TITUS
Avestan Corpus
Part No. 153
Previous part

Chapter: 4 
Aiβisrūϑrim Gāh


Paragraph: 1 
Verse: a    xṣ̌naoϑra. ahurahe. mazdā̊:

Verse: Q1Aa    aṣ̌əm. vohū. vahištəm. astī::
Verse: Q1Ab    uštā. astī. uštā. ahmāi.
Verse: Q1Ac    hiiat̰. aṣ̌āi. vahištāi. aṣ̌əm.:: (si. bār.)

Verse: Q1Ba    aṣ̌əm. vohū. vahištəm. astī::
Verse: Q1Bb    uštā. astī. uštā. ahmāi.
Verse: Q1Bc    hiiat̰. aṣ̌āi. vahištāi. aṣ̌əm.::

Verse: Q1Ca    aṣ̌əm. vohū. vahištəm. astī::
Verse: Q1Cb    uštā. astī. uštā. ahmāi.
Verse: Q1Cc    hiiat̰. aṣ̌āi. vahištāi. aṣ̌əm.::


Verse: b    frauuarāne. mazdaiiasnō. zaraϑuštriš. vīdaēuuō. ahura.t̰kaēṣ̌ō.
Verse: c       aiβisrūϑrimāi.1 aibigaiiāi. aṣ̌aone. aṣ̌ahe. raϑβe.
Verse: d          yasnāica. vahmāica. xṣ̌naoϑrāica. frasastaiiaēca:
Verse: e       frādat̰.vīspąm. hujiiāitə̄e. zaraϑuštrōtəmāica. aṣ̌aone. aṣ̌ahe. raϑβe.
Verse: f          yasnāica. vahmāica. xṣ̌naoϑrāica. frasastaiiaēca:

Paragraph: 2 
Verse: a       aṣ̌āunąm.1 frauuaṣ̌inąm.
Verse: b       γənąnąmca.2 vīrō.vąϑβanąm.
Verse: c       yāiriiaiiā̊sca.3 huṣ̌itōiš.
Verse: d       amaheca. hutāštahe. huraoδahe.
Verse: e       vərəϑraγnaheca.4 ahuraδātahe.
Verse: f       vanaiṇtiiā̊sca. uparatātō.
Verse: g          xṣ̌naoϑra. yasnāica. vahmāica. xṣ̌naoϑrāica. frasastaiiaēca.:

Verse: Q1a    2yaϑā. ahū. vairiiō.
Verse: Q1b       zaotā. frā.mē. mrūtē:
Verse: Q1c    aϑā. ratuš. aṣ̌āt̰cīt̰. haca.
Verse: Q1d       frā. aṣ̌auua. vīδuuā̊. mraotū.

Paragraph: 3  {= G. 1,3}
Verse: a    1ahurəm. mazdąm. aṣ̌auuanəm. aṣ̌ahe. ratūm. yazamaide:
Verse: b    zaraϑuštrəm. aṣ̌auuanəm. aṣ̌ahe. ratūm. yazamaide:
Verse: c    zaraϑuštrahe. aṣ̌aonō. frauuaṣ̌īm. yazamaide:
Verse: d    aməṣ̌ə̄. spəṇtə̄. aṣ̌aonąm. yazamaide.::

Paragraph: 4  {= G. 1,4}
Verse: a    aṣ̌āunąm. vaŋuhīš. sūrā̊. spəṇtā̊. frauuaṣ̌aiiō. yazamaide.
Verse: b       astuuatō. manahiiāca:
Verse: c    apanōtəməm. raϑβąm. yazamaide.
Verse: d       yaētuštəməm. yazatanąm.
Verse: e       haŋhanuštəməm. aṣ̌ahe. raϑβąm.
Verse: f       aiβinasąstəməm. jaγmūštəmąm. aṣ̌aonō. aṣ̌ahe. raϑβō. ratufritīm. yazamaide.::

Paragraph: 5 
Verse: a    aiβisrūϑriməm.1 aṣ̌auuanəm. aṣ̌ahe. ratūm. yazamaide:
Verse: b    aibigāim.2 aṣ̌auuanəm. aṣ̌ahe. ratūm. yazamaide:
Verse: c    ϑβąm. ātrəm.3 ahurahe. mazdā̊. puϑrəm. aṣ̌auuanəm. aṣ̌ahe. ratūm. yazamaide:
Verse: d    4asmana. hāuuana. aṣ̌ahe. ratauuō. yazamaide:
Verse: e    aiiaŋhaēna. hāuuana. aṣ̌ahe. ratauuō. yazamaide:4
Verse: f    haδa.zaoϑrəm. haδa.aiβiiā̊ŋhanəm.
Verse: g       imat̰. barəsma. aṣ̌aiia. frastarətəm. aṣ̌auuanəm. aṣ̌ahe. ratūm. yazamaide:
Verse: h    āpe.5 uruuare.6 yazamaide:
Verse: i    aouruuatąm.7 urune.8 aṣ̌auuanəm. aṣ̌ahe. ratūm. yazamaide.::

Paragraph: 6 
Verse: a    frādat̰.vīspąm.hujiiāitīm. aṣ̌auuanəm. aṣ̌ahe. ratūm. yazamaide:
Verse: b    zaraϑuštrəm. aṣ̌auuanəm. aṣ̌ahe. ratūm. yazamaide:
Verse: c    mąϑrəm. spəṇtəm. aṣ̌auuanəm. aṣ̌ahe. ratūm. yazamaide:
Verse: d    gə̄uš. uruuānəm. aṣ̌auuanəm. aṣ̌ahe. ratūm. yazamaide:
Verse: e    zaraϑuštrōtəməmca. aṣ̌auuanəm. aṣ̌ahe. ratūm. yazamaide:
Verse: f    1zaraϑuštrəm. aṣ̌auuanəm. aṣ̌ahe. ratūm. yazamaide.::

Paragraph: 7 
Verse: a    āϑrauuanəm. aṣ̌auuanəm. aṣ̌ahe. ratūm. yazamaide:
Verse: b    1raϑaēštārəm. aṣ̌auuanəm. aṣ̌ahe. ratūm. yazamaide:
Verse: c    vāstrīm. fṣ̌uiiaṇtəm. aṣ̌auuanəm. aṣ̌ahe. ratūm. yazamaide:
Verse: d    nmānahe. nmānō.paitīm. aṣ̌auuanəm. aṣ̌ahe. ratūm. yazamaide:
Verse: e    vīsō. vīspaitīm.2 aṣ̌auuanəm. aṣ̌ahe. ratūm. yazamaide:
Verse: f    zaṇtə̄uš. zaṇtupaitīm. aṣ̌auuanəm. aṣ̌ahe. ratūm. yazamaide:
Verse: g    daiŋ́hə̄uš.3 daiŋ́hupaitīm.4 aṣ̌auuanəm. aṣ̌ahe. ratūm. yazamaide.::

Paragraph: 8 
Verse: a    yuuānəm.1 humanaŋhəm. huuacaŋhəm.2 huš́iiaoϑnəm.
Verse: b       hudaēnəm. aṣ̌auuanəm. aṣ̌ahe. ratūm. yazamaide:
Verse: c    yuuānəm.1 uxδō.vacaŋhəm. aṣ̌auuanəm. aṣ̌ahe. ratūm. yazamaide:
Verse: d       xvaētuuadaϑəm.3 aṣ̌auuanəm. aṣ̌ahe. ratūm. yazamaide:
Verse: e       daiŋ́hāuruuaēsəm.4 aṣ̌auuanəm. aṣ̌ahe. ratūm. yazamaide:
Verse: f    humāim.5 pairijaϑnəm. aṣ̌auuanəm. aṣ̌ahe. ratūm. yazamaide:
Verse: g    nmānahe. nmānō.paϑnīm. aṣ̌auuanəm. aṣ̌ahe. ratūm. yazamaide.::

Paragraph: 9 
Verse: a    nāirikąmca. aṣ̌aonīm. yazamaide:
Verse: b       frāiiō.humatąm.1 frāiiō.hūxtąm.1 frāiiō.huuarštąm.1
Verse: c       huš.hąm.sāstąm. ratuxṣ̌aϑrąm. aṣ̌aonīm.
Verse: d          yąm. ārmaitīm. spəṇtąm.
Verse: e          yā̊sca. tē. γnā̊. ahura. mazda:
Verse: f    narəmca. aṣ̌auuanəm.2 yazamaide:
Verse: g       frāiiō.humatəm.3 frāiiō.hūxtəm.3 frāiiō.huuarštəm.3
Verse: h       vistō.fraorəitīm.4 əuuistō.kaiiaδəm.5
Verse: i          yeŋ́he. š́iiaoϑnāiš. gaēϑā̊. aṣ̌a. frādəṇte:6
Verse: j             zaraϑuštrōtəmahe. raϑβō. yasnāica. vahmāica.
Verse: k    zaraϑuštrōtəməmca. aṣ̌auuanəm. aṣ̌ahe. ratūm. yazamaide.::

Paragraph: 10 
Verse: a    aṣ̌āunąm.1 vaŋuhīš. sūrā̊. spəṇtā̊. frauuaṣ̌aiiō. yazamaide:
Verse: b    γnā̊sca.2 vīrō.vąϑβā̊. yazamaide:
Verse: c    yāiriiąmca. huṣ̌itīm. yazamaide:
Verse: d    aməmca.3 hutaštəm.4 huraoδəm. yazamaide:
Verse: e    vərəϑraγnəmca.5 ahuraδātəm. yazamaide:
Verse: f    vanaiṇtīmca. uparatātəm. yazamaide.::

Paragraph: 11  {= G. 1,9 / Vr. 7,5 / Y. 71,23}
Verse: a    1ϑβąm. ātrəm.2 ahurahe. mazdā̊. puϑrəm. aṣ̌auuanəm. aṣ̌ahe. ratūm. yazamaide:
Verse: b       haδa.zaoϑrəm. haδa.aiβiiā̊ŋhanəm.
Verse: c    imat̰. barəsma. aṣ̌aiia. frastarətəm. aṣ̌auuanəm. aṣ̌ahe. ratūm. yazamaide:
Verse: d    apąm. naptārəm. yazamaide:
Verse: e    +nairīm. saŋhəm. yazamaide::
Verse: f    taxməm. dāmōiš. upamanəm. yazatəm. yazamaide::
Verse: g    iristanąm. uruuąnō. yazamaide::
Verse: h       yā̊. aṣ̌aonąm. frauuaṣ̌aiiō.

Paragraph: 12  {= Y. 71,24}
Verse: a    ratūm. bərəzaṇtəm. yazamaide::
Verse: b       yim. ahurəm. mazdąm.
Verse: c          yō. aṣ̌ahe. apanōtəmō.
Verse: d          yō. aṣ̌ahe. jaγmūštəmō::
Verse: e    vīspa. srauuā̊. zaraϑuštri. yazamaide::
Verse: f    vīspaca. huuaršta. š́iiaoϑna. yazamaide.
Verse: g       varštaca. varəš́iiamnaca.::


Verse: Q1a    yeŋ́hē. hātąm.   āat̰. yesnē. paitī. vaŋhō.
Verse: Q1b    mazdā̊. ahurō. vaēϑā.   aṣ̌āt̰. hacā. yā̊ŋhąmcā.
Verse: Q1c    tąscā. tā̊scā. yazamaide.

Paragraph: 13 
Verse: Q1Aa    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Ab    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Ac    xšaϑrəmcā. ahurāi.ā.   yim. drigubiiō. dadat̰. vāstārəm.:: (du. bār.)

Verse: Q1Ba    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Bb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Bc    xšaϑrəmcā. ahurāi.ā.   yim. drigubiiō. dadat̰. vāstārəm.::


Verse: a    yasnəmca.1 vahməmca. aojasca. zauuarəca. āfrīnāmi.
Verse: b       aṣ̌āunąm.2 frauuaṣ̌inąm.
Verse: c       γənąnąmca. vīrō.vąϑβanąm.
Verse: d       yāiriiaiiā̊sca. huṣ̌itōiš.
Verse: e       amaheca. hutāštahe. huraoδahe.
Verse: f       vərəϑraγnaheca.3 ahuraδātahe.
Verse: g       vanaiṇtiiā̊sca. uparatātō.:

Verse: Q2a    aṣ̌əm. vohū. vahištəm. astī::
Verse: Q2b    uštā. astī. uštā. ahmāi.
Verse: Q2c    hiiat̰. aṣ̌āi. vahištāi. aṣ̌əm.::

{~ Ny. 1,18 / Y. 72,9 / 68,11 / SrB 5}
Verse: Q3a    ahmāi. raēšca.1 xvarənasca.
Verse: Q3b       ahmāi. tanuuō. druuatātəm.
Verse: Q3c       ahmāi. tanuuō. vazduuarə.
Verse: Q3d       ahmāi. tanuuō. vərəϑrəm.
Verse: Q3e       ahmāi. īštīm. pouruš.xvāϑrąm.
Verse: Q3f       ahmāi. āsnąmcit̰. frazaṇtīm.
Verse: Q3g       ahmāi. darəγąm. darəγō.jītīm.
Verse: Q3h       ahmāi. vahištəm. ahūm. aṣ̌aonąm. raocaŋhəm. vīspō.xvāϑrəm:

Verse: h    aϑa. jamiiāt̰. yaϑa. āfrīnāmi.:

Verse: Q4a    aṣ̌əm. vohū. vahištəm. astī::
Verse: Q4b    uštā. astī. uštā. ahmāi.
Verse: Q4c    hiiat̰. aṣ̌āi. vahištāi. aṣ̌əm.::

{= Y. 72,9}
Verse: Q5Aa       hazaŋrəm. baēṣ̌azanąm.
Verse: Q5Ab       baēuuarə. baēṣ̌azanąm. (si. bār.)::
Verse: Q5Ba       hazaŋrəm. baēṣ̌azanąm.
Verse: Q5Bb       baēuuarə. baēṣ̌azanąm.::
Verse: Q5Ca       hazaŋrəm. baēṣ̌azanąm.
Verse: Q5Cb       baēuuarə. baēṣ̌azanąm.::

Verse: Q6a    aṣ̌əm. vohū. vahištəm. astī::
Verse: Q6b    uštā. astī. uštā. ahmāi.
Verse: Q6c    hiiat̰. aṣ̌āi. vahištāi. aṣ̌əm.::

Verse: Q7a    jasa. mē. auuaŋhe. mazda. (si. bār.)
Verse: Q7b    jasa. mē. auuaŋhe. mazda.
Verse: Q7c    jasa. mē. auuaŋhe. mazda.

Verse: Q8b       amahe. hutāštahe. huraoδahe.
Verse: Q8c       vərəϑraγnahe. ahuraδātahe.
Verse: Q8d       vanaiṇtiiā̊sca. uparatātō.::

{= Y. 72,10}
Verse: Q9a       rāmanasca. xvāstrahe.
Verse: Q9b       vaiiaoš. uparō.kairiiehe.
Verse: Q9c       taraδātō. aniiāiš. dāmąn::
Verse: Q9d    aētat̰. tē. vaiiō.
Verse: Q9e       yat̰. tē. asti. spəṇtō.mainiiaom::
Verse: Q9f          ϑβāṣ̌ahe. xvaδātahe.
Verse: Q9g          zruuānahe. akaranahe.
Verse: Q9h          zruuānahe. darəγō.xvaδātahe.:

Verse: Q10a    aṣ̌əm. vohū. vahištəm. astī::
Verse: Q10b    uštā. astī. uštā. ahmāi.
Verse: Q10c    hiiat̰. aṣ̌āi. vahištāi. aṣ̌əm.::

Verse: C1a    kərba. mažd. gunāh. guzārašni. rā. kunōm. ašahī. ruuą.
Verse: C1b       dušārm. rā. ham. kərbaī. i. hamā. vahą. i. haft. buṇdahihā. bə̄. rasāt̰::
Verse: C1c    ašō. bə̄t̰. də̄r. zī.::)

Verse: i    aϑa. jamiiāt̰. yaϑa. āfrīnāmi.:

Verse: Q11a    aṣ̌əm. vohū. vahištəm. astī::
Verse: Q11b    uštā. astī. uštā. ahmāi.
Verse: Q11c    hiiat̰. aṣ̌āi. vahištāi. aṣ̌əm.::



Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.