TITUS
Rg-Veda: Rg-Veda-Samhita
Part No. 979
Previous part

Hymn: 142_(968) 
Verse: 1 
Halfverse: a    ayám agne jaritā́ tvé abʰūd ápi sáhasaḥ sūno nahy ànyád ásty ā́pyam /
   ayám agne jaritā́ tvé abʰūd ápi
   ayám agne jaritā́ tvé abʰūt ápi
   ayám agne jaritā́ tvé abʰūd ápi

Halfverse: b    sáhasaḥ sūno nahy ànyád ásty ā́pyam /
   sáhasaḥ sūno nahí anyát ásti ā́pyam /
   sáhasaḥ sūno nahí anyád ásti ā́piyam /

Halfverse: c    bʰadráṃ hí śárma trivárūtʰam ásti ta āré híṃsānām ápa didyúm ā́ kr̥dʰi //
   bʰadráṃ hí śárma trivárūtʰam ásti ta
   bʰadrám hí śárma trivárūtʰam ásti te
   bʰadráṃ hí śárma trivárūtʰam ásti ta

Halfverse: d    āré híṃsānām ápa didyúm ā́ kr̥dʰi //
   āré híṃsānām ápa didyúm ā́ kr̥dʰi //
   āré híṃsānām ápa didyúm ā́ kr̥dʰi //


Verse: 2 
Halfverse: a    pravát te agne jánimā pitūyatáḥ sācī́va víśvā bʰúvanā ny r̥̀ñjase /
   pravát te agne jánimā pitūyatáḥ
   pravát te agne jánima+ pitūyatáḥ
   pravát te agne jánimā pitūyatáḥ

Halfverse: b    sācī́va víśvā bʰúvanā ny r̥̀ñjase /
   sācī́ iva víśvā bʰúvanā ní r̥ñjase /
   sācī́va víśvā bʰúvanā ní r̥ñjase /

Halfverse: c    prá sáptayaḥ prá saniṣanta no dʰíyaḥ puráś caranti paśupā́ iva tmánā //
   prá sáptayaḥ prá saniṣanta no dʰíyaḥ
   prá sáptayaḥ prá saniṣanta naḥ dʰíyaḥ
   prá sáptayaḥ prá saniṣanta no dʰíyaḥ

Halfverse: d    puráś caranti paśupā́ iva tmánā //
   puráḥ caranti paśupā́ḥ iva tmánā //
   puráś caranti paśupā́ iva tmánā //


Verse: 3 
Halfverse: a    utá vā́ u pári vr̥ṇakṣi bápsad bahór agna úlapasya svadʰāvaḥ /
   utá vā́ u pári vr̥ṇakṣi bápsad
   utá vaí u pári vr̥ṇakṣi bápsat
   utá vā́ u pári vr̥ṇakṣi bápsad

Halfverse: b    bahór agna úlapasya svadʰāvaḥ /
   bahóḥ agne úlapasya svadʰāvaḥ /
   bahór agna úlapasya svadʰāvaḥ /

Halfverse: c    utá kʰilyā́ urvárāṇām bʰavanti mā́ te hetíṃ táviṣīṃ cukrudʰāma //
   utá kʰilyā́ urvárāṇām bʰavanti
   utá kʰilyā́ḥ urvárāṇām bʰavanti
   utá kʰilyā́ urvárāṇām bʰavanti

Halfverse: d    mā́ te hetíṃ táviṣīṃ cukrudʰāma //
   mā́ te hetím táviṣīm cukrudʰāma //
   mā́ te hetíṃ táviṣīṃ cukrudʰāma //


Verse: 4 
Halfverse: a    yád udváto niváto yā́si bápsat pŕ̥tʰag eṣi pragardʰínīva sénā /
   yád udváto niváto yā́si bápsat
   yát udvátaḥ nivátaḥ yā́si bápsat
   yád udváto niváto yā́si bápsat

Halfverse: b    pŕ̥tʰag eṣi pragardʰínīva sénā /
   pŕ̥tʰak eṣi pragardʰínī iva sénā /
   pŕ̥tʰag eṣi pragardʰínīva sénā /

Halfverse: c    yadā́ te vā́to anuvā́ti śocír vápteva śmáśru vapasi prá bʰū́ma //
   yadā́ te vā́to anuvā́ti śocír
   yadā́ te vā́taḥ anuvā́ti śocíḥ
   yadā́ te vā́to anuvā́ti śocír

Halfverse: d    vápteva śmáśru vapasi prá bʰū́ma //
   váptā iva śmáśru vapasi prá bʰū́ma //
   vápteva śmáśru vapasi prá bʰū́ma //


Verse: 5 
Halfverse: a    práty asya śréṇayo dadr̥śra ékaṃ niyā́nam bahávo rátʰāsaḥ /
   práty asya śréṇayo dadr̥śra
   práti asya śréṇayaḥ dadr̥śre
   práti asya śráyiṇayo dadr̥śra

Halfverse: b    ékaṃ niyā́nam bahávo rátʰāsaḥ /
   ékam niyā́nam bahávaḥ rátʰāsaḥ /
   ékaṃ niyā́nam bahávo rátʰāsaḥ /

Halfverse: c    bāhū́ yád agne anumármr̥jāno nyàṅṅ uttānā́m anvéṣi bʰū́mim //
   bāhū́ yád agne anumármr̥jāno
   bāhū́ yát agne anumármr̥jānaḥ
   bāhū́ yád agne anumármr̥jāno

Halfverse: d    nyàṅṅ uttānā́m anvéṣi bʰū́mim //
   nyàṅ uttānā́m anvéṣi bʰū́mim //
   níaṅṅ uttānā́m anuéṣi bʰū́mim //


Verse: 6 
Halfverse: a    út te śúṣmā jihatām út te arcír út te agne śaśamānásya vā́jāḥ /
   út te śúṣmā jihatām út te arcír
   út te śúṣmāḥ jihatām út te arcíḥ
   út te śúṣmā jihatām út te arcír

Halfverse: b    út te agne śaśamānásya vā́jāḥ /
   út te agne śaśamānásya vā́jāḥ /
   út te agne śaśamānásya vā́jāḥ /

Halfverse: c    úc cʰvañcasva ní nama várdʰamāna ā́ tvādyá víśve vásavaḥ sadantu //
   úc cʰvañcasva ní nama várdʰamāna
   út śvañcasva ní nama várdʰamānaḥ
   úc cʰvañcasva ní nama várdʰamāna

Halfverse: d    ā́ tvādyá víśve vásavaḥ sadantu //
   ā́ tvā adyá víśve vásavaḥ sadantu //
   ā́ tvādyá víśve vásavaḥ sadantu //


Verse: 7 
Halfverse: a    apā́m idáṃ nyáyanaṃ samudrásya nivéśanam /
   apā́m idáṃ nyáyanaṃ
   apā́m idám nyáyanam
   apā́m idáṃ niáyanaṃ

Halfverse: b    samudrásya nivéśanam /
   samudrásya nivéśanam /
   samudrásya nivéśanam /

Halfverse: c    anyáṃ kr̥ṇuṣvetáḥ pántʰāṃ téna yāhi váśām̐ ánu //
   anyáṃ kr̥ṇuṣvetáḥ pántʰāṃ
   anyám kr̥ṇuṣva itáḥ pántʰām
   anyáṃ kr̥ṇuṣvetáḥ pántʰāṃ

Halfverse: d    téna yāhi váśām̐ ánu //
   téna yāhi váśān ánu //
   téna yāhi váśām̐ ánu //


Verse: 8 
Halfverse: a    ā́yane te parā́yaṇe dū́rvā rohantu puṣpíṇīḥ /
   ā́yane te parā́yaṇe
   ā́yane te parā́yaṇe
   ā́yane te parā́yaṇe

Halfverse: b    dū́rvā rohantu puṣpíṇīḥ /
   dū́rvāḥ rohantu puṣpíṇīḥ /
   dū́rvā rohantu puṣpíṇīḥ /

Halfverse: c    hradā́ś ca puṇḍárīkāṇi samudrásya gr̥hā́ imé //
   hradā́ś ca puṇḍárīkāṇi
   hradā́ḥ ca puṇḍárīkāṇi
   hradā́ś ca puṇḍárīkāṇi

Halfverse: d    samudrásya gr̥hā́ imé //
   samudrásya gr̥hā́ḥ imé //
   samudrásya gr̥hā́ imé //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.