TITUS
Black Yajur-Veda: Taittiriya-Brahmana
Part No. 7
Previous part

Chapter: 7 
Paragraph: 1 
Verse: 1    {BS 1.7.1.1}
Sentence: 1    etád brāhmaṇāny evá páñca havī́m̐ṣi /
Sentence: 2    átʰa_índrāya śúnāsī́rāya puroḍā́śaṃ dvā́daśkapālaṃ nírvaptai /
Sentence: 3    saṃvatsaró vā́ índrāśúnāsī́raḥ /
Sentence: 4    saṃvatsaréṇa_evā́smā ánnam ávarundʰe /
Sentence: 5    vāyavayàṃ páyo bʰavati /
Sentence: 6    vāyúr vái vŕ̥ṣṭyai pradāpayitā́ /
Sentence: 7    sá evā́smai vŕ̥ṣṭiṃ prádāpayati /
Sentence: 8    sauryà ékakapālo bʰavati /
Sentence: 9    sū́ryeṇa vā́ amúṣmim̐l loké vŕ̥ṣṭir dʰr̥tā́ /
Sentence: 10    sá evā́smai vŕ̥ṣṭiṃ níyaccʰati //

Verse: 2    {BS 1.7.1.2}
Sentence: 1    dvādaśagavám̐ sī́raṃ dákṣiṇā sámr̥ddʰyai /
Sentence: 2    deva_asurā́ḥ sáṃyattā āsan /
Sentence: 3    té devā́ agním abruvan /
Sentence: 4    tváyā vīréṇa_ásurān abʰíbʰavāma_íti /
Sentence: 5    sò 'bravīt /
Sentence: 6    tredʰā́_ahám ātmā́naṃ víkariṣya íti /
Sentence: 7    sá tredʰā́_ātmā́naṃ vyàkuruta /
Sentence: 8    agníṃ tŕ̥tīyam /
Sentence: 9    rudráṃ tŕ̥tīyam /
Sentence: 10    váruṇaṃ tŕ̥tīyam //

Verse: 3    {BS 1.7.1.3}
Sentence: 1    sò 'bravīt /
Sentence: 2    ká idáṃ turī́yam íti /
Sentence: 3    ahám íti_índro 'bravīt /
Sentence: 4    sáṃ tú sr̥jāvahā íti /
Sentence: 5    táu sámasr̥jetām /
Sentence: 6    sá índras turī́yam abʰavat /
Sentence: 7    yád índras turī́yam ábʰavat /
Sentence: 8    tád indraturīyásya_indraturīyatvám /
Sentence: 9    táto vái devā́ vyajayanta /
Sentence: 10    yád indraturīyáṃ nirupyate víjityai //

Verse: 4    {BS 1.7.1.4}
Sentence: 1    vahínī dʰenúr dákṣiṇā /
Sentence: 2    yád vahínī téna_āgneyī́ /
Sentence: 3    yád gáuḥ /
Sentence: 4    téna raudrī́ /
Sentence: 5    yád dʰenúḥ /
Sentence: 6    téna_aindrī́ /
Sentence: 7    yát strī́ satī́ dāntā́ /
Sentence: 8    téna vāruṇī́ sámr̥ddʰyai /
Sentence: 9    prajā́patir yajñám asr̥jata //

Verse: 5    {BS 1.7.1.5}
Sentence: 1    tám̐ sr̥ṣṭám̐ rákṣām̐sy ajigʰām̐san /
Sentence: 2    sá etā́ḥ prajā́patir ātmáno devátā niramimīta /
Sentence: 3    tā́bʰir vái sá digbʰyó rákṣām̐si prā́ṇudata /
Sentence: 4    yát pañcāvattī́yaṃ juhóti /
Sentence: 5    digbʰyá evá tád yájamāno rákṣām̐si práṇudate /
Sentence: 6    sámūḍham̐ rákṣaḥ sáṃdagdʰam̐ rákṣa íty āha /
Sentence: 7    rákṣām̐sy evá sáṃdahati /
Sentence: 8    agnáye rákṣogʰne svā́hā_íty āha /
Sentence: 9    devátābʰya evá vijigyānā́bʰyo bʰágadʰéyaṃ karoti /
Sentence: 10    praṣṭivāhī́ rátʰo dákṣiṇā sámr̥ddʰyai //

Verse: 6    {BS 1.7.1.6}
Sentence: 1    índro vr̥trám̐ hatvā́ /
Sentence: 2    ásurān parābʰā́vya /
Sentence: 3    námucim āsuráṃ na_álabʰata[na_ālabʰata?] /
Sentence: 4    tám̐ śacy ā̀gr̥hṇāt /
Sentence: 5    táu samalabʰetām /
Sentence: 6    sò 'smād abʰíśunataro 'bʰavat /
Sentence: 7    sò 'bravīt /
Sentence: 8    saṃdʰā́m̐ sáṃdadʰāvahai /
Sentence: 9    átʰa tvā_vaḥ {BS tvā́va} srakṣyāmi /
Sentence: 10    ná mā śúṣkeṇa ná_ārdréṇa hanaḥ //

Verse: 7    {BS 1.7.1.7}
Sentence: 1    ná dívā ná náktam íti /
Sentence: 2    sá etám apā́ṃ pʰénam asiñcat /
Sentence: 3    ná vā́ eṣá śúṣko na_ā́rdró vyuṣṭā_āsīt /
Sentence: 4    ánuditaḥ sū́ryaḥ /
Sentence: 5    ná vā́ etád dívā ná náktam /
Sentence: 6    tásyaitásmim̐l loké /
Sentence: 7    apā́ṃ pʰénena śíra údavartayat /
Sentence: 8    tád enam ánvavartata /
Sentence: 9    mítradʰrug íti //

Verse: 8    {BS 1.7.1.8}
Sentence: 1    sá etā́n apām ārgā́n ajanayat /
Sentence: 2    tā́n ajuhot /
Sentence: 3    táir vái sá rákṣām̐sy ápāhata {AS option apāhan} /
Sentence: 4    yád apām ārgahomó bʰávati /
Sentence: 5    rákṣasām ápahatyai /
Sentence: 6    eka_ulmukéna yanti /
Sentence: 7    tád dʰí rákṣasāṃ bʰāgadʰéyam /
Sentence: 8    imā́ṃ díśaṃ yanti /
Sentence: 9    eṣā́ vái rákṣasāṃ dík /
Sentence: 10    svā́yām evá diśí rákṣām̐si hanti //

Verse: 9    {BS 1.7.1.9}
Sentence: 1    svákr̥ta íriṇe juhoti pradaré vā /
Sentence: 2    etád vái rákṣasām āyátanam /
Sentence: 3    svá evá_āyátane rákṣām̐si hanti /
Sentence: 4    parṇamáyena sruvéṇa juhoti /
Sentence: 5    bráhma vái parṇáḥ /
Sentence: 6    bráhmaṇā_evá rákṣām̐si hanti /
Sentence: 7    devásya tvā savitúḥ prasavá íty āha /
Sentence: 8    savitŕ̥prasūta evá rákṣām̐si hanti /
Sentence: 9    hatám̐ rákṣó vadʰiṣma rákṣa íty āha /
Sentence: 10    rákṣasām̐ stŕ̥tyai /
Sentence: 11    yád váste tád dákṣiṇā nirávattyai /
Sentence: 12    ápratīkṣam ā́yanti /
Sentence: 13    rákṣasām antárhityai //

Paragraph: 2 
Verse: 1    {BS 1.7.2.10}
Sentence: 1    dʰātré puroḍā́śaṃ dvā́daśakapālaṃ nírvapati /
Sentence: 2    saṃvatsaró vái dʰātā́ /
Sentence: 3    saṃvatsaréṇa_evā́smai prajā́ḥ prájanayati /
Sentence: 4    ánv evā́smā ánumatir manyate /
Sentence: 5    rāté rākā́ /
Sentence: 6    prá sinīvālī́ janayati /
Sentence: 7    prajā́sv evá prájātāsu kuhvā̀ vā́caṃ dadʰāti /
Sentence: 8    mitʰunáu gā́vau dákṣiṇā sámr̥ddʰyai /
Sentence: 9    āgnāvaiṣṇavám ékādaśakapālaṃ nírvapati /
Sentence: 10    aindrāvaiṣṇavám ékādaśakapālam //

Verse: 2    {BS 1.7.2.11}
Sentence: 1    vaiṣṇaváṃ trikapālám /
Sentence: 2    vīryàṃ vā́ agníḥ /
Sentence: 3    vīryàm índraḥ /
Sentence: 4    vīryàṃ víṣṇuḥ /
Sentence: 5    prajā́ evá prájātā vīryè prátiṣṭhāpayati /
Sentence: 6    tásmāt prajā́ vīryàvatīḥ /
Sentence: 7    vāmaná r̥ṣabʰó vahī́ dákṣiṇā /
Sentence: 8    yád vahī́ téna_āgneyáḥ /
Sentence: 9    yád r̥ṣabʰáḥ //

Verse: 3    {BS 1.7.2.12}
Sentence: 1    téna_aindráḥ /
Sentence: 2    yád vāmanáḥ /
Sentence: 3    téna vaiṣṇaváḥ sámr̥ddʰyai /
Sentence: 4    agnīṣomī́yam ékādaśakapālaṃ nírvapati /
Sentence: 5    indrāsomī́yam ékādaśakapālam /
Sentence: 6    saumyáṃ carúm /
Sentence: 7    sómo vái retodʰā́ḥ /
Sentence: 8    agníḥ prajā́nāṃ prajanayitā́ /
Sentence: 9    vr̥ddʰā́nām índraḥ pradāpayitā́ /
Sentence: 10    sóma evā́smai réto dádʰāti //

Verse: 4    {BS 1.7.2.13}
Sentence: 1    agníḥ prajā́ṃ prájanayati /
Sentence: 2    vr̥ddʰā́m índraḥ práyaccʰati /
Sentence: 3    babʰrúr dákṣiṇā sámr̥ddʰyai /
Sentence: 4    somāpauṣṇáṃ carúṃ nírvapati /
Sentence: 5    aindrāpauṣṇáṃ carúm /
Sentence: 6    sómo vái retodʰā́ḥ /
Sentence: 7    pūṣā́ paśūnā́ṃ prajanayitā́ /
Sentence: 8    vr̥ddʰā́nām índraḥ pradā́payitā́ /
Sentence: 9    sóma evā́smai réto dádʰāti /
Sentence: 10    pūṣā́ paśū́n prájanayati //

Verse: 5    {BS 1.7.2.14}
Sentence: 1    vr̥ddʰā́n índraḥ práyaccʰati /
Sentence: 2    pauṣṇáś carú bʰavati /
Sentence: 3    iyáṃ vái pūṣā́ /
Sentence: 4    asyā́m evá prátitiṣṭhati /
Sentence: 5    śyāmó dákṣiṇā sámr̥ddʰyai /
Sentence: 6    bahú vái púruṣo 'medʰyám {AS medʰyám} úpagaccʰati /
Sentence: 7    vaiśvānaráṃ dvā́daśakapālaṃ nírvapati /
Sentence: 8    saṃvatsaró vā́ agnír vaiśvānaráḥ /
Sentence: 9    saṃvatsaréṇa_eváinam̐ svadayati /
Sentence: 10    híraṇyaṃ dákṣiṇā //

Verse: 6    {BS 1.7.2.15}
Sentence: 1    pavítraṃ vái híraṇyam /
Sentence: 2    punā́ty eváinam /
Sentence: 3    bahú vái rājanyó 'nr̥taṃ karoti /
Sentence: 4    úpa jāmyái hárate /
Sentence: 5    jinā́ti brāhmaṇám /
Sentence: 6    vádaty ánr̥tam /
Sentence: 7    ánr̥te kʰálu vái kriyámāṇe váruṇo gr̥hṇāti /
Sentence: 8    vāruṇáṃ yavamáyaṃ carúṃ nírvapati /
Sentence: 9    varuṇapāśád eváinaṃ muñcati /
Sentence: 10    aśvo dákṣiṇā /
Sentence: 11    vāruṇó hí devátayā_áśvaḥ sámr̥ddʰyai //

Paragraph: 3 
Verse: 1    {BS 1.7.3.16}
Sentence: 1    ratnínām etā́ni havī́m̐ṣi bʰavanti /
Sentence: 2    eté vái rāṣṭrásya pradātā́raḥ /
Sentence: 3    etè 'pādātā́raḥ /
Sentence: 4    yá evá rāṣṭrásya pradātā́raḥ /
Sentence: 5    yè 'pādātā́raḥ /
Sentence: 6    tá evā́smai rāṣṭráṃ práyaccʰanti /
Sentence: 7    rāṣṭrám evá bʰavati /
Sentence: 8    yát samāhŕ̥tya nírvapet /
Sentence: 9    áratninaḥ syuḥ /
Sentence: 10    yatʰāyatʰáṃ nírvapati ratnitvā́ya //

Verse: 2    {BS 1.7.3.17}
Sentence: 1    yát sadyó nirvápet /
Sentence: 2    yāvatīm ékena havíṣā_āśíṣam avarundʰé /
Sentence: 3    tā́vatīm ávarundʰīta /
Sentence: 4    anvaháṃ nírvapati /
Sentence: 5    bʰúyasīm evá_āśíṣam ávarundʰe /
Sentence: 6    bʰū́yaso yajñakratū́n úpaiti /
Sentence: 7    bārhaspatyáṃ carúṃ nírvapati brahmáṇo gr̥hé /
Sentence: 8    mukʰatá evā́smai bráhma sám̐śyati /
Sentence: 9    átʰo bráhmann evá kṣattrám anvā́rambʰayati /
Sentence: 10    śitipr̥ṣṭhó dákṣiṇā sámr̥ddʰyai //

Verse: 3    {BS 1.7.3.18}
Sentence: 1    aindrám ékādaśakapālam̐ rājanyàsya gr̥hé /
Sentence: 2    indriyám evá_avarundʰe /
Sentence: 3    r̥ṣabʰó dákṣiṇā sámr̥ddʰyai /
Sentence: 4    ādityáṃ carúṃ máhiṣyai gr̥hé /
Sentence: 5    iyáṃ vā́ áditiḥ /
Sentence: 6    asyā́m evá prátitiṣṭhati /
Sentence: 7    dʰenúr dákṣiṇā sámr̥ddʰyai /
Sentence: 8    bʰágāya carúṃ vāvā́tāyai gr̥hé /
Sentence: 9    bʰágam evā́smin dadʰāti /
Sentence: 10    vícittagarbʰā paṣṭhauhī́ dákṣiṇā sámr̥ddʰyai //

Verse: 4    {BS 1.7.3.19}
Sentence: 1    nairr̥táṃ carúṃ parivr̥ktyài gr̥hé kr̥ṣṇā́nāṃ vrīhīṇā́ṃ nakʰánirbʰinnam /
Sentence: 2    pāpmā́nam evá nírr̥tiṃ nirávadayate kr̥ṣṇā́ kūṭā́ dákṣiṇā sámr̥ddʰyai /
Sentence: 3    āgneyám aṣṭā́kapālam̐ senānyò gr̥hé /
Sentence: 4    sénām evā́sya sám̐śyati /
Sentence: 5    híraṇyaṃ dákṣiṇā sámr̥ddʰyai /
Sentence: 6    vāruṇáṃ dáśakapālam̐ sūtásya gr̥hé /
Sentence: 7    varuṇasavám evá_avarundʰe /
Sentence: 8    mahā́niraṣṭo dákṣiṇā sámr̥ddʰyai /
Sentence: 9    mārutám̐ saptákapālaṃ grāmaṇyò gr̥hé //

Verse: 5    {BS 1.7.3.20}
Sentence: 1    ánnaṃ vái marútaḥ /
Sentence: 2    ánnam evá_avarundʰe /
Sentence: 3    pŕ̥śnir dákṣiṇā sámr̥ddʰyai /
Sentence: 4    sāvitráṃ dvā́daśakapālaṃ kṣattúr gr̥hé prásūtyai /
Sentence: 5    upadʰvastó dákṣiṇā sámr̥ddʰyai /
Sentence: 6    āśvináṃ dvikapālám̐ saṃgrahītúr gr̥hé /
Sentence: 7    aśvínau vái devā́nāṃ bʰiṣájau /
Sentence: 8    tā́bʰyām evā́smai bʰeṣajáṃ karoti /
Sentence: 9    savātyàu dákṣiṇā sámr̥ddʰyai /
Sentence: 10    pauṣṇáṃ carúṃ bʰāgadugʰásya gr̥hé //

Verse: 6    {BS 1.7.3.21}
Sentence: 1    ánnaṃ vái pūṣā́ /
Sentence: 2    ánnam evá_avarundʰe /
Sentence: 3    śyāmó dákṣiṇā sámr̥ddʰyai /
Sentence: 4    raudráṃ gāvīdʰukáṃ carúm akṣāvāpásya gr̥hé /
Sentence: 5    antatá evá rudráṃ nirávadayate /
Sentence: 6    śabála údvāro dákṣiṇā sámr̥ddʰyai /
Sentence: 7    dvā́daśa_etā́ni havī́m̐ṣi bʰavanti /
Sentence: 8    dvā́daśa mā́sāḥ saṃvatsaráḥ /
Sentence: 9    saṃvatsaréna_evā́smai rāṣṭrám ávarundʰe /
Sentence: 10    rāṣṭrám evá bʰavati //

Verse: 7    {BS 1.7.3.22}
Sentence: 1    yán ná pratinirvápet /
Sentence: 2    ratnína āśíṣó 'varundʰīrann /
Sentence: 3    prátinírvapati /
Sentence: 4    índrāya sutrā́mṇe puroḍā́śam ékādaśakapālam /
Sentence: 5    índrāya_am̐homúce /
Sentence: 6    āśíṣa evá_avarundʰe /
Sentence: 7    āyán no {BS ayáṃ no} rā́jā vr̥trahā́ rā́jā /
Sentence: 8    bʰūtvā́ vr̥tráṃ vadʰyād íty āha /
Sentence: 9    āśíṣam eváitā́m ā́śāste /
Sentence: 10    maitrābārhaspatyáṃ bʰavati /
Sentence: 11    śvetā́yai śvetávatsāyai dugdʰé //

Verse: 8    {BS 1.7.3.23}
Sentence: 1    bārhaspatyé maitrám ápidadʰāti /
Sentence: 2    bráhma caivā́smai kṣattráṃ ca samī́cī dadʰāti /
Sentence: 3    átʰo bráhmann evá kṣattráṃ prátiṣṭhāpayati /
Sentence: 4    bārhaspatyéna pū́rveṇa prácarati /
Sentence: 5    mukʰatá evā́smai bráhma sám̐śyati /
Sentence: 6    átʰo bráhmann evá kṣattrám anvā́rambʰayati /
Sentence: 7    svayaṃkr̥tā́ védir bʰavati /
Sentence: 8    svayaṃdináṃ barhíḥ /
Sentence: 9    svayaṃkr̥tá idʰmáḥ /
Sentence: 10    ánabʰijitasya_abʰíjityai /
Sentence: 11    támsād rā́jñām áraṇyam abʰíjitam /
Sentence: 12    sáivá śvetā́ śvetávatsā dákṣiṇā sámr̥ddʰyai //

Paragraph: 4 
Verse: 1    {BS 1.7.4.24}
Sentence: 1    devasuvā́m etā́ni havī́m̐ṣi bʰavanti /
Sentence: 2    etā́vanto {AS etā́vantau} vái devā́nām̐ savā́ḥ /
Sentence: 3    tá evā́smai savā́n práyaccʰanti /
Sentence: 4    tá enam̐ suvante /
Sentence: 5    agnír eváinaṃ gr̥hápatīnām̐ suvate /
Sentence: 6    sómo vánaspátīnām /
Sentence: 7    rudráḥ paśūnā́m /
Sentence: 8    bŕ̥haspátir vācā́m /
Sentence: 9    índro jyeṣṭhā́nām /
Sentence: 10    mitráḥ satyā́nām //

Verse: 2    {BS 1.7.4.25}
Sentence: 1    váruṇo dʰármapatīnām /
Sentence: 2    etád evá sarvaṃ bʰavati /
Sentence: 3    savitā́ tvā prasavā́nām̐ suvatām íti hástaṃ gr̥hṇāti prásūtyai /
Sentence: 4    yé devā devasúvaḥ stʰa_íty āha /
Sentence: 5    yatʰāyajúr eváitát /
Sentence: 6    mahaté kṣattrā́ya mahatá ā́dʰipatyāya mahaté jā́narājyāya_íty āha /
Sentence: 7    āśíṣam eváitā́m ā́śāste /
Sentence: 8    eṣá vo bʰaratā rā́jā sómo 'smā́kaṃ brāhmaṇā́nām̐ rā́jā_ity āha /
Sentence: 9    tásmāt sómarājāno brāhmaṇā́ḥ /
Sentence: 10    práti tyán nāma rājyám adʰāyi_íty āha //

Verse: 3    {BS 1.7.4.26}
Sentence: 1    rājyám evā́smin prátidadʰāti /
Sentence: 2    svā́ṃ tanúvaṃ váruṇo aśiśred íty āha /
Sentence: 3    varuṇasavám evá_avarundʰe /
Sentence: 4    śúcer mitrásya vrátyā abʰūma_íty āha /
Sentence: 5    śúcim eváinaṃ vrátyaṃ karoti /
Sentence: 6    ámanmahi mahatá r̥tásya nā́ma_íty āha /
Sentence: 7    manutá eváinam /
Sentence: 8    sárve vrā́tā váruṇasya_abʰūvann íty āha /
Sentence: 9    sárvavrātam eváinaṃ karoti /
Sentence: 10    ví mitrá évair árātim {AS ví mitrárāvair árātim} atā́rīd íty āha {= TS.1.8.10.f} //

Verse: 4    {BS 1.7.4.27}
Sentence: 1    árātim eváinaṃ tārayati /
Sentence: 2    ásūṣudanta yajñíyā r̥téna_íty āha /
Sentence: 3    svadáyaty eváinam /
Sentence: 4    vy ù tritó jarimā́ṇaṃ na ānaḍ íty āha {= TS1.8.10.f} /
Sentence: 5    ā́yur evā́smin dadʰāti /
Sentence: 6    dvā́bʰyāṃ vímr̥ṣṭe /
Sentence: 7    dvipā́d yájamānaḥ prátiṣṭhityai /
Sentence: 8    agnīṣomī́yasya ca_ékādaśakapālasya devasuvā́ṃ ca havíṣām agnáye sviṣṭakŕ̥te samávadyati /
Sentence: 9    devátābʰir eváinam ubʰayátaḥ párigr̥hṇāti /
Sentence: 10    viṣṇukramā́n kramate /
Sentence: 11    víṣṇur evá bʰūtvā_ímā́n lokā́n abʰíjayati //

Paragraph: 5 
Verse: 1    {BS 1.7.5.28}
Sentence: 1    artʰa_ítaḥ stʰa_íti juhoti /
Sentence: 2    ā́hutyā_eváinā niṣkrī́ya gr̥hṇāti /
Sentence: 3    átʰo havíṣkr̥tānām evá_abʰígʰr̥tānāṃ gr̥hṇāti /
Sentence: 4    váhantīnāṃ gr̥hṇāti /
Sentence: 5    etā́ vā́ apā́m̐ raṣṭrám /
Sentence: 6    rāṣṭrám evā́smai gr̥hṇāti /
Sentence: 7    átʰo śríyam eváinam abʰívahanti /
Sentence: 8    apā́ṃ pátir asi_íty āha /
Sentence: 9    mitʰunám evá_akaḥ /
Sentence: 10    vŕ̥ṣā_asy ūrmír íty āha //

Verse: 2    {BS 1.7.5.29}
Sentence: 1    ūrmimántam eváinaṃ karoti /
Sentence: 2    vr̥ṣaséno 'si_íty āha /
Sentence: 3    sénām evā́sya sám̐śyati /
Sentence: 4    vrajakṣítaḥ stʰa_íty āha /
Sentence: 5    etā́ vā́ apā́ṃ víśaḥ /
Sentence: 6    víśam evā́smai páryūhati /
Sentence: 7    marútām ójaḥ stʰa_íty āha /
Sentence: 8    ánnaṃ vái marútaḥ /
Sentence: 9    ánnam evá_avarundʰe /
Sentence: 10    sū́ryavarcasaḥ stʰa_íty āha //

Verse: 3    {BS 1.7.5.30}
Sentence: 1    rāṣṭrám evá varcasvy àkaḥ /
Sentence: 2    sūryatvacasaḥ stʰa_íty āha /
Sentence: 3    satyáṃ vā́ etát /
Sentence: 4    yád várṣati /
Sentence: 5    ánr̥taṃ yádātápati várṣati /
Sentence: 6    satya_anr̥té evá_avarundʰe /
Sentence: 7    ná_enam̐ satya_anr̥té udité him̐staḥ /
Sentence: 8    yá eváṃ véda /
Sentence: 9    mā́ndā stʰa_íty āha /
Sentence: 10    rāṣṭrám evá brahmavarcasy àkaḥ //

Verse: 4    {BS 1.7.5.31}
Sentence: 1    vā́śāḥ stʰa_íty āha /
Sentence: 2    rāṣṭrám evá vaśy àkaḥ /
Sentence: 3    śákvarīḥ stʰa_íty āha /
Sentence: 4    paśávo vái śákvarīḥ /
Sentence: 5    paśū́n evá_avarundʰe /
Sentence: 6    viśvabʰŕ̥taḥ stʰa_íty āha /
Sentence: 7    rāṣṭrám evá payasvy àkaḥ /
Sentence: 8    janabʰŕ̥taḥ stʰa_íty āha /
Sentence: 9    rāṣṭrám evá_indriyāvy àkaḥ /
Sentence: 10    agnés tejasyā̀ḥ stʰá_ity āha //

Verse: 5    {BS 1.7.5.32}
Sentence: 1    rāṣṭrám evá tejasvy àkaḥ /
Sentence: 2    apā́m óṣadʰīnām̐ rásaḥ stʰa_íty āha /
Sentence: 3    rāṣṭrám evá madʰavyàm akaḥ /
Sentence: 4    sārasvatáṃ gráhaṃ gr̥hṇāti /
Sentence: 5    eṣā́ vā́ apā́ṃ pr̥ṣṭhám /
Sentence: 6    yát sárasvatī /
Sentence: 7    pr̥ṣṭhám eváinam̐ samānā́nāṃ karoti /
Sentence: 8    ṣoḍaśábʰir gr̥hṇāti /
Sentence: 9    ṣóḍaśakalo vái púruṣaḥ /
Sentence: 10    yā́vān evá púruṣaḥ /
Sentence: 11    tásmin vīryàṃ dadʰāti /
Sentence: 12    ṣoḍaśábʰir juhóti ṣóḍaśábʰir gr̥hṇāti /
Sentence: 13    dvā́trim̐śat sáṃpadyante /
Sentence: 14    dvā́trim̐śadakṣarā_anuṣṭúk /
Sentence: 15    vā́g anuṣṭúp sárvāṇi ccʰándām̐si /
Sentence: 16    vācā́_eváinam̐ sárvebʰiś cʰándobʰir abʰíṣiñcati //

Paragraph: 6 
Verse: 1    {BS 1.7.6.33}
Sentence: 1    dévīr āpaḥ sáṃ mádʰumatīr mádʰumatībʰiḥ sr̥jyadʰvam íty āha /
Sentence: 2    bráhmaṇā_eváināḥ sám̐sr̥jati /
Sentence: 3    ánādʰr̥ṣṭāḥ sīdata_íty āha /
Sentence: 4    bráhmaṇā_eváināḥ sādayati /
Sentence: 5    antarā́ hótuś ca dʰíṣṇiyaṃ brāhmaṇāccʰam̐sínaś ca sādayati /
Sentence: 6    āgneyó vái hótā /
Sentence: 7    aindró brāhmaṇāccʰam̐sī́ /
Sentence: 8    téjasā ca_evá_indriyéṇa ca_ubʰayáto rāṣṭráṃ párigr̥hṇāti /
Sentence: 9    híraṇyena_útpunāti /
Sentence: 10    ā́hutyai hí pavítrābʰyām utpunánti vyā́vr̥ttyai //

Verse: 2    {BS 1.7.6.34}
Sentence: 1    śatámānaṃ bʰavati /
Sentence: 2    śatā́yuḥ /
Sentence: 3    púruṣaś śatá_indriyaḥ /
Sentence: 4    ā́yuṣy evá_indriyé prátitiṣṭhati /
Sentence: 5    ánibʰr̥ṣṭam asi_íty āha /
Sentence: 6    ánibʰr̥ṣṭam̐ hy ètát /
Sentence: 7    vācó bándʰur íty āha /
Sentence: 8    vācó hy eṣa bandʰùḥ /
Sentence: 9    tapojā́ íty āha /
Sentence: 10    tapojā́ hy ètát /
Sentence: 11    sómasya dātrám asi_íty āha //

Verse: 3    {BS 1.7.6.35}
Sentence: 1    sómasya hy ètád dātrám /
Sentence: 2    śukrā́ vaḥ śukréṇa_útpunāmi_íty āha /
Sentence: 3    śukrā́ hy ā́paḥ /
Sentence: 4    śukrám̐ híraṇyam /
Sentence: 5    candrā́ś candréṇa_ity āha /
Sentence: 6    candrā́ hy ā́paḥ /
Sentence: 7    candrám̐ híraṇyam /
Sentence: 8    amŕ̥tā amŕ̥tena_íty āha /
Sentence: 9    amŕ̥tā hy ā́paḥ /
Sentence: 10    amŕ̥tam̐ híraṇyam //

Verse: 4    {BS 1.7.6.36}
Sentence: 1    svā́hā rājasū́yāya_íty āha /
Sentence: 2    rājasū́yāya hy ènā utpunā́ti /
Sentence: 3    sadʰamā́do dyumní nīrúja {BS nīrū́rja} etā́ íti vāruṇyā́_r̥cā́ gr̥hṇāti /
Sentence: 4    varuṇasavám evá_avarundʰe /
Sentence: 5    ékayā gr̥hṇāti /
Sentence: 6    ekadʰā́_evá yájamāne vīryàṃ dadʰāti /
Sentence: 7    kṣatrásya_úlbam asi kṣatrásya yónir asi_íti tārpyáṃ ca_ūṣṇī́ṣaṃ ca práyaccʰati sayonitvā́ya /
Sentence: 8    ékaśatena darbʰapuñjīláiḥ pavayati /
Sentence: 9    śatā́yur vái púruṣaḥ śatávīryaḥ /
Sentence: 10    ātmā́_ekaśatáḥ //

Verse: 5    {BS 1.7.6.37}
Sentence: 1    yā́vān evá púruṣaḥ /
Sentence: 2    tásmin vīryàṃ dadʰāti /
Sentence: 3    dádʰy āśayati /
Sentence: 4    indriyám evá_avarundʰe /
Sentence: 5    udumbáram āśayati /
Sentence: 6    annā́dyasya_ávaruddʰyai /
Sentence: 7    śáṣpāṇy āśayati /
Sentence: 8    súrābalim eváinaṃ karoti /
Sentence: 9    āvída etā́ bʰavanti /
Sentence: 10    āvídam eváinaṃ gamayanti //

Verse: 6    {BS 1.7.6.38}
Sentence: 1    agnír eváinaṃ gā́rhapatyena_avati /
Sentence: 2    índra indriyéṇa /
Sentence: 3    pūṣā́ paśúbʰiḥ /
Sentence: 4    mitrā́varuṇau prāṇāpānā́bʰyām /
Sentence: 5    índro vr̥trā́ya vájram údayaccʰat /
Sentence: 6    sá dívam alikʰat /
Sentence: 7    sò 'ryamṇáḥ pántʰā abʰavat /
Sentence: 8    sá ā́vinne dyā́vāpr̥tʰivī́ dʰr̥távrate íti dyā́vāpr̥tʰivī́ úpādʰāvat /
Sentence: 9    sá ābʰyām evá prásūta índro vr̥trā́ya vájraṃ prā́harat /
Sentence: 10    ā́vinne dyā́vāpr̥tʰivī́ dʰr̥távrate íti yád ā́ha //

Verse: 7    {BS 1.7.6.39}
Sentence: 1    ābʰyā́m evá prásūto yájamāno vájraṃ bʰrā́tr̥vyāya práharati /
Sentence: 2    ā́vinnā devy áditir viśvarūpī_íty āha /
Sentence: 3    iyáṃ vái devy áditir viśvarūpī́ /
Sentence: 4    asyā́m evá prátitiṣṭhati /
Sentence: 5    ā́vinno 'yám asā́v āmuṣyāyaṇò 'syā́ṃ viśy àsmín rāṣṭrá íty āha /
Sentence: 6    viśā́_éváinam̐ rāṣṭréṇa sámardʰayati /
Sentence: 7    mahaté kṣatrā́ya mahatá ā́dʰipatyāya mahaté jā́narājyāyā_íty āha /
Sentence: 8    āśíṣam eváitā́m ā́śaste /
Sentence: 9    eṣá vo bʰaratā rā́jā sómo 'smā́kaṃ brāhmaṇā́nām̐ rā́jā_íty āha /
Sentence: 10    tásmāt sómarājāno brāhmaṇā́ḥ //

Verse: 8    {BS 1.7.6.40}
Sentence: 1    índrasya vájro 'si vā́rtragʰna íti dʰánuḥ práyaccʰati víjityai /
Sentence: 2    śatrubā́dʰanāḥ stʰa_íti_iṣū́n /
Sentence: 3    śátrūn evā́sya bādʰante /
Sentence: 4    pātá mā pratyáñcaṃ pātá mā tiryáñcam anváñcaṃ mā pāta_íty āha /
Sentence: 5    tisró vái śaravyā̀ḥ /
Sentence: 6    pratī́cī tiráścy ánū́cī /
Sentence: 7    tábʰya eváinaṃ pānti /
Sentence: 8    digbʰyó mā pāta_íty āha /
Sentence: 9    digbʰyá eváinaṃ pānti /
Sentence: 10    víśvābʰyo mā nāṣṭrā́bʰyaḥ pāta_íty āha /
Sentence: 11    áparimitād eváinaṃ pānti /
Sentence: 12    híraṇyavarṇāv uṣásāṃ viroká íti triṣṭúbʰā bāhū́ údgr̥hṇāti /
Sentence: 13    indriyáṃ vái vīryàṃ triṣṭúk /
Sentence: 14    indriyám evá vīryàm upáriṣṭād ātmán dʰatte //

Paragraph: 7 
Verse: 1    {BS 1.7.7.41}
Sentence: 1    díśo vyā́stʰāpayati /
Sentence: 2    diśā́m abʰíjityai /
Sentence: 3    yád anuprakrā́met /
Sentence: 4    abʰí díśo jayet /
Sentence: 5    út tú mādyet /
Sentence: 6    mánasā_ánuprákrāmati /
Sentence: 7    abʰí díśo jayati /
Sentence: 8    ná_unmādyati /
Sentence: 9    samídʰam ā́tiṣṭha_íty āha /
Sentence: 10    téja evá_avarundʰe //

Verse: 2    {BS 1.7.7.42}
Sentence: 1    ugrā́m ā́tiṣṭha_íty āha indriyám evá_avarundʰe /
Sentence: 2    virā́jam ā́tiṣṭha_íty āha /
Sentence: 3    annā́dyam evá_avarundʰe /
Sentence: 4    údīcīm ā́tiṣṭha_íty āha /
Sentence: 5    paśū́n evá_avarundʰe /
Sentence: 6    ūrdʰvā́m ā́tiṣṭha_íty āha /
Sentence: 7    suvargám evá lokám abʰíjayati /
Sentence: 8    ánū́jjihīte /
Sentence: 9    suvargásya lokásya sámaṣṭyai //

Verse: 3    {BS 1.7.7.43}
Sentence: 1    mārutá eṣá bʰavati /
Sentence: 2    ánnaṃ vái marútaḥ /
Sentence: 3    ánnam evá_avarundʰe /
Sentence: 4    ékavim̐śatikapālo bʰavati prátiṣṭhityai /
Sentence: 5    yò 'raṇye 'nuvākyò gaṇáḥ /
Sentence: 6    táṃ madʰyatá úpadadʰāti /
Sentence: 7    grāmyáir evá paśúbʰir āraṇyā́n paśū́n párigr̥hṇāti /
Sentence: 8    tásmād grāmyáiḥ paśúbʰir āraṇyā́ḥ paśávaḥ párigr̥hītāḥ /
Sentence: 9    pŕ̥tʰir vainyáḥ /
Sentence: 10    abʰyàṣicyata //

Verse: 4    {BS 1.7.7.44}
Sentence: 1    sá rāṣṭráṃ ná_abʰavat /
Sentence: 2    sá etā́ni pārtʰā́ny apaśyat /
Sentence: 3    tā́ny ajuhot /
Sentence: 4    táir vái sá rāṣṭrám abʰavat /
Sentence: 5    yát pārtʰā́ni juhóti /
Sentence: 6    rāṣṭrám evá bʰavati /
Sentence: 7    bārhaspatyáṃ pū́rveṣām uttamáṃ bʰavati /
Sentence: 8    aindrám úttareṣāṃ pratʰamám /
Sentence: 9    bráhma caivā́smai kṣatráṃ ca samī́cī dadʰāti /
Sentence: 10    átʰo bráhmann evá kṣatráṃ prátiṣṭhāpayati //

Verse: 5    {BS 1.7.7.45}
Sentence: 1    ṣáṭ purástād abʰiṣekásya juhoti /
Sentence: 2    ṣáḍ upáriṣṭāt /
Sentence: 3    dvā́daśa sáṃpadyante /
Sentence: 4    dvā́daśa mā́sāḥ saṃvatsaráḥ /
Sentence: 5    saṃvatsaráḥ kʰálu vái devā́nāṃ pū́ḥ /
Sentence: 6    devā́nām evá púraṃ madʰyató vyávasarpati /
Sentence: 7    tásya ná kútaś cana_úpāvyādʰó bʰavati /
Sentence: 8    bʰūtā́nām áveṣṭīr {AS éveṣṭīr} juhoti /
Sentence: 9    átra_atra vái mr̥tyúr jāyate /
Sentence: 10    yátra_yatraivá mr̥tyúr jā́yate /
Sentence: 11    táta eváinam ávayajate /
Sentence: 12    tásmād rājasū́yena_ījānáḥ sárvam ā́yur eti /
Sentence: 13    sárve hy àsya mr̥tyávo 'veṣṭāḥ /
Sentence: 14    tásmād rājasū́yena_ījānó ná_abʰícaritavái /
Sentence: 15    pratyág enam abʰicāráḥ str̥ṇute //

Paragraph: 8 
Verse: 1    {BS 1.7.8.46}
Sentence: 1    sómasya tvíṣir asi táva_iva me tvíṣir bʰūyād íti śārdūlacarma_úpastr̥ṇāti /
Sentence: 2    yáiva sóme tvíṣiḥ /
Sentence: 3    yā́ śārdūlé /
Sentence: 4    tā́m evá_avarundʰe /
Sentence: 5    mr̥tyór vā́ eṣá várṇaḥ /
Sentence: 6    yát_śārdūláḥ /
Sentence: 7    amŕ̥tam̐ híraṇyam /
Sentence: 8    amŕ̥tam asi mr̥tyór mā pāhi_íti híraṇyam úpāsyati /
Sentence: 9    amŕ̥tam evá mr̥tyór antárdʰatte /
Sentence: 10    śatámānaṃ bʰavati //

Verse: 2    {BS 1.7.8.47}
Sentence: 1    śata_ā́yuḥ púruṣaḥ śata_índriyaḥ /
Sentence: 2    ā́yuṣy evá_indriyé prátitiṣṭhati /
Sentence: 3    didyón mā pāhi_íty upáriṣṭād ádʰinídadʰāti /
Sentence: 4    ubʰayáta evā́smai śárma dadʰāti /
Sentence: 5    áveṣṭā dandaśū́kā íti klībám̐ sī́sena vidʰyati /
Sentence: 6    dandaśū́kān evá_avayajate /
Sentence: 7    tásmāt klībáṃ dandaśū́kā dám̐śukāḥ /
Sentence: 8    nírastaṃ námuceḥ śira íti lohitāyasáṃ nírasyati /
Sentence: 9    pāpmā́nam evá námuciṃ nirávadayate /
Sentence: 10    prāṇā́ ātmánaḥ pū́rve 'bʰiṣícyā íty āhuḥ //

Verse: 3    {BS 1.7.8.48}
Sentence: 1    sómo rā́jā váruṇaḥ /
Sentence: 2    devā́ dʰarmasúvaś ca yé /
Sentence: 3    té_te vā́cam̐ suvantāṃ té_te prāṇám̐ suvantām íty āha /
Sentence: 4    prāṇā́n evá_ātmánaḥ pū́rvān abʰíṣiñcati /
Sentence: 5    yád brūyā́t /
Sentence: 6    agnés tvā téjasā_abʰíṣiñcāmi_íti /
Sentence: 7    tejasvy èva syāt /
Sentence: 8    duścármā tú bʰavet /
Sentence: 9    sómasya tvā́ dyumnéna_abʰíṣiñcāmi_íty āha /
Sentence: 10    saumyó vái devátayā púruṣaḥ //

Verse: 4    {BS 1.7.8.49}
Sentence: 1    sváyā_eváinaṃ devátayā_abʰíṣiñcati /
Sentence: 2    agnés téjasā_íty āha /
Sentence: 3    téja evā́smin dadʰāti /
Sentence: 4    sū́ryasya várcasā_íty āha /
Sentence: 5    várca evā́smin dadʰāti /
Sentence: 6    índrasya_indriyéṇa_íty āha /
Sentence: 7    indriyám evā́smin dadʰāti /
Sentence: 8    mitrā́váruṇayor vīryèṇa_íty āha /
Sentence: 9    vīràm evā́smin dadʰāti /
Sentence: 10    marútām ójasā_íty āha //

Verse: 5    {BS 1.7.8.50}
Sentence: 1    ója evā́smin dadʰāti /
Sentence: 2    kṣatrā́ṇāṃ kṣatrápatir asi_íty āha /
Sentence: 3    kṣatrā́ṇām eváinaṃ kṣatrápatiṃ karoti /
Sentence: 4    áti divás pāhi_íty āha /
Sentence: 5    áty anyā́n pāhi_iti vā́vá_etád āha /
Sentence: 6    samā́vavr̥trann adʰarā́g údīcīr íty āha /
Sentence: 7    rāṣṭrám evā́smin dʰruvám akaḥ /
Sentence: 8    uccʰéṣaṇena juhoti /
Sentence: 9    uccʰéṣaṇabʰāgo vái rudráḥ /
Sentence: 10    bʰāgadʰéyena_evá rudráṃ nirávadayate //

Verse: 6    {BS 1.7.8.51}
Sentence: 1    údaṅ parétya_ágnīddʰre juhoti /
Sentence: 2    eṣā́ vái rudrásya dík /
Sentence: 3    svā́yām evá diśí rudráṃ nirávadayate /
Sentence: 4    rúdra yát te kráyī páraṃ nā́ma_íty āha /
Sentence: 5    yád vā́ asya kráyī páraṃ nā́ma /
Sentence: 6    téna vā́ eṣá hinasti /
Sentence: 7    yám̐ hinásti /
Sentence: 8    ténaiváinam̐ sahá śamáyati /
Sentence: 9    tásmai hutám asi yaméṣṭam asi_íty āha /
Sentence: 10    yamā́d evā́sya mr̥tyúm ávayajate //

Verse: 7    {BS 1.7.8.52}
Sentence: 1    prájāpate ná tvád etā́ny anyá íti tásyai gr̥hé juhuyāt /
Sentence: 2    yā́ṃ kāmáyeta rāṣṭrám asyai prajā́ syād íti /
Sentence: 3    rāṣṭrám evā́syai prajā́ bʰavati /
Sentence: 4    parṇamáyena_adʰvaryúr abʰíṣiñcati /
Sentence: 5    brahmavarcasám evā́smin tvíṣiṃ dadʰāti /
Sentence: 6    áudumbareṇa rājanyàḥ /
Sentence: 7    ū́rjam evā́sminn annā́dyaṃ dadʰāti /
Sentence: 8    ā́śvattʰena váiśyaḥ /
Sentence: 9    víśam evā́smin púṣṭiṃ dadʰāti /
Sentence: 10    náiyagrodʰena jányaḥ /
Sentence: 11    mitrā́ṇy evā́smai kalpayati /
Sentence: 12    átʰo prátiṣṭhityai //

Paragraph: 9 
Verse: 1    {BS 1.7.9.53}
Sentence: 1    índrasya vájro 'si vā́rtragʰna íti rátʰam upā́vaharati víjityai /
Sentence: 2    mitrā́váruṇayos tvā praśāstróḥ praśíṣā yunajmi_íty āha /
Sentence: 3    bráhmaṇā_eváinaṃ devátābʰyāṃ yunakti /
Sentence: 4    praṣṭivāhínaṃ yunakti /
Sentence: 5    praṣṭivāhī́ vái devaratʰáḥ /
Sentence: 6    devaratʰám evā́smai yunakti /
Sentence: 7    tráyó 'śvā bʰavanti /
Sentence: 8    rátʰaś caturtʰáḥ /
Sentence: 9    dváu savyeṣṭhasāratʰī́ /
Sentence: 10    ṣáṭ sáṃpadyante //

Verse: 2    {BS 1.7.9.54}
Sentence: 1    ṣáḍ vā́ r̥távaḥ /
Sentence: 2    r̥túbʰir eváinaṃ yunakti /
Sentence: 3    viṣṇukramā́n kramate /
Sentence: 4    víṣṇur evá bʰūtvā_ímā́m̐l lokā́n abʰíjayati /
Sentence: 5    yáḥ kṣatríyaḥ prátihitaḥ /
Sentence: 6    sò 'nvā́rabʰate /
Sentence: 7    rāṣṭrám evá bʰavati /
Sentence: 8    triṣṭúbʰā_anvā́rabʰate /
Sentence: 9    indriyáṃ vái triṣṭúk /
Sentence: 10    indriyám evá yájamāne dadʰāti //

Verse: 3    {BS 1.7.9.55}
Sentence: 1    marútāṃ prasavé jeṣam íty āha /
Sentence: 2    marúdbʰir evá prásūta újjayati /
Sentence: 3    āptáṃ mána íty āha /
Sentence: 4    yád evá {AS yádaiva} mánasā_áipsīt /
Sentence: 5    tád āpat /
Sentence: 6    rājanyàṃ jināti /
Sentence: 7    ánākrānta evá_ākramate /
Sentence: 8    ví vā́ eṣá indriyéṇa vīryèṇa_r̥dʰyate /
Sentence: 9    yó rājanyàṃ jinā́ti /
Sentence: 10    sám ahám indriyéṇa vīryèṇa_íty āha //

Verse: 4    {BS 1.7.9.56}
Sentence: 1    indriyám evá vīryàm ātmán dʰatte /
Sentence: 2    paśūnā́ṃ manyúr asi táva_iva me manyúr bʰūyād íti vā́rāhī upānáhāv úpamuñcate /
Sentence: 3    paśūnā́ṃ vā́ eṣá manyúḥ /
Sentence: 4    yád varāháḥ /
Sentence: 5    téna_evá paśūnā́ṃ manyúm ātmán dʰatte /
Sentence: 6    abʰí vā́ iyám̐ suṣuvāṇáṃ kāmayate /
Sentence: 7    tásya_īśvarā́_indriyáṃ vīryàm ā́dātoḥ /
Sentence: 8    vā́rāhī upānáhāv úpamuñcate /
Sentence: 9    asyā́ evá_antárdʰatte /
Sentence: 10    indriyásya vīryàsya_ánāttyai {thus corrected, BS,AS ánātyai, also in 3.3.10.2} //

Verse: 5    {BS 1.7.9.57}
Sentence: 1    námo mātré pr̥tʰivyā́ íty āha_áhim̐sāyai /
Sentence: 2    íyad asy ā́yur asy ā́yur me dʰehi_íty āha /
Sentence: 3    ū́rjam evá_ātmán dʰatte /
Sentence: 4    ū́rj_asi_ū́rjaṃ me dʰehi_íty āha {this sentence is not in the original version} /
Sentence: 5    ū́rjam evá_ātmán dʰatte {this sentence is not in the original version} /
Sentence: 6    yúṅṅ asi várco 'si várco máyi dʰehi_íty āha /
Sentence: 7    várca evá_ātmán dʰatte /
Sentence: 8    ekadʰā́ brahmáṇa úpaharati /
Sentence: 9    ekadʰā_évá yájamāna ā́yur ū́rjaṃ várco dadʰāti /
Sentence: 10    ratʰavimocanī́yā juhoti prátiṣṭhityai //

Verse: 6    {BS 1.7.9.58}
Sentence: 1    tráyó 'śvā bʰavanti /
Sentence: 2    rátʰaś caturtʰáḥ /
Sentence: 3    tásmāc catúr juhoti /
Sentence: 4    yád ubʰáu sahá_avatíṣṭhetām /
Sentence: 5    samānáṃ lokám iyātām /
Sentence: 6    sahá saṃgrahītrā́ ratʰavā́hane rátʰam ā́dadʰāti /
Sentence: 7    suvargā́d eváinaṃ lokā́d antárdadʰāti /
Sentence: 8    ham̐sáḥ śuciṣád íty ā́dadʰāti /
Sentence: 9    bráhmaṇā_eváinam upāvahárati /
Sentence: 10    bráhmaṇā dadʰāti /
Sentence: 11    áticcʰandasā_ā́dadʰāti /
Sentence: 12    áticcʰandā vái sárvāṇi cʰándām̐si /
Sentence: 13    sárvebʰir eváinaṃ cʰándobʰir ā́dadʰāti /
Sentence: 14    várṣma vā́ eṣā́ cʰándasām /
Sentence: 15    yád áticcʰandāḥ /
Sentence: 16    yád áticcʰandasā dádʰāti {áticcʰandasā_ā́dadʰāti?} /
Sentence: 17    várṣma_eváinam̐ samānā́nāṃ karoti //

Paragraph: 10 
Verse: 1    {BS 1.7.10.59}
Sentence: 1    mitrò 'si váruṇo 'si_íty āha /
Sentence: 2    maitráṃ vā́ áhaḥ /
Sentence: 3    vāruṇī́ rā́triḥ /
Sentence: 4    ahorātrā́bʰyām eváinam upā́vaharati /
Sentence: 5    mitrò 'si váruṇo 'si_íty āha /
Sentence: 6    maitró vái dákṣiṇaḥ /
Sentence: 7    vāruṇáḥ savyáḥ /
Sentence: 8    vaiśvadevy ā̀míkṣā /
Sentence: 9    svám eváinau bʰāgadʰéyam upāvàharati /
Sentence: 10    sám aháṃ víśvair deváir íty āha //

Verse: 2    {BS 1.7.10.60}
Sentence: 1    vaiśvadevyò vái prajā́ḥ /
Sentence: 2    tā́ evá_ā́dyāḥ kurute /
Sentence: 3    kṣatrásya nā́bʰir asi kṣatrásya yónir asi_íty adʰīvāsám ā́str̥ṇāti sayonitvā́ya /
Sentence: 4    syonā́m ā́sīda suṣádām ā́sīda_íty āha /
Sentence: 5    yatʰāyajúr eváitát /
Sentence: 6    mā́ tvā him̐sīn mā_mā him̐sīd íty āha_áhim̐sāyai /
Sentence: 7    níṣasāda dʰr̥távrato váruṇaḥ pastyā̀sv ā́ sā́mrājyāya sukrátur íty āha /
Sentence: 8    sā́mrājyam eváinam̐ sukrátuṃ karoti /
Sentence: 9    bráhmā́3m̐ tvám̐ rājan brahmā́_asi savitā́si satyásava íty āha /
Sentence: 10    savitā́ram eváinam̐ satyásavaṃ karoti //

Verse: 3    {BS 1.7.10.61}
Sentence: 1    bráhmā́3m̐ tvám̐ rājan brahmā́_asi_índro 'si satya_ójā íty āha /
Sentence: 2    índram eváinam̐ satya_ójasaṃ karoti /
Sentence: 3    bráhmā́3m̐ tvám̐ rājan brahmā́_asi mitrò 'si suśéva íty āha /
Sentence: 4    mitrám eváinam̐ suśévaṃ karoti /
Sentence: 5    bráhmā́3m̐ tvám̐ rājan brahmā́_asi váruṇo 'si satyádʰarmā_íty āha /
Sentence: 6    váruṇam eváinam̐ satyádʰarmāṇaṃ karoti /
Sentence: 7    savitā́_asi satyásava íty āha /
Sentence: 8    gāyatrī́m eváiténa_abʰivyā́harati /
Sentence: 9    índro 'si satya_ójā íty āha /
Sentence: 10    triṣṭúbʰam eváiténa_abʰivyā́harati //

Verse: 4    {BS 1.7.10.62}
Sentence: 1    mitrò 'si suśéva íty āha /
Sentence: 2    jágatīm eváiténa_abʰivyā́harati /
Sentence: 3    satyám etā́ devátāḥ /
Sentence: 4    satyám etā́ni cʰándām̐si /
Sentence: 5    satyám evá_avarundʰe /
Sentence: 6    váruṇo 'si satyádʰarmā_íty āha /
Sentence: 7    anuṣṭúbʰam eváiténa_abʰivyā́harati /
Sentence: 8    satya_anr̥té vā́ anuṣṭúp /
Sentence: 9    satya_anr̥té váruṇaḥ /
Sentence: 10    satya_anr̥té evá_avarundʰe //

Verse: 5    {BS 1.7.10.63}
Sentence: 1    ná_enam̐ satya_anr̥té udité him̐staḥ /
Sentence: 2    yá eváṃ véda /
Sentence: 3    índrasya vájro 'si vā́rtragʰna íti spʰyáṃ práyaccʰati /
Sentence: 4    vájro vái spʰyaḥ /
Sentence: 5    vájreṇa_evā́smā avaraparám̐ randʰayati /
Sentence: 6    evám̐ hí tát_śréyaḥ /
Sentence: 7    yád asmā eté rádʰyeyuḥ /
Sentence: 8    díśo 'bʰy àyam̐ rā́jā_abʰūd íti páñcākṣā́n práyaccʰati /
Sentence: 9    eté vái sárvé 'yāḥ /
Sentence: 10    áparājāyinam eváinaṃ karoti //

Verse: 6    {BS 1.7.10.64}
Sentence: 1    odanám údbruvate /
Sentence: 2    parameṣṭhī́ vā́ eṣáḥ /
Sentence: 3    yád odanáḥ /
Sentence: 4    paramā́m eváinam̐ śríyaṃ gamayati /
Sentence: 5    súślokā́3m̐ súmaṅgalā́3m̐ {BS súślokā́4ṃ súmaṅgalā́4ṃ} sátyarājā́3n íty āha /
Sentence: 6    āśiṣam eváitā́m ā́śāste /
Sentence: 7    śaunaḥśepám {AS śyaunaḥśépam} ā́kʰyāpayate /
Sentence: 8    varuṇapāśā́d eváinaṃ muñcati /
Sentence: 9    paraḥśatáṃ bʰavati /
Sentence: 10    śata_ā́yuḥ púruṣaḥ śata_índriyaḥ /
Sentence: 11    ā́yuṣy evá_indriyé prátitiṣṭhati /
Sentence: 12    mārutásya ca_ékavim̐śatikapālasya vaiśvadevyái ca_āmíkṣāyā agnáye sviṣṭakŕ̥te samávadyati /
Sentence: 13    devátābʰir eváinam ubʰayátaḥ {BS /} párigr̥hṇāti /
Sentence: 14    apā́ṃ náptre svā́hā_ūrjó náptre svā́hā_agnáye gr̥hápataye svā́hā_íti tisrá ā́hutīr juhoti /
Sentence: 15    tráya imé lokā́ḥ /
Sentence: 16    eṣv èvá lokéṣu prátitiṣṭhati //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.