TITUS
Rg-Veda: Rg-Veda-Samhita
Part No. 725
Previous part

Hymn: 2_(714) 
Verse: 1 
Halfverse: a    pávasva devavī́r áti pavítraṃ soma ráṃhyā /
   pávasva devavī́r áti
   pávasva devavī́ḥ áti
   pávasva devavī́r áti

Halfverse: b    pavítraṃ soma ráṃhyā /
   pavítram soma ráṃhyā /
   pavítraṃ soma ráṃhiyā /

Halfverse: c    índram indo vŕ̥ṣā́ viśa //
   índram indo vŕ̥ṣā́ viśa //
   índram indo vŕ̥ṣā ā́ viśa //
   índram indo vŕ̥ṣā́ viśa //


Verse: 2 
Halfverse: a    ā́ vacyasva máhi psáro vŕ̥ṣendo dyumnávattamaḥ /
   ā́ vacyasva máhi psáro
   ā́ vacyasva máhi psáraḥ
   ā́ vacyasva máhi psáro

Halfverse: b    vŕ̥ṣendo dyumnávattamaḥ /
   vŕ̥ṣā indo dyumnávattamaḥ /
   vŕ̥ṣendo dyumnávattamaḥ /

Halfverse: c    ā́ yóniṃ dʰarṇasíḥ sadaḥ //
   ā́ yóniṃ dʰarṇasíḥ sadaḥ //
   ā́ yónim dʰarṇasíḥ sadaḥ //
   ā́ yóniṃ dʰarṇasíḥ sadaḥ //


Verse: 3 
Halfverse: a    ádʰukṣata priyám mádʰu dʰā́rā sutásya vedʰásaḥ /
   ádʰukṣata priyám mádʰu
   ádʰukṣata priyám mádʰu
   ádʰukṣata priyám mádʰu

Halfverse: b    dʰā́rā sutásya vedʰásaḥ /
   dʰā́rā sutásya vedʰásaḥ /
   dʰā́rā sutásya vedʰásaḥ /

Halfverse: c    apó vasiṣṭa sukrátuḥ //
   apó vasiṣṭa sukrátuḥ //
   apáḥ vasiṣṭa sukrátuḥ //
   apó vasiṣṭa sukrátuḥ //


Verse: 4 
Halfverse: a    mahā́ntaṃ tvā mahī́r ánv ā́po arṣanti síndʰavaḥ /
   mahā́ntaṃ tvā mahī́r ánv
   mahā́ntam tvā mahī́ḥ ánu
   mahā́ntaṃ tvā mahī́r ánu

Halfverse: b    ā́po arṣanti síndʰavaḥ /
   ā́paḥ arṣanti síndʰavaḥ /
   ā́po arṣanti síndʰavaḥ /

Halfverse: c    yád góbʰir vāsayiṣyáse //
   yád góbʰir vāsayiṣyáse //
   yát góbʰiḥ vāsayiṣyáse //
   yád góbʰir vāsayiṣyáse //


Verse: 5 
Halfverse: a    samudró apsú māmr̥je viṣṭambʰó dʰarúṇo diváḥ /
   samudró apsú māmr̥je
   samudráḥ apsú māmr̥je
   samudró apsú māmr̥je

Halfverse: b    viṣṭambʰó dʰarúṇo diváḥ /
   viṣṭambʰáḥ dʰarúṇaḥ diváḥ /
   viṣṭambʰó dʰarúṇo diváḥ /

Halfverse: c    sómaḥ pavítre asmayúḥ //
   sómaḥ pavítre asmayúḥ //
   sómaḥ pavítre asmayúḥ //
   sómaḥ pavítre asmayúḥ //


Verse: 6 
Halfverse: a    ácikradad vŕ̥ṣā hárir mahā́n mitró ná darśatáḥ /
   ácikradad vŕ̥ṣā hárir
   ácikradat vŕ̥ṣā háriḥ
   ácikradad vŕ̥ṣā hárir

Halfverse: b    mahā́n mitró ná darśatáḥ /
   mahā́n mitráḥ ná darśatáḥ /
   mahā́n mitró ná darśatáḥ /

Halfverse: c    sáṃ sū́ryeṇa rocate //
   sáṃ sū́ryeṇa rocate //
   sám sū́ryeṇa rocate //
   sáṃ sū́riyeṇa rocate //


Verse: 7 
Halfverse: a    gíras ta inda ójasā marmr̥jyánte apasyúvaḥ /
   gíras ta inda ójasā
   gíraḥ te indo ójasā
   gíras ta inda ójasā

Halfverse: b    marmr̥jyánte apasyúvaḥ /
   marmr̥jyánte apasyúvaḥ /
   marmr̥jyánte apasyúvaḥ /

Halfverse: c    yā́bʰir mádāya śúmbʰase //
   yā́bʰir mádāya śúmbʰase //
   yā́bʰiḥ mádāya śúmbʰase //
   yā́bʰir mádāya śúmbʰase //


Verse: 8 
Halfverse: a    táṃ tvā mádāya gʰŕ̥ṣvaya ulokakr̥tnúm īmahe /
   táṃ tvā mádāya gʰŕ̥ṣvaya
   tám tvā mádāya gʰŕ̥ṣvaye
   táṃ tvā mádāya gʰŕ̥ṣvaya

Halfverse: b    ulokakr̥tnúm \!\ īmahe /
   ulokakr̥tnúm ! īmahe /
   ulokakr̥tnúm īmahe /

Halfverse: c    táva práśastayo mahī́ḥ //
   táva práśastayo mahī́ḥ //
   táva práśastayaḥ mahī́ḥ //
   táva práśastayo mahī́ḥ //


Verse: 9 
Halfverse: a    asmábʰyam indav indrayúr mádʰvaḥ pavasva dʰā́rayā /
   asmábʰyam indav indrayúr
   asmábʰyam indo indrayúḥ
   asmábʰyam indav indrayúr

Halfverse: b    mádʰvaḥ pavasva dʰā́rayā /
   mádʰvaḥ pavasva dʰā́rayā /
   mádʰvaḥ pavasva dʰā́rayā /

Halfverse: c    parjányo vr̥ṣṭimā́m̐ iva //
   parjányo vr̥ṣṭimā́m̐ iva //
   parjányaḥ vr̥ṣṭimā́n iva //
   parjányo vr̥ṣṭimā́m̐ iva //


Verse: 10 
Halfverse: a    goṣā́ indo nr̥ṣā́ asy aśvasā́ vājasā́ utá /
   goṣā́ indo nr̥ṣā́ asy
   goṣā́ḥ indo nr̥ṣā́ḥ asi
   goṣā́ indo nr̥ṣā́ asi

Halfverse: b    aśvasā́ vājasā́ utá /
   aśvasā́ḥ vājasā́ḥ utá /
   aśvasā́ vājasā́ utá /

Halfverse: c    ātmā́ yajñásya pūrvyáḥ //
   ātmā́ yajñásya pūrvyáḥ //
   ātmā́ yajñásya pūrvyáḥ //
   ātmā́ yajñásya pūrviyáḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.