Chapter: i
Sentence: 1 pad nām ud šnāyišn ī wispān-sūd dādār ohrmazd
Sentence: 2 ud harwisp mēnōg ud gētīg dahišnān yazadān
Sentence: 3 ud frahangān frahang ī dēn ī māzdēsn,
Sentence: 4 kē-š ēd ast bun-xān ī dānāgīh frāz-wizīdār.
Sentence: 5 aziš, pad xwarrah ud kām ī dō axwān abzōnīgān, āfrāh ī dādār ohrmazd
Sentence: 6 ud harwisp meh-ōzān yazadān,
Sentence: 7 ud pad rāyēnišn ud pardazišn ī yazadān-ēzišnīh ō čimīg-warzišnān dānāgān
Sentence: 8 pādāšnīhā nōg nōg ō-xwēšēnīdārīh ī xrad,
Sentence: 9 pad stabrīhā nirmad-windišnīh ī dō-axwānīg, ī ō tan ud ruwān bēšazgartom.
Sentence: 10 čiyōn andar abēzag abdān abd abēgumān ud huhangōšīdag weh dēn ī māzdēsnān pad gōwišn ī dādār ohrmazd ud spitāmān zarduxšt pad was gyāg wizīrēnīd ēstēd
Sentence: 11 kū ōy ī wisp-weh dādār ēn dām pad xrad dād,
Sentence: 12 u-š *wanīgardīh-dāštārīh pad xrad,
Sentence: 13 ud asazišnīg ud apetyārag pad ān ī hamēw-ud-hamēw-rawišnīh anōšagīh nirmadōmandtom abzār ī xrad rāy abāz ō xwēš kunēd.
Sentence: 14 ham čim rāy paydāg
Sentence: 15 kū dānāg-ēw būd kē-š guft
Sentence: 16 kū: agar ēn āšnāg kū yazadān dēn rāstīh ud dād frārōnīh ud abar dāmān nēkīh-kāmag ud abaxšāyišnīg,
Sentence: 17 čē rāy frahist mardōmān was-kēš ud was-wurrōyišn ud was-buništ hēnd?
Sentence: 18 ud frahist ān kēš ud dād ud wurrōyišnīh pad xīr ī yazadān wizendgar ud nē xūb?
Sentence: 19 ud ēn-iz handēšīd
Sentence: 20 kū: wizīdār būdan pad ēn tis rāy ranǰ abar barišn
Sentence: 21 ud pad ēn tis āgāh abāyēd būdan
Sentence: 22 čē pad frazām-kārīh tan ō xākīh gumēzīhēd ud abestām ō ruwān bawēd,
Sentence: 23 ud harw kas ruwān rāy ranǰ abar barišn
Sentence: 24 ud az kār ud kirbag āgāh bawišn,
Sentence: 25 čē ān kirbag ī mardōm anāgāhīhā kunēd kirbag kem
Sentence: 26 ud ān wināh ī mardōm anāgāhīhā kunēd wināh pad bun ī ōy bawēd.
Sentence: 27 ud az abestāg paydāg
Sentence: 28 kū: nē kas tis kard kē-š nē ruwān kard tā nūn
Sentence: 29 ud nē tis kunēd kē nē ruwān kunēd az-iz nūn frāz,
Sentence: 31 čē mēnōg ud gētīg ēdōn homānāg *čiyōn drubuštīh dō,
Sentence: 32 ēk ēwar paydāg kū be stānēnd ud ēk stadan nē šāyēd.
Sentence: 33 pas hambār ān kunišn ī weh, kē ēwar paydāg kū stadan nē šāyēd.
Sentence: 34 ud ka pad ēd rāyēnišn abar nigerīd
Sentence: 35 pad xrad-xwāstārīh andar ēn gēhān šahr šahr ud pāygōs pāygōs franaft
Sentence: 36 ud az was kēš ud wurrōyišn ī awēšān mardōmān ī-šān pad dānāgīh abērtar menīd, pursīd ud wizōst ud abar mad,
Sentence: 37 ud ka dīd kū ēk andar did ēdōn hambasān ud hamēmāl hēnd
Sentence: 38 ēg dānist kū ēn kēš ud wurrōyišn ud ǰud-ristagīh ī pad ēn gēhān ēk andar did ēdōn hambasānīg hēnd nē az dahišn ī yazadān sazēd būd,
Sentence: 39 čē yazadān dēn rāstīh ud dād frārōnīh,
Sentence: 40 ud pad ēn abēgumān būd kū harw *kē nē pad ēn abēzag dēn ēg-išān pad harw tis gumānīgīh
Sentence: 41 ud pad hamāg čim šēbišn wēnēnd.
Sentence: 42 pas az ān pad pursīdārīh ud warzīdārīh ī dēn tuxšāgtar būd
Sentence: 43 ud az dastwarān ī pad ēn dēn dānāgtar ud dēn-āgāhtar būd hēnd pursīd
Sentence: 44 kū: pad dārišn ī tan ud bōzišn ī ruwān tis čē weh ud pahlomtar?
Sentence: 45 u-šān pad paydāgīh ī az dēn guft
Sentence: 46 kū: az nēkīh ī ō mardōmān rasēd xrad weh,
Sentence: 47 čē gētīg pad nērōg ī xrad šāyēd rāyēnīdan
Sentence: 48 ud mēnōg-iz pad nērōg ī xrad ō xwēš šāyēd kardan,
Sentence: 49 ud ēn-iz paydāg kū ohrmazd ēn dām ud dahišn ī andar gētīg pad āsn xrad dād ēstēd
Sentence: 50 ud gētīg-iz ud mēnōg rāyēnīdārīh pad xrad.
Sentence: 51 ud ka wuzurg sūdīh ud arzōmandīh ī xrad pad ān ēwēnag dīd andar ohrmazd ī xwadāy ud amahraspandān ud mēnōg ī xrad spāsdārtar būd
Sentence: 52 ud mēnōg ī xrad pad *panāh grift
Sentence: 53 ud mēnōg ī xrad rāy namāz ud paristišn wēš kard kū abārīg amahraspandān,
Sentence: 54 ud ēn-iz dānist kū hamāg kār ud kirbag ud kunišn ī frārōn pad nērōg ī xrad ō xwēš šāyēd kardan
Sentence: 55 ud tuxšāg abāyēd būdan pad hušnūdīh ī mēnōg ī xrad,
Sentence: 56 ud az ān frāz pad ēzišn ī mēnōg ī xrad kardan tuxšāgtar būd.
Sentence: 57 pas az ān mēnōg ī xrad menišn ud kāmag ī ān dānāg rāy tan awiš paydāgēnīd
Sentence: 58 u-š awiš guft
Sentence: 59 kū: dōst ī stāyīdār weh az ahlāyīh ī pahlom.
Sentence: 60 āfrāh xwāh az man, mēnōg ī xrad,
Sentence: 61 kū-t rāh-nimāy bawam ō hušnūdīh ī yazadān ud wehān ud pad gētīg dārišn ī tan ud pad mēnōg bōxtārīh ī ruwān.
Chapter: ii
Sentence: 1 pursīd dānāg ō mēnōg ī xrad
Sentence: 2 kū čiyōn šāyēd xwāstan dārišn ud padēxīh ī tan ǰud az zyān ī ruwān ud bōxtārīh ī ruwān ǰud az zyān ī tan?
Sentence: 3 mēnōg ī xrad passox kard
Sentence: 4 kū: ān ī az tō keh pad hamtāg, ud hamtāg pad aziš-meh,
Sentence: 5 ud aziš-meh pad sālār, ud sālār pad xwadāy dār
Sentence: 6 ud andar xwadāyān ēkānag ud framān-burdār ud rāst-gōwišn bāš.
Sentence: 7 andar hamahlān ēr-tan ud čarb ud hučašm bāš.
Sentence: 8 spazgīh ma kun,
Sentence: 9 kū-t dusrawīh ud druwandīh awiš nē rasēd,
Sentence: 10 čē guft ēstēd
Sentence: 11 kū: spazgīh garāntar kū ǰādūgīh,
Sentence: 12 ud andar dušox harw druz dwārišn ō pēš ud druz ī spazgīh, garān-wināhīh rāy, dwārišn ō pas.
Sentence: 13 āz-kāmagīh ma kun,
Sentence: 14 kū-t āz dēw nē frēbēd
Sentence: 15 u-t xīr ī gētīg abēmizag ud ān ī mēnōg wany nē bawēd.
Sentence: 16 xešmīh ma kun,
Sentence: 17 čē mard ka xešm gīrēd ēg-iš kār ud kirbag ud namāz ud paristišn ī yazadān framōš bawēd
Sentence: 18 u-š hāmōyēn wināh ud bazag ō menišn ōftēd ud tā be nišastan ī xešm
Sentence: 19 hāwand ahreman guft ēstēd.
Sentence: 20 bēš ma bar,
Sentence: 21 čē ōy ī bēš-burdār rāmišn ī gētīg ud mēnōg wany bawēd
Sentence: 22 u-š kāhišn ō tan ud ruwān ōftēd.
Sentence: 23 waranīgīh ma kun,
Sentence: 24 kū-t az xwēš kunišn zyān ud pašēmānīh nē rasēd.
Sentence: 25 arešk ī abārōn ma bar,
Sentence: 26 kū-t zīndagīh abēmizag nē bawēd.
Sentence: 27 nang rāy wināh ma kun,
Sentence: 28 čē nēkīh ud ārāyišn ud hangadīh ud pādixšāyīh ud hunar ud šāyendagīh nē pad kām ud kunišn ī mardōmān, bē pad brēhēnišn ī spihr ud kāmag ī yazadān bawēd.
Sentence: 29 būšāsp ma warz,
Sentence: 30 kū-t kār ud kirbag ī abāyēd kardan akard nē mānēd.
Sentence: 31 zan ī pad-gōhr wizīn,
Sentence: 32 čē ān weh ī pad abdomīh husrawtar.
Sentence: 33 drāyān-ǰōyišnīh ma kun,
Sentence: 34 kū-t andar hordād ud amurdād amahraspand āstār ī garān nē ǰahēd.
Sentence: 35 wišād-dwārišnīh ma kun,
Sentence: 36 kū-t pad dōpāyān ud čahārpāyān zyān ud pad frazandān wizend nē rasēd.
Sentence: 37 ēw-mōg ma raw,
Sentence: 38 kū-t āstār ī garān ō ruwān nē rasēd.
Sentence: 39 az pāy pēšārwār ma kun,
Sentence: 40 kū pad dād ī dēwān griftār nē bawē
Sentence: 41 u-t ān wināh rāy dēw ō dušox nē kešānd.
Sentence: 42 tuxšāg ud paymānīg bāš
Sentence: 43 ud az frārōn-tuxšāgīh ī xwēš xwar,
Sentence: 44 ud yazadān ud wehān bahr kun,
Sentence: 45 u-t ēd ēdōn-warzīdārīh andar xwēškārīh mahist kirbag.
Sentence: 46 az xwāstag ī kasān ma appar,
Sentence: 47 kū-t frārōn-tuxšāgīh ī xwēš wany nē bawēd,
Sentence: 48 čē guft ēstēd
Sentence: 49 kū, kē nē az frārōn-tuxšāgīh ī xwēš, bē az any, tis xwarēd ōy ēdōn homānāg čiyōn kē sar ī mardōmān pad dast dārēd ud mazg ī mardōmān xwarēd.
Sentence: 50 az zan ī kasān pahrēxtār bāš,
Sentence: 51 čē-t ēn har sē wany šāyēd būdan, ham xwāstag ud ham tan ud ham ruwān.
Sentence: 52 abāg dušmenān pad dādestān kōxš.
Sentence: 53 abāg dōst pad passand ī dōstān raw.
Sentence: 54 abāg kēnwar mard nibard ma bar
Sentence: 55 u-š pad tis-iz ēwēnag ma āzār.
Sentence: 56 abāg āzwar mard hambāy ma bāš
Sentence: 57 u-š pad sālārīh ma gumār.
Sentence: 58 abāg spazg mard ō dar ī pādixšāyān ma šaw.
Sentence: 59 abāg dusraw mard paywand ma kun.
Sentence: 60 abāg dušāgāh mard hamkār ud hamtōzag ma bāš.
Sentence: 61 abāg halag mard pahikār ma kun.
Sentence: 62 abāg mastōg mard pad rāh ma raw.
Sentence: 63 az wad-gōhr mard abām ma stān.
Sentence: 64 pad spāsdārīh ī andar yazadān ud yašt ud niyāyišn ud ēzišn ud azbāyišn ud hammōxtārīh ī frahang kardan tuxšāg ud gyān-abespār bāš,
Sentence: 65 čē guft ēstēd
Sentence: 66 kū: pad ǰahišn-ayārīh ī pad mardōmān xrad weh
Sentence: 67 ud pad nām xwāstan ud ruwān bōxtan rādīh weh
Sentence: 68 ud pad rāyēnīdārīh ī kār ud dādestān bowandag-menišnīh weh
Sentence: 69 ud pad ōstīgān-gōwišnīh ǰādangō-barišnīhā rāstīh weh
Sentence: 70 ud pad kār-raftārīh tuxšāgīh weh
Sentence: 71 ud pad harw kas padiš wistāx būdan awestwārīh weh
Sentence: 72 ud pad nēkīh-awiš-madārīh spāsdārīh weh
Sentence: 73 ud pad xwēštan anērang dāštan paymān-gōwišnīh ī pad rāstīh weh
Sentence: 74 ud pad abāz dāštan ī ēbgat ud petyārag az xwēštan xwēškārīh weh
Sentence: 75 ud pēš ī xwadāyān ud pādixšāyān paymān-gōwišnīh ud pad hanǰaman xūb-dranǰišnīh weh
Sentence: 76 ud pad dōstān āsānīh-menišnīg dōstīh weh
Sentence: 77 ud pad hamahl-ō-xwēš-kardārīh sōg-dādārīh weh
Sentence: 78 ud andar aziš-mehān čarbīh ud ēr-tanīh weh
Sentence: 79 ud andar aziš-kehān sāxtārīh ud huēwāzīh weh
Sentence: 80 ud andar kardagārān spās-gōwišnīh ud āzādīh-kardārīh weh
Sentence: 81 ud andar hamtōhmagān humānīh weh
Sentence: 82 ud andar tan-drustīh paymānīg-xwarišnīh ud tan pad kār dāštan weh
Sentence: 83 ud andar spās-ešnāsān kardārīh weh
Sentence: 84 ud andar sālārān ēkānagīh ud sūd-xwāstārīh weh
Sentence: 85 ud andar ēkānagān ud bandagān nēk-dāštārīh ud bīm-nimūdārīh weh
Sentence: 86 ud andar xwēštan-kem-ranǰ-dāštārīh hunsandīh weh
Sentence: 87 ud andar sālārīh wehān pad wehīh ud wattarān pad wattarīh be šnāxtan, wehān pādāšn ud wattarān āwēnišn kardan weh
Sentence: 88 ud pad harw gāh ud zamān xwēštan az wināh pahrēxtan ud pad kirbagīg kār tuxšāg būdan weh
Sentence: 89 ud pad harw rōz ōhrmazd pad dādārīh ud ahreman pad murnǰēnīdārīh menīdan ud andar ayād dāštan weh
Sentence: 90 ud pad anāzarmīh awiš nē madan xwēštan-ešnāsīh weh.
Sentence: 91 ēn hamāg drust ud rāst ud hamgōnag ast,
Sentence: 92 bē xwēškārīh ud pād-uzwānīh azabar harw tis.
Sentence: 93 az uzdēs-paristišnīh ud dēw-ēzagīh dūr pahrēz,
Sentence: 94 čē paydāg
Sentence: 95 kū, agar kay husraw uzdēszār ī pad war ī čēčist nē kand hād, andar ēn sē-hazārag ī hušēdar ud hušēdarmāh ud sōšāns, kē ǰud ǰud pad harw hazārag sar az awēšān ēk āyēd kē harw kār ī gēhān abāz wirāyēd ud mihrōdruǰān ud uzdēs-paristān ī andar kišwar be zanēd, ēg petyārag ēdōn stahmagtar būd hād kū rist-āxēz ud tan ī pasēn kardan nē šāyist hād.
Sentence: 96 pad hambār kardan ī kirbag tuxšāg bāš,
Sentence: 97 kū-t pad mēnōgān ō frayād rasēd.
Sentence: 98 pad ēč nēkīh ī gētīg wistāx ma bāš,
Sentence: 99 čē nēkīh ī gētīg ēdōn homānāg čiyōn abr ī pad afsālān rōz āyēd, kē pad ēč kōf abāz nē pāyēd.
Sentence: 100 was gētīg-ārāy ma bāš,
Sentence: 101 čē gētīg-ārāy mard mēnōg-wišōb bawēd.
Sentence: 102 pad xīr ud xwāstag ī was wistāx ma bāš,
Sentence: 103 čē-t pad frazām hamāg abāyēd hištan.
Sentence: 104 pad pādixšāyīh wistāx ma bāš,
Sentence: 105 čē-t pad frazām abādixšā abāyēd būdan.
Sentence: 106 pad āzarm ud grāmīgīh wistāx ma bāš,
Sentence: 107 čē pad mēnōg āzarmīgīh nē frayādēd.
Sentence: 108 pad paywand ud tōhmag ī wuzurg wistāx ma bāš,
Sentence: 109 čē-t pad frazām abestām ō kunišn ī xwēš bawēd.
Sentence: 110 pad zīndagīh wistāx ma bāš,
Sentence: 111 čē-t abdom margīh abar rasēd
Sentence: 112 ud nasā sag ud way kirrēnēd
Sentence: 113 ud astag ō zamīg ōftēd
Sentence: 114 ud tā sē rōz-šabān ruwān pad bālēn ī tan nišīnēd
Sentence: 115 ud rōz ī čahārom andar ōšbām pad abāgīh ī srōš-ahlā ud way ī weh ud wahrām ī amāwand ud hamēstārīh ī astwihād ud way ī wattar ud frazēšt dēw ud nizēšt dēw ud duškām-kardārīh ī xešm ī anāg-kardār ī xurdruš tā ō *činwad puhl ī buland ī sahmgen, kē harw ahlaw ud druwand awiš madār, *šawēd.
Sentence: 116 ud was hamēstār ānōy pād ēstēnd.
Sentence: 117 pad anāgīh-kāmagīh ī xešm ī xurdruš ud astwihād, kē hāmōyēn dām ōbārēd ud sagrīh nē dānēd,
Sentence: 118 ud mayānǰīgīh ī mihr ud srōš ud rašn
Sentence: 119 ud tarāzēnīdārīh ī rašn ī rāst
Sentence: 120 pad tarāzūg ī mēnōgān, kē ēč kustag ōgrā nē kunēd nē ahlawān rāy ud nē-z druwandān, nē xwadāyān rāy ud nē-z any dahibedān,
Sentence: 121 čand mōy-ēw tāg be nē wardēd ud āzarm nē dārēd
Sentence: 122 ud ān ī xwadāy ud dahibed abāg ān ī xwurdagtom mardōm dādestān rāst dārēd.
Sentence: 123 ud ka ruwān ī ahlawān pad ān puhl widerēd ēg frasang homānāg ān ī puhl pahnāy bawēd
Sentence: 124 ud ān ī ahlaw ruwān pad abāgīh ī srōš-ahlā be widerēd
Sentence: 125 u-š ān ī xwēš nēk-kunišn pad kanīg kirb ō padīrag āyēd,
Sentence: 126 ī az harw kanīg ī pad gēhān hučihrtar ud weh,
Sentence: 127 ud ān ī ahlaw ruwān gōwēd
Sentence: 128 kū: tō kē hē, kē-m hagriz kanīg ī az tō hučihrtar ud weh pad gētīg nē dīd.
Sentence: 129 pad passox paywāzēd ān kanīg kirb
Sentence: 130 kū: az* nē kanīg bē kunišn ī nēk ī tō ham, ǰuwān ī humenišn ī hugōwišn ī hukunišn ī hudēn,
Sentence: 131 čē tō, ka-t pad gētīg dīd kē dēw-ēzagīh kard ēg tō nišast hē u-t ēzišn ī yazadān kard
Sentence: 132 ud ka-t dīd kū kas stahm ud appar kard ud weh mardōm bēšīd ud tar kard ud xwāstag az bazag handōxt ēg tō stahm ud appar ī xwēš az dāmān abāz dāšt
Sentence: 133 u-t weh mardōm menīd ud aspinǰ ud padīriftārīh kard u-t dāšn dād,
Sentence: 134 kē az nazdīk frāz mad ud kē-z az dūr, u-t xwāstag az frārōnīh handōxt
Sentence: 135 ud ka tō dīd kē drō-dādwarīh ud pārag-stānišnīh kard u-š gugāyīh ī pad drō dād ēg tō nišast hē u-t dranǰišn ī rāstīh ud frārōnīh guft.
Sentence: 136 az* ham ēd ī tō humat ud hūxt ud huwaršt ī-t menīd ud guft ud kard,
Sentence: 137 čē ka burzišnīg būd ham ēg-it burzišnīgtar be kard ham
Sentence: 138 ud ka grāmīg būd ham ēg-it grāmīgtar-iz be kard ham
Sentence: 139 ud ka xwarrahōmand būd ham ēg-it xwarrahōmandtar-iz be kard ham.
Sentence: 140 ud ka az ānōy frāz rawēd ēg-iš wād-ēw ī hubōy ō padīrag āyēd ī az hamāg hubōyīh hubōytar.
Sentence: 141 pursēd ān ī ahlawān ruwān az srōš
Sentence: 142 kū: ēn čē wād ast ī-m hagriz pad gētīg wād ī ēdōn hubōy ō mārišn nē mad.
Sentence: 143 ēg srōš-ahlā ō ān ī ahlaw ruwān paywāzēd
Sentence: 144 kū: ēn wād az wahišt ast kē ēdōn hubōy.
Sentence: 145 pas fradom gām pad humat ud dudīgar pad hūxt ud sidīgar pad huwaršt abar āxrāmēd
Sentence: 146 ud čahārom gām be ō ān ī asar rōšnīh ī hamāg xwārīh abar rasēd
Sentence: 147 u-š hāmōyēn yazadān ud amahraspandān ō padīrag āyēnd
Sentence: 148 ud saxwan aziš pursēnd
Sentence: 149 kū: čiyōn az ān ī sēǰōmand ī bīmōmand ī was-anāgīh axwān ō ēn ī asēǰ axwān ī apetyārag mad hē, ǰuwān ī humenišn ī hugōwišn ī hukunišn ī hudēn?
Sentence: 150 pas ōhrmazd ī xwadāy gōwēd
Sentence: 151 kū-š ma saxwan aziš pursēd, čē az ān ī grāmīg tan ǰudāg ud pad ān ī bīmgen rāh āmad ēstēd
Sentence: 152 u-š xwarišnān xwaštom, ān ī mēdyōzarm rōγn, awiš barēd,
Sentence: 153 kū-š āsāyēd ruwān az ān ī sē-šabag puhl ī-š az astwihād ud abārīg dēwān awiš mad,
Sentence: 154 u-š pad gāh ī harwisp-pēsīd abar nišānēd.
Sentence: 155 čiyōn paydāg
Sentence: 156 kū: ahlaw nar ud nārīg pas az bē-widerišnīh xwaštom az xwarišnān, ahy ān ī mēdyōzarm rōγn, mēnōgān yazadān awiš barēnd u-š pad gāh ī harwisp-pēsīd be nišānēnd,
Sentence: 157 tā hamēw-ud-hamēw-rawišnīh pad harwisp xwārīh ēstēd abāg mēnōgān yazadān hamēw-rawišnīhā.
Sentence: 158 ud ka ān ī druwand mīrēd ēg-iš ruwān sē rōz-šabān pad nazdīkīh ī kamāl ī ōy druwand dwārēd ud griyēd
Sentence: 159 kū: ō kū šawam ud nūn kē pad panāh gīram?
Sentence: 160 ud hāmōyēn wināh ud bazag ī-š pad gētīg kard andar ān sē rōz-šabān pad čašm wēnēd.
Sentence: 161 rōz ī čahārom wizarš dēw āyēd ud ruwān ī druwandān pad ān ī wattar šōn bandēd
Sentence: 162 ud pad hamēstārīh ī srōš-ahlā nayēd tā ō *činwad puhl.
Sentence: 163 ēg rašn ī rāst ān ruwān ī druwandān pad druwandīh āškārag kunēd.
Sentence: 164 pas wizarš dēw ān ruwān ī druwandān gīrēd ud anāzarmīhā ud xešm-kāmagīhā zanēd ud wināhēd
Sentence: 165 ud ān ī druwandān ruwān borz-wāngīhā griyēd ud burāmēd ud was xwāhišn lābakkarīhā xwāhēd ud was kōxšišn gyān-apattūgīhā kunēd
Sentence: 166 ī ka-š tis-iz kōxšīdārīh ud lābakkarīh nē čār u-š az bayān ud az-iz dēwān kas ō frayād nē rasēd, bē-š wizarš dēw akōmandīhā ō ān ī nizm dušox kešēd.
Sentence: 167 ud pas kanīg-ēw ī ō kanīgān nē homānāg ō padīrag āyēd
Sentence: 168 ud gōwēd ān ī druwandān ruwān ō ān duškanīg
Sentence: 169 kū: tō kē hē, kē-m hagriz pad gētīg duškanīg ī az tō duščihrtar ud zišttar nē dīd?
Sentence: 170 u-š pad passox awiš gōwēd
Sentence: 171 kū: man nē kanīg, bē kunišn ī tō ham, zišt ī dušmenišn ī dušgōwišn ī duškunišn ī duǰdēn,
Sentence: 172 čē ka-z tō pad gētīg dīd kē ēzišn ī yazadān kard ēg-iz tō nišast hē u-t dēw-ēzagīh kard
Sentence: 173 ud dēwān ud druzān paristīd
Sentence: 174 ud ka-z-it dīd kē weh mardōm aspinǰ ud padīriftārīh kard ud dāšn dād, kē az nazdīk frāz mad ud kē-z az dūr,
Sentence: 175 ēg tō weh mardōm tar ud anāzarmīg kard ud dāšn nē dād ud dar-iz be bast
Sentence: 176 ud ka tō dīd kē dādwarīh ī rāst kard ud pārag nē stad ud gugāyīh ī rāst dād ud dranǰišn ī frārōn guft
Sentence: 177 ēg-iz tō nišast hē u-t dādwarīh ī drō kard u-t gugāyīh ī pad drō dād u-t dranǰišn ī abārōn guft.
Sentence: 178 az* ham ēd ī tō dušmat ud dušhūxt ud dušxwaršt ī-t menīd ud guft ud kard,
Sentence: 179 čē ka man aburzišnīg būd ham ēg-it aburzišnīgtar-iz be kard ham
Sentence: 180 ud ka anāzarmīg būd ham ēg-it anāzarmīgtar-iz be kard ham
Sentence: 181 ud ka pad gāh ī čašmagāhān nišast ham ēg-it čašmagāhtar-iz be kard ham.
Sentence: 182 pas fradom gām pad dušmat ud dudīgar pad dušhūxt ud sidīgar gām pad dušxwaršt andar šawēd
Sentence: 183 ud čahārom gām ō pēš gannāg mēnōg ī druwand ud abārīg-iz dēwān andar dwārēd
Sentence: 184 ud dēwān afsōs ud riyahrīh padiš kunēnd
Sentence: 185 kū-t az ōhrmazd ī xwadāy ud amahraspandān ud wahišt ī hubōy ud hurām čē must ud gilag būd ka-t ō wēnišn ī ahreman ud dēwān ud dušox ī tārīk ayāst,
Sentence: 186 ka-t amā anāgīh padiš kunēm ud nē āmurzēm ud dagr zamān anāgīh wēnē?
Sentence: 187 ud drāyēd gannāg mēnōg ō dēwān
Sentence: 188 kū-š ma saxwan aziš pursēd
Sentence: 189 čē az ān ī grāmīg tan ǰudāg ud pad ān ī wattar widarag be āmad ēstēd,
Sentence: 190 bē-š awiš barēd rēmantom ud wattartom az xwarišnān, xwarišn ī pad dušox frawārd ēstēd.
Sentence: 191 āwarēnd wiš ud zahr ī mār ud gazdum ud abārīg-iz xrafstar ī pad dušox
Sentence: 192 u-š xward dahēnd.
Sentence: 193 ud tā rist-āxēz ud tan ī pasēn pad was anāgīh ud pādifrāh ī ēwēnag ēwēnag pad dušox abāyēd būd
Sentence: 194 ud frahixt kū ānōy xwarišn šāyēd xward, bē pad ān hangōšīdag homānāg.
Sentence: 195 mēnōg ī āsn xrad ō dānāg guft
Sentence: 196 kū: ēd ī-t pad dārišn ī tan ud bōzišn ī ruwān rāy pursīd, u-m xūbīhā awiš guft ud handarzēnīd hē,
Sentence: 197 awiš nēk pardaz {frēz ?} ud pad kār dār,
Sentence: 198 čē-t ēd ast mahist rāh pad dārišn ī tan ud bōzišn ī ruwān.
Chapter: iii
Sentence: 1 pursīd dānāg ō mēnōg ī xrad
Sentence: 2 kū: rādīh weh, ayāb rāstīh,
Sentence: 3 ayāb spāsdārīh, ayāb xrad,
Sentence: 4 ayāb bowandag-menišnīh, ayāb hunsandīh?
Sentence: 5 mēnōg ī xrad passox kard
Sentence: 6 kū: pad ruwān rādīh ud pad hamāg gēhān rāstīh
Sentence: 7 ud andar yazadān spāsdārīh ud pad tan ī mard xrad
Sentence: 8 ud pad hamāg kār bowandag-menišnīh ud pad āsānīh ī tan ud zanišn ī ahreman ud dēwān hunsandīh weh.
Chapter: iv
Sentence: 1 pursīd dānāg ō mēnōg ī xrad
Sentence: 2 kū: kirbag-ēw kadām meh ud weh?
Sentence: 3 mēnōg ī xrad passox kard
Sentence: 4 kū: mahist kirbag rādīh ud dudīgar rāstīh ud xwēdōdah,
Sentence: 5 sidīgar gāhānbār, čahārom hamāg-dēn,
Sentence: 6 panǰom ēzišn ī yazadān ud aspinǰ ī kārdāgān kardan,
Sentence: 7 šašom harw kas rāy nēkīh abāyistan,
Sentence: 8 haftom hučašmīh ī pad wehān.
Chapter: v
Sentence: 1 pursīd dānāg ō mēnōg ī xrad
Sentence: 2 kū: zamīg kadām šādtar?
Sentence: 3 mēnōg ī xrad passox kard
Sentence: 4 kū: zamīg ān šādtar kē-š mard ī ahlaw ī rāst-gōwišn mānišn padiš kunēd,
Sentence: 5 dudīgar kē mān ī ātaxšān padiš kunēnd,
Sentence: 6 sidīgar ka-š gāwān ud gōspandān padiš xufsēnd,
Sentence: 7 čahārom awarzīd ud anābādān zamīg ka abāz ō warz ud ābādānīh āwarēnd,
Sentence: 8 panǰom kē gilistag ī xrafstarān aziš kanēnd,
Sentence: 9 šašom kē ēzišn ud rasišn ī yazadān ud nišastan ī wehān abar bawēd,
Sentence: 10 haftom ka ān ī awērān ābādān kunēnd,
Sentence: 11 haštom ka az xwēšīh ī wattarān ō xwēšīh ī wehān rasēd,
Sentence: 12 nohom ka az bar ud bīz* ī aziš bawēd yazadān ud wehān ud arzānīgān bahr kunēnd,
Sentence: 13 dahom kē zōhr ud ēzišn padiš kunēnd.
Chapter: vi
Sentence: 1 pursīd dānāg ō mēnōg ī xrad
Sentence: 2 kū: zamīg kadām dušrāmtar?
Sentence: 3 mēnōg ī xrad passox kard
Sentence: 4 kū: zamīg ān bišttar kē dušox padiš kirrēnīd ēstēd,
Sentence: 5 dudīgar ka-š mard ī ahlaw ī awināh padiš ōzanēnd,
Sentence: 6 sidīgar kē dēw ud druz handwaran* padiš kunēnd,
Sentence: 7 čahārom kē uzdēszār padiš kunēnd,
Sentence: 8 panǰom ka-š mard ī druwand ī anāg-kardār mānišn padiš kunēnd,
Sentence: 9 šašom ka-š nasā azēr nigān kard ēstēd,
Sentence: 10 haftom kē xrafstar gilistag padiš dārēd,
Sentence: 11 haštom ka az xwēšīh ī wehān ō xwēšīh ī wattarān rasēd,
Sentence: 12 nohom ka ān ī ābādān awērān kunēnd,
Sentence: 13 dahom kē šēwan ud mōyag padiš kunēnd.
Chapter: vii
Sentence: 1 pursīd dānāg ō mēnōg ī xrad
Sentence: 2 kū: wahišt čiyōn ud čand
Sentence: 3 ud hamēstān čiyōn ud čand
Sentence: 4 ud dušox čiyōn ud čand?
Sentence: 5 ud ahlawān andar wahišt dādestān čē ud nēkīh az čē
Sentence: 6 ud druwandān andar dušox anāgīh ud petyārag čē
Sentence: 7 ud awēšān kē pad hamēstān hēnd dādestān čē ud čiyōn?
Sentence: 8 mēnōg ī xrad passox kard
Sentence: 9 kū: wahišt fradom az star pāyag tā māh pāyag,
Sentence: 10 dudīgar az māh pāyag tā xwarxšēd pāyag,
Sentence: 11 ud sidīgar az xwarxšēd pāyag tā garōdmān, kū dādār ohrmazd abar nišīnēd.
Sentence: 12 ud wahišt fradom humat ud dudīgar hūxt ud sidīgar huwaršt.
Sentence: 13 ahlawān andar wahišt azarmān ud amarg ud abīm ud abēš ud apetyārag hēnd
Sentence: 14 ud harw gāh purr-xwarrah ud hubōy ud hurām ud purr-rāmišn ud purr-nēkīh hēnd.
Sentence: 15 ud harw zamān wād ī hubōy, bōy ī sprahmagān homānāg ō padīrag āyēd ī az harw xwašīh xwaštar ud az harw hubōyīh hubōytar,
Sentence: 16 u-šān az būdan ī pad wahišt sagrīh nēst,
Sentence: 17 u-šān nišast ud rawišn ud wēnišn ud rāmišn abāg yazadān ud amahraspandān ud ahlawān tā hamēw-ud-hamēw-rawišnīh.
Sentence: 18 hamēstagān rāy paydāg kū az zamīg tā star pāyag
Sentence: 19 ud bē sarmāg ud garmāg enyā-šān tis-iz petyārag nēst.
Sentence: 20 dušox fradom dušhumat ud dudīgar dušhūxt ud sidīgar dušxwaršt
Sentence: 21 ud čahārom gām druwand mardōm ō ān ī tārīktom dušox rasēd
Sentence: 22 u-š frāz ō nazdīkīh ī ahreman ī druwand nayēnd
Sentence: 23 u-š ahreman ud dēwān afsōs ud riyahrīh padiš kunēnd
Sentence: 24 kū-t az ohrmazd ī xwadāy ud amahraspandān ud wahišt ī hubōy ī hurām čē must ud gilag būd ka-t ō wēnišn ī amā ud dušox ī tārīk ayāsīd
Sentence: 25 ka-t amā anāgīh padiš kunēm ud nē āmurzēm ud dagr zamān anāgīh wēnē?
Sentence: 26 u-š pas pādifrāh ud anāgīh ī gōnag gōnag padiš kunēnd.
Sentence: 27 ud hast gyāg kū pad sardīh ēdōn čiyōn ān ī sardtom snēxr (ay, wafr)
Sentence: 28 ud hast gyāg kū pad garmīh ēdōn čiyōn ān ī garmtom ud sōzāgtom ātaxš
Sentence: 29 ud hast gyāg kū-šān xrafstar ēdōn kirrēnēnd čiyōn sag astuxān
Sentence: 30 ud hast gyāg kū pad gandagīh ēdōn kū be larzēnd ud be ōftēnd
Sentence: 31 ud hamwār-šān tārīkīh ēdōn homānāg čiyōn ka pad dast be šāyēd griftan.
Chapter: viii
Sentence: 1 pursīd dānāg ō mēnōg ī xrad
Sentence: 2 kū: ohrmazd ēn dām ud dahišn čiyōn ud pad čē ēwēnag dād
Sentence: 3 u-š amahraspandān ud mēnōg ī xrad čiyōn ud pad čē ēwēnag tāšīd ud dād?
Sentence: 4 ud ahreman ī druwand dēwān ud druzān ud abārīg-iz wišūdagān čiyōn wišūd hēnd?
Sentence: 5 ud harw nēkīh ud wattarīh ō mardōmān ud abārīg-iz dāmān čiyōn rasēd?
Sentence: 6 ud tis ī baxt ēstēd wardēnīdan šāyēd ayāb nē?
Sentence: 7 mēnōg ī xrad passox kard
Sentence: 8 kū: dādār ohrmazd ēn dām ud dahišn ud amahraspandān ud mēnōg ī xrad az ān ī xwēš rōšnīh ud pad āfrīn ī zurwān ī akanārag brēhēnīd,
Sentence: 9 ēd rāy čē zurwān ī akanārag azarmān ud amarg ud adard ud asōhišn ud apōhišn ud apetyārag ud tā hamēw-ud-hamēw-rawišnīh ēč kas be stadan ud az xwēškārīh abādixšā kardan nē tuwān.
Sentence: 10 ud ahreman ī druwand dēwān ud druzān ud abārīg-iz wišūdagān az kūn-marz ī xwēš wišūd
Sentence: 11 u-š nō hazār zamestān pad zamān ī akanārag abāg ohrmazd paymān kard
Sentence: 12 ud tā bowandag be būdan ēč kas wardēnīdan ud ǰuttar kardan nē šāyēd
Sentence: 13 ud ka nō hazār sāl bowandag būd ahreman be agārīhēd
Sentence: 14 ud srōš-ahlā xešm be zanēd
Sentence: 15 ud mihr ud zurwān ī akanārag ud mēnōg ī dādestān, kē pad ēč kas nē drōzēd, ud baxt ud baγōbaxt hāmōyēn dām ud dahišn ī ahreman ud pad abdomīh āz-iz dēw be zanēnd
Sentence: 16 ud hamāg dām ud dahišn ī ohrmazd apetyārag ēdōn abāz bawēd čiyōn ān ī-š pad fradomīh brēhēnīd ud dād.
Sentence: 17 harw nēkīh ud ǰuttarīh ī ō mardōmān ud abārīg-iz dāmān rasēd pad haftān ud dwāzdahān rasēd
Sentence: 18 ud ān dwāzdah axtar, čiyōn pad dēn dwāzdah spāhbed ī az kustag ī ohrmazd guft ēstēd,
Sentence: 19 ud ān haft abāxtar haft spāhbed ī az kustag ī ahreman guft ēstēd,
Sentence: 20 ud harwisp dām ud dahišn ōy haft abāxtarān tarwēnēnd ud ō margīh ud harw anāgīh abespārēnd,
Sentence: 21 čiyōn awēšān dwāzdah axtar ud haft abāxtar brēhēnāg ud rāyēnāg ī gēhān hēnd.
Sentence: 22 ohrmazd nēkīh-kāmag ud hagriz anāgīh nē padīrēd ud nē menēd
Sentence: 23 ud ahreman anāgīh-kāmag ud tis-iz nēkīh nē menēd ud nē padīrēd.
Sentence: 24 ohrmazd ka-š kāmēd pad dām ī ahreman ud ahreman-iz hast ī ka-š kāmēd pad dām ī ohrmazd wardēnīdan tuwān
Sentence: 25 bē ēdōn tuwān wardēnīdan kū pad frazām-kārīh ohrmazd zyān nē bawēd,
Sentence: 26 čē frazām-pērōzīh ohrmazd xwēš,
Sentence: 27 čē paydāg kū ohrmazd ǰam ud frēdōn ud kāwōs ahōš dād hēnd
Sentence: 28 ud ahreman ēdōn wardēnīd čiyōn āšnāg
Sentence: 29 ud ahreman bēwarasp ud frāsyāg ud aleksandar ēdōn sahist kū anōšag hēnd
Sentence: 30 ud ohrmazd ō meh-sūdīh ēdōn wardēnīd čiyōn ān ī paydāg.
Chapter: ix
Sentence: 1 pursīd dānāg ō mēnōg ī xrad
Sentence: 2 kū: az kišwar ō kišwar šāyēd šudan ayāb nē?
Sentence: 3 ud asmān az čē gōhr kard ēstēd?
Sentence: 4 ud gumēzišn ī āb andar zamīg čiyōn ud pad čē ēwēnag?
Sentence: 5 mēnōg ī xrad passox kard
Sentence: 6 kū: az kišwar ō kišwar bē pad parwānagīh ī yazadān ayāb parwānagīh ī dēwān enyā šudan nē šāyēd.
Sentence: 7 ud asmān az gōhr ī xwēn-āhan kard ēstēd čiyōn almāst-iz xwānēnd.
Sentence: 8 ud gumēzišn ī āb andar zamīg ēdōn čiyōn xōn andar tan ī mardōmān.
Chapter: x
Sentence: 1 pursīd dānāg ō mēnōg ī xrad
Sentence: 2 kū: ahreman ī druwand u-š dēwān ud wišūdagān abāg ohrmazd ud amahraspandān tis-iz āštīh ud dōšāram ēk abāg did būdan šāyēd ayāb nē?
Sentence: 3 mēnōg ī xrad passox kard
Sentence: 4 kū: pad ēč mar-iz būdan nē šāyēd,
Sentence: 5 čē ahreman mihōxt ī wad menēd u-š kār xešm ud kēn ud anāštīh
Sentence: 6 ud ohrmazd ahlāyīh menēd u-š kār kirbag ud wehīh ud rāstīh
Sentence: 7 ud harw tis wardēnīdan šāyēd bē gōhr ī nēk ud wad
Sentence: 8 ud gōhr ī nēk pad tis-iz čārag ō wattarīh ud gōhr ī wad pad ēč ēwēnag ō wehīh wardēnīdan nē šāyēd.
Sentence: 9 ud ohrmazd nēk-gōhrīh rāy ēč wattarīh ud drōzanīh nē passandēd
Sentence: 10 ud ahreman wad-gōhrīh rāy ēč wehīh ud rāstīh nē padīred
Sentence: 11 u-šān ēd rāy ēk abāg did tis-iz āštīh ud dōšāram būdan nē šāyēd.
Chapter: xi
Sentence: 1 pursīd dānāg ō mēnōg ī xrad
Sentence: 2 kū: xrad weh ayāb hunar?
Sentence: 3 mēnōg ī xrad passox kard
Sentence: 4 kū: xrad kē-š wehīh nē abāg pad xrad nē dārišn
Sentence: 5 ud hunar kē-š xrad nē abāg pad hunar nē dārišn.
Chapter: xii
Sentence: 1 pursīd dānāg ō mēnōg ī xrad
Sentence: 2 kū: čē rāy ka xīr ī mēnōg ēdōn rāst ud ān ī gētīg ēdōn drō baxt ēstēd?
Sentence: 3 mēnōg ī xrad passox kard
Sentence: 4 kū: xīr ī gētīg pad bun-dahišnīh ēdōn rāst baxt ēstēd čiyōn ān ī mēnōg
Sentence: 5 ud dādār ohrmazd hāmōyēn nēkīh ī pad ēn dām ud dahišn ō bun ī mihr ud māh ud awēšān dwāzdah axtar, ī az dēn dwāzdah spāhbed guft ēstēd, kard
Sentence: 6 ud awēšān-iz rāstīhā ud sazāgīhā baxtan rāy az ohrmazd padīrift.
Sentence: 7 ud pas ahreman ān haft abāxtar, čiyōn haft spāhbed ī ahreman guft ēstēd, pad wišuftan ud be stadan ī ān nēkīh az dāmān ī ohrmazd, pad petyāragīh ī mihr ud māh ud awēšān dwāzdah axtarān dād.
Sentence: 8 ud harw nēkīh ī awēšān axtarān pad dāmān ī ohrmazd baxšēnd
Sentence: 9 awēšān abāxtarān čand-šān tuwān bawēd az-iš apparēnd
Sentence: 10 ud be ō nērōg ī dēwān ud druzān ud wattarān dahēnd.
Sentence: 11 ud xīr ī mēnōg ēd rāy ēdōn rāst čē ohrmazd ī xwadāy abāg harwisp yazadān ud amahraspandān apetyārag hēnd
Sentence: 12 ud kōxšišn ī abāg ahreman ud dēwān ud āmār-iz ī ruwān ī mardōmān pad rāstīh kunēnd
Sentence: 13 ud kē-š kirbag wēš gāh pad wahišt
Sentence: 14 ud kē-š kirbag ud wināh āgenēn rāst gāh pad hamēstān
Sentence: 15 ud ka bazag wēš ēg-iš rāh ō dušox.
Chapter: xiii
Sentence: 1 pursīd dānāg ō mēnōg ī xrad
Sentence: 2 kū: čē rāy ka gāwān ud gōspandān ud murwān ud wāyendagān ud māhīgān ēk ēk pad ān ī xwēš dānišn sazāgīhā dānišnōmand hēnd
Sentence: 3 ud mardōmān tā-šān hammōzišn abar nē barēnd ud was ranǰ ud uzēnag padiš nē kunēnd dānišn ī mardōmīh ayāftan ud dānistan nē tuwān?
Sentence: 4 mēnōg ī xrad passox kard
Sentence: 5 kū: mardōmān pad bun-dahišnīh ēdōn dānāg būd hēnd kū-šān kirbag ud bazag ī kard, ēg-išān pādāšn ī kirbag ud pādifrāh ī bazag pad xwēš čašm dīd
Sentence: 6 ud tis-iz bazag az mardōmān nē raft
Sentence: 7 ud pas ahreman ī druwand pādāšn ī kirbag ud pādifrāh ī wināh abar nihumbīd
Sentence: 8 ud ēd-iz rāy andar dēn guft ēstēd
Sentence: 9 kū az harw anāgīh ī gizistag gannāg mēnōg ī druwand pad dāmān ī ohrmazd kard čahār tis ēn wattar ud garāntar
Sentence: 10 ka-š kirbag mizd ud wināh pādifrāh be nihumbīd.
Sentence: 11 ud ham čim rāy was kēš ud wurrōyišn ī abārōn andar gēhān rawāg kard
Sentence: 12 ud mardōmān nē dānistan ī kār ud kirbag rāy harw kas ān wēš wurrōyēd ud pad weh dārēd ī-š hammōzišn pad kēš abar būd ēstēd
Sentence: 13 ud pad nāmčišt ān kēš pādyāwandtar kē-š pādixšāyīh abāg bawēd.
Sentence: 14 bē ān ēk xwadāyīh ud pādixšāyīh ī wištāsp šāhān šāh,
Sentence: 15 kē-š dēn ī drust ud rāst ī pad gōwišn ī dādār ohrmazd abēgumānīhā ud ēwarīhā dānistan rāy az ēw-tāg zarduxšt ī spitāmān frāz padīrift,
Sentence: 16 kē harw ēwēnag xīr ī gētīg ud mēnōg az dēn ī weh ī māzdēsnān rōšn ud gōwizār ud agumān paydāgīhēd,
Sentence: 17 enyā ēč wurrōyišn nēst kē-š xīr ī gētīg ud mēnōg ēdōn gōwizār ud rōšn padiš šāyēd ayāftan ud dānistan,
Sentence: 18 bē wēš winaftagīh rāy āγištag ud pēčīdag owōn hēnd kū-šān gōwišn ī bun ō mayān ud mayān ō frazām abēr ahomānāg.
Chapter: xiv
Sentence: 1 pursīd dānāg ō mēnōg ī xrad
Sentence: 2 kū: panāh kadām drubušttar
Sentence: 3 ud dōst kadām weh
Sentence: 4 ud nām-burdār kadām weh
Sentence: 5 ud rāmišn-ayār kadām weh
Sentence: 6 ud xwāstag kadām xwaštar
Sentence: 7 ud rāmišn ī az harw rāmišn frāztom kadām?
Sentence: 8 mēnōg ī xrad passox kard
Sentence: 9 kū: panāh yazad drubušttar
Sentence: 10 ud dōst brād ī nēk weh
Sentence: 11 ud nām-burdār frazand ī nēk ī dēn-burdār weh
Sentence: 12 ud rāmišn-ayār zan ī nēk ī huxēm weh
Sentence: 13 ud xwāstag ān weh ud xwaštar ī az frārōnīh handōxt ēstēd ud abāg kār ud kirbag xwarēd ud dārēd
Sentence: 14 ud rāmišn ī az harw rāmišn frāztar tan-drustīh ud abēbīmīh ud husrawīh ud ahlāyīh.
Chapter: xv
Sentence: 1 pursīd dānāg ō mēnōg ī xrad
Sentence: 2 kū: driyōšīh weh ayāb tuwāngarīh ayāb pādixšāyīh?
Sentence: 3 mēnōg ī xrad passox kard
Sentence: 4 kū: driyōšīh ī pad frārōnīh weh kū tuwāngarīh ī az xīr ī kasān,
Sentence: 5 čē guft ēstēd
Sentence: 6 kū: ōy ī driyōštom ud armēšttom kas hamēw ka-š menišn ud gōwišn ud kunišn frārōn ud pad kār ī yazadān dārēd az harw kār ud kirbag ī mardōmān andar gēhān kunēnd ōy-iz dādīhā bahr andar bawēd
Sentence: 7 ud ōy-iz ī tuwāngar ī was-xwāstag mard, kē-š xwāstag nē az frārōnīh kard ēstēd, ka pad kār ud kirbag ud ahlaw-dād uzēnag kunēd ēg-iš kirbag xwēš nē bawēd,
Sentence: 8 čē kirbag ōy xwēš kē az-iš appurd ēstēd,
Sentence: 9 bē ōy ī was-xwāstag mard kē-š xwāstag az frārōn-tuxšāgīh handōxt ēstēd
Sentence: 10 ud abāg kār ud kirbag ud rāmišn xwarēd ud dārēd ān-iz aziš weh nēst,
Sentence: 11 čē ān pad pahlom abāyēd dāštan.
Sentence: 12 ud ān-iz ī pādixšāyīh rāy gōwēnd
Sentence: 13 kū: kē pad deh-ēw hupādixšā weh kū kē pad kišwar-ēw dušpādixšā,
Sentence: 14 čē dādār ohrmazd pānagīh-kardārīh ī dāmān rāy hupādixšāyīh dād
Sentence: 15 ud ahreman ī druwand dušpādixšāyīh pad petyārag ī hupādixšāyīh dād ēstēd.
Sentence: 16 hupādixšā ān bawēd kē šahr ābādān ud driyōšān abēmust ud dād ud ēwēn ī rāst dārēd ud framāyēd
Sentence: 17 ud dād ud ēwēn ī abārōn spōzēd
Sentence: 18 ud āb ud ātaxš xūb dārēd
Sentence: 19 ud pad ēwēn ēzišn ī yazadān ud kār ud kirbag rawāg dārēd
Sentence: 20 ud driyōšān ayārōmandīh ud ǰādag-gōwīh kunēd
Sentence: 21 ud dēn ī weh ī māzdēsnān rāy tan ud ān-iz ī xwēš gyān be abespārēd
Sentence: 22 ud agar hast kas kē az rāh ī yazadān bē ēstēd ēg-iš wirāyišn padiš kardan framāyēd
Sentence: 23 u-š griftār kunēd ud abāz ō rāh ī yazadān āwarēd
Sentence: 24 ud az xwāstag ī-š hast bahr ī yazadān ud arzānīgān ud kirbag ud driyōšān be baxšēd
Sentence: 25 ud tan ruwān rāy be abespārēd.
Sentence: 26 hupādixšā ī pad ān ēwēnag hamtāg ī yazadān ud amahraspandān guft ēstēd.
Sentence: 27 dušpādixšā ān bawēd
Sentence: 28 kē dād ud ēwēn ī rāst ud frārōn wišōbēd
Sentence: 29 ud stahm ud appar ud adādestānīh andar kār dārēd
Sentence: 30 ud xīr ī mēnōg wišōbēd
Sentence: 31 ud kār ud kirbag pad abandīh dārēd
Sentence: 32 ud kirbakkar mardōm az kirbag kardan abāz dārēd
Sentence: 33 ud padiš wizend-kardār bawēd
Sentence: 34 u-š hāmōyēn handāzišn ō tan ī xwēš
Sentence: 35 ud ārāyišn ī xīr ī gētīg
Sentence: 36 ud hangadīh ud burzišn ī wattarān
Sentence: 37 ud zanišn ud āwēnišn ī wehān
Sentence: 38 ud abesīhēnīšn ī driyōšān.
Sentence: 39 dušpādixšā ī pad ān ēwēnag hamtāg ī ahreman ud dēwān guft ēstēd.
Chapter: xvi
Sentence: 1 pursīd dānāg ō mēnōg ī xrad
Sentence: 2 kū: az xwarišn ī mardōmān xwarēnd ud wastarag ī mardōmān paymōzēnd kadām arzōmandtar ud weh?
Sentence: 3 mēnōg ī xrad passox kard
Sentence: 4 kū: az xwarišn ī mardōmān xwarēnd šīr ī gōspandān weh dād ēstēd,
Sentence: 5 čē mardōm ud čahārpāy kē az mādar be zāyēnd tā ān ī ka-šān xwarišn tuwān xwardan ēg-išān rōyišn ud parwarišn az šīr
Sentence: 6 ud pad šīr weh šāyēnd zīwistan.
Sentence: 7 ud agar mardōm, ka az šīr ī mādar abāz kunēnd, be ō šīr ī gōspandān hammōzišn kunēnd
Sentence: 8 ēg-išān nān pad kār andar nē abāyēd,
Sentence: 9 čē paydāg
Sentence: 10 kū: mardōm ī pad arzah ud sawah ud fradadafš ud widadafš ud wōrūbaršt ud wōrūǰaršt hēnd xwarišn pēm ī gōspandān ud gāwān,
Sentence: 11 any xwarišn nē xwarēnd,
Sentence: 12 ud ōy ī pēm-xwarišn mardōm tan-drusttar ud zōrōmandtar ud zāyišn-iz ī frazandān abēwizendtar bawēd.
Sentence: 13 ud az ǰōrdāyān gandum meh ud weh guft ēstēd,
Sentence: 14 čē rad ī ǰōrdāyān ast
Sentence: 15 ud az-iz abestāg ēg-iš nām pad radīh ī ǰōrdāyān paydāg.
Sentence: 16 ud az mēwag xurmāg ud angūr meh ud weh guft ēstēd
Sentence: 17 ud ka nān nē mad ēstēd mēwag rāy drōn abāyēd yaštan
Sentence: 18 ud ka mēwag xurmāg ayāb angūr yašt harw mēwag pādixšā xwardan
Sentence: 19 ud ka ān nē mad ēstēd ān mēwag abāyēd xwardan ī yašt ēstēd.
Sentence: 20 may rāy paydāg kū gōhr ī nēk ud wad pad may ō paydāgīh šāyēd madan
Sentence: 21 ud wehīh ī mard andar xešm ud xrad ī mard andar abārōnīh-hangēz waran,
Sentence: 22 čē kē xešm awištābēd, u-š xwēš tan wirāstan tuwān, pad wehīh,
Sentence: 23 ud kē waran awištābēd, u-š xwēš tan wirāstan tuwān, pad xrad,
Sentence: 24 ud kē may awištābēd, u-š xwēš tan wirāstan tuwān, pad gōhr
Sentence: 25 *wizōstan nē abāyēd.
Sentence: 26 čē ōy ī nēk-gōhr mard ka may xwarēd ēdōn homānāg čiyōn ǰāmag-ēw ī zarrēn ud asēmēn ī and čand wēš abrōzēnd pāktar ud rōšntar bawēd
Sentence: 27 ud menišn ud gōwišn ud kunišn frārōntar dārēd
Sentence: 28 ud andar zan ud frazand ud hamahlān ud dōstān čarbtar ud šīrēntar bawēd
Sentence: 29 ud pad harw kār ud kirbag tuxšāgtar bawēd.
Sentence: 30 ud ōy ī wad-gōhr mard ka may xwarēd xwēš tan az paymān frēh menēd ud dārēd
Sentence: 31 ud abāg hamahlān nibard barēd ud čērīh nimāyēd ud afsōs ud riyahrīh kunēd
Sentence: 32 ud weh mardōm tar kunēd
Sentence: 33 ud zan ud frazand ud mizdwar ud bandag ud paristār ī xwēš bēšēd
Sentence: 34 ud xwaran ī wehān wišōbēd
Sentence: 35 ud āštīh be barēd ud anāštīh andar āwarēd.
Sentence: 36 bē harw kas pad paymān xwardan ī may ōšyār abāyēd būd
Sentence: 37 čē az paymān xwardan ī may ēn and nēkīh awiš rasēd
Sentence: 38 čē xwarišn gugārēd
Sentence: 39 ud ātaxš abrōzēd
Sentence: 40 ud ōš ud wīr ud tōm ud xōn abzāyēd
Sentence: 41 ud bēš spōzēd
Sentence: 42 ud gōnag abrōzēd
Sentence: 43 ud tis ī framušt ayād kunēd
Sentence: 44 ud wehīh pad menišn gāh gīrēd
Sentence: 45 ud wēnišn ī čašm ud ašnawišn ī gōš ud guftārīh ī uzwān abzāyēd
Sentence: 46 ud kār ī kardan ud rāyēnīdan abāyēd rawāgtar bawēd
Sentence: 47 ud pad *bālēn-gāh xwaš xufsēd ud sabuk āxēzēd
Sentence: 48 u-š ān bahrag rāy husrawīh ō tan ud ahlāyīh ō ruwān ud passand-iz ī wehān abar rasēd.
Sentence: 49 ud kē may frēh az paymān xwarēd ēn and āhōg padiš paydāg bawēd
Sentence: 50 čē-š xrad ud ōš ud wīr ud tōm ud xōn kāhēd
Sentence: 51 ud ǰagar wināhēd ud wēmārīh handōzēd
Sentence: 52 ud gōnag wardēnēd
Sentence: 53 ud zōr ud pattūgīh kāhēd
Sentence: 54 ud namāz ud stāyišn ī yazadān framušt bawēd
Sentence: 55 ud wēnišn ī čašm ud ašnawišn ī gōš ud guftārīh ī uzwān kem bawēd
Sentence: 56 ud hordād ud amurdād bēšēd
Sentence: 57 ud būšāsp-kāmagīh warzēd
Sentence: 58 u-š ān ī guftan ud kardan abāyēd akard mānēd
Sentence: 59 ud pad dušwārīh xufsēd ud axwašīhā āxēzēd
Sentence: 60 ud ān bahrag rāy xwēš tan ud zan ud frazand ud dōst ud xwēšāwand bēšēd ud dušrām
Sentence: 61 ud must-abarmānd ud dušmen šād
Sentence: 62 ud yazadān aziš nē hušnūd
Sentence: 63 u-š dusrawīh ō tan ud druwandīh-iz ō ruwān rasēd.
Sentence: 64 ud az paymōzan ī mardōmān dārēnd pad tan parnagān ud pad ruwān pambag weh,
Sentence: 65 ēd rāy čē parnagān az xrafstar bawēd
Sentence: 66 ud pambag parwarišn az āb ud rōyišn az zamīg ud pad xīr ī ruwān meh ud weh ud arzōmandtar guft ēstēd.
Chapter: xvii
Sentence: 1 pursīd dānāg ō mēnōg ī xrad
Sentence: 2 kū: kadām ān šādīh ī az dušrāmīh wattar?
Sentence: 3 mēnōg ī xrad passox kard
Sentence: 4 kū: kē xwāstag az bazag handōxt ēstēd u-š padiš šād bawēd ēg-iš ān šādīh az dušrāmīh wattar.
Chapter: xviii
Sentence: 1 pursīd dānāg ō mēnōg ī xrad
Sentence: 2 kū: čē rāy mardōmān ēn čahār tis ī-šān pad daxšag wēš abāyēd ham ēn kemtar menēnd --
Sentence: 3 wardišnīgīh ī tis ī gētīg ud margīh ī tan ud āmār ī ruwān ud bīm ī dušox.
Sentence: 4 mēnōg ī xrad passox kard
Sentence: 5 kū: wiyābānīh ī āz dēw ud ahunsandīh rāy.
Chapter: xix
Sentence: 1 pursīd dānāg ō mēnōg ī xrad
Sentence: 2 kū: pad bīm ud mihōxt zīwistan wattar ayāb margīh?
Sentence: 3 mēnōg ī xrad passox kard
Sentence: 4 kū: pad bīm ud mihōxt zīwistan az margīh wattar.
Sentence: 5 harw kas zīndagīh rāy rāmišn ud xwašīh ī gētīg abāyēd
Sentence: 6 ud ka-š rāmišn ud xwašīh ī gētīg nēst u-š bīm ud mihōxt-iz abāg az margīh wattar guft ēstēd.
Chapter: xx
Sentence: 1 pursīd dānāg ō mēnōg ī xrad
Sentence: 2 kū: pad pādixšāyān tis-ēw čē sūdmandtar ud čē zyāngārtar?
Sentence: 3 mēnōg ī xrad passox kard
Sentence: 4 kū: pādixšāyān rāy tis-ēw hampursagīh ī abāg dānāgān ud wehān sūdmandtar
Sentence: 5 u-šān gōwišn ud hampursagīh ī abāg spazgān ud dō-saxwanān zyāngārtar.
Chapter: xxi
Sentence: 1 pursīd dānāg ō mēnōg ī xrad
Sentence: 2 kū: gētīg-ārāy ud mēnōg-wišōb mard frazām čē?
Sentence: 3 ud ōy ī afsōsgar mard frazām čē?
Sentence: 4 ud ōy ī axwēškār mard frazām čē?
Sentence: 5 ud ōy ī kēnwar mard frazām čē?
Sentence: 6 ud ōy ī aǰgahān mard frazām čē?
Sentence: 7 ud ōy ī mihōxt-menišn mard frazām čē?
Sentence: 8 ud ōy ī tar-menišn mard frazām čē?
Sentence: 9 mēnōg ī xrad passox kard
Sentence: 10 kū: ōy ī gētīg-ārāy ud mēnōg-wišōb mard andar pādifrāh ī stōš ēdōn tabāhīhēd čiyōn ātaxš ī waxšendag ka-š āb abar rasēd.
Sentence: 11 ud ōy ī afsōsgar mard pad tan ud ruwān xwarrah nē bawēd
Sentence: 12 ud harw bār ka zafar abāz kunēd ēg-iš druwandīh abzāyēd
Sentence: 13 u-š harw druz pad tan ēdōn mehmān bawēnd kū-š ēč wehīh ō tan nē hilēnd
Sentence: 14 ud wehān riyahrīh ud wattarān stāyišn kunēd
Sentence: 15 u-š pad gētīg tan dusraw ud pad mēnōg ruwān druwand bawēd
Sentence: 16 u-š andar dušox pādifrāh kardan rāy be ō druz ī afsōsgar abespārēnd
Sentence: 17 ud ōy druz pad harw pādifrāh afsōs *ēw ud riyahrīh *ēw padiš kunēd.
Sentence: 18 ud ōy ī axwēškār mard, ǰud-iz az druwandīh, was ka pad gētīg margīh abar rasēd, aziš did xwaš zāyēd.
Sentence: 19 ud ōy ī kēnwar mard puhl ī pad ruwān garāntar kū abārīg druwandān ī pad dušox
Sentence: 20 ēd rāy čē kēn pad paywand rawēd
Sentence: 21 ud harw wināh wirāstan weh šāyēd kū kēn,
Sentence: 22 čē kēn pad paywand be mānēd
Sentence: 23 ud hast ī ka tā frašegird paywandēd,
Sentence: 24 čē az abēzag dēn rōšn paydāg
Sentence: 25 kū anērīh ī hrōmāyīgān ud turkān-iz abāg ērānagān bun az ān kēn būd ī-šān pad ōzadan ī ēraǰ kišt
Sentence: 26 ud tā frašegird hamēw paywandēd.
Sentence: 27 ud ōy ī aǰgahān mard anarzānīgtom az mardōmān guft ēstēd
Sentence: 28 čē az dēn paydāg
Sentence: 29 kū dādār ohrmazd ōy ī aǰgahān mardōm rāy ǰōrdā nē brēhēnīd
Sentence: 30 ud ōy ī aǰgahān mardōm rāy ēg-iš tis pad dāšn ud ahlawdād nē dahišn
Sentence: 31 u-š aspinǰ ud padīriftārīh nē kunišn,
Sentence: 32 ēd rāy čē ān xwarišn ī mardōm ī aǰgahān xwarēd az abārōnīh ud adādestānīh xwarēd
Sentence: 33 u-š aǰgahānīh ud adādestān-xwarišnīh rāy ēg-iš tan dusraw ud ruwān druwand bawēd.
Sentence: 34 ud ōy ī mihōxt-menišn mard pad wehān ēdōn warōmand čiyōn pad wattarān
Sentence: 35 ud pad xīr ī mēnōg ud gētīg ud pad-iz ēzišn ud azbāyišn ud paristišn ī yazadān warōmand
Sentence: 36 u-š ān bahrag rāy yazadān ud amahraspandān ēzišn ud azbāyišn ī kunēd kem padīrēnd
Sentence: 37 ud āyaft-iz ī xwāhēd awiš kem dahēnd
Sentence: 38 ud pad dahān ī wehān hamwār dusraw
Sentence: 39 u-š ruwān druwand bawēd.
Sentence: 40 ud ōy ī tar-menišn mard dōst andak u-š dušmen was
Sentence: 41 ud dāšn ī ō kas dahēd ud ēzišn-iz ī yazadān rāy kunēd tar-mānīh rāy kem padīrēnd
Sentence: 42 ud āyaft-iz ī xwāhēd kem dahēnd
Sentence: 43 u-š andar dušox pādifrāh ī pad ruwān kardan rāy ō druz ī tar-menišnīh abespārēnd
Sentence: 44 ud druz ī tar-menišnīh gōnag gōnag pādifrāh padiš kunēd ud nē āsāyēd.
Chapter: xxii
Sentence: 1 pursīd dānāg ō mēnōg ī xrad
Sentence: 2 kū: pad tuxšāgīh xīr ud xwāstag ī gētīg ō xwēš šāyēd kardan ayāb nē?
Sentence: 3 mēnōg ī xrad passox kard
Sentence: 4 pad tuxšāgīh ān nēkīh ī nē brēhēnīd ēstēd ō xwēš kardan nē šāyēd,
Sentence: 5 bē ān ī brēhēnīd ēstēd tuxšāgīh rāy ahy be rasēd,
Sentence: 6 bē tuxšāgīh ka-š zamān nē abāg pad gētīg abēbar, bē pas-iz pad mēnōg ō frayād rasēd ud pad tarāzūg abzāyēd.
Chapter: xxiii
Sentence: 1 pursīd dānāg ō mēnōg ī xrad
Sentence: 2 kū: pad xrad ud dānāgīh abāg brēh kōxšīdan šāyēd ayāb nē?
Sentence: 3 mēnōg ī xrad passox kard
Sentence: 4 kū: abāg-iz tagīgīh ud zōrōmandīh ī xrad ud dānāgīh pas-iz abāg brēh kōxšīdan nē šāyēd,
Sentence: 5 čē ka brēhēnišn, pad nēkīh ayāb pad ǰuttarīh, frāz rasēd dānāg pad kār wiyābān bawēd ud dušāgāh kār-āgāh
Sentence: 6 ud wad-dil *dilēr ud dilēr wad-dil
Sentence: 7 ud tuxšāg aǰgahān ud aǰgahān tuxšāg kunēd,
Sentence: 8 ēdōn čiyōn pad ān tis ī brēhēnīd ēstēd wihānag padiš andar āyēd
Sentence: 9 ud abārīg harw tis be spōzēd.
Chapter: xxiv
Sentence: 1 pursīd dānāg ō mēnōg ī xrad
Sentence: 2 kū: āyaft-xwāstārīh ud kirbag-warzīdārīh ud arzānīgīh rāy yazadān ō mardōmān did-iz tis baxšēnd ayāb nē?
Sentence: 3 mēnōg ī xrad passox kard
Sentence: 4 kū: baxšēnd,
Sentence: 5 čē ēdōn čiyōn gōwēnd kū "baxt ud baγōbaxt".
Sentence: 6 ēg *baxt ān bawēd ī az fradomīh baxt ēstēd
Sentence: 7 ud baγōbaxt ān ī did-iz baxšēnd,
Sentence: 8 bē yazadān ān baxšišn ēd rāy kem kunēnd ud pad mēnōg paydāgēnēnd čē ahreman-iz ī druwand ud dēwān pad nērōg ī haft abāxtar xwāstag ud abārīg-iz harw nēkīh ī gētīg az wehān ud arzānīgān apparēnd ud ō wattarān ud anarzānīgān abērtar baxšēnd.
Chapter: xxv
Sentence: 1 pursīd dānāg ō mēnōg ī xrad
Sentence: 2 kū: az tuwāngarān kē driyōštar ud az driyōšān kē tuwāngartar?
Sentence: 3 mēnōg ī xrad passox kard
Sentence: 4 kū: az tuwāngarān ōy driyōštar kē pad ān ī-š hast nē hunsand
Sentence: 5 ud wēš būdan ī tis rāy tēmār barēd,
Sentence: 6 ud az driyōšān ōy tuwāngartar kē pad ān ī mad ēstēd hunsand
Sentence: 7 ud wēš būdan ī tis rāy nē handēšēd.
Chapter: xxvi
Sentence: 1 pursīd dānāg ō mēnōg ī xrad
Sentence: 2 kū: kōr-čašm wattar ayāb kōr-dil?
Sentence: 3 ud dušāgāh wattar ayāb wad-xēm?
Sentence: 4 mēnōg ī xrad passox kard
Sentence: 5 kū: ōy ī kōr-čašm ka-š *šnāsagīh ī pad tis hast ud hammōzišn kunēd pad drust-čašm dārišn,
Sentence: 6 ud ōy ī drust-čašm ka-š dānišn ī *tis nēst ud ān-iz ī-š hammōzēnd nē padīrēd ēg ān az-iz kōr-čašm wattar.
Sentence: 7 ud dušāgāh kem wattar kū dušxēm,
Sentence: 8 čē dušāgāh ǰud az dādestān az kas tis be stadan nē tuwān
Sentence: 9 ud dušxēm mard ēg-iš hāmōyēn kām ō stahm ud appar.
Sentence: 10 ōy ī dušāgāh rāy paydāg kū ǰud az brēhēnišn az nōg xwaš zāyēd.
Chapter: xxvii
Sentence: 1 pursīd dānāg ō mēnōg ī xrad
Sentence: 2 kū: čē rāy mardōm ī az gayōmart ud ān-iz ī az hōšyang ī pēšdād xwadāyān ud dahibedān tā ō wištāsp ī šāhān šāh ēdōn kāmag-widār būd hēnd
Sentence: 3 u-šān az yazadān nēkīh wēš windād
Sentence: 4 ud frahist ān ī andar yazadān anespās būd hēnd,
Sentence: 5 ud hast-iz kē abēr anespās ud mihrōdruǰ ud wināhgār būd hēnd,
Sentence: 6 ēg awēšān ǰud ǰud čē nēkīh rāy dād *būd hēnd
Sentence: 7 u-šān bar ud sūd aziš čē raft?
Sentence: 8 mēnōg ī xrad passox kard
Sentence: 9 kū: ān ī awēšān rāy pad nēkīh ayāb pad ǰuttarīh pursē āgāh bāš ud be dān,
Sentence: 10 čē kār ī gēhān hāmōyēn pad brēh ud zamānag ud wizīr ī brīn rawēd, ī xwad ast zurwān ī pādixšā ud dagrand-xwadāy,
Sentence: 11 čiyōn andar āwām āwām ō harw kē rāy baxt ēstēd ān ī abāyēd madan abar rasēd,
Sentence: 12 čiyōn az-iz ham paywand ī awēšān pēšēnīgān ī widardag paydāg
Sentence: 13 kū abdom ān nēkīh ī az awēšān ō dāmān ī ohrmazd abāyist madan be mad.
Sentence: 14 čē az gayōmart sūd ēn būd
Sentence: 15 fradom ōzadan ī arzūr ud abespārag kardan ī tan ī xwēš meh-dādestānīhā ō ahreman,
Sentence: 16 ud dudīgar sūd ēn būd
Sentence: 17 kū mardōm ud hamāg frawahr ī frašegird-kardārān, narān ud nārīgān, az tan ī ōy *būd,
Sentence: 18 ud sidīgar ēn kū ayōxšust-iz az tan ī ōy brēhēnīd.
Sentence: 19 ud az hōšyang ī pēšdād sūd ēn būd
Sentence: 20 kū-*š *az sē bahr dēw ī māzandar ī gēhān-murnǰēnīdār dō bahr be ōzad.
Sentence: 21 ud az tahmōrub ī hurust sūd ēn būd
Sentence: 22 kū-š gizistag gannāg mēnōg ī druwand sīh sāl pad bārag dāšt
Sentence: 23 ud haft ēwēnag nibēg (ī dibīrīh) ī ōy druwand pad nigān dāšt be ō paydāgīh āwurd.
Sentence: 24 ud az huramag ǰamšēd ī wiwanghān sūd ēn būd
Sentence: 25 kū-š sē sad sāl amargīh pad hāmōyēn dām ud dahišn ī dādār ohrmazd be winnārd
Sentence: 26 ud adard ud azarmān ud apetyārag kard hēnd,
Sentence: 27 ud dudīgar ēn kū-š war ī ǰamkard kard
Sentence: 28 ī, ka ān wārān ī malkōsān bawēd, čiyōn pad dēn paydāg kū mardōm ud abārīg dām ud dahišn ī ohrmazd ī xwadāy ān ī frahist be abesīhēd,
Sentence: 29 pas ān war ī ǰamkard dar be wišāyēd
Sentence: 30 ud mardōmān ud gōspandān ud abārīg dām ud dahišn ī dādār ohrmazd az ān war be āyēnd
Sentence: 31 ud gēhān abāz ārāyēnd,
Sentence: 32 ud sidīgar,
Sentence: 33 ka-š paymān ī gētīgīg ī ōy duǰdānāg druwand ōbārd ēstād, ā-š az aškom abāz āwurd, ud čahārom ka-š gōspand pad gōhrīg ī pīl ō dēwān nē dād.
Sentence: 34 ud az azdahāg bēwarasp ud gizistag frāsyāg ī tūr sūd ēn būd
Sentence: 35 kū agar xwadāyīh ō bēwarasp ud frāsyāg nē mad hād ēg gizistag gannāg mēnōg ān xwadāyīh be ō xešm dād hē
Sentence: 36 ud ka be ō xešm mad hē tā rist-āxēz ud tan ī pasēn nē šāyist hē aziš be stadan
Sentence: 37 ēd rāy čē-š tanōmandīh nēst.
Sentence: 38 ud az frēdōn sūd ēn būd
Sentence: 39 čiyōn zadan ud bastan ī azdahāg bēwarasp ī ēdōn garān-wināh.
Sentence: 40 u-š any-iz was māzandar dēw zad ud az kišwar ī Xwaniras bē kard.
Sentence: 41 ud az manuščihr sūd ēn būd
Sentence: 42 kū-š salm ud tūǰ pad kēn ī ēraǰ ī-š niyāg būd *be *ōzad
Sentence: 43 ud petyāragīh az gēhān abāz dāšt
Sentence: 44 ud zamīg az padišxwārgar tā bun ī ganǰag, čiyōn frāsyāg grift ēstād, pad paymān az frāsyāg abāz stad ud ō xwēšīh ī ērānšahr āwurd, ud abzūdan ī zrēh ī kayānseh, čiyōn frāsyāg be spurd u-š āb aziš bē kard.
Sentence: 45 ud az kay kawād sūd ēn būd
Sentence: 46 kū andar yazadān spāsdār būd
Sentence: 47 u-š xwadāyīh xūb kard
Sentence: 48 ud paywand ud tōhmag ī kayān az ōy abāz raft.
Sentence: 49 ud az sām sūd ēn būd
Sentence: 50 kū-š mār ī srūwar ud gurg ī kabōd, kē pehn-iz xwānēnd, ud dēw ī ābīg gandarw ud murw ī kamag ud dēw ī wiyābānīg be ōzad
Sentence: 51 ud any-iz was kār ī wuzurg ud arzōmand kard
Sentence: 52 ud was petyārag az gēhān abāz dāšt
Sentence: 53 ī ka, pargast, az awēšān petyāragān ēk abāz mānd hē rist-āxēz ud tan ī pasēn kardan nē šāyist hē.
Sentence: 54 ud az kāwōs sūd ēn būd
Sentence: 55 čiyōn syāwaxš az tan ī ōy brēhēnīd
Sentence: 56 ud any-iz was kardagān aziš raft.
Sentence: 57 ud az syāwaxš sūd ēn būd
Sentence: 58 čiyōn zāyišn ī kay husraw ud kardan ī kangdiz.
Sentence: 59 ud az kay husraw sūd ēn būd
Sentence: 60 čiyōn ōzadan ī frāsyāg
Sentence: 61 ud kandan ī uzdēszār ī pad war ī čēčist
Sentence: 62 ud winnārdan ī kangdiz
Sentence: 63 ud rist-ārāstār sōšāns ī pērōzgar rist-āxēzišnīh ī pad tan ī pasēn ayārīh ī ōy rāy weh tuwān kardan.
Sentence: 64 ud az kay luhrāsp sūd ēn būd
Sentence: 65 kū-š xwadāyīh xūb kard
Sentence: 66 ud andar yazadān spāsdār būd, ud ūrišlem ī ǰahūdān be kand ud ǰahūdān wišuft ud pargandag kard
Sentence: 67 ud dēn-padīriftār kay wištāsp az tan ī ōy brēhēnīd.
Sentence: 68 ud az kay wištāsp sūd ēn būd
Sentence: 69 čiyōn padīriftan ud yaštan ī dēn ī weh ī māzdēsnān
Sentence: 70 pad *baγān ī ēwāz ahunawar, gōwišn ī dādār ohrmazd,
Sentence: 71 ud abesīhēnīdan ud škastan ī kālbod ī dēwān ud druzān
Sentence: 72 ud rāmišn ud āsānīh ī āb ud ātaxš ud harwisp yazadān ī mēnōgān ud gētīgān
Sentence: 73 ud purr-ēmēdīh ī wehān ud arzānīgān
Sentence: 74 pad ān ī frārōn kām ō ān ī xwēš sahišn
Sentence: 75 ud šnāyišn ud rāmēnīdārīh ī ohrmazd abāg amahraspandān
Sentence: 76 ud bēšišn ud zanišn ī ahreman u-*š wišūdagān.
Chapter: xxviii
Sentence: 1 pursīd dānāg ō mēnōg ī xrad
Sentence: 2 kū: kē *wixšayišnīgtar,
Sentence: 3 pad-nērōgtar,
Sentence: 4 kē tēztar,
Sentence: 5 kē šādtar,
Sentence: 6 ud kē dušrāmišntar?
Sentence: 7 mēnōg ī xrad passox kard
Sentence: 8 kū: ohrmazd ī xwadāy wixšayišnīgtar,
Sentence: 9 *kē nō hazār sāl anāgīh pad dāmān ī xwēš az ahreman wēnēd, pas-iz *bē pad dādestān ud wixšayišnīh enyā-š nē zanēd.
Sentence: 10 ud spihr pad-nērōgtar,
Sentence: 11 ud wīr ī mardōmān tēztar,
Sentence: 12 ud ruwān ī ahlawān šādtar,
Sentence: 13 ud ān ī druwandān *pašēmāntar.
Chapter: xxix
Sentence: 1 pursīd dānāg ō mēnōg ī xrad
Sentence: 2 kū: kē pad-nigerišntar ud *pad-pānagtar abāyēd dāštan?
Sentence: 3 mēnōg ī xrad passox kard
Sentence: 4 kū: rahīg ī aburnāy ud zan ud stōr ud ātaxš pad-pānagtar ud *pad-nigerišntar abāyēd dāštan.
Chapter: xxx
Sentence: 1 pursīd dānāg ō mēnōg ī xrad
Sentence: 2 kū: zīndagīh kadām wattar
Sentence: 3 ud pad xrad kē apursišnīgtar?
Sentence: 4 mēnōg ī xrad passox kard
Sentence: 5 kū: zīndagīh ī ōy wattar kē pad bīm ud mihōxt zīwēd
Sentence: 6 ud pad xrad ōy apursišnīgtar kē pad mēnōg nē *wurrōyēd ud gētīg ārāyēd.
Chapter: xxxi
Sentence: 1 pursīd dānāg ō mēnōg ī xrad
Sentence: 2 kū: āsrōnān ud artēštārān ud wāstaryōšān ǰud ǰud xwēškārīh čē?
Sentence: 3 mēnōg ī xrad passox kard
Sentence: 4 kū: āsrōnān xwēškārīh dēn xūb dāštan
Sentence: 5 ud ēzišn ud azbāyišn ī yazadān xūb ud pad nigerišn kardan,
Sentence: 6 ud wizīr ud dādestān ud ēwēn ud band, čiyōn az abēzag weh-dēn ī māzdēsnān paydāg, rāst dāštan
Sentence: 7 ud mardōmān az kirbag ud wehīh āgāhēnīdan
Sentence: 8 ud rāh ō wahišt ud bīm ud pahrēz az dušox nimūdan.
Sentence: 9 artēštārān xwēškārīh dušmen zadan
Sentence: 10 ud šahr ud būm ī xwēš abēbīm ud āsān dāštan.
Sentence: 11 ud wāstaryōšān xwēškārīh warz ud ābādānīh kardan
Sentence: 12 ud tuwān-sāmānīhā gēhān padēxēnīdan ud ābādān dāštan.
Chapter: xxxii
Sentence: 1 pursīd dānāg ō mēnōg ī xrad
Sentence: 2 kū: hutuxšān pēškārān xwēškārīh čē?
Sentence: 3 mēnōg ī xrad passox kard
Sentence: 4 kū: pēškārān xwēškārīh ēn
Sentence: 5 kū ān kār ī nē dānēnd dast awiš nē barēnd
Sentence: 6 ud ān ī dānēnd xūb ud pad nigerišn kunēnd
Sentence: 7 ud mizd dādīhā xwāhēnd,
Sentence: 8 čē kē ān kār ī nē dānēd pad kardan frāz gīrēd, hast ī *ka ān kār tabāh ud agār bawēd ud ka was-iz ōy mard *kār ī xwēš hušnūdag kunēd ēg-iz-iš ān wināh ō bun bawēd.
Chapter: xxxiii
Sentence: 1 pursīd dānāg ō mēnōg ī xrad
Sentence: 2 kū: xwadāy
Sentence: 3 ud sālār ud dōst
Sentence: 5 ud xwēšāwand
Sentence: 6 ud zan
Sentence: 7 ud frazand
Sentence: 8 ud šahr kadām wattar?
Sentence: 9 mēnōg ī xrad passox kard
Sentence: 10 kū: xwadāy ān wattar kē šahr abēbīm ud mardōmān abēmust dāštan nē tuwān,
Sentence: 11 ud sālār ān wattar kē pad hunar wad ud andar kardārān anespās ud hašāgirdān nē ayār ud ǰādag-gōw,
Sentence: 12 ud dōst ān wattar kē padiš wistāx būdan nē šāyēd,
Sentence: 13 ud xwēšāwand ān wattar ī pad astānag nē ayār,
Sentence: 14 ud zan ān wattar kē abāg pad rāmišn zīwistan nē šāyēd,
Sentence: 15 ud frazand ān wattar ī nē nām-burdār,
Sentence: 16 ud šahr ān wattar kē pad nēkīh ud abēbīmīh ud āwāmīh andar zīwistan nē šāyēd.
Chapter: xxxiv
Sentence: 1 pursīd dānāg ō mēnōg ī xrad
Sentence: 2 kū: dādār ohrmazd ō gētīg tis-iz dahišn dād kē ahreman petyārag awiš burdan nē tuwān?
Sentence: 3 mēnōg ī xrad passox kard
Sentence: 4 kū: ō ōy ī xradōmand ud hunsand mardōm petyārag burdan kem šāyēd.
Chapter: xxxv
Sentence: 1 pursīd dānāg ō mēnōg ī xrad
Sentence: 2 kū: čand ān mardōm ī pad tuwāngar ud čand ān ī pad driyōš abāyēd dāštan?
Sentence: 3 mēnōg ī xrad passox kard
Sentence: 4 kū: ēn and mardōm pad tuwāngar abāyēd dāštan:
Sentence: 5 ēk ōy kē pad xrad bowandag,
Sentence: 6 dudīgar kē-š tan drust ud abēbīmīhā zīwēd,
Sentence: 7 sidīgar kē pad ān ī mad ēstēd hunsand,
Sentence: 8 čahārom ōy kē-š brēh pad frārōnīh ayār,
Sentence: 9 panǰom kē pad čašm ī yazadān ud uzwān ī wehān husraw,
Sentence: 10 šašom kē-š wurrōyišn abar ēn ēk abēzag weh dēn ī māzdēsnān,
Sentence: 11 haftom kē-š tuwāngarīh az frārōnīh.
Sentence: 12 ud ēn and mardōm pad driyōš dārišn:
Sentence: 13 ēk ān kē-š xrad nēst,
Sentence: 14 dudīgar kē-š tan nē drust,
Sentence: 15 sidīgar kē pad bīm ud sahm ud mihōxt zīwēd,
Sentence: 16 čahārom kē pad xwēš-tan nē pādixšā,
Sentence: 17 panǰom kē-š brēh nē ayār,
Sentence: 18 šašom kē pad čašm ī yazadān ud uzwān ī wehān dusraw,
Sentence: 19 haftom kē pīr u-š frazand ud paywand nēst.
Chapter: xxxvi
Sentence: 1 pursīd dānāg ō mēnōg ī xrad
Sentence: 2 kū: wināh kadām garāntar?
Sentence: 3 mēnōg ī xrad passox kard
Sentence: 4 kū: az wināh ī mardōmān kunēnd kūn-marz garāntar,
Sentence: 5 dudīgar kē wiftag,
Sentence: 6 sidīgar kē mard ī ahlaw ōzanēd,
Sentence: 7 čahārom kē xwēdōdah wišōbēd,
Sentence: 8 panǰom kē stūr-rāyēnīdārīh škennēd,
Sentence: 9 šašom kē ātaxš ī wahrām zanēd,
Sentence: 10 haftom kē babrag ī ābīg ōzanēd,
Sentence: 11 haštom kē uzdēs paristēd,
Sentence: 12 nohom kē pad harw kēš wurrōyēd ud paristīdan kāmēd,
Sentence: 13 dahom kē tis ī-š pad nigāhdārīh padīrift be xwarēd ud nakkīrā bawēd,
Sentence: 14 yāzdahom ōy kē wināhgārīh rāy abestām ō drōzanīh kunēd,
Sentence: 15 dwāzdahom kē kār nē kunēd bē anespāsīhā ud adādīhā xwarēd,
Sentence: 16 sēzdahom kē zandīkīh kunēd,
Sentence: 17 čahārdahom kē ǰādūgīh kunēd,
Sentence: 18 pānzdahom kē ahlomōγīh kunēd,
Sentence: 19 šāzdahom kē dēw-ēzagīh,
Sentence: 20 haftdahom kē duzīh ayāb duz-abāyistīh,
Sentence: 21 haštdahom kē mihrōdruǰīh,
Sentence: 22 nōzdahom kē kēnwarīh,
Sentence: 23 wīstom kē pad tis ī kasān ō xwēš kardan stahmagīh kunēd,
Sentence: 24 wīst-u-yakom kē mard ī ahlaw bēšēd,
Sentence: 25 wīst-u-dowom kē spazgīh,
Sentence: 26 wīst-u-seyom kē tar-menišnīh kunēd,
Sentence: 27 wīst-u-čahārom kē ō zan ī kārān šawēd,
Sentence: 28 wīst-u-panǰom kē anespāsīh kunēd,
Sentence: 29 wīst-u-šašom kē drō ud *anāst gōwēd,
Sentence: 30 wīst-u-haftom kē pad ān ī widard tis ahunsandīh kunēd,
Sentence: 31 wīst-u-haštom kē rāmišn az abārōnīh ud āzārišn ī wehān,
Sentence: 32 wīst-u-nohom kē wināh pad rāyēnišn ud kirbag pad ranǰ ud spōz dārēd,
Sentence: 33 sīhom kē pad ān nēkīh ī-š pad kas kard abaxš bawēd.
Chapter: xxxvii
Sentence: 1 pursīd dānāg ō mēnōg ī xrad
Sentence: 2 kū: mardōmān pad čand rāh ud wihān ī kirbag ō wahišt wēš rasēnd?
Sentence: 3 mēnōg ī xrad passox kard
Sentence: 4 kū: fradom kirbag rādīh
Sentence: 5 ud dudīgar rāstīh
Sentence: 6 ud sidīgar spāsdārīh,
Sentence: 7 čahārom hunsandīh,
Sentence: 8 panǰom nēkīh kardan abāyistan ī pad wehān ud dōst būdan ī ō harw kas,
Sentence: 9 šašom pad ēn abēgumān būdan kū asmān ud zamīg ud harw nēkīh ī gētīg ud mēnōg az dādār ohrmazd,
Sentence: 10 haftom abēgumānīh ī pad ēn kū hamāg anāgīh ud petyārag az ahreman ī druwand ī gizistag,
Sentence: 11 haštom abēgumānīh ī pad rist-āxēz ud tan ī pasēn,
Sentence: 12 nohom kē ruwān dōšāram rāy xwēdōdah kunēd,
Sentence: 13 dahom kē stūrīh rāyēnēd,
Sentence: 14 yāzdahom kē frārōn-tuxšāgīh kunēd,
Sentence: 15 dwāzdahom kē pad ēn abēzag weh dēn ī māzdēsnān abēgumān,
Sentence: 16 sēzdahom kē pad hunar ud abzār ī harw kas hučašm bawēd,
Sentence: 17 čahārdahom kē hučašmīh ī wehān xwāhēd ud xwad-iz pad wehīh ī andar wehān wēnēd hučašm bawēd,
Sentence: 18 pānzdahom kē dōšāram ī wehān xwāhēd,
Sentence: 19 šāzdahom kē kēn ud wad-dōšāramīh az menišn dūr dārēd,
Sentence: 20 haftdahom kē arešk ī abārōn nē barēd,
Sentence: 21 haštdahom kē waran-kāmagīh nē kunēd,
Sentence: 22 nōzdahom kē anāštīh abāg kas nē kunēd,
Sentence: 23 wīstom kē pad tis ī widard ud uzīd bēš nē barēd,
Sentence: 24 wīst-u-yakom kē xešm ō tan nē hilēd,
Sentence: 25 wīst-u-dowom kē nang rāy wināh nē kunēd,
Sentence: 26 wīst-u-seyom kē aǰgahānīh rāy būšāsp kāmag nē warzēd,
Sentence: 27 wīst-u-čahārom kē pad yazadān abēgumān,
Sentence: 28 wīst-u-panǰom kē pad hastīh ī wahišt ud dušox ud āmār ī pad ruwān ud xwāhrīh ī pad wahišt ud anāgīh ī pad dušox abēgumān,
Sentence: 29 wīst-u-šašom kē az spazgīh ud čašm-areškīh pahrēzēd,
Sentence: 30 wīst-u-haftom kē xwad nēkīh kunēd ud ō-z kasān āfrāh ī nēk dahēd,
Sentence: 31 wīst-u-haštom kē wehān ayār ud wattarān hamēmāl bawēd,
Sentence: 32 wīst-u-nohom kē az frēb ud dušīh xwēš tan pahrēzēd,
Sentence: 33 sīhom kē drō ud *anāst nē gōwēd,
Sentence: 34 sīh-u-yakom kē az mihrōdruǰīh xwēš tan saxt pahrēzēd,
Sentence: 35 sīh-u-dowom kē sūd ud nēkīh ī xwēš xwāstan rāy az anāgīh ī kasān pahrēz kunēd,
Sentence: 36 sīh-u-seyom kē wēmārān ud armēštān ud kārdāgān rāy spinǰānagīh kunēd.
Chapter: xxxviii
Sentence: 1 pursīd dānāg ō mēnōg ī xrad
Sentence: 2 kū: čē rāy ka nēkīh ī gētīg nē pad arzānīgīh baxšēnd ud ruwān pad mēnōgān pad kunišn-*arzānīgīh griftār kunēnd?
Sentence: 3 mēnōg ī xrad passox kard
Sentence: 4 kū: xwābarīh ī ohrmazd ī xwadāy abar dāmān rāy ham pad wehān ud ham pad wattarān hamāg nēkīh baxšēd,
Sentence: 5 bē ka-šān nē hamwārag abar rasēd stahmagīh ī ahreman ud dēwān ud apparišn ī ān haft abāxtar rāy.
Sentence: 6 ud pad mēnōgān ēd rāy ruwān pad kunišn-arzānīgīh griftār kunēnd čē *harw kas druwandīh pad kunišn ī xwēš kard bawēd.
Chapter: xxxix
Sentence: 1 pursīd dānāg ō mēnōg ī xrad
Sentence: 2 kū: *pad nērōg kadām abāyišnīgtar,
Sentence: 3 ud pad xrad kē bowandagtar,
Sentence: 4 ud pad xēm kē awestwārtar,
Sentence: 5 ud gōwišn ī kē xūbtar,
Sentence: 6 ud wehīh kē pad menišn kem,
Sentence: 7 ud pad mihr kē wattar,
Sentence: 8 ud rāmišn kē kem pad menišn,
Sentence: 9 ud pad dil kē abāyišnīgtar,
Sentence: 10 ud pad burdārīh kē passandišnīgtar,
Sentence: 11 ud kē pad awestwār nē dārišn,
Sentence: 12 ud čē ān ī abāg harw kas sazēd dāštan,
Sentence: 13 ud čē ān ī abāg ēč kas nē dārišn,
Sentence: 14 ud *čē pad hampursagīh dārišn,
Sentence: 15 ud kē ān ī pad gugāy nē padīrišn,
Sentence: 16 ud andar kē framān-burdār abāyēd būdan,
Sentence: 17 ud *kē wēš abāyēd menīdan ud spās dāštan,
Sentence: 18 ud čē ān ī pad ēč rāh anāzarm nē kunišn,
Sentence: 19 ud *kē ān ī, pad pāyag ī xwēš, hāwand ohrmazd ud amahraspandān guft ēstēd,
Sentence: 20 ud kē ān ī, pad pāyag ī xwēš, hāwand ahreman ud dēwān?
Sentence: 21 mēnōg ī xrad passox kard
Sentence: 22 kū: pad nērōg ōy abāyišnīgtar kē, ka-š xešm gīrēd, xešm be nišāstan ud wināh nē kardan ud xwēš tan rāmēnīdan tuwān.
Sentence: 23 ud pad xrad ōy bowandagtar kē ān ī xwēš ruwān bōxtan tuwān.
Sentence: 24 ud pad xēm ōy awestwārtar kē tis-iz frēb ud wihānag padiš nēst.
Sentence: 25 ud gōwišn ī ōy xūbtar kē rāsttar gōwēd.
Sentence: 26 ud wehīh pad menišn ī *xešmēn mard kem.
Sentence: 27 ud pad mihr kēnwar mard ī zadār wattar.
Sentence: 28 ud rāmišn pad menišn ī ōy ī areškēn mard kem.
Sentence: 29 ud pad dil ōy abāyišnīgtar kē gētīg hilēd ud mēnōg gīrēd
Sentence: 30 ud pad xwēš kām ahlāyīh ō grīw padīrēd.
Sentence: 31 ud pad burdārīh ōy passandišnīgtar kē anāgīh ud petyārag ī-š az ahreman ud dēwān ud wattarān abar rasēd hunsandīhā ud pad kāmag ō grīw padīrēd
Sentence: 32 ud pad ēč rāh ruwān ī xwēš nē āzāred.
Sentence: 33 ud ōy pad awestwār nē dārišn kē az yazadān bīm ud pad mardōmān šarm nē dārēd.
Sentence: 34 ud ān ī abāg harw kas sazēd dāštan āštīh ud dōšāram.
Sentence: 35 ud ān ī abāg kas-iz nē dārišn kēn ud anāštīh.
Sentence: 36 ud ēn harw sē pad hampursagīh dārišn -- humat ud hūxt ud huwaršt pad menišn ud gōwišn ud kunišn ī xwēš.
Sentence: 37 ud ēn sē pad gugāy nē padīrišn -- zan ud rahīg ī aburnāy ud bandag mard.
Sentence: 38 ud ēn and tan framān-burdār būdan ud paristišn kardan abāyēd --
Sentence: 39 zan andar šōy,
Sentence: 40 ud frazand andar pid ud mād ud sālār ud dastwar ud awestād ud stūr ud paywand ī armēšt,
Sentence: 41 ud andar xwadāyān ud sālārān ud awestādān framān-burdār bawišn.
Sentence: 42 ud yazadān wēš abāyēd menīdan ud spās dāštan.
Sentence: 43 ud ruwān ī xwēš pad ēč dar anāzarm nē kunišn
Sentence: 44 ud hamēšag andar ayād dārišn.
Sentence: 45 ud dādwar kē dādwarīh ī rāst kunēd ud pārag nē stānēd pad pāyag ī xwēš hāwand ohrmazd ud amahraspandān,
Sentence: 46 ud ān kē dādwarīh ī drō kunēd pad pāyag ī xwēš hāwand ahreman ud dēwān guft ēstēd.
Chapter: xl
Sentence: 1 pursīd dānāg ō mēnōg ī xrad
Sentence: 2 kū: čē sardtar ud čē garmtar,
Sentence: 3 ud čē rōšntar ud čē tārīktar,
Sentence: 4 ud čē purrtar ud čē tuhīgtar,
Sentence: 5 ud čē frazām *abēbartar,
Sentence: 6 ud čē ān tis kē kas *aziš sagrīh nē bawēd,
Sentence: 7 ud čē ān ī kas appurdan nē tuwān,
Sentence: 8 ud čē ān tis ī pad wahāg xrīdan nē šāyēd,
Sentence: 9 ud čē ān tis ī harw kas hamēw aziš hušnūd,
Sentence: 10 ud čē ān ī kas-iz aziš nē hušnūd,
Sentence: 11 ud čē ān ēk kāmag ī ohrmazd ī xwadāy az mardōmān *sahēd,
Sentence: 12 čē ān ēk kāmag ī ahreman ī druwand az mardōmān sahēd,
Sentence: 13 ud čē frazām ī gētīg ud čē frazām ī mēnōg?
Sentence: 14 mēnōg ī xrad passox kard
Sentence: 15 kū: dil ī ahlawān garmtar ud ān ī druwandān sardtar,
Sentence: 16 ud ahlawīh rōšntar ud *druwandīh tārīktar,
Sentence: 17 ud ēmēd ud panāh ō yazadān purrtar ud ān ī ō dēwān tuhīgtar.
Sentence: 18 gētīg-ārāy ud mēnōg-wišōb mard frazām abēbartar,
Sentence: 19 ud dānāgīh ast kē kas sagrīh aziš nē dānēd,
Sentence: 20 ud frahang ud hunar ast kē kas appurdan nē tuwān.
Sentence: 21 ōš ud wīr ast kē pad wahāg xrīdan nē šāyēd,
Sentence: 22 ud xrad ast kē harw kas ud xwēš-tan aziš abēmust ud hušnūd.
Sentence: 23 stardīh ud dušāgāhīh ast kē harw kas ud xwēš-tan-iz aziš mustōmand ud nē hušnūd.
Sentence: 24 ān ēk kāmag ī ohrmazd ī xwadāy az mardōmān sahēd ēn
Sentence: 25 kū: man be šnāsēd, čē harw kē man be šnāsēd az pas ī man āyēd ud ō hušnūdagīh ī man tuxšēd.
Sentence: 26 ud ān ēk kāmag ī ahreman az mardōmān sahēd ēn
Sentence: 27 kū: man ma šnāsēd, čē dānēd kū kē ōy druwand be šnāsēd az pas ī ōy anāg-kunišn nē šawēd
Sentence: 28 u-š tis-iz nērōg ud ayārīh az ōy mardōm nē bawēd.
Sentence: 29 ud ān ī-t mēnōg ud gētīg rāy pursīd -- gētīg, pad frazām margīh ud abaydāgīh
Sentence: 30 ud mēnōg, pad frazām ān ī ahlawān ruwān azarmān ud amarg ud apetyārag ud purr-xwarrah ud purr-rāmišn tā hamēw-ud-hamēw-rawišnīh abāg yazadān ud amahraspandān ud frawahr ī ahlawān,
Sentence: 31 ud puhl ud drōš ud *pādifrāh ī druwandān pad dušox tā hamēw-ud-hamēw-rawišnīh ,
Sentence: 32 ud ān ī druwandān ruwān, ǰud az pādifrāh būdan, wēnišn-iz ī abāg dēwān ud druzān ēdōn sahēd čiyōn pad gētīg mardōm ī tan-drust abāg ān ī garāntar wēmār.
Chapter: xli
Sentence: 1 pursīd dānāg ō mēnōg ī xrad
Sentence: 2 kū: mard kadām tagīgtar,
Sentence: 3 ud rāh kadām bīmgentar,
Sentence: 4 ud āmār kadām škafttar,
Sentence: 5 ud band *kadām xwaštar,
Sentence: 6 ud kār kadām pašēmāntar,
Sentence: 7 ud dāšn kadām abēsūdtar?
Sentence: 8 mēnōg ī xrad passox kard
Sentence: 9 kū: mard ān tagīgtar kē abāg druz ī xwēš kōxšīdan tuwān
Sentence: 10 ud pad nāmčišt kē ēn panǰ druz az tan dūr dārēd
Sentence: 11 ī čiyōn hast āz ud xešm ud waran ud nang ud ahunsandīh.
Sentence: 12 rāh andar be-widerišnīh ī *činwad puhl bīmgentar.
Sentence: 13 āmār ī pad ruwān ī druwandān škafttar.
Sentence: 14 band ī frazandān xwaštar ud abāyišnīgtar.
Sentence: 15 kār ān pašēmāntar ī anespāsān rāy kunēnd.
Sentence: 16 dāšn ān abēsūdtar ī ō anarzānīgān dahēnd.
Chapter: xlii
Sentence: 1 pursīd dānāg ō mēnōg ī xrad
Sentence: 2 kū: mardōm čand sardag hēnd?
Sentence: 3 mēnōg ī xrad passox kard
Sentence: 4 kū: mardōm sē sardag hēnd,
Sentence: 5 ēk mardōm ud ēk nēm-mardōm ud ēk nēm-dēw.
Sentence: 6 mardōm ān bawēd kē pad dādārīh ī ohrmazd ud murnǰēnīdārīh ī ahreman ud būdan ī rist-āxēz ud tan ī pasēn ud abārīg-iz harw nēkīh ud anāgīh ī pad gētīg ud mēnōg abēgumān
Sentence: 7 kū bun az awēšān harw dō az ohrmazd ud ahreman,
Sentence: 8 u-š wurrōyišn pad ēn ēk abēzag dēn ī weh ī māzdēsnān
Sentence: 9 ud pad ēč ǰud-ristagīh nē wurrōyēd ud nē niyōšēd.
Sentence: 10 nēm-mardōm ān bawēd kē tis ī gētīg ud mēnōg pad sahišn ī xwēš kunēd, xwēš-xradīhā ud xwad-dōšagīhā,
Sentence: 11 hast kār ud kirbag ī pad kāmag ī ohrmazd ud hast ī pad kāmag ī ahreman aziš rawēd.
Sentence: 12 nēm-dēw ān bawēd kē-š bē čiyōn nām ī mardōmīh ud mardōm-zādagīh padiš *enyā pad harw kār ud kunišn ō dēw ī dō-pāy homānāg.
Sentence: 13 nē gētīg šnāsēd ud nē mēnōg,
Sentence: 14 nē kirbag šnāsēd ud nē wināh,
Sentence: 15 nē wahišt šnāsēd ud nē dušox,
Sentence: 16 ud āmār-iz ī pad ruwān nē handēšēd.
Chapter: xliii
Sentence: 1 pursīd dānāg ō mēnōg ī xrad
Sentence: 2 kū: ohrmazd ud amahraspandān ud wahišt ī hubōy ī hurām pad čē abērtar ō xwēš šāyēd kardan?
Sentence: 3 ud ahreman ī druwand ud dēwān stō kardan ud az dušox ī *dušwahāg ud tārīk rastan čiyōn šāyēd?
Sentence: 4 mēnōg ī xrad passox kard
Sentence: 5 kū: ohrmazd ī xwadāy ud amahraspandān ud wahišt ī hubōy ī hurām ō xwēš *kardan ud ahreman ī druwand ud dēwān stō kardan ud az dušox ī tārīk ī *dušwahāg rastan ēdōn šāyēd
Sentence: 6 ka mēnōg ī xrad pad puštībānīh gīrēnd
Sentence: 7 ud mēnōg ī hunsandīh zēn ud zrēh ud gurdīh homānāg pad tan paymōzēnd
Sentence: 8 ud mēnōg ī rāstīh spar kunēnd
Sentence: 9 ud mēnōg ī spāsdārīh wazr
Sentence: 10 ud mēnōg ī bowandag-menišnīh kamān
Sentence: 11 ud mēnōg ī rādīh tigr
Sentence: 12 ud mēnōg ī paymān nēzag homānāg kunēnd
Sentence: 13 ud mēnōg ī tuxšāgīh *abdast ud mēnōg ī brēh pad panāh frāz gīrēnd.
Sentence: 14 pad ēn ēwēnag ō wahišt ud wēnišn ī yazadān madan ud az ahreman ī druwand ud dušox ī *dušwahāg bōxtan šāyēd.
Chapter: xliv
Sentence: 1 pursīd dānāg ō mēnōg ī xrad
Sentence: 2 kū: asmān ud zamīg čiyōn winnārd ēstēd,
Sentence: 3 ud āb andar gēhān rēzišn ud winnārišn čiyōn,
Sentence: 4 ud abr ō kū nišīnēd,
Sentence: 5 ud zamestān dēw kū pādixšātar,
Sentence: 6 ud šahr kadām apetyāragtar?
Sentence: 7 mēnōg ī xrad passox kard
Sentence: 8 kū: asmān ud zamīg ud āb ud abārīg harw čē andarōn xāyag-dēs ēdōn homānāg čiyōn murwān xāyag,
Sentence: 9 ud asmān, azabar zamīg ud azēr zamīg xāyag homānāg, pad dastkārīh ī dādār ohrmazd winnārd ēstēd,
Sentence: 10 ud zamīg andar mayān ī asmān hangōšīdag ēdōn homānāg čiyōn zardag mayān ī xāyag.
Sentence: 11 ud hāmōyēn āb ī andar gēhān rēzišn az arzah kišwar,
Sentence: 12 ānōy kū xwarxšēd ul āyēd,
Sentence: 13 ud nixwārišn ō sawah kišwar,
Sentence: 14 *ānōy kū xwarxšēd frōd šawēd,
Sentence: 15 ud hambārišn ī āb andar zrēh ī pūtīk, ud az zrēh ī pūtīk abāz ō zrēh ī warkaš šawēd.
Sentence: 16 abr māništ ud nišast pad harborz,
Sentence: 17 ud zamestān dēw pad ērānwēz pādixšātar,
Sentence: 18 ud az dēn paydāg
Sentence: 19 kū pad ērānwēz dah māh zamestān ud dō māh hāmīn,
Sentence: 20 ud ān-iz dō māh ī tābestān sard āb, sard zamīg ud sard urwar,
Sentence: 21 u-šān petyārag zamestān,
Sentence: 22 ud mār padiš wasyār,
Sentence: 23 tā-šān abārīg petyārag kem.
Sentence: 24 paydāg kū ohrmazd ērānwēz az abārīgān gyāgān ud rōstāgān weh dād,
Sentence: 25 u-š wehīh ēn kū mardōmān zīndagīh sē-sad sāl
Sentence: 26 ud gāwān ud gōspandān sad-u-panǰāh sāl,
Sentence: 27 u-šān dard ud wēmārīh kem,
Sentence: 28 ud drō nē dranǰēnd
Sentence: 29 ud šēwan ud mōyag nē kunēnd,
Sentence: 30 ud āz dēw pad tan ī awēšān pādixšāyīh kem,
Sentence: 31 ud pad dah mard nān-ēw ka xwarēnd sagr hēnd,
Sentence: 32 ud pad harw čehel sāl az zan-ēw ud mard-ēw frazand-ēw zāyēd,
Sentence: 33 u-šān dād wehīh ud dēn pōryōtkēšīh,
Sentence: 34 ud ka mīrēnd ahlaw hēnd
Sentence: 35 u-šān rad gōbedšāh ud xwadāy ud pādixšā srōš.
Chapter: xlv
Sentence: 1 pursīd dānāg ō mēnōg ī xrad
Sentence: 2 kū: ahreman mardōmān pad čē wēš frēbēd ud ō dušox nayēd,
Sentence: 3 u-š rāmišn az čē wēš,
Sentence: 4 ud bunag kū gyāg dārēd,
Sentence: 5 u-š abāg dēwān rasišn kū wēš,
Sentence: 6 u-š xwarišn az čē?
Sentence: 7 mēnōg ī xrad passox kard
Sentence: 8 kū: ahreman mardōmān pad frēhbūd ud abēbūd ud druz ī ahlomōγīh ud gumāngarīh ud āzwarīh wēš frēbēd,
Sentence: 9 u-š rāmišn az anāštīh ī mardōmān wēš,
Sentence: 10 u-š xwarišn *abaydāgīhā az *apetītīgīh ī mardōmān,
Sentence: 11 ud bunag pad spazgān ud kēnwarān dārēd,
Sentence: 12 u-š rasišn ud rawišn abāg xešmēnān wēš.
Chapter: xlvi
Sentence: 1 pursīd dānāg ō mēnōg ī xrad
Sentence: 2 kū: ahreman pad mardōmān stahm-ēw kadām pad-zyāntar ud meh dārēd?
Sentence: 3 mēnōg ī xrad passox kard
Sentence: 4 kū: ahreman ka az mardōmān zīndagīh ud zan ud frazand ud hāmōyēn nēkīh ī gētīgīg be apparēd nē pad ēd dārēd kū-š tis-iz zyān pad ōy kas kard,
Sentence: 5 bē ka-š ān ī ēw-tāg ruwān be apparēd ud tabāh be kunēd ēg pad ēd dārēd kū-m zyān-ēw ī bowandag padiš kard, ay, čē-š ēn pad abāyist ud kunišn ud tanōmandīh ī xwēš kard.
Chapter: xlvii
Sentence: 1 pursīd dānāg ō mēnōg ī xrad
Sentence: 2 kū: čē ān tis ī az harw xwāstag pahlomtom
Sentence: 3 ud čē ān ī abar harw tis-iz pādixšā
Sentence: 4 ud čē ān ī kas aziš wirēxtan nē tuwān?
Sentence: 5 mēnōg ī xrad passox kard
Sentence: 6 kū: xrad ast ī weh az hāmōyēn xwāstag ī pad gēhān,
Sentence: 7 ud baxt ast ī abar harw kas ud harw tis pādixšā,
Sentence: 8 ud way ī wattar *ast kē kas aziš wirēxtan nē tuwān.
Chapter: xlviii
Sentence: 1 pursīd dānāg ō mēnōg ī xrad
Sentence: 2 kū: mardōmān ōš ud wīr ud tōm māništ andar tan čiyōn?
Sentence: 3 mēnōg ī xrad passox kard
Sentence: 4 kū: ōš ud wīr ud tōm ī mardōmān gāh pad mazg ī sar,
Sentence: 5 ud ka mazg ī sar drust ōš ud wīr ud tōm pad abzāyišn *bawēd,
Sentence: 6 ud ka mardōm be ō pīrīh rasēd mazg ī sar be ō kāhišn ēstēd,
Sentence: 7 ud ōy ī pīr mardōm kāhišn ī ōš ud wīr rāy ān ī pad xrad abāyēd kardan kem wēnēd ud kem dānēd
Sentence: 8 ud xrad pad fradomīh ō mazg ī angust ī dast ī mardōmān gumēzēd,
Sentence: 9 u-š pas nišēm ud ēstišn ud gāh pad dil,
Sentence: 10 u-š māništ andar hamāg tan ēdōn bawēd čiyōn pāy kālbod andar mōzag.
Chapter: xlix
Sentence: 1 pursīd dānāg ō mēnōg ī xrad
Sentence: 2 kū: ēn stārag ī pad asmān paydāg, u-šān marag ēdōn was, ēg-išān kār ud rāyēnišn čē?
Sentence: 3 ud rawišn ī xwarxšēd ud māh ud stāragān čiyōn?
Sentence: 4 mēnōg ī xrad passox kard
Sentence: 5 kū: az stāragān ī pad asmān fradom stārag ī tištar, ī meh ud weh ud arzōmandtar ud xwarrahōmandtar guft ēstēd,
Sentence: 6 ud hāmōyēn *bahrōmandīh ud padēxīh ī gēhān pad rāh ī tištar.
Sentence: 7 ud stārag ī āb-čihrag pad abzāyišn ī āb
Sentence: 8 ud stārag ī zamīg-čihrag pad abzāyišn ī zamīg,
Sentence: 9 ud stārag ī urwar-čihrag pad abzāyišn ī urwar,
Sentence: 10 ud stārag ī gōspand-čihrag pad abzāyišn ī gōspand,
Sentence: 11 ud āb ud zamīg ud urwar ud gōspand čihrag pad abzāyišn ī mardōm čihrag dād ēstēd.
Sentence: 12 ud stārag ī wanand pad widaragīhā ud darīhā ī harborz gumārd ēstēd
Sentence: 13 kū dēwān ud parīgān ud druzān az ān dar ud widarag wardēnēd,
Sentence: 14 kū-šān rāh ud widarag ī xwarxšēd ud māh ud stāragān brīdan ud škastan nē tuwān.
Sentence: 15 ud stārag ī haftōring abāg nō ud nawad ud nō-sad ud nō-hāzār ud nō-bēwar frawahr ī ahlawān pad dar ud widarag ī dušox gumārd ēstēd
Sentence: 16 pad abāz dāštan ī ān nō ud nawad ud nō-sad ud nō-hazār ud nō-bēwar dēwān ud druzān ud parīgān ud ǰādūgān ī pad hamēstārīh ī spihr ud axtarān hēnd,
Sentence: 17 u-š rawišn pērāmōn ī dušox,
Sentence: 18 mādagwar kār ēn, čiyōn dwāzdah kadag ī axtarān pad dast dārēd pad drust šudan ud āmadan,
Sentence: 19 ud awēšān-iz dwāzdah axtarān hamgōnag pad nērōg ud ayārīh ī haftōring rawēnd,
Sentence: 20 ud harw axtar-ēw ka pad harborz andar āyēd pušt ō haftōring kunēd
Sentence: 21 ud panāh az haftōring xwāhēd.
Sentence: 22 abārīg amar ud anōšmār axtarān ī paydāg hēnd frawahr ī gētīgān guft ēstēd,
Sentence: 23 čē hāmōyēn dām ud dahišn ī dādār ohrmazd ō gētīg dād, kē zāyišnīg ud kē-z arōyišnīg hēnd, harw tan-ēw rāy hamgōhr frawahr-ēw ī xwēš paydāg.
Sentence: 24 ud rawišn ī xwarxšēd ud māh mādagwar rōzēnīdārīh ī gēhān
Sentence: 25 ud pazzāmēnīdan ī harwispīn zāyišnān ud rōyišnān
Sentence: 26 ud drust dāštan ī rōz ud māh ud sāl ud hāmīn ud zamestān ud wahār ud pādēz ud abārīg harwispīn mar ud hangārag ī mardōmān šāyēnd ayāftan ud dīdan ud dānistan.
Sentence: 27 wihēzag ī xwarxšēd ud māh rāy abērtar paydāg.
Chapter: l
Sentence: 1 pursīd dānāg ō mēnōg ī xrad
Sentence: 2 kū: kadām ān tuwāngar ī pad farrox ud kadām ān ī pad dušfarrag dārišn?
Sentence: 3 mēnōg ī xrad passox kard
Sentence: 4 kū: ān kē tuwāngarīh az frārōn-tuxšāgīh kard ēstēd pad farrox ud ān kē az abārōnīh kard ēstēd pad dušfarrag dārišn.
Chapter: li
Sentence: 1 pursīd dānāg ō mēnōg ī xrad
Sentence: 2 kū: čē rāy ka aǰgahān ud dušāgāh ud wad mard ast ī ka ō burzišn ud nēkīh ī wuzurg rasēd
Sentence: 3 ud ōy ī šāyendag ud dānāg ud weh mard ast ī ka ō garān anāgīh ud škaftīh ud niyāzōmandīh rasēd?
Sentence: 4 mēnōg ī xrad passox kard
Sentence: 5 kū: ōy ī aǰgahān ud dušāgāh ud wad mard, ka-š brēh ayār bawēd, ēg-iš ān aǰgahānīh ō tuxšāgīh ud ān dušāgāhīh ō dānāgīh ud ān wattarīh ō wehīh homānāg bawēd,
Sentence: 6 ud ōy ī dānāg ud šāyendag ud weh mard, ka-š brēh hamēmāl, ēg-iš ān dānāgīh ō adānīh ud halagīh ud ān šāyendagīh ō dušāgāhīh wardēd,
Sentence: 7 ud dānišn ud hunar ud šāyendagīh armēšt paydāg bawēd.
Chapter: lii
Sentence: 1 pursīd dānāg ō mēnōg ī xrad
Sentence: 2 kū: ēzišn ī yazadān ud spāsdārīh ī pad nēkīh ī az yazadān čiyōn abāyēd kardan
Sentence: 3 ud petītīgīh ī pad ruwān-bōxtārīh čiyōn kunišn?
Sentence: 4 mēnōg ī xrad passox kard
Sentence: 5 kū: ēzišn ī yazadān ān weh ī pad ēn abēzag weh dēn ī māzdēsnān kunēnd,
Sentence: 6 u-š bun wehīh ud rāstīh ud abēgumānīh ī pad yazadān
Sentence: 7 ud pad andak ud was ī mad ēstēd andar yazadān spāsdār būdan ud pad šnōmagān ud āzādīh ī az yazadān menīdan ud spās dāštan.
Sentence: 8 ud ka-z az ahreman ud dēwān škaftīh ud anāgīh abar rasēd pad xīr ī yazadān warōmand nē būdan,
Sentence: 9 ud spāsdārīh ī andar yazadān nē kāhēnīdan,
Sentence: 10 ud harw wizend ī ǰahēd abāz ō stahmagīh ī ahreman ud dēwān dādan,
Sentence: 11 ud nēkīh ud sūd ī xwēš pad zyān ī any kas nē xwāstan,
Sentence: 12 ud pad dāmān ī ohrmazd abaxšāyišnīg būdan
Sentence: 13 ud pad kār ud kirbag tuxšāg ud kōxšišnīg *būdan,
Sentence: 14 nāmčišt pad pahrēz ī āb ud ātaxš ud urwar wēš tuxšīdan,
Sentence: 15 ud pad ēn abēgumān būdan kū yazadān ō mardōmān bē nēkīh enyā tis-iz ǰuttarīh nē dahēnd ud ahreman ud dēwān bē anāgīh enyā ēč nēkīh nē dahēnd.
Sentence: 16 petītīg būdan rāy mādagwar tis ēn kū wināh nē kunēd xwēš-kāmīhā
Sentence: 17 ud agar adānīh ayāb wastārīh *ayāb dušāgāhīh rāy wināh-ēw ǰahēd, ēg pēš ī dastwarān ud wehān pad petīt bawēd,
Sentence: 18 ud pas az ān nē kunēd, ēg ān wināh ī-š kard ēstēd az tan ī ōy ēdōn *appār bawēd
Sentence: 19 čiyōn wād, ān ī staft-tag, ka tēz ud saxt āyēd dašt ēdōn frāz mālēd kū harw giyāhīzag-ēw ud tis-ēw ī ān gyāg kaft ēstēd be barēd.
Chapter: liii
Sentence: 1 pursīd dānāg ō mēnōg ī xrad
Sentence: 2 kū: namāz ud stāyišn ī yazadān čiyōn kunišn?
Sentence: 3 mēnōg ī xrad passox kard
Sentence: 4 kū: harw rōz sē bār padīrag xwarxšēd ud mihr, čiyōn pad āgenēn rawēnd, ēstād
Sentence: 5 ud hamgōnag padīrag māh ud ātaxš ī wahrām ayāb ātaxš ī ādarōg bāmdād ud nēm-rōz ud ēbārag namāz ud stāyišn kardan
Sentence: 6 ud spāsdār būdan,
Sentence: 7 ud agar - pargast - andar yazadān ī mēnōgān ud gētīgān ud mardōmān ud stōrān ud gāwān ud gōspandān ud sagān ud sag-sardagān ud abārīg dām ud dahišn ī ohrmazd ī xwadāy wināh-ēw ayāb frōd-mānd-ēw ǰast,
Sentence: 8 pēš ī xwarxšēd ud mihr ud māh ud ātaxš ī ohrmazd abaxš ud pašēmān ud pad petīt būdan
Sentence: 9 ud wināh wizārišn rāy čand weh šāyēd kirbag warzīdan.
Chapter: liv
Sentence: 1 pursīd dānāg ō mēnōg ī xrad
Sentence: 2 kū: čē rāy ka dušāgāh mard, ka-š āfrāh awiš barēnd, frahang ud āfrāh ī dānāgān ud wehān ēdōn pad abandīh dārēd kū awiš hammōxtan dušwār?
Sentence: 3 mēnōg ī xrad passox kard
Sentence: 4 ēd rāy čē dušāgāh mard dušāgāhīh ī xwēš pad menišn ēdōn weh dārēd čiyōn dānāg dānāgīh ī xwēš pad menišn.
Chapter: lv
Sentence: 1 pursīd dānāg ō mēnōg ī xrad
Sentence: 2 kū: čē rāy ōy ī wad-gōhr mard wehān nē dōst, ud anabzār mard abzārōmandān?
Sentence: 3 mēnōg ī xrad passox kard
Sentence: 4 kū: ēd rāy čē ōy ī wad-abzār mard *harw gāh az abzārōmandān bīm
Sentence: 5 kū-mān pad hunar ud abzār ēranǰēnd ud az ān bahrag rāy pēš wehān ud *hamahlān šarmgenīh abar rasēd.
Sentence: 6 ud wad-gōhr mard ēd rāy wehān nē dōst bawēnd čē-šān zamān ī pad abesīhēnišn ud zanišn az dast ī wehān bawēd.
Chapter: lvi
Sentence: 1 pursīd dānāg ō mēnōg ī xrad
Sentence: 2 kū: ēn kōfīhā ud drayāīhā ī pad gēhān čē rāy kard ēstēd?
Sentence: 3 mēnōg ī xrad passox kard
Sentence: 4 ēn kōfīhā ī pad gēhān hast ī wād-hangēxtār ud hast ī abāz-dāštār
Sentence: 5 ud hast ī gyāg ud rāyēnāg ud nišēm ud awestām ī abr ī wārendag
Sentence: 6 ud hast ī zadār ī ahreman ud dēwān ud dāštār ud zīwēnīdār ī dām ud dahišn ī ohrmazd ī xwadāy.
Sentence: 7 ud ēn drayā ī pad gēhān pānagīh-kardārīh ud zīwēnīdārīh ī dām ud dahišn ī xwēš rāy dādār ohrmazd az kanār ī harborz kard ēstēd.
Chapter: lvii
Sentence: 1 pursīd dānāg ō mēnōg ī xrad
Sentence: 2 kū: čē rāy ka mēnōgān ud gētīgān dānišn ud kār-āgāhīh harw dō band ō tō paywast?
Sentence: 3 mēnōg ī xrad passox kard
Sentence: 4 kū: ēd rāy čē az fradom man, kē āsn xrad ham (az mēnōgān ud gētīgān), abāg ohrmazd būd ham.
Sentence: 5 ud dādār ohrmazd mēnōg ud gētīg dahišnān, yazadān ud abārīg hamāg dām ud dahišn, pad nērōg ud tagīgīh ud dānāgīh ud kār-āgāhīh ī āsn xrad āfrīd ud dād ud dārēd ud rāyēnēd
Sentence: 6 ud pad frašegird sar abesīhēnišn ud zanišn ī ahreman u-š wišūdagān pad xrad nērōg abērtar šāyēd kardan,
Sentence: 7 ud sōšāns abāg kay husraw ud awēšān kē rist-āxēz ud tan ī pasēn kunēnd nērōg ud ayārīh ī xrad rāy abērtar kardan šāyēd.
Sentence: 8 ud dānišn ud kār-āgāhīh ī gētīg ud frahang ud hammōzišn ī pad harw pēšag ud hamāg rāyēnīdārīh ī āwāmīgān pad xrad bawēd
Sentence: 9 ud ruwān ī ahlawān pad bōxtan ī az dušox ud madan ī ō wahišt ud garōdmān nērōg ud pānagīh ī xrad rāy abērtar rasēnd,
Sentence: 10 ud mardōmān pad gētīg weh zīwišnīh ud rāmišn ud husrawīh ud harw nēkīh pad nērōg ī xrad šāyēd xwāstan.
Sentence: 11 ud tōm ī mardōmān ud stōrān ud gāwān ud gōspandān ud abārīg-iz harw dām ud dahišn ī ohrmazd ī xwadāy dāštan ud nišāstan ī andar aškom ī *mād ud *tā az gursagīh ud tišnagīh be nē mīrēnd, paydāg kardan ī-šān xwarišn andar aškom, ud baxšišn ud pazzāmišn ī hannāmān ī *dur-hangirrīh ud āb-hanǰīh pad zōr ī xrad rāy abērtar kirīhēnd.
Sentence: 12 ud winnārišn ī zamīg ud gumēzišn ī āb andar zamīg ud rōyišn ud waxšišn ī urwarān ud rang ī gōnag gōnag ud bōy ud mizag ud xwašīh ī tis tis pad xrad abērtar baxt ud kard ēstēd,
Sentence: 13 ud winnārišn ī harborz pērāmōn gēhān, ud paydāgēnīdan ī haft kišwar zamīg, ud asmān azabar kōf ī harborz, ud rawišn ī xwarxšēd ud māh ud dwāzdah axtarān, ud šaš gāh ī gāhānbār ud panǰ gāh ī frawardīgān, ud wahišt ī pad humat gāh ud hūxt gāh ud huwaršt gāh ud hamāg xwāhrīh ī garōdmān ī pahlom, ud widarag ī mēnōgān ud gētīgān, puhl ī *činwad, pad nērōg ī xrad kard ud baxt ēstēd.
Sentence: 14 ud abr ī āb-gōnag āb az zrēh stadan ud pad andarwāy rāyēnīdan ud paymānīgīhā srešk srešk ō zamīg wēxtan, ud be dānistan ī dām ī ohrmazd čiyōnīh ī wahišt ud dušox ud xwābarīh ī ohrmazd ud amahraspandān ud abārīg yazadān abar dāmān ī xwēš, ud zadārīh ud murnǰēnīdārīh ī ahreman ud dēwān abar dāmān ī ohrmazd, pad nērōg ī xrad abērtar šāyēd dānistan.
Sentence: 15 ud dēn ī weh ī māzdēsnān ud gōwišn ud čāšišn ī mēnōgān ud škastan ī dēwān kālbod ī gētīgīg ud abaydāg kardan ī az wēnišn ī mardōmān pahlomtom abzār ī xrad rāy abērtar kirīhēd.
Sentence: 16 ud kōxšišn-iz ud kārezār ī ērān abāg anērān ud zanišn ī ahreman ud dēwān pad nērōg ī xrad šāyēd kardan.
Sentence: 17 āb-iz ī nihānīg azēr zamīg xwarxšēd-nigerišn kardan ud ō warz ud ābādānīh ud sūd ud āsānīh ud rāmišn ī mardōmān ud stōrān ud gāwān ud gōspandān pad nērōg ī xrad šāyēd burdan.
Sentence: 18 ud dard ud wēmārīh ī mardōmān ud stōrān ud gāwān ud gōspandān ud abārīg gyānwarān be šnāxtan ud dārūg ud darmān ud tan-drustīh ud āsānīh awiš burdan nērōg ī xrad rāy abērtar šāyēnd kardan.
Sentence: 19 ud harw mardōm kē az xrad bahrwarīh wēš ēg-iš wahišt bahr abērtar
Sentence: 20 ud wištāsp-iz ud zarduxšt ud gayōmart ud abārīg awēšān kē az wahišt bahr abērtar, wēš awiš-madārīh ī xrad rāy,
Sentence: 21 ud ǰam ud frēdōn ud kāwōs ud abārīg awēšān xwadāyān kē az yazadān warz ud tagīgīh windād, čiyōn wištāsp ud abārīg xwadāyān az dēn bahrwarīh būd ud nē madan ī awēšān ō dēn ud pad-iz ān ī ka andar xwēš xwadāy anespās būd hēnd kem awiš-madārīh ī xrad rāy.
Sentence: 22 ud ahreman-iz ud dēwān ōy mard wēš frēbēnd ud ō dušox nayēnd kē az xrad driyōštar ud pad xēm sabuktar,
Sentence: 23 ud paydāg kū ōy kē pad xēm ud xōg ud warišn nēk ēg-iš spās az xrad dārišn,
Sentence: 24 čē paydāg kū ahreman ō zarduxšt drāyīd kū: agar az ēn dēn ī weh ī māzdēsnān abāz ēstē ēg-it hazār sāl xwadāyīh ī gētīg daham,
Sentence: 25 čiyōn ō wadaγān dahibed dahāg dād.
Sentence: 26 zarduxšt purr-xradīh rāy xēm ud warišn ī frārōn pad ān wiyābānīh ī gizistag gannāg *mēnōg ī druwand frēftag ud wiyābān nē būd
Sentence: 27 u-š ō ahreman guft
Sentence: 28 kū: škennam ud gugānam kālbod ī ašmā dēwān ud druzān ud ǰādūgān ud parīgān pad hōm ud barsom ud dēn ī rāst ī weh kē dādār ohrmazd ō man čāšt.
Sentence: 29 ahreman ka-š ān saxwan ašnūd stard ud stō būd ud ō dušox dwārist ud dagrand zamān stard ēstād.
Sentence: 30 ēn-iz paydāg kū ohrmazd ka ahreman abāg-iš hāmōyēn dām ud dahišn pad paymān frāz kard būd, pas abāg hāmōyēn yazadān ud amahraspandān hanǰaman kard u-š az ān ī xwēš xrad āzādīh guft ud hangārd.
Sentence: 31 ud ēn-iz paydāg kū nō-hazār sāl ī frašegird tā rist-āxēz ud tan ī pasēn hāmōyēn dām ud dahišn xrad dārēd ud rāyēnēd.
Sentence: 32 ud ēn-iz paydāg kū ōy ī dušāgāh ud wad-xēm mard, ka was-iz ō burzišn ud tuwāngarīh ud pādixšāyīh rasēd, pas-iz pad ān nēkīh ud pādixšāyīh burzīdan nē abāyed.
Chapter: lviii
Sentence: 1 pursīd dānāg ō mēnōg ī xrad
Sentence: 2 kū: čē rāy ka pādixšā ī dušāgāh pādixšāyīh rāy ī-š hast dušāgāhīh ud halagīh abāz ō dānāgīh ud hunarāwandīh wardēd
Sentence: 3 ud driyōš ī dānāg driyōšīh rāy dānāgīh ud kār-āgāhīh ī-š hast abāz ō halagīh ud abēsūdīh wardēd?
Sentence: 4 mēnōg ī xrad passox kard
Sentence: 5 kū: frēbišn ud stahmagīh ī āz druz rāy
Sentence: 6 mardōmān harw kē-š xwāstag ud tuwāngarīh wēš pad mardōmīh ī ōy saxwan wēš gōwēnd ud kunišn ud kardārīh abērtar hangārēnd,
Sentence: 7 bē pad čašm ī yazadān ud amahraspandān driyōš ī awināh ud dānāg weh ud grāmīgtar kū pādixšā ud tuwāngar ī dušāgāh.
Chapter: lix
Sentence: 1 pursīd dānāg ō mēnōg ī xrad
Sentence: 2 kū: čē āhōg ī āsrōnān,
Sentence: 3 ud čē āhōg ī artēštārān,
Sentence: 4 ud čē āhōg ī wāstaryōšān,
Sentence: 5 ud čē āhōg ī hutuxšān?
Sentence: 6 mēnōg ī xrad passox kard
Sentence: 7 kū: āhōg ī āsrōnān ahlomōγīh ud āzwarīh ud framōšīdārīh ud sūdagīh ud xwurdag-nigerišnīh ud dušwurrōyišnīh ī pad dēn.
Sentence: 8 ud āhōg ī artēštārān stahmagīh ud zadārīh ud mihrōdruǰīh ud *anabaxšāwandīh ud *ǰeh-gāyīh ud abar-tanīh ud tar-menišnīh.
Sentence: 9 ud āhōg ī wāstaryōšān dušāgāhīh ud čašm-areškīh ud wad-xwāhīh ud kēnwarīh.
Sentence: 10 ud āhōg ī hutuxšān dušwurrōyišnīh ud anespāsīh ud abārōn-dranǰišnīh ud tandīh ud dušēwāzīh.
Chapter: lx
Sentence: 1 pursīd dānāg ō mēnōg ī xrad
Sentence: 2 kū: mardōm pad wehīh ud wattarīh kadām āšnāgtar?
Sentence: 3 mēnōg ī xrad passox kard
Sentence: 4 kū: mardōm kē-š nišast ud kār abāg wattarān u-š nām pad husrawīh ud wehīh barēnd, mard pad wehīh ān āšnāgtar,
Sentence: 5 ud ān kē-š nišast ud kār abāg wehān u-š nām pad dusrawīh ud *wattarīh barēnd, mard pad wattarīh ān āšnāgtar,
Sentence: 6 čē guft ēstēd
Sentence: 7 kū: kē abāg wehān paywandēd wehīh
Sentence: 8 ud kē abāg wattarān paywandēd wattarīh abāg be āwarēd,
Sentence: 9 ēdōn čiyōn wād ī ka ō gandagīh pahikafēd gandagīh
Sentence: 10 ud ka ō hubōyīh pahikafēd hubōyīh *abāg be *āwarēd.
Sentence: 11 pas dān
Sentence: 12 kū ān kē kār abāg wehān wehīh padīrēd
Sentence: 13 ud kē kār abāg wattarān wattarīh
Sentence: 14 bē pas-iz harw dō pad uzmāyišn dārišn.
Chapter: lxi
Sentence: 1 pursīd dānāg ō mēnōg ī xrad
Sentence: 2 kū: rad ī mardān kē, rad ī zanān kē,
Sentence: 3 rad ī aspān kē, rad ī wāyendagān kē,
Sentence: 4 *rad ī *gāwān *kē, rad ī dadān kē, rad ī ǰōrdāyān kē?
Sentence: 5 mēnōg ī xrad passox kard
Sentence: 6 mard ī dānāg ī dēn-āstawān ī huspās ī rāst-gōwišn abar hamahlān rad.
Sentence: 7 zan ī ǰuwān ī drust-gōhr ī awestwār ī husraw ī huxēm ī kadag-abrōz, kē šarm ud bīm nēk, ud xwēš pid ud niyāg ud šōy ud sālār dōst, ud hučihr ud wimēhgen abar zan ī xwēš hamahlān rad.
Sentence: 8 gāw ī xwarrahōmand ī borz-dōš ī ramagōmand abar gāwān rad,
Sentence: 9 čihrāb murwān rad,
Sentence: 10 asp ī arwand aspān rad,
Sentence: 11 xargōš dadān rad. gandum ǰōrdāyān rad.
Chapter: lxii
Sentence: 1 pursīd dānāg ō mēnōg ī xrad
Sentence: 2 kū: kangdiz kū gyāg ēstēd?
Sentence: 3 war ī ǰamkard kū kard ēstēd?
Sentence: 4 tan ī sām kū gyāg *sayēd?
Sentence: 5 mānišn ī srōš kū?
Sentence: 6 xar ī sē-pāy kū gyāg ēstēd?
Sentence: 7 hōm ī rist-ārāstār, kē rist padiš wirāyēnd ud tan ī pasēn padiš kunēnd, kū rust ēstēd?
Sentence: 8 gōbedšāh pad kadām gyāg?
Sentence: 9 kar māhīg pad čē kār gumārd ēstēd?
Sentence: 10 sēn murw āšyān kū dārēd?
Sentence: 11 čamrōš kū gyāg nišīnēd u-š kār čē?
Sentence: 12 mēnōg ī xrad passox kard
Sentence: 13 kū: kangdiz pad ōšastar rōn nazdīk ō *stāyēs gumārd ēstēd
Sentence: 14 pad wimand ī ērānwēz.
Sentence: 15 ud war ī ǰamkard pad ērānwēz azēr zamīg kard ēstēd
Sentence: 16 ud harw ēwēnag tōm ī hamāg dām ud dahišn ī ohrmazd ī xwadāy az mardōm ud stōr ud gōspand ud wāyendag, harw čē wehtar ud pad-wizēntar, ō ānōy burd ēstēd,
Sentence: 17 ud harw čehel sāl az zan-ēw ud mard-ēw ī ān gyāg hēnd frazand-ēw zāyēd,
Sentence: 18 u-šān zīndagīh sē-sad sāl
Sentence: 19 u-šān dard ud petyārag kem.
Sentence: 20 ud tan ī sām pad dašt ī *pēšānsē, nazdīk ō kōf ī damāwand,
Sentence: 21 ud pad ān dašt bē ǰōrdā ud xwarišnīg, tis ī kārēnd ud *drūnēnd ud padiš zīwēnd, tā any giyā ud draxt ud urwar nēst,
Sentence: 22 u-š zargōnīh frahist dramanag,
Sentence: 23 ud yazadān ud amahraspandān tan ī sām rāy nō ud nawad ud nō-sad ud nō-hazār ud nō-bēwar frawahr ī ahlawān pad pānagīh gumārd ēstēd
Sentence: 24 kū-š dēwān ud druzān nē wināhēnd.
Sentence: 25 māništ ī srōš frahist pad arzah ud pas pad-iz sawah ud hamāg gēhān.
Sentence: 26 xar ī sē-pāy mayān ī zrēh ī warkaš nišīnēd
Sentence: 27 ud hāmōyēn āb ī ō nasā ud daštān ud abārīg hixr ud *rēmanīh wārēd ka ō xar ī sē-pāy rasēd hāmōyēn pad wēnišn pāk ud yōǰdahr kunēd.
Sentence: 28 ud hōm ī rist-wirāstār pad zrēh ī warkaš andar ān ī zofāytom gyāg rust ēstēd
Sentence: 29 u-š nō ud nawad ud nō-sad ud nō-hazār ud nō-bēwar frawahr ī ahlawān *pad pānagīh gumārd ēstēd,
Sentence: 30 u-š kar māhīg pērāmōn hamēw wardēd u-š wak ud abārīg xrafstar aziš abāz hamēw dārēd.
Sentence: 31 gōbedšāh pad ērānwēz andar kišwar ī Xwaniras *ēstēd
Sentence: 32 ud az pāy tā nēm-tan gāw ud az nēm-tan azabar mardōm
Sentence: 33 ud hamwār pad drayā-bār nišīnēd
Sentence: 34 ud ēzišn ī yazadān hamēw kunēd ud zōhr ō zrēh *hamēw rēzēd
Sentence: 35 kē rāy pad ān zōhr-rēzišnīh amar xrafstar andar zrēh be mīrēnd,
Sentence: 36 čē agar --- pargast --- ōy ān ēzišngarīh nē kunēd ud ān zōhr ō ān zrēh nē rēzēd, kū ān amar xrafstar be abesīhēd, ēg hamēw ka wārān wārīd xrafstar ēdōn wārīd čiyōn wārān.
Sentence: 37 sēn murw āšyān pad wan ī ǰud-bēš ī was-tōhmag,
Sentence: 38 ud hamēw ka abar āxēzēd hazār tāg az ān draxt be rust
Sentence: 39 ud ka nišīnēd hazār tāg be škennēd u-š tōm aziš ōsānēd.
Sentence: 40 ud čamrōš murw ham pad ān nazdīkīh nišīnēd,
Sentence: 41 u-š kār ēn kū ān tōm ī az wan ī was-tōhmag ī ǰud-bēš ōsānēd ōy čīnēd ud ānōy kū tištar āb stānēd parganēd
Sentence: 42 kū tā tištar āb abāg ān harwispān tōm stānād ud abāg ān wārān pad gēhān wārād.
Chapter: lxiii
Sentence: 1 pursīd dānāg ō mēnōg ī xrad
Sentence: 2 kū: kadām ān kirbag ī az kirbagān meh ud weh u-š tis-iz uzēnag pad-kār nē abāyēd?
Sentence: 3 mēnōg ī xrad passox kard
Sentence: 4 kū: andar yazadān spāsdār būdan ud harw kas rāy nēkīh abāyistan.
Sentence: 8 ēn az harw kirbag meh ud weh u-š ēč uzēnag pad-kār nē abāyēd.
Copyright TITUS Project,
Frankfurt a/M, 9.1.2021.
No parts of this document may be republished in any form
without prior permission by the copyright holder.