīḥ kr̥tyā́ upavā́sane yā́vanto rā́jño váruṇasya pā́śāḥ /
Halfverse: c    vyr̥̀ddʰayo yā́ ásamr̥ddʰayo yā́ asmín tā́ stʰāṇā́v ádʰi sādayāmi //49//

Verse: 50 
Halfverse: a    yā́ me priyátamā tanū́ḥ sā́ me bibʰāya vā́sasaḥ /
Halfverse: c    tásyā́gre tváṃ vanaspate nīvíṃ kr̥ṇuṣva mā́ vayáṃ riṣāma //50// {11}

Verse: 51 
Halfverse: a    yé ántā yā́vatīḥ síco yá ótavo yé ca tántavaḥ /
Halfverse: c    vā́so yát pátnībʰir utáṃ tán na syonám úpa spr̥śāt //51//

Verse: 52 
Halfverse: a    uśatī́ḥ kanyálā imā́ḥ pitr̥lokā́t pátiṃ yatī́ḥ /
Halfverse: c    áva dīkṣā́m asr̥kṣata svā́hā //52//

Verse: 53 
Halfverse: a    bŕ̥haspátinā́vasr̥ṣṭāṃ víśve devā́ adʰārayan /
Halfverse: c    várco góṣu práviṣṭaṃ yát ténemā́ṃ sáṃ sr̥jāmasi //53//

Verse: 54 
Halfverse: a    bŕ̥haspátinā́vasr̥ṣṭāṃ víśve devā́ adʰārayan /
Halfverse: c    téjo góṣu práviṣṭaṃ yát ténemā́ṃ sáṃ sr̥jāmasi //54//

Verse: 55 
Halfverse: a    bŕ̥haspátinā́vasr̥ṣṭāṃ víśve devā́ adʰārayan /
Halfverse: c    bʰájo góṣu práviṣṭo yás ténemā́ṃ sáṃ sr̥jāmasi //55//

Verse: 56 
Halfverse: a    bŕ̥haspátinā́vasr̥ṣṭāṃ víśve devā́ adʰārayan /
Halfverse: c    yáśo góṣu práviṣṭaṃ yát ténemā́ṃ sáṃ sr̥jāmasi //56//

Verse: 57 
Halfverse: a    bŕ̥haspátinā́vasr̥ṣṭāṃ víśve devā́ adʰārayan /
Halfverse: c    páyo góṣu práviṣṭaṃ yát ténemā́ṃ sáṃ sr̥jāmasi //57//

Verse: 58 
Halfverse: a    bŕ̥haspátinā́vasr̥ṣṭāṃ víśve devā́ adʰārayan /
Halfverse: c    ráso góṣu práviṣṭo yás ténemā́ṃ sáṃ sr̥jāmasi //58//

Verse: 59 
Halfverse: a    yádīmé keśíno jánā gr̥hé te samánartiṣū ródena kr̥ṇvánto 'gʰám /
Halfverse: c    agníṣ ṭvā tásmād énasaḥ savitā́ ca prá muñcatām //59//

Verse: 60 
Halfverse: a    yádīyáṃ duhitā́ táva vikeśy árudad gr̥hé ródena kr̥ṇvaty agʰám /
Halfverse: c    agníṣ ṭvā tásmād énasaḥ savitā́ ca prá muñcatām //60// {12}

Verse: 61 
Halfverse: a    yáj jāmáyo yád yuvatáyo gr̥hé te samánartiṣū ródena kr̥ṇvatī́r agʰám /
Halfverse: c    agníṣ ṭvā tásmād énasaḥ savitā́ ca prá muñcatām //61//

Verse: 62 
Halfverse: a    yát te prajā́yāṃ paśúṣu yád vā gr̥héṣu níṣṭʰitam agʰakŕ̥dbʰir agʰáṃ kr̥tám /
Halfverse: c    agníṣ ṭvā tásmād énasaḥ savitā́ ca prá muñcatām //62//

Verse: 63 
Halfverse: a    iyáṃ nā́ry úpa brūte pū́lyāny āvapantikā́ /
Halfverse: c    dīrgʰā́yur astu me pátir jī́vāti śarádaḥ śatám //63//

Verse: 64 
Halfverse: a    ihémā́v indra sáṃ nuda cakravākéva dáṃpatī /
Halfverse: c    prajáyainau svastakaú víśvam ā́yur vy àśnutām //64//

Verse: 65 
Halfverse: a    yád āsandyā́m upadʰā́ne yád vopavā́sane kr̥tám /
Halfverse: c    vivāhé kr̥tyā́ṃ yā́ṃ cakrúr āsnā́ne tā́ṃ ní dadʰmasi //65//

Verse: 66 
Halfverse: a    yád duṣkr̥táṃ yác cʰámalaṃ vivāhé vahataú ca yát /
Halfverse: c    tát saṃbʰalásya kambalé mr̥jmáhe duritáṃ vayám //66//

Verse: 67 
Halfverse: a    saṃbʰalé málaṃ sādayitvā́ kambalé duritáṃ vayám /
Halfverse: c    ábʰūma yajñíyāḥ śuddʰā́ḥ prá ṇa ā́yūṃṣi tāriṣat //67//

Verse: 68 
Halfverse: a    kr̥trímaḥ káṇṭakaḥ śatádan yá eṣáḥ /
Halfverse: c    ápāsyā́ḥ kéśyaṃ málam ápa śīrṣaṇyàṃ likʰāt //68//

Verse: 69 
Halfverse: a    áṅgādaṅgād vayám asyā́ ápa yákṣmaṃ ní dadʰmasi /
Halfverse: c    tán mā́ prā́pat pr̥tʰivī́ṃ mótá devā́n dívaṃ mā́ prā́pad urv àntárikṣam /
Halfverse: e    apó mā́ prā́pan málam etád agne yamám mā́ prā́pat pitŕ̥̄ṃś ca sárvān //69//

Verse: 70 
Halfverse: a    sáṃ tvā nahyāmi páyasā pr̥tʰivyā́ḥ sáṃ tvā nahyāmi páyasaúṣadʰīnām /
Halfverse: c    sáṃ tvā nahyāmi prajáyā dʰánena sā́ sáṃnaddʰā sanuhi vā́jam émám //70// {13}

Verse: 71 
Halfverse: a    ámo 'hám asmi sā́ tvaṃ sā́māhám asmy ŕ̥k tváṃ dyaúr aháṃ pr̥tʰivī́ tvam /
Halfverse: c    tā́v ihá sáṃ bʰavāva prajā́m ā́ janayāvahai //71//

Verse: 72 
Halfverse: a    janiyánti nāv ágravaḥ putriyánti sudā́navaḥ /
Halfverse: c    áriṣṭāsū sacevahi br̥haté vā́jasātaye //72//

Verse: 73 
Halfverse: a    yé pitáro vadʰūdarśā́ imáṃ vahatúm ā́gaman /
Halfverse: c    té asyaí vadʰvaì sáṃpatnyai prajā́vac cʰárma yacʰantu //73//

Verse: 74 
Halfverse: a    yédáṃ pū́rvā́gan raśanāyámānā prajā́m asyaí dráviṇaṃ cehá dattvā́ /
Halfverse: c    tā́ṃ vahantv ágatasyā́nu pántʰāṃ virā́ḍ iyáṃ suprajā́ áty ajaiṣīt //74//

Verse: 75 
Halfverse: a    prá budʰyasva subúdʰā búdʰyamānā dīrgʰāyutvā́ya śatáśāradāya /
Halfverse: c    gr̥hā́n gacʰa gr̥hápatnī yátʰā́so dīrgʰáṃ ta ā́yuḥ savitā́ kr̥ṇotu //75// {14}



Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.