TITUS
Rg-Veda: Aitareya-Brahmana
Part No. 159
Previous part

Paragraph: 6 
adʰyāya 22, kʰaṇḍaḥ 1-10


Sentence: 1    gaur vai devatā pañcamam ahar vahati,
   triṇavah stomaḥ śākvaraṃ sāma pāṅktiś cʰando.
   yatʰādevatam enena yatʰāstomaṃ yatʰāsāma yatʰācʰandasaṃ rādʰnoti
   ya evaṃ veda
Sentence: 2    yad vai neti na preti yat stʰitaṃ, tat pañcamasyāhno rūpaṃ
Sentence: 3    yad dʰy eva dvitīyam ahas tad etat punar yat pañcamaṃ
Sentence: 4    yad ūrdʰvavad yat prativad yad antarvad yad vr̥ṣaṇvad yad vr̥dʰanvad,
   yan madʰyame pade devatā nirucyate, yad antarikṣam abʰyuditaṃ
Sentence: 5    yad dugdʰavad yad ūdʰavad yad dʰenumad yat pr̥śnimad
   yan madvad yat paśurūpaṃ yad adʰyāsavad
   - vikṣudrā iva hi paśavo - yaj jāgataṃ - jāgatā hi paśavo
   - yad bārhatam - bārhatā hi paśāvo - yat pāṅktam
   - pāṅktā hi paśavo - yad vāmaṃ - vāmam hi paśavo
   - yad dʰaviṣmad - dʰavir hi paśavo - yad vapuṣmad - vapur hi paśavo
   - yac cʰākvaraṃ yat pāṅktaṃ yat kurvad yad dvitīyasyāhno rūpam:
   etāni vai pañcamasyāhno rūpāṇī/mam
Sentence: 6    ū ṣu vo atitʰim uṣarbudʰam iti pañcamasyāhna ājyam bʰavati
   jāgatam adʰyāsavat paśurūpam pañcame 'hani pañcamasyāhno rūpam
Sentence: 7    ā no yajñaṃ divispr̥śam, ā no vāyo mahe tane, ratʰena pr̥tʰupājasā,
   bahavaḥ sūracakṣasa, imā u vāṃ diviṣṭayaḥ, pibā sutasya rasino,
   devaṃ-devaṃ vo 'vase devaṃ-devam, br̥had u gāyiṣe vaca iti
   bārhatam praügam pañcame 'hani pañcamasyāhno rūpam
Sentence: 8    yat pāñcajanyayā viśeti marutvatīyasya pratipat,
   pāñcajanyayeti pañcame 'hani pañcamasyāhno rūpam
Sentence: 9    indra it somapā eka, indra nedīya ed ihy, ut tiṣṭha brahmaṇas pate,
   'gnir netā, tvaṃ soma kratubʰiḥ, pinvanty apo,
   br̥had indrāya gāyateti dvitīyenāhnā samāna ātānaḥ pañcame
   'hani pañcamasyāhno rūpam
Sentence: 10    avitāsi sunvato vr̥ktabarhiṣa iti
   sūktam madvat pāṅktam pañcapadam pañcame 'hani pañcamasyāhno rūpam
Sentence: 11    ittʰa hi soma in mada iti
   sūktam madvat pāṅktam pañcapadam pañcame 'hani pañcamasyāhno rūpam
Sentence: 12    indra piba tubʰyaṃ suto madāyeti sūktam madvat traiṣṭubʰaṃ.
   tena pratiṣṭhitapadena savanaṃ dādʰārāyatanād evaitena na pracyavate
Sentence: 13    marutvām̐ indra mīḍhva iti paryāso.
   neti na preti pañcame 'hani pañcamasyāhno rūpaṃ
Sentence: 14    tā u gāyatryo.
   gāyatryo vā etasya tryahasya madʰyaṃdinaṃ vahanti.
   tad vai tac cʰando vahati yasmin nivid dʰīyate.
   tasmād gāyatrīṣu nividaṃ dadʰāti



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.