TITUS Texts: Old Persian Corpus

TITUS
Old Persian Corpus
Part No. 32

Text: DNa
DNa

Line: 1    𐎲𐎥 𐏐 𐎺𐏀𐎼𐎣 𐏐 𐎠𐎢𐎼𐎶𐏀𐎭𐎠 𐏐 𐏃𐎹 𐏐 𐎡𐎶/𐎠𐎶
   b-g : v-z-r-k : a-u-r-m-z-d-a : h-y : i-m-/a-m
   baga : vazraka : Auramazdā : hya : imām

Line: 2    𐏐 𐎲𐎢𐎷𐎡𐎶 𐏐 𐎠𐎭𐎠 𐏐 𐏃𐎹 𐏐 𐎠𐎺𐎶 𐏐 𐎠𐎿𐎶/𐎠𐎴𐎶
   : b-u-mi-i-m : a-d-a : h-y : a-v-m : a-s-m-/a-n-m
   : būmim : adā : hya : avam : asmānam

Line: 3    𐏐 𐎠𐎭𐎠 𐏐 𐏃𐎹 𐏐 𐎶𐎼𐎫𐎡𐎹𐎶 𐏐 𐎠𐎭𐎠 𐏐 𐏃/𐎹
   : a-d-a : h-y : m-r-t-i-y-m : a-d-a : h-/y
   : adā : hya : martiyam : adā : hya

Line: 4    𐏐 𐏁𐎡𐎹𐎠𐎫𐎡𐎶 𐏐 𐎠𐎭𐎠 𐏐 𐎶𐎼𐎫𐎡𐎹𐏃𐎹𐎠
   : š-i-y-a-t-i-m : a-d-a : m-r-t-i-y-h-y-a
   : šiyātim : adā : martiyahyā

Line: 5    𐏐 𐏃𐎹 𐏐 𐎭𐎠𐎼𐎹𐎺𐎢𐎶 𐏐 𐎧𐏁𐎠𐎹𐎰𐎡𐎹𐎶 𐏐 𐎠𐎤/𐎢𐎴𐎢𐏁
   : h-y : d-a-r-y-v-u-m : x-š-a-y-ϑ-i-y-m : a-ku-/u-n-u-š
   : hya : Dārayavaum : xšāyaϑiyam : akunauš

Line: 6    𐏐 𐎠𐎡𐎺𐎶 𐏐 𐎱𐎽𐎢𐎺𐎴𐎠𐎶 𐏐 𐎧𐏁𐎠𐎹𐎰/𐎡𐎹𐎶
   : a-i-v-m : p-ru-u-v-n-a-m : x-š-a-y-ϑ-/i-y-m
   : aivam : parūvnām : xšāyaϑiyam

Line: 7    𐏐 𐎠𐎡𐎺𐎶 𐏐 𐎱𐎽𐎢𐎺𐎴𐎠𐎶 𐏐 𐎳𐎼𐎶𐎠𐎫𐎠/𐎼𐎶
   : a-i-v-m : p-ru-u-v-n-a-m : f-r-m-a-t-a-/r-m
   : aivam : parūvnām : framātāram

Line: 8    𐏐 𐎠𐎭𐎶 𐏐 𐎭𐎠𐎼𐎹𐎺𐎢𐏁 𐏐 𐎧𐏁𐎠𐎹𐎰𐎡𐎹 𐏐 𐎺/𐏀𐎼𐎣
   : a-d-m : d-a-r-y-v-u-š : x-š-a-y-ϑ-i-y : v-/z-r-k
   : adam : Dārayavauš : xšāyaϑiya : vazraka

Line: 9    𐏐 𐎧𐏁𐎠𐎹𐎰𐎡𐎹 𐏐 𐎧𐏁𐎠𐎹𐎰𐎡𐎹𐎠𐎴𐎠𐎶
   : x-š-a-y-ϑ-i-y : x-š-a-y-ϑ-i-y-a-n-a-m
   : xšāyaϑiya : xšāyaϑiyānām

Line: 10    𐏐 𐎧𐏁𐎠𐎹𐎰𐎡𐎹 𐏐 𐎭𐏃𐎹𐎢𐎴𐎠𐎶 𐏐 𐎻𐎡𐎿𐎱𐏀𐎴𐎠/𐎴𐎠𐎶
   : x-š-a-y-ϑ-i-y : d-h-y-u-n-a-m : vi-i-s-p-z-n-a-/n-a-m
   : xšāyaϑiya : dahyūnām : vispazanānām

Line: 11    𐏐 𐎧𐏁𐎠𐎹𐎰𐎡𐎹 𐏐 𐎠𐏃𐎹𐎠𐎹𐎠 𐏐 𐎲𐎢𐎷𐎡/𐎹𐎠
   : x-š-a-y-ϑ-i-y : a-h-y-a-y-a : b-u-mi-i-/y-a
   : xšāyaϑiya : ahyāyā : būmiyā

Line: 12    𐏐 𐎺𐏀𐎼𐎣𐎠𐎹𐎠 𐏐 𐎯𐎢𐎼𐎡<𐎹 𐏐> 𐎠𐎱𐎡𐎹 𐏐 𐎻𐎡𐏁𐎫𐎠𐎿/𐎱𐏃𐎹𐎠
   : v-z-r-k-a-y-a : du-u-r-i-<y :> a-p-i-y : vi-i-š-t-a-s-/p-h-y-a
   : vazrakāyā : dūraiy : apiy : Vištāspahyā

Line: 13    𐏐 𐎱𐎢𐏂 𐏐 𐏃𐎧𐎠𐎶𐎴𐎡𐏁𐎡𐎹 𐏐 𐎱𐎠𐎼𐎿 𐏐 𐎱/𐎠𐎼𐎿𐏃𐎹𐎠
   : p-u-ç : h-x-a-m-n-i-š-i-y : p-a-r-s : p-/a-r-s-h-y-a
   : puça : Haxāmanišiya : Pārsa : Pārsahyā

Line: 14    𐏐 𐎱𐎢𐏂 𐏐 𐎠𐎼𐎡𐎹 𐏐 𐎠𐎼𐎡𐎹 𐏐 𐎨𐎡/𐏂
   : p-u-ç : a-r-i-y : a-r-i-y : c-i-/ç
   : puça : Ariya : Ariya : ciça

Line: 15    𐏐 𐎰𐎠𐎫𐎡𐎹 𐏐 𐎭𐎠𐎼𐎹𐎺𐎢𐏁 𐏐 𐎧𐏁[𐎠]𐎹/𐎰𐎡𐎹
   : ϑ-a-t-i-y : d-a-r-y-v-u-š : x-š-[a]-y-/ϑ-i-y
   : ϑātiy : Dārayavauš : xšāyaϑiya

Line: 16    𐏐 𐎺𐏁𐎴𐎠 𐏐 𐎠𐎢𐎼𐎶𐏀𐎭𐎠𐏃𐎠 𐏐 𐎡𐎶[𐎠 𐏐]
   : v-š-n-a : a-u-r-m-z-d-a-h-a : i-m-[a :]
   : vašnā : Auramazdāhā : imā :

Line: 17    𐎭𐏃𐎹𐎠𐎺 𐏐 𐎫𐎹𐎠 𐏐 𐎠𐎭𐎶 𐏐 𐎠𐎥𐎼𐎲𐎠𐎹[𐎶 𐏐]
   d-h-y-a-v : t-y-a : a-d-m : a-g-r-b-a-y-[m :]
   dahyāva : tyā : adam : agarbāyam :

Line: 18    𐎠𐎱𐎫𐎼𐎶 𐏐 𐏃𐎨𐎠 𐏐 𐎱𐎠𐎼𐎿𐎠 𐏐 𐎠𐎭𐎶𐏁𐎠[𐎶 𐏐]
   a-p-t-r-m : h-c-a : p-a-r-s-a : a-d-m-š-a-[m :]
   apataram : hacā : Pārsā : adamšām :

Line: 19    𐎱𐎫𐎡𐎹𐎧𐏁𐎹𐎡𐎹 𐏐 𐎶𐎴𐎠 𐏐 𐎲𐎠𐎪𐎡𐎶 𐏐 𐎠𐎲[𐎼]/𐏃
   p-t-i-y-x-š-y-i-y : m-n-a : b-a-ji-i-m : a-b-[r]-/h
   patiyaxšayaiy : manā : bājim : abaraha

Line: 20    𐏐 𐎫𐎹𐏁𐎠𐎶 𐏐 𐏃𐎨𐎠𐎶 𐏐 𐎠𐎰𐏃𐎹 𐏐 𐎠𐎺 𐏐 [𐎠]/𐎤𐎢𐎴𐎺
   : t-y-š-a-m : h-c-a-m : a-ϑ-h-y : a-v : [a]-/ku-u-n-v
   : tyašām : hacāma : aϑahya : ava : akunava

Line: 21    𐏐 𐎭𐎠𐎫𐎶 𐏐 𐎫𐎹 𐏐 𐎶𐎴𐎠 𐏐 𐎠𐎺𐎮𐎡[𐏁 𐏐]
   : d-a-t-m : t-y : m-n-a : a-v-di-i-[š :]
   : dātam : tya : manā : avadiš :

Line: 22    𐎠𐎭𐎠𐎼𐎡𐎹 𐏐 𐎶𐎠𐎭 𐏐 𐎢𐎺𐎩 𐏐 𐎱𐎼𐎰𐎺 𐏐 𐏃𐎼[𐎡]/𐎺
   a-d-a-r-i-y : m-a-d : u-v-j : p-r-ϑ-v : h-r-[i]-/v
   adāraiya : Māda : Ūvja : Parϑava : Haraiva

Line: 23    𐏐 𐎲𐎠𐎧𐎫𐎼𐎡𐏁 𐏐 𐎿𐎢𐎦𐎢𐎭 𐏐 𐎢𐎺𐎠𐎼𐏀[𐎷]/𐎡𐏁
   : b-a-x-t-r-i-š : s-u-gu-u-d : u-v-a-r-z-[mi]-/i-š
   : Bāxtriš : Suguda : Uvārazmiš

Line: 24    𐏐 𐏀𐎼𐎣 𐏐 𐏃𐎼𐎢𐎺𐎫𐎡𐏁 𐏐 𐎰𐎫𐎦𐎢𐏁 𐏐 𐎥/𐎭𐎠𐎼
   : z-r-k : h-r-u-v-t-i-š : ϑ-t-gu-u-š : g-/d-a-r
   : Zraka : Harauvatiš : Θataguš : Gadāra

Line: 25    𐏐 𐏃𐎡𐎯𐎢𐏁 𐏐 𐎿𐎣𐎠 𐏐 𐏃𐎢𐎶𐎺𐎼𐎥𐎠 𐏐 𐎿/𐎣𐎠
   : h-i-du-u-š : s-k-a : h-u-m-v-r-g-a : s-/k-a
   : Hiduš : Sakā : haumavargā : Sakā

Line: 26    𐏐 𐎫𐎡𐎥𐎼𐎧𐎢𐎭𐎠 𐏐 𐎲𐎠𐎲𐎡𐎽𐎢[𐏁 𐏐] 𐎠/𐎰𐎢𐎼𐎠
   : t-i-g-r-x-u-d-a : b-a-b-i-ru-u-[š :] a-/ϑ-u-r-a
   : tigraxaudā : Bābirauš : Aϑurā

Line: 27    𐏐 𐎠𐎼𐎲𐎠𐎹 𐏐 𐎸𐎢𐎭𐎼𐎠𐎹 𐏐 𐎠𐎼𐎷[𐎡𐎴]
   : a-r-b-a-y : mu-u-d-r-a-y : a-r-mi-[i-n]
   : Arabāya : Mudrāya : Armina

Line: 28    𐏐 𐎣𐎫𐎱𐎬𐎢𐎣 𐏐 𐎿𐎱𐎼𐎭 𐏐 𐎹𐎢𐎴 𐏐 𐎿𐎣𐎠 𐏐 𐎫𐎹𐎡[𐎹 𐏐 𐎱]/𐎼𐎭𐎼𐎹
   : k-t-p-tu-u-k : s-p-r-d : y-u-n : s-k-a : t-y-i-[y : p]-/r-d-r-y
   : Katpatuka : Sparda : Yauna : Sakā : tyaiy : paradraya

Line: 29    𐏐 𐎿𐎤𐎢𐎭𐎼 𐏐 𐎹𐎢𐎴𐎠 𐏐 𐎫𐎣𐎲𐎼𐎠 𐏐 𐎱𐎢𐎫[𐎠]𐎹/𐎠
   : s-ku-u-d-r : y-u-n-a : t-k-b-r-a : p-u-t-[a]-y-/a
   : Skudra : Yaunā : takabarā : Putāyā

Line: 30    𐏐 𐎤𐎢𐏁𐎡𐎹𐎠 𐏐 𐎶𐎨𐎡𐎹𐎠 𐏐 𐎣𐎼𐎣𐎠 𐏐 𐎰𐎠𐎫𐎡𐎹 𐏐 𐎭/𐎠𐎼𐎹𐎺𐎢𐏁
   : ku-u-š-i-y-a : m-c-i-y-a : k-r-k-a : ϑ-a-t-i-y : d-/a-r-y-v-u-š
   : Kūšiyā : Maciyā : Karkā : ϑātiy : Dārayavauš

Line: 31    𐏐 𐎧𐏁𐎠𐎹𐎰𐎡𐎹 𐏐 𐎠𐎢𐎼𐎶𐏀𐎭𐎠 [𐏐 𐎹]𐎰/𐎠
   : x-š-a-y-ϑ-i-y : a-u-r-m-z-d-a [: y]-ϑ-/a
   : xšāyaϑiya : Auramazdā : yaϑā

Line: 32    𐏐 𐎠𐎺𐎡𐎴 𐏐 𐎡𐎶𐎠𐎶 𐏐 𐎲𐎢𐎷𐎡𐎶 𐏐 𐎹𐎢[𐎭𐎫𐎡𐎶 𐏐]
   : a-v-i-n : i-m-a-m : b-u-mi-i-m : y-u-[d-t-i-m :]
   : avaina : imām : būmim : yaudatim :

Line: 33    𐎱𐎿𐎠𐎺𐎮𐎡𐎶 𐏐 𐎶𐎴𐎠 𐏐 𐎳𐎼𐎠𐎲𐎼 𐏐 𐎶𐎠𐎶 [𐏐 𐎧𐏁𐎠/𐎹𐎰𐎡𐎹𐎶
   p-s-a-v-di-i-m : m-n-a : f-r-a-b-r : m-a-m [: x-š-a-/y-ϑ-i-y-m
   pasāvadim : manā : frābara : mām : xšāyaϑiyam

Line: 34    𐏐 𐎠𐎤𐎢𐎴𐎢𐏁 𐏐 𐎠𐎭𐎶 𐏐 𐎧𐏁𐎠[𐎹𐎰]𐎡𐎹
   : a-ku-u-n-u-š : a-d-m : x-š-a-[y-ϑ]-i-y
   : akunauš : adam : xšāyaϑiya

Line: 35    𐏐 𐎠𐎷𐎡𐎹 𐏐 𐎺𐏁𐎴𐎠 𐏐 𐎠𐎢𐎼𐎶𐏀𐎭𐎠𐏃[𐎠] 𐏐 𐎠/𐎭𐎶𐏁𐎡𐎶
   : a-mi-i-y : v-š-n-a : a-u-r-m-z-d-a-h-[a] : a-/d-m-š-i-m
   : amiy : vašnā : Auramazdāhā : adamšim

Line: 36    𐏐 𐎥𐎠𐎰𐎺𐎠 𐏐 𐎴𐎡𐎹𐏁𐎠𐎭𐎹𐎶 [𐏐 𐎫𐎹]𐏁𐎠/𐎶
   : g-a-ϑ-v-a : n-i-y-š-a-d-y-m [: t-y]-š-a-/m
   : gāϑavā : niyašādayam : tyašām

Line: 37    𐏐 𐎠𐎭𐎶 𐏐 𐎠𐎰𐏃𐎶 𐏐 𐎠𐎺 𐏐 𐎠𐎤𐎢𐎴𐎺 𐏐 𐎹[𐎰𐎠 𐏐] 𐎶𐎠𐎶 𐏐
   : a-d-m : a-ϑ-h-m : a-v : a-ku-u-n-v : y-[ϑ-a :] m-a-m :
   : adam : aϑaham : ava : akunava : yaϑā : mām :

Line: 38    𐎣𐎠𐎶 𐏐 𐎠𐏃 𐏐 𐎹𐎮𐎡𐎱𐎫𐎡𐎹 𐏐 𐎶𐎴𐎡𐎹[𐎠𐏃𐎡𐎹 𐏐 𐎫]/𐎹
   k-a-m : a-h : y-di-i-p-t-i-y : m-n-i-y-[a-h-i-y : t]-/y
   kāma : āha : yadipatiy : maniyāhaiy : tya

Line: 39    𐏐 𐎨𐎡𐎹𐎣𐎼𐎶 𐏐 [𐎠𐏃 𐏐 𐎠]𐎺𐎠 𐏐 𐎭𐏃𐎹𐎠𐎺
   : c-i-y-k-r-m : [a-h : a]-v-a : d-h-y-a-v
   : ciyakaram : āha : avā : dahyāva

Line: 40    𐏐 𐎫𐎹𐎠 𐏐 𐎭𐎠𐎼𐎹[𐎺]𐎢𐏁 𐏐 𐎧𐏁𐎠𐎹[𐎰]𐎡𐎹
   : t-y-a : d-a-r-y-[v]-u-š : x-š-a-y-[ϑ]-i-y
   : tyā : Dārayavauš : xšāyaϑiya

Line: 41    𐏐 𐎠𐎭𐎠𐎼𐎹 𐏐 𐎱𐎫𐎡𐎣𐎼𐎠 𐏐 𐎮𐎡𐎮𐎡𐎹 𐏐 𐎫𐎹𐎡[𐎹] 𐏐 𐎥/𐎠𐎰𐎢𐎶
   : a-d-a-r-y : p-t-i-k-r-a : di-i-di-i-y : t-y-i-[y] : g-/a-ϑ-u-m
   : adāraya : patikarā : dīdiy : tyaiy : gāϑum

Line: 42    𐏐 𐎲𐎼𐎫𐎡𐎹 𐏐 𐎠[𐎺]𐎭𐎠 𐏐 𐎧𐏁𐎴𐎠𐎿𐎠𐏃𐎹 𐏐
   : b-r-t-i-y : a-[v]-d-a : x-š-n-a-s-a-h-y :
   : baratiy : avadā : xšnāsāhy :

Line: 43    𐎠𐎭𐎫𐎡𐎹 𐏐 𐎠𐏀𐎭𐎠 𐏐 𐎲𐎺𐎠[𐎫]𐎡𐎹 𐏐 𐎱𐎠𐎼[𐎿]𐏃[𐎹𐎠 𐏐]
   a-d-t-i-y : a-z-d-a : b-v-a-[t]-i-y : p-a-r-[s]-h-[y-a :]
   adataiy : azdā : bavātiy : Pārsahyā :

Line: 44    𐎶𐎼𐎫𐎡𐎹𐏃𐎹𐎠 𐏐 𐎯𐎢𐎼𐎡𐎹 𐏐 𐎠𐎼𐏁𐎫[𐎡]𐏁 𐏐 𐎱/𐎼𐎠𐎥𐎶𐎫𐎠
   m-r-t-i-y-h-y-a : du-u-r-i-y : a-r-š-t-[i]-š : p-/r-a-g-m-t-a
   martiyahyā : dūraiy : arštiš : parāgmatā

Line: 45    𐏐 𐎠𐎭𐎫𐎡𐎹 𐏐 𐎠𐏀𐎭𐎠 𐏐 𐎲𐎺𐎠𐎫𐎡/𐎹
   : a-d-t-i-y : a-z-d-a : b-v-a-t-i-/y
   : adataiy : azdā : bavātiy

Line: 46    𐏐 𐎱𐎠𐎼𐎿 𐏐 𐎶𐎼𐎫𐎡𐎹 𐏐 𐎯𐎢𐎼𐎹𐎱𐎡𐎹 [𐏐 𐏃𐎨]𐎠 𐏐 𐎱𐎠/𐎼𐎿𐎠
   : p-a-r-s : m-r-t-i-y : du-u-r-y-p-i-y [: h-c]-a : p-a-/r-s-a
   : Pārsa : martiya : dūrayapiy : hacā : Pārsā

Line: 47    𐏐 𐎱𐎼𐎫𐎼𐎶 𐏐 𐎱𐎫𐎡𐎹𐎩𐎫𐎠 𐏐 𐎰𐎠𐎫𐎡𐎹 𐏐 𐎭𐎠/𐎼𐎹𐎺𐎢𐏁
   : p-r-t-r-m : p-t-i-y-j-t-a : ϑ-a-t-i-y : d-a-/r-y-v-u-š
   : partaram : patiyajatā : ϑātiy : Dārayavauš

Line: 48    𐏐 𐎧𐏁𐎠𐎹𐎰𐎡𐎹 𐏐 𐎠𐎡𐎫 𐏐 𐎫[𐎹 𐏐] 𐎣𐎼𐎫/𐎶
   : x-š-a-y-ϑ-i-y : a-i-t : t-[y :] k-r-t-/m
   : xšāyaϑiya : aita : tya : kartam

Line: 49    𐏐 𐎠𐎺 𐏐 𐎻𐎡𐎿𐎶 𐏐 𐎺𐏁𐎴𐎠 𐏐 𐎠𐎢𐎼𐎶𐏀𐎭𐎠𐏃𐎠 𐏐 𐎠𐎤/𐎢𐎴𐎺𐎶
   : a-v : vi-i-s-m : v-š-n-a : a-u-r-m-z-d-a-h-a : a-ku-/u-n-v-m
   : ava : visam : vašnā : Auramazdāhā : akunavam

Line: 50    𐏐 𐎠𐎢𐎼𐎶𐏀𐎭𐎠<𐎶>𐎡𐎹 𐏐 𐎢𐎱𐎿𐎫𐎠𐎶 𐏐 𐎠𐎲/𐎼
   : a-u-r-m-z-d-a-<m >-i-y : u-p-s-t-a-m : a-b-/r
   : Auramazdāmaiy : upastām : abara

Line: 51    𐏐 𐎹𐎠𐎫𐎠 𐏐 𐎣𐎼𐎫𐎶 𐏐 𐎠𐎤𐎢𐎴[𐎺𐎶 𐏐 𐎶𐎠]𐎶 𐏐 𐎠/𐎢𐎼𐎶𐏀𐎭𐎠
   : y-a-t-a : k-r-t-m : a-ku-u-n-[v-m : m-a]-m : a-/u-r-m-z-d-a
   : yātā : kartam : akunavam : mām : Auramazdā

Line: 52    𐏐 𐎱𐎠𐎬𐎢𐎺 𐏐 𐏃𐎨𐎠 𐏐 𐎥[𐎿𐎫𐎠] 𐏐 𐎢𐎫𐎠𐎶/𐎡𐎹
   : p-a-tu-u-v : h-c-a : g-[s-t-a] : u-t-a-m-/i-y
   : pātuv : hacā : gastā : utāmaiy

Line: 53    𐏐 𐎻𐎡𐎰𐎶 𐏐 𐎢𐎫𐎠 𐏐 𐎡𐎶𐎠𐎶 𐏐 𐎭𐏃𐎹𐎠𐎢𐎶 𐏐 𐎠𐎡𐎫 𐏐 𐎠𐎭/𐎶
   : vi-i-ϑ-m : u-t-a : i-m-a-m : d-h-y-a-u-m : a-i-t : a-d-/m
   : viϑam : utā : imām : dahyāum : aita : adam

Line: 54    𐏐 𐎠𐎢𐎼𐎶𐏀𐎭𐎠𐎶 𐏐 𐎩𐎮𐎡𐎹𐎠𐎷𐎡𐎹 𐏐 𐎠𐎡𐎫𐎶/𐎡𐎹
   : a-u-r-m-z-d-a-m : j-di-i-y-a-mi-i-y : a-i-t-m-/i-y
   : Auramazdām : jadiyāmiy : aitamaiy

Line: 55    𐏐 𐎠𐎢𐎼𐎶𐏀𐎭𐎠 𐏐 𐎭𐎭𐎠𐎬𐎢𐎺 𐏐
   : a-u-r-m-z-d-a : d-d-a-tu-u-v :
   : Auramazdā : dadātuv :

Line: 56    𐎶𐎼𐎫𐎡𐎹𐎠 𐏐 𐏃𐎹𐎠 𐏐 𐎠𐎢𐎼𐎶𐏀𐎭𐎠𐏃/𐎠
   m-r-t-i-y-a : h-y-a : a-u-r-m-z-d-a-h-/a
   martiyā : hyā : Auramazdāhā

Line: 57    𐏐 𐎳𐎼𐎶𐎠𐎴𐎠 𐏐 𐏃𐎢𐎺𐎫𐎡𐎹 𐏐 𐎥𐎿/𐎫𐎠
   : f-r-m-a-n-a : h-u-v-t-i-y : g-s-/t-a
   : framānā : hauvtaiy : gastā

Line: 58    𐏐 𐎶𐎠 𐏐 𐎰𐎭𐎹 𐏐 𐎱𐎰𐎡𐎶 𐏐
   : m-a : ϑ-d-y : p-ϑ-i-m :
   : mā : ϑadaya : paϑim :

Line: 59    𐎫𐎹𐎠𐎶 𐏐 𐎼𐎠𐎿𐎫𐎠𐎶 𐏐 𐎶𐎠
   t-y-a-m : r-a-s-t-a-m : m-a
   tyām : rāstām : mā

Line: 60    𐏐 𐎠𐎺𐎼𐎭 𐏐 𐎶𐎠 𐏐 𐎿𐎫𐎲𐎺
   : a-v-r-d : m-a : s-t-b-v
   : avarada : mā : stabava

This text is part of the TITUS edition of Old Persian Corpus.

Copyright TITUS Project, Frankfurt a/M, 3.11.2013. No parts of this document may be republished in any form without prior permission by the copyright holder.