TITUS
Rg-Veda: Aitareya-Brahmana
Part No. 196
Previous part

Paragraph: 9 
adʰyāya 28, kʰaṇḍaḥ 1-8


Sentence: 1    ā tvā vahantu haraya iti prātaḥsavana unnīyamānebʰyo 'nvāha
   
vr̥ṣaṇvatīḥ pītavatīḥ sutavatīr madvatī rūpasamr̥ddʰā
Sentence: 2    
aindrīr anvāhaindro vai yajño
Sentence: 3    
gāyatrīr anvāha, gāyatraṃ vai prātaḥsavanaṃ
Sentence: 4    
nava nyūnāḥ prātaḥsavane 'nvāha, nyūne vai retaḥ sicyate
Sentence: 5    
daśa madʰyaṃdine 'nvāha,
   
nyūne vai retaḥ siktam madʰyaṃ striyai prāpya stʰaviṣṭham bʰavati
Sentence: 6    
nava nyūnās tr̥tīyasavane 'nvāha, nyūnād vai prajāḥ prajāyante
Sentence: 7    
tad yad etāni kevalasūktāny anvāha,
   
yajamānam eva tad garbʰam bʰūtam prajanayati yajñād devayonyai
Sentence: 8    
te haike sapta-saptānvāhuḥ sapta prātaḥsavane sapta mādʰyaṃdine
   
sapta tr̥tīyasavane:
   
yāvatyo vai puronuvākyās tāvatyo yājyāḥ,
   
sapta vai prāñco yajanti sapta vaṣaṭkurvanti,
   
tāsām etāḥ puronnvākyā iti vadantas
Sentence: 9    
tat tatʰā na kuryād.
   
yajamānasya ha te reto vilumpanty atʰo yajamānam eva,
   
yajamāno hi sūktaṃ
Sentence: 10    
navabʰir vā etam maitrāvaruṇo 'smāl lokād antarikṣalokam abʰi pravahati,
   
daśabʰir antarikṣalokād amuṃ lokam abʰy -- antarikṣaloko hi jyeṣṭho --
   
navabʰir amuṣmāl lokāt svargaṃ lokam abʰi
Sentence: 11    
na ha vai te yajamānāṃ svargaṃ lokam abʰi voḷhum arhanti
   
ye sapta-saptānvāhus
Sentence: 12    
tasmāt kevalaśa eva sūktāny anubrūyāt



Next part



This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.