TITUS
Rg-Veda: Aitareya-Brahmana
Part No. 61
Previous part

Paragraph: 31 


Sentence: 1    devā vai yad eva yajñe 'kurvaṃs tad asurā akurvaṃs,
   te samāvadvīryā evāsan na vyāvartanta.
   tato vai devā etaṃ tūṣṇīṃśaṃsam apaśyaṃs, tam eṣām asurā nānvavāyaṃs.
   tūṣṇīṃsāro vā eṣa yat tūṣṇīṃśaṃso
Sentence: 2    devā vai yaṃ-yam eva vajram asurebʰya udayacʰaṃs,
   taṃ-tam eṣām asurāḥ pratyabudʰyanta.
   tato vai devā etaṃ tūṣṇīṃśaṃsaṃ vajram apaśyaṃs, tam ebʰya udayacʰaṃs,
   tam eṣām asurā na pratyabudʰyanta. tam ebʰyaḥ prāharaṃs,
   tenainān apratibuddʰenāgʰnaṃs. tato vai devā abʰavan, parāsurā
Sentence: 3    bʰavaty ātmanā, parāsya dviṣan pāpmā bʰrātr̥vyo bʰavati, ya evaṃ veda
Sentence: 4    te vai devā vijitino manyamānā yajñam atanvata, tam eṣām asurā abʰyāyan:
   yajñaveśasam eṣāṃ kariṣyāma iti.
   tān samantam evodārān pariyattān udapaśyaṃs, te 'bruvan:
   saṃstʰāpayāmemaṃ yajñaṃ, yajñaṃ no 'surā mā vadʰiṣur iti. tatʰeti.
   taṃ tūṣṇīṃśaṃse saṃstʰāpayan:
   bʰūr Agnir jyotir jyotir Agnir ity ājyapraüge saṃstʰāpayann:
   Indro jyotir bʰuvo jyotir Indra iti niṣkevalyamarutvatīye saṃstʰāpayan:
   Sūryo jyotir jyotiḥ svaḥ Sūrya iti vaiśvadevāgnimārute saṃstʰāpayaṃs.
   tam evaṃ tūṣṇīṃśaṃse saṃstʰāpayaṃs,
   tam evaṃ tūṣṇīṃśaṃse saṃstʰāpya tenāriṣṭenodr̥cam āśnuvata
Sentence: 5    sa tadā vāva yajñaḥ saṃtiṣṭhate, yadā hotā tūṣṇīṃśaṃsaṃ śaṃsati
Sentence: 6    sa ya enaṃ śaste tūṣṇīṃśaṃsa upa vā vaded anu vā vyāharet, tam brūyād:
   eṣa evaitām ārtim āriṣyati.
   prātar vāva vayam adyemaṃ śaste tūṣṇīṃśaṃse saṃstʰāpayāmas.
   taṃ yatʰā gr̥hān itaṃ karmaṇānusamiyād, evam evainam idam anusamima iti.
   so ha vāva tām ārtim r̥cʰati,
   ya evaṃ vidvān saṃśaste tūṣṇīṃśaṃsa upa vā vadaty anu vā vyāharati.
   tasmād evaṃ vidvān saṃśaste tūṣṇīṃśaṃse nopavaden, nānuvyāharet



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.